مقابلة مع الأستاذ الفاضل محمد حكم (أبو رامي)

[achraf]

مقابلتنا القادمة مع الأستاذ والمربي الكبير


رَجُل العلوم


الأستاذ محمد مصطفى حكم


أبو رامي



عسى أن نستفيد من خبراته الواسعة في مجال التعليم - والله ولي التوفيق -

[achraf]

خَرَّج الجيل الأوّل


وقام بواجبه على أكمل وجه


نترككم مع الأستاذ محمد حكم "أبو رامي"




http://qalamoun.com/student/images/interviews/Mhakam/mohamadhakam2.JPG

[achraf]

بداية لو تعطينا نبذة عن حياتك؟

ولدت في القلمون سنة 1933 زوجتي رحمها الله اسمها نهى الفحيلي ؛ و عندي ثلاث أولاد : رامي و منال و عمر.

هل تحدثنا أكثر عن عائلتك؟

زوجتي هي أخت الدكتور عبدالله فحيلي، كانت معلمة هون بمدرسة البنات ماتت بالقلب وكان عمرها 33 سنة .
بالبداية أخذناها على الجامعة الأمريكية وظلت تتحكم 6 أشهر وما كانوا يعرفوا شو بها بعدين أخذتا على مستشفى hotel dieu وكان في بروفيسور قال أنا بجمعة بعرفلك شو القصة وفعلا عرف؛ لهذا السبب أنا هلأ بشوف أننو الياسوعية تعليمها أقوى من الأمريكية لأنا بتعتمد أسلوب التفكير أكثر من الأمريكية.
المهم اجا أخوها من فرنسا وما قبل إلاّ إنو ياخدها يعالجها بفرنسا؛ قالولو متل بعضها هون أو هونيك، بس ما قبل وما قعدت يومين هونيك وماتت وجبناها ودفناها بالضيعة ووقتها بكيتها كل الضيعة.
كان وقت ماتت مرتي ابني عمر عمرو 3 سنين ورامي 9 ومنال 8 سنين.
بالنسبة للأولاد رامي درس هندسة كهرباء مع أنني كنت حابّو يدرس طب ورفض يبقى بلبنان رغم إنّو صرّللو عمل بشركة كهرباء لبنان وأنا بعذرو لأن كل فترة الدراسة كانت تحت القصف، تخرج من هون وهادا وجّ الضيف شي 18 سنة بأمريكا وهلأ تزوج وصار عندو توم بنات ب14 آذار بيصير عمرن 3 سنين.
أمّا بنتي منال فهي متزوجة من المفتش كميل وهلأ صارت معلمة ثانوية وعم تعلم انكليزي بالجامعة اللبنانية.
ابني عمر كمان كنت حابّو يعمل طب بالياسوعية بس حَب الهندسة ودرس الهندسة المدنية باللبنانية.

[achraf]

حدثنا عن مسيرتك التعليمية؟

تعلمنا أول ما بدينا بالغرفتين يلي برا تبعون مدرسة البنات، كان كل صفين يعدوا بصف وكان بس في للصف الرابع (الأول و التاني صف والتالت والرابع صف) وكان حسن فلو يعلمنا وكان في أساتذة من طرابلس.
بعد الصف الرابع نزلنا على البلد وكفينا بالجديدة لحد البريفيه يعني درسنا الخامس وبعد الخامس بيجي أربع عوالي وبعدين البريفيه، وبعدا قدمت على دار المعلمين، ما كان في ثانويات وكان أكثر التلاميذ يتعيّنوا فور تخرّجن، يروحوا يأدمو على وزارة التربية وكان بدّن كتير معلمين ميشان الضِيَع.
وأنا قرّبت طلب تعيين وطلعت بضيعة اسمها "طرماز" بس ما طلعت لأنني نجحت دغري بدار المعلمين. ودار المعلمين كان في واحدة ببيروت ما كان في غيرها كانت بفرن الشباك وكانت سنتين تعلمنا فيهن وكان بوقتا مدير دار المعلمين فؤاد فرام البستاني وهو مؤرخ وعندو كتب ورجع عمل مدير الجامعة وقت صار في جامعة.

هل البريفيه بوقتكن كانت شهادة؟

كانت شهادة فرنسية ولبنانية، كنت تقدم شهادة وتنجح وتروح على الشفهي ببيروت. رحنا على دار المعلمين، كان أول سنة في الواحد يقدم على Bacc قسم أول وعملت أنا بكلوريا قسم أول وتاني سنة تخرجنا كانت حوالي سنة 1953، بل 54 على أساس كان بدّي روح على الجامعة بس تعينت بمدرسة نموذجية تابعة لدار المعلمين بنفس المبنى وساقبت الظروف أني مرضت وبلّشت معي مشاكل المعدة واضطريت أني أنقل من بيروت وصرت احتاج الى أكل خصوصي جينا لهون على أساس على مدرسة الصبيان وكان في بس ابتدائي بمدرسة البنات، وجاء المرحوم عبد الرحيم المحمد وقال بدك تيجي على مدرسة البنات بدنا نفتح صف تكميلي وهيك جينا على مدرسة البنات كانت سنة شي 1956.

[achraf]

شو استلمت بتلك الفترة تعليم؟

اجمالا كنت علم science يعني علوم ووقت جينا على مدرسة البنات كانت الست أمينة زيادة هي المديرة وصار في اعتراض من قبل شيخ الضيعة الشيخ عاصم وقال كيف بدّن الصبيان يعلمو البنات؟؟؟
ولك بدن يتعلموا !!
والست أمينة شدّت كتير وضلينا هون وصرنا نزيد: جيت انا أول واحد والأستاذ ابراهيم جراد اجا بعدين وكان الأستاذ منير الخطيب ويمكن علي علوان، كان في طقم معلمين، علمنا الطقم اللي تخرّج وعمل دار معلمين ورجع واستلم هون مثل: لميس نور و فاطمة دنكر... كلّن لحنا معلمينن خرّجنا هادي الدفعة واجوا هنّه استلموا محلنا ونقلنا احنا، أنا نقلت على طرابلس على مدرسة الزاهرية علّمت سنة أو سنتين وبعدين اجا المدير مصطفى عبدو مدير الصبيان والكلونك قال بدّك تجي لهون عالصبيان واستقريت هون وعلمت من سنة 63 الى 97 وقت طلعت على التقاعد.
ووقت فتحت المنار فتحت محل بيت الأستاذ محمد طوط هون، وبعدين رجعوا بلشوا يعمروها وصرنا نساعدن ونشرف على الشغل واللي تم على مراحل بس خلال هذه المراحل علمت اجمالا علوم: physique-chimie – Biologie، وكنت علم الصفوف التكميلية العالي ثالث و العالي رابع.
عملت دراسة لراديو و كان محل transistor نستخدم لمبات، و رجعت عملت دراسة جامعية ودمجت المشروع بالمراسلة وخدنا شهادة فرنسية. كان في راديو أنا عاملو و oscilloscop بس انسرقوا بالأحداث، صراحة أكثر الشي اهتميت بالالكترونيك والكهربا.

ما هي الصعوبات والمشاكل التي كنتم تعانوها في تحصيلكم العلمي؟

ليك الجيل يللي قبل منا متل الكلونك صهري ورفعت حسين كانوا ينزلوا مشي ويطلعو مشي من البلد أكثر الأحيان، هوني كانوا يتعلمو لصف الرابع وخلص والأكثرية يروحوا على الشغل: كانوا يشتغلوا بالسقي بطرابلس ينزلو مشي ويطلعو مشي من بكرا لعشية ماكان في سيارات كان الواحد يشتغل ب3 ليرات و نص كيومية بالوقت اللي كان كيلو اللحمة ب5 ليرات .
بس جيلنا، أنا مثلا صرت أنزل على البسكلة وارجع عليها وبالشتوية كان في سيارة واحدة عالقلمون قبل حسن الشيخ علي يبقى واحد اسمو سركيس شكلو مربوع ولابس طربوش وعندو ford بو دعسة، نبقى نجي معو ونروح معو والسيارة كانت بتساع شي4 ركاب كان يحط فيها 20 راكب !! و كانت الطلعة والنزلة بربع ليرة.

[achraf]

هل اشتغلت بالفترةاللي كنت عم تعلّم فيها ؟

لاء، نبقى نشتغل بملاحتنا بالصيف، كان عنا ملاحة بنزلة الدير، يمكن لحود رئيس الجمهورية السابق أخدها للأرض هونيك.

هل كان التعليم مُكلِف بأيامكن ؟

لاء، كان فقط يكلف جهد النزلة والطلعة واحنا كنا بمدارس رسمية؛ تبقى المدرسة الرسمية مدرسة !
وهلأ يلّي نزعها أحداث ال 75، نزعت كل شي ومن جملتها المدرسة الرسمية وبعدين كلّن متخرجين من المدرسة الرسمية متل الدكتور رشيد المحمد ودكاترة آل علوان كلّن كانوا تلاميذنا ومنن يللي بيعلموا بالجامعة اللبنانية كمان .
الست أمينة زيادة قعدت فترة طويلة عريضة، أول الشي أجت معلمة للبنات ويبقى يعلموا فوق على العين بالغرفة يللي حد عين الجامع كانت تعلّم البنات هونيك وكانت أول واحدة أجت على القلمون وبلشت بالتعليم وبذلت كل جهدها وقتها. بعدين زادوا مدرسة البنات كانت بس هالغرفتين وبلشو يزيدوهن والمدرسة هونيك عملوها جمعية أصدقاء المدرسة كان محمد حسن الأبيض وفاروق يللي عندو محطة البنزين ( الأب الكبير ) هو الرئيس وكان في حسين بكري الحكم "عمي" ومحمد عبد الرحمن المحمد، والأخير بتذكّر كان عندو السنترال وهو يللي كان يوزع السنترال على كل الضيعة بالمحل يللي عند نزلة الجامع وهو كان centralist بالجيش التركي وكان وارثها للشغلة عن ايام الجيش التركي بالحرب العالمية الأولى، كان يقعد يحكيلنا.

[achraf]

خلال تعليمك هل تغيرت عليك المناهج؟

تغيرت كتير يبقى بالأول في مثلا بالفيزيك كتاب ال RDP كنت تبدي فيه وتعطي لأربع سنين وال chimie كمان، بس ال natural كان كل سنة في كُتب.
وكلها كتب تبقى فرنسية، عفكرة نبقى لحنا وتلاميذ حتى درّسنا بهذه الكتب. RDP تغيرت مؤخرا ضلت ماشية شي 50 سنة بالمناهج اللبنانية وأكتر من وقت كان الفرنسيين هون وهادا ال RDPإذا بتقرا فيه فهو غني بشكل هائل وبيعلمك الفيزيك كللو الى الbrevet (optic – elecricite). قبل منا في مرحلة العالي تالت كنا نعطي ( machine a vapeur تبع ال train) ويلي بيعلموه بالقسم التاني هلأ كلو كانوا بياخدوه بهادا الكتاب وبتلاقيهن فيه .

هل تعتبر أنها مناهج أقوى؟

نعم كانت قوية وهلأ صار فيه كمان مناهج قوية.

طالب الbrevet كم كان يكون عمره؟

كنا نفوت عالمدرسة سبع سنين، سنة لل certificat وتلاتة لل brevet وتلاتة سبعة يعني شي 18أو 19 سنة هلأ صارالولد ابن 5 سنين بيفوت عالمدرسة.

الواقع التعليمي الموجود الآن هل هو أفضل أم أسوء من قبل والسبب؟

كمنهاج تعليمي كان دائما في مناهج متقدمة بس الأحداث خربت كتير، كنا بالزمان كم أستاذ بس يعلمو هلأ بتلاقي فائض بالمعلمين قاعدين. كنّا بال brevet ناخد كهربا و optic و acoustic، ما بعرف هلأ بيقولولي بالثانوي في شغلات يبقو يعلموها بهادا لم تعد موجودة حتى بالثانوي صارو بيوخدوها بالجامعة بس كلو بالنتيجة عم يوصل يلي ما عم ياخدو بالثانوي عم ياخدو بالجامعة يعني هلأ الأفضلية إنو صار في جامعات وجامعات كتيرة وبمتناول الكل يلي بدو مجانا فيه ويلي بدو بمصريات فيه وهادا شي بلبنان متقدم منيح.

[achraf]

متى تقاعدت عن التعليم؟

سنة ال 97 طلعت على التقاعد وعلمت سنة واحدة بعدين 98 بالمنار وبس. ورجعت صرت اشتغل مع ابني عمر مهندس وصرت راقب الورش. كل شي علمي أنا بحب اشتغل فيه.

اسمك ارتبط بمادة العلوم ونعرف تفانيك بإيصال المعلومة؛ حسب خبراتك ما هي الوسيلة الأنسب للتعامل مع الطلاب لكي يحبوا المادة؟

هادي بتيجي من الخبرة. ليك أهم شي كل شي بدو مختبر هلأ لحنا عنا مختبر، بفوت التلاميذ عالمختبر وبحبو المادة لأن فيها مختبر. افترض مثلا كل شغلة بتفوت التلميذ عالمختبر وبتخليه يشتغل، أول شي بيفهم المادة منيح تاني الشي بيصير بحبها للمادة. كنا نعمل مختبر للتلاميذ كيف بيعرف فئة دمّو بالمنهج الجديد موجودة.
المختبر بالبرنامج القديم يبقى غني كتير، فيه أشياء كتير تعملها بالمختبر وموجودة بالبرنامج القديم وكنا نحضرلن الحديد: نحط بودرة الحديد يلي بيعملو منها الحديد لونها أحمر ونخلطو مع بودرة الألمنيوم وبتحطلو شريط magnesium وبتشعلو فبيشعل وبينزل الحديد سائل لونو أحمر ورجعو وقت خط ال train المارىء بين السراي والسراي يبقو موصولين ببراغي رجعو صارو يشيلو البراغي ويوصلهن ببعضن بطريقة التجربة يلي ذكرتها لكم ويلي كنا نعملها للتلاميذ بالمختبرات.

هل ما زلت متابع للتطورات العلمية؟

أنا بهتم كتير بالأشياء العلمية وإذا عم إقرا جريدة ولقيت شي علمي دائما بحتفظ فيها وبجمعها وكمان بتابع الإذاعات العلمية على التلفزيون ومن صغري أنا هيك.

[achraf]

ما هي أهم المنجزات التي حققتها والتي كنت تنوي تحقيقها؟

خرّجنا تلاميذ وما ضيعنا وقت وقمنا بواجبنا على أكمل وجه. أهم شي إنو التلميذ بدك تعلمو وتقوم بواجبك، إنت بتقبض معاشك وبدك تقوم بواجبك وإلا بتكون عم تسرق، حتّى نبقى نقوم بأكتر من واجبنا. ووقت الشهادات نبقى نعلمهن خارج الوقت سواء عند البنات أو عند الصبيان.

التنوع والاختلاف بالأحزاب شو تأثيره على الواقع التعليمي؟

الأحزاب كانت موجودة حتى قبل الأحداث وكل القلمون عم تتعلم وكان في نهضة علمية ماشية بس الأحداث هية يلي خربت كل شي، الفوضى في الأحداث هي التي خربت التعليم والمدارس يعني في أشياء ما إلو عين الواحد يحكيها وقت صارو يكسرو المقاعد و.. و.. وما فيك تحكي إدامو.

حاليا الضعف الذي تعانيه المدارس الرسمية هل للأساتذة دور به؟

في أساتذة مناح هلأ مارء فترة؛ التعاقد غير دار المعلمين ضعفت السلك التعليمي ما في شك بس إجمالا وقت بيكون في نظام ماشي التلميذ بدو يتعلم وبضل في عناصر تعليمية ممتازة بس هلأ فوضى المدرسة يلي مثلا بدها 20 معلم فيها 40 بيصيرو يتنافسو مين بدو يقعد، وأنا اشتغلت وإنت ما اشتغلت...

ما هو دور الإدارة في هذه المسألة؟

الإدارة دورها مهم جدا والمفروض إنو الطالب الكفوء بس هو يلي يطلع من صفو ميشان ما يضرو الطالب ، وتاني شي بدو تعليم منيح والإدارة أهم شي، وكمان في شغلة عند الأهل إنو وقت إنت بتدفع عن ابنك بيصير بدك تهتم فيه. هلأ اهتم فيه وإنت ما عم تدفع كمان بيمشي منيح بس في تقصير من الأهل. وعطيتك أمثال كل يلي تخرجو من المدارس الرسمية أكتريتن دكاترة مثل بيت علوان ومعن دنكر المهندس وكلن من المدارس الرسمية.

[achraf]

ما هو الذي شجع حضرتك على الاتجاه العلمي في التعليم؟

كان عندي من صغري حب للأشياء العلمية بشكل هائل وكنت قوي بال Math والعلوم هلأ بدار المعلمين بيعطو جوائز بالفصل كانت تمرء إجمالا أنا آخد على العلمي جوائز.
التقدم العلمي صاير بسرعة الضوء بكل المجالات بال electronic والأشياء العلمية والكمبيوتر والاختراعات. تصور يبقى بالأول يرسم المهندس على إيدو وراح الخط ووقع بمشكلة... هلأ بيرسم على الأوتوكاد وبيعدل فيها على رياحتو وكيف ما بدو؛ شي غريب عجيب.

ما هو رأيك بالأجيال ...؟

وين ما كان بتلاقي هيك وهيك بس إجمالا التعليم كل شي للأمام وصارت وسائل التعليم أوسع من الأول ولذلك صار الطالب إذا ما عجبو هادا الفرع بيروح على غيرو. وإذا ما عجبتو هادي المدرسة بيروح على غيرها. الوسائل عم تكتر وفي تقدم.

كمستوى بالضيعة؟

ممتاز والأهم إنو الأكترية عم يتعلمو وبالأول ما كان في هلأد علم وحتى الواحد يضطر قديما يترك المدرسة ليشتغل ويساعد أهلو. هلأ كل شي صار متقدم.

هل برأيك أن أهل القلمون مقصرين بحقكم وبحق كبار الأساتذة؟

أنا قمت بواجبي وهو شو بدو يعملي؟؟
بس إجمالا يلي بيعمل واجبو بيضل بيلاقي احترام.

[achraf]

ختاما هل خرجت بحكمة من خلال تجربتك؟

كل واحد أد ما بيقدر يتعلم يتعلم وأد ما بيقدر يعلم أولادو يعلمن. لأن العلم هو الذخيرة والعلم عم يصعب يوم عن يوم وخصوصي بلبنان عنا بيضل في ظروف غير مستقرة فالعلم هو الزوادة المهمة جدا للإنسان والغرب ما تقدم علينا إلا بالعلم.
في ناس دكاترة بالجامعة حتى الآن يقومون بأبحاث بفرنسا وبيرجع: متل خالد حسين أنا بشجعو كل سنة بيروح 4 أو 5 مرات وبيعمل أبحاث لأن برا متل فرنسا في مختبرات بيقدرو يعملو أبحاث. يبقى عبدالله فحيلي أخو مرتي كمان بيروح هلأ صرلو زمان ما راح. هون ما عنا مختبرات و برا بيتمنو عليك تعمل أبحاث لأنك عم تغنيلن معلوماتن.

شكرا جزيلا يا أستاذنا الكريم و انشاء الله سنبقى على تواصل معك.
أهلا و سهلا بالشباب و أنا على استعداد إنّو فيدكن بللي بقدر عليه...



و هكذا بعون الله انتهت مقابلتنا مع الأستاذ أبو رامي نتمنى أن تنال اعجابكم.
والله وليّ التوفيق.

http://qalamoun.com/student/images/interviews/Mhakam/mohamadhakam3.JPG

http://qalamoun.com/student/images/interviews/Mhakam/mohamadhakam1.JPG

[الزاهر]

بس عنجد الأعدة معو كانت غير شكل !!! ... لها لذة وفي حديثه متعة !

[الشامي]

السلام عليكم

مقابلة جميلة وممتعة ، وأنصح بأن يكون هناك سلسلة مقابلات مع الأستاذ الفاضل أبو رامي، لا تقتصر على المجالات العلمية وإنما على جوانب تخص تاريخ البلدة...

مشكورين على هذا الجهد الطيب وإلى الأمام...

أخوكم:rolleyes:

[عبد الله]

والله كانت إيام حلوه مع الإستاذ حكم
بارك الله بكم على هذه المقابلة

[Hassan.D]

و الله يا أخ زيدان النية موجودة ان شاء الله و نحنا حطينا الأستاذ أبورامي بالجو .

[هشام الفلو]

شكرا كتير عالمقابلة, وتحياتي مرة تانية للأستاذ محمد حكم
يا ريت تشتقلو شوي عاللغة