نصيحة للبلدية بعدم تحويل الساحة قرب المسجد البحري إلى ساحة للترفيه

[علي القلموني]

إخواني الأعزاء من فترة غير قليلة سمعنا كلام عن قيام البلدية بالمساعي الحثيثة للقيام بمشروع قرب المسجد البحري وهو كما يقول الأخ وسيم الفلو بساحة للترفيه وغيره .

الجميع من الأخوة في القلمون يعلم ما يعانيه المسجد الغربي لقاء قربه من الشارع ذلك الشارع الذي يؤرق البلدة ويضم شباب وشابات الله يسترنا وأعتقد معظم الأخوة والأخوات في المنتدى لديه الفتور الكبير من هذا الشارع التي أصبحت البلدة بفضله كأنها بلدة غير مسلمة شباب وشابات مع بعضهم كلام بذيء فقر في ثياب البنات وغير ذلك مما صراحة يدمي قلوب كل شاب أو فتاة عندها ولو في نفسها القليل من الغيرة على الإسلام . يعني صراحة صارت الأسرة الملتزمة لديها هاجس كبير خوفا على أولادها ...

من هنا كان لا بد لي من أن أنوه الأخوة في البلدية وعلى رأسهم رئيس البلدية الحاج طلال دنكر وجميع الأعضاء ممن عنده غيرة على الإسلام وعلى الإلتزام أن لا يطبق ذلك المشروع قرب المسجد البحري لأن منا ناقصين ... وإعادة النظر به وعدم زج البلدة بشارع جديد يكون منتزها للعشاق . يعني عندنا شارع العشاق ما بدنا يا أخ طلال يصير عندنا منتزه العشاق .

[wassim.h]

انا بوافءك أخي علي....معك حق,,,,,مافي احترام لحرمة الجامع الغربي بالمرّة ...وهيدا لوجود شارع الكزدوره(او العشّاق) ....و ما المفروض البلديه تعمل واحد شبيه لو قرب الجامع البحري احتراماً لحرمتو...يعني اذا ماكان في محل تاني للمشروع ,و خلص صار بدّون يعملو جنب الجامع,,لازم يكون المنتزه مضبوط.....وهيدا شي صعب شوي بالألمون...يعني اذا ماكانو من ادّ المشروع ما يعملو .....بس ان شاء الله اذا النيّة طيبة بعون الله بيءدرو يضبطو حتى لو كان بألب الجامع.....والله يأدّم الي فيه الخير....

[وسيم أحمد الفلو]

أعتقد أن المشروع هو في الساحة قرب البور وليس في الساحة الملاصقة للمسجد

[علي القلموني]

أنا بعرف الأرض وين هي صحيح بعيدة عن المسجد ولكن كما قلت هي قرب البور من ناح مركز الجماعة البحري يعني إديش بعيدة عن المسجد 50 متر منا شي يا أخ وسيم هيدا ما إسموا بعد ، وخصوصا أنا سمعت أنو تيار المستقبل هو داعم المشروع وحدث ولا حرج عن أفعال هذا التيار .

[wassim.h]

وحرمة المسجد تقدّر ب400 متر.....

[Nader 3:16]

و انا اضم صوتي الى صوتكم...
لكن حبذا لو يعطينا الاخ وسيم فكرة واضحة و موسعة عما سيحدث.:)

[kata2eb]

**** أضم صوتي إليكم .....
أرجوا من البلدية أن توضح

لكن إذا كان المشروع مضمون من حيث عدم تأثيره على المسجد
فأنا أقوم بنفسي به لعله يبعد الأذى ولو قليلا عن مسجدنا الغربي

[وسيم أحمد الفلو]

سلام

هلأ مرح يصور شي لإنو ناطرين مرسوم من الدولة

أنا أعتقد أن الإعتراض على المشروع غير مبرر لإنو وجود حديقة وملعب لن يؤثر على حرمة المسجد.

[الزاهر]

أنا من رأي الأرايب وسيم!!!.............لشو كل هالخوف!!!...........ما بيصير شي...........إن شاء الله

[wassim.h]

يا سيدنا هالإيام الملاعب والحدائق هنّه مءوى العشّاق....الّا اذا منعتون

[amer]

وخصوصا أنا سمعت أنو تيار المستقبل هو داعم المشروع وحدث ولا حرج عن أفعال هذا التيار .

اخونا عبد الغني طوط وضّح لنا (من زمان) ما علاقة تيار المستقبل بالمشروع .
قال بأن تيار المستقبل لم يقترح اي مشروع ولكن تيار المستقبل ينتظر البلدية لتسمي المشروع الذي تريد ان تقيمه , وبعدها يدعم تيار المستقبل المشروع .

ارجو ان لا تحرّفوا الحقيقة , فهذه ليست من صفات المسلم .

[علي القلموني]

هلا بالأخوة جميعا
أول الشي يا أخamer نحنا ما حكينا شي على تيار المستقبل نحنا منعرف انو التيار هو بدو يدعم المشروع ماليا، لذلك نحنا ما عمنفتري على أحد .
نحنا بس حابين كنا ننوه انو المسجد البحري ما يصير فيه مثل المسجد الغربي غيرة على الدين بس ما أكثر من هيك .

[وسيم أحمد الفلو]

أخي الكريم علي

هل هناك شيء في هذا المشروع غير إقامة الحديقة والملاعب؟

وما هو الضير في وجود حديقة وملاعب قرب المسجد؟

[الزاهر]

يا سيدنا هالإيام الملاعب والحدائق هنّه مءوى العشّاق....الّا اذا منعتون

إذا منشان كم شب وبنت بدي احرم أهل ضيعة كاملة من خدمة هي حقهم شبكون عملت!!!!

[wassim.h]

إذا منشان كم شب وبنت بدي احرم أهل ضيعة كاملة من خدمة هي حقهم شبكون عملت!!!!


ما المهم العدد !!!!...وانا عم وصّل فكرة الإهتمام بالإنضباط....

[الزاهر]

ما المهم العدد !!!!...وانا عم وصّل فكرة الإهتمام بالإنضباط....



البلدية ما عندها شرطة كفو!!!...........وهادي مشكلة....(بالمشبرح ما رح يكون في انضباط)......لكن الي بيسمعهم هالأد متخوفين بيؤول عايشين بنيويورك وهالشباب والصبابيا ما عندهم محل يـعشقو إلا بالحديقة!!!............يا عمي الضيعة كلها زواقيق..........روحو شوفو الشباب اللي عم تعشق بالمخبي!!!.......هادول مصيبة..........الله اعلم شبيعملو...........أما بالحديقة ادام كل العالم مش بخطر هاديك!!!

وبرجع بؤول ما بحرم ضيعة من خير من أجل 2 زعران فيها!!!

[علي القلموني]

كلامك البلدية ما عندها شرطة كفو!!!...........وهادي مشكلة....(بالمشبرح ما رح يكون في انضباط)......لكن الي بيسمعهم هالأد متخوفين بيؤول عايشين بنيويورك وهالشباب والصبابيا ما عندهم محل يـعشقو إلا بالحديقة!!!............يا عمي الضيعة كلها زواقيق..........روحو شوفو الشباب اللي عم تعشق بالمخبي!!!.......هادول مصيبة..........الله اعلم شبيعملو...........أما بالحديقة ادام كل العالم مش بخطر هاديك!!!

وبرجع بؤول ما بحرم ضيعة من خير من أجل 2 زعران فيها!!!

كلامك منطقي مئة في المئة أكيد نحن لا نريد حرمان الضيعة من أي مشروع ولكن في نفس الوقت نحن ننوه الأخوة في البلدية اذا ماكن عندهم حل لموضوع الضبط هيدي مشكلة، يعني شوف بالشارع الشرطي عم يكزدر مع العلم وبمر واحد عم يشفط بالسيارة أو حاطط أغاني على العالي هيدا الشرطي مش مستعد يحكيه كلمة واحد مع أنو هيدي شغلتوا يعني بدنا شوية غيرة .

نحنا للأسف ما عندنا شرطة بهالبلدية يعني الشرطي موظف وبس وبعتقد لو بيقدر الحاج طلال كان غيرهم بس هم موظفي دولة ما في يغيرهم هنا إلا الأخ زينون الأبيض عنده إخلاص ولكن يد واحد ما بتسفق .

[الزاهر]

فإذا أنا وانت متفقون على قضية نقص عناصر الشرطة.............وأنت أضفت نقطة مهمة جدا "مشكور" وهي عدم قيام العناصر الموجودة بدورها...........أو يمكن الأصح "عدم مقدرتها على القيام بكامل دورها"............وهذه قضية تانية...............واسمحولي استطرد شوية:

بداية شرطي البلدية عنا الحمد لله منو مسمحلو يحمل سلاح!!!............آه وشو بيعمل بالليل وئت بيصادف لص مثلا ............واللص مسلح..........شي أكيد يعني.........وهو أعزل!!!............ما شاء الله!!!

أمر آخر إنو قلة عدد العناصر تؤدي إلى قلة هيبة بين الناس ................لسبب أول إنو لم تعتد الناس أن يكون عليها رقيب من البدلية بشكل دائم............وللسبب الثاني أنو العنصر ما رح يكون من موقف قوي عندما يحاول فض نزاع أو ضبط شواز أو أو أو ...........يعني أبسط مثل مرة كنا عاملين متل احتفال صغير...........واشتكى علينا أصحاب البناية...........وجاء الشرطي زينون ..........وفات عالقاعة............كنا نحنا شي 50 واحد............وهو واحد!!!!............فما كان من موقف قوة ...........واستمرينا لكن بدون ما نزعج الجيران ..............فلو كبس علينا 5 أو 6 عناصر دفعة واحدة كانت أصة تانية!!!

هاد عرض للمشكلة سابقة الذكر مما هو ظاهر لي...........أما إذا كانو غير متفرغين للمهمة أو ما عم يئبضو أو أو أو ...............فما عندي علم بهكذا أمور...........وممكن تكون حاصلة.............ولنحل المشكلة بدنا إحاطة بالأسباب أول شي ثم منفكر بالحل............كذلك يجب حل المشاكل واحدة واحدة...............حبة حبة............مش تطلع البلدية عندها 30 هدف بدها تحققهم خلال ولايتها............يا أخي يجي مجلس ينجح بإنو يعمل فريق عناصر شرطة ذو سلطة وفعالية وقادر يستمر ويكون جسم مستقل عن مشاكل البلدية السياسية والمصالحية...............بعتبرو أنجح من مجلس بلش 12 مشروع وما خلص ولا واحد منها............

أما بالعودة لقضية الساحة...........فنقطة ثانية مهمة هي ..............ماذا ستصبح عليه هذه الساحة بعد التحويل..............هل حديقة عامة؟؟...........هل ملعب أطفال............هل موقف سيارات............هل قاعة تعزية...............شو بيعرفني..............هل تقرر ذلك بشكل قطعي؟؟!!


فإذا كانت ستصبح حديقة عامة فبرأي ألف أهلا وسهلا بها.................بنقصنا هكذا مكان في القلمون وبشدة!!!..............لأن أي سيران بك تعملو مع العيلة بك تطلع عالنبعة ومشوار منو هين خصوصي إنو الطريق وعرة............وإذا معك أطفال.........مشكلة!!!!

إذا ملعب أطفال فالأولى صيانة الحديقة الكائنة على الطريق الجديدة

إذا موقف سيارات عمومي..........مثلا............مشروع مهم ويدر ربح للبلدية لكن المكان المذكور غير مناسب 1- لأنو عالبحر (ما حدا بيحب ينزع سيارتو) 2- لأنو بعيد عن وسط البلدة.................مع ذلك أنا أرى أن مشروع موقف سيارات عمومي هو من ما تحتاجه البلدة والبلدية.............يعني شوف الطرقات عنا مثلا.............كلها متروسة سيارات مركونة عالطرفين.......لكن هكذا مشروع يحتاج دراسة للمكان والكيفية ...............

والسلام عليكم