دليل الخاطبين

[الريس]

مرحبا ، كيفكون يا جماعة ؟؟؟

حبيت اني افتح هذا الموضوع ، لحتى انفيد الشباب الخاطبين وما عم يعرفوا شو بيعملوا ، وشو بيحكوا ، وطبعا متل العادة ، البنات ما لهم شغل هون ، فيفرقونا بريحة طيبة ، الا أم سفيان ، فهي على الراس والعين ، وعندها خبرة بهل المواضيع ، شنها متزوزة .

ما رح احكي كيف بتنقي المرة ، لأن انبرا لساني من هالموضوع وبعتقد انو اخد وقتو كتيير ، ومع هدا يلي بدو يعرف شي عن الخطيبة يسأل هون ، واذا الواحد بدو يعرف شي عن بعد الخطيبة والزواج فكمان يسأل هون ، بس ما يتأل العيار ، مشان يلي عم يقروا يعني ، أنا من ناحيتي ما عندي أي مشكل ، تقلي وبتقللك .


أول شي يا أبو الشباب يا عريس ، لازم تعرف انو الخطيبة هي فترة مرحلية ، يعني انت ما رح اتضلك خاطب طول حياتك ، والخطيبة ليست مجرّد بروتوكول اجتماعي يحدث بين المسلمين ، الخطيبة هي mini test عن الحياة الزوجية ، يعني الرجال والمرأة عادة وين بكونوا مشاكلهم ؟

عادة بتكون المشاكل مادية ، أو تربوية أو... وكلها متضمنة في طريقة التفاهم بين الزوجين ، وهذه يلي لازم تنحل في فترة الخطيبة .

ما عم قول انو ما في أسباب أخرى بتوصل للمشاكل بين الزوجين ، يعني يمكن تكون المشاكل جنسية أو .... بس اطمنوا يا زكرتية هيدي محلولة ، اذا المخلوقة ما بتلبي منيح ، ما لكم غير انكم اتنوا ، ما حدا يعمل حالوا آدمي وصابر هلأ على شهوتو ومدري أيش ، ربنا قايلك عف نفسك .


المهم ما رح طول عليكون هلأ ، رح انبلش بصدر الموضوع دغري .

أول شي انت لازم تحببها فيك ، ولحتى اتحببها فيك لازم اتكون انت بتحبها ، وبعدين منكفي هلأ بدي روح .....

[Nader 3:16]

و لك لوين رايح قاعدين!!!!!!!!

هلء هيك بدنا نشتغل يا ريس ؟؟؟؟؟
كنت علحظة بدي اخطب بس بطلت و الحق اكيد عليك(عم امزح)

[الريس]

آه يا زعيم ، أنا جيت هلأ ، ما تواخذني انشغلت شوية ، وما حبيت امحيهم وارجع أكتب من جديد ، فقلت لحالي فقاس الفقسة يا صبي ، وبترجع بعدين بتكفي .

المهم كنا عم نقول ، انو الواحد لازم يحبب خطيبتوا فيه ، ولحتى يحببها فيه لازم يكون بحبها ، وبيعرف يحكي معها ، وبيفهم عليها ، وبيعمل متل ما بدها ، بس أكيد مش بكل شي ، على كل رح اشرح ورح فصّل شوية .

أول شي قلنا انو لازم يكون بحبها ، لأن اذا كان ما بحبها عنجد ، فكل شغلوا رح يكون تمثيل بتمثيل ، ويلي عم يمثل ما فيه يصبر كتيير ، وبالأخص لما بشوف شي ما بيعجبوا من حبيبتوا . وكمان يلي بحب بيطلع معو الحكي الحلو بشكل عفوي ، والكلمة الحلوة الطالعة من القلب بتكون نكهتها غير شكل على البنت ، صدقوني البنت بهل العمر -يعني عمر الخطيبة- أحيان بكون كل شي بدا ياه الحب ، بكون صرلا مدري اديش لحتى يجي الريس أو شي شب زكرتي وحلاوة متل حكايتوا على حصان أبيض لحتى يطير فيها بدنيا الأحلام .

وكمان قلنا انو لازم الشب يعرف يحكي مع خطيبتوا ، لأن أحيان بكون الواحد بحب البنت وغرقان على الآخر ، بس مصيبتوا انو جحش ما بيعرف يحكي مع البنات ، فساعتها اذا كان في خمس كيلو حب بقلب البنت شايلتلوا هنة ، فساعتها بصيروا ربع وقية ومن كعب السحارة كمان . يعني معليش اذا الواحد راح لعند خطيبتوا ولقاها لابسة جديد ، فيقلها شو هل الحلو ، ما يبلش فيها من أول الطريق "ان شاء الله بتموتي شهيدة" -البس جديدا وعش حميدا ومت شهيدا- يعني يقلها ريتوا ما يبلى ، ريتوا يسلملي القمر ، ولك أنا شو بعمل ، وين بروح ادام هالجمال ، بس يا الله اديش بكونوا اهل البنت سألا ، ولك يا عمي كحشوهم وعدو انتو والمخلوقة على رواق ، يعني ما تختلوا ، بس كحشوهم على آخر الصالوان ، أو عدوا بمحل بعيد عنهم بس مش مسكر . وبنبه الشباب الزكرتية كمان ، انو ما يزيدو الغزل كتيير خلال هالفترة ، يعني يا شباب ما تلسحوا العسلات كلهم من أول الطريق ، تركوا شوية لبعدين ، وحاولوا تستغلوا فترة الخطيبة لحتى تفهموا على بعضكم ، وتشوفوا كيف بتفكر المرة و.... يعني ما معقول واحد يكون خاطب واحدة ، يضل رايح جاية من عندها وغزل وأخد وعطا و... وما عارف هية مع مين بالسياسة أو ......

كمان لازم الواحد يكون سخي شوية ، بس أكيد ضمن امكانياتوا وما يتكلف أبدا ، يعني هو ورايح يحول لعند الحلاب ، يخدلها صنية حلو ، بس ما يخد زنود ما يقوموا يفهموها غلط ، في أدد ما بدكون أنواع تانية .

وكمان لازم الواحد يكون بساعد خطيبتوا ، يعني هي وعم تعمل القهوة ، معليش حمال حالك وقوم عمل قهوة معها -وبين بعضنا ، بتقدر تحكيها بالمطبخ على رواق ، ما بكونوا اهلها موجودين- ومنها بتكون ورجيت المرأة انك بتعرف تشتغل شوية بالبيت ، وانها ما رح تإنيك لحتى تتصبب على شاكلتك كل النهار .


وكنت حابب اعمل متل معجم ، حط فيه كلمات الحب ، ولكن قلت لحالي تركها بيطلعوا عفويين ، وأنا هلأ مش بحالة تخولني اني احكي بالحب ، لأني غرقان لشوشتي قولة واحد ، رح يطلع معي كلام كتير سارح .

[Nadine]

طيب خلص بس هيك؟؟!! على اساس دليل الخاطبين , هيك خليت العالم يخطبو على اساس انن ماشين على دليلك ,ما رجعت حطيت مشاركات علقتن ما بقا يعرفو شو بدن يحكو, خلص ما بقا في معلومات منقلن ينتقلو على الزواج؟!!

[فيصل]

صلو على النبي



مرت امرأة فائقة الجمال برجل فقير بل معدم، فنظر إليها


وقلبه ينفطر شغفا بجمالها ...


ثم تقدم منها ودار بينهما الحوار الآتي:-



الرجل: "وزيّناها للناظرين"

المرأة: " وحفظناها من كل شيطان رجيم"

الرجل: " بل هي فتنة ولكن أكثرهم لا يعلمون"

المرأة: "واتقوا فتنة لا تصيبن الذين ظلموا منكم خاصة واعلموا أن الله شديد العقاب"

الرجل : "نريد أن نأكل منها وتطمئن قلوبنا"

المرأة: "لن تنالوا البرّ حتى تنفقوا"

الرجل : "وإن كان ذو عسرة"

المرأة: "حتى يغنيهم الله من فضله"

الرجل: و"الذين لا يجدون ما ينفقون"

المرأة: "أولئك عنها مبعدون"



عندها احمر وجه الرجل غيظا وقال:"ألا لعنة الله على نساء الأرض أجمعين!!"





فأجابته المرأة:



"للذكر مثل حظ الأنثيين"

[مصطفى معتوق]

كونك خبير بقصص الخطيبة فيا ريت بتقلي من وين لازم الواحد يبلش يفتش ليلاقي عروس
لأن الشغل والسياسة اخدين كل وقتي يا شريك
هلق صحيح يمكن اتفلسف عليك بالساحة السياسية بس هون بدنا رايك ومشورتك كونك من اصحاب الاختصاص بالخطبة والنسوان والزواز وتوابعو وما الى هنالك ....
مع اطيب التمنيات

[الريس]

والله يا شريك هيدي الشغلة الوحيدة يلي ما بتعرف كيف بتجيك ، أنا اتعرفت على الصبية يلي بحبها من وقتا كنا بالجامعة ، شفتها وعجبتني ، بس هية كانت لا بتهش ولا بتنش ، ما كان حدا لو قلب يحكي معها أي كلمة ، فشوية شوي صرت اتقرب منها ، لحديت ما اجا يوم وبينما كنت عم حكيها ، شفتها ضحكتلي ، فقلت لحالي خلص صارت البنت لإلك يا ريس عراف استغل الوضع ، ومرّة تانية كنت عم امزح معها ، كنت واقف مع واحد بدخن فجيت فخدت منو سيغارا وجيت بدي قلها اتفضلي ، فقالتلي ما بدياك تمشي مع هيك ناس ، بينزعوك ، فتأكدت انها بتهتملي بس ما بتحب اتبين على حالها ، اتقرب منها اكثر وأكثر -طبعا ضمن حدود- فهمت عقلها وبصراحة كلها عاجبتني ، ويمكن اذا متت قبل ما جي على لبنان فأكيد بكون الحق عليها ، بس ارجع على البيت بقعد وبصفن ، وبصير اتخيل عيونها وضحكتها وكل مرّة حكيتها ، وقلبي خلص بروح ، الله يرحموا ، يعني بالفعل ما كنت عارف انو الانسان فيه يحب لهل الدرجة ، كيف لما الواحد بكون مودع حدا حبيب على قلبوا كتيير لأول مرّة وعارف انو ما رح يرجع يشوفوا ، أنا هيك شعوري ، ما بعرف ليش ، بس قلبي عم يتأطع ، ويمكن هذا هو السبب الأساسي انها مشركاتي خفت بالمنتدى ، وانها علاقاتي الاجتماعية مع الناس خفت أكثر من الأول ، ما بق لي نفس عم اضحك ولا اعمل شي ، منقوم تنحكيها على التلفون فبحس متل كأني خدت حبة بتعيش ، وأول ما سكر الخط ابلش اتذكر كل كلمة قالتها وضحكتها ، وبطير وبسرح ، يعني شي مرّة أنا وصافن بدو ينسرق البيت أو تشعل الدنيا وما حس ...


يلي بدو يتزوج لازم يحب قبل ، والحب ما بتعرف كيف بجيك ، يمكن تكون بتعرف صبية من زمان وما بتحبها وما بتعرف كيف بتتغير مشاعرك تجاهها يمكن من موقف معين أو من لباس أو ... ، يمكن اتشوف بنت ومن أول مرّة تعجبك وبعد ما تتعرف عليها تصير بتعجبك أكتر ، صدقني المجال مفتوح ، ووين مكان فيك تتعرف على بنت ، القصة مش قصة وين ، القصة قصة كيف ؟؟؟ لازم الشب يكون يعرف يتقرب من البنت ويتعامل معها ، وأنا متل ما قلتلك البنت يلي بحبها كانت ما بتضحك للرغيف السخن ، بس الحمد لله عرفت اتسللت على قلبها ، وهي كمان ما قصرت بقلبي أبدا .

[مصطفى معتوق]

والله حسيت حال بقصص الف ليلة وليلة
على كل حال الله يوفقك وعقبال العايزين