بيشرفنا نطلب إيد بنتكن الكريمة... [الأرشيف] - منتدى موقع بلدة القلمون في لبنان

مشاهدة النسخة كاملة : بيشرفنا نطلب إيد بنتكن الكريمة...

دوكر

02-02-2008, 02:03 PM

يا هلا بالجميع.......
كيفكن؟.......كيف الصحة؟...... كيف الأحوال؟..........
طيب متل العادة .....ما بحب اللف و الدوران......و ما في داعي للمءدمات .......هلأ هوا صحيح الموضوع شويا بخليني استحي بس ؤلت بطرحو عليكن ........من شان نستفيد منكم من خلال وجهات نظركون........و من خلال تجاربكن ازا كان عندكن تجارب.......و بعرض عليكن وجهة نظري و بنشوف و بنتناءش ........
الموضوع.....هوا .......
بؤل ولا بلاها؟............
طيب خلص..........الؤصة و ما فيها.....انو اخوكم دوكر المعوكر..........ارب يخطب.......فا دار براسي كتير أشياء .....شلازم اعرف عن الصبية .......شلازم اسألا بفترة الخطيبة ........شلازم ؤلا ......كيف لازم اتعامل مع الموءف......عن ايش لازم احكيلا ..........
و كتير اشياء غير........
الموءف صعب ......و كتير مخجل عارف.....و حاسس بهل الشي.......
"سلام عليكم..."
"و عليكم السلام......"
"............"
".........................."
"..................."
"........................................."
"و الله نحنا بنتشرف نطلب أد بنتكن...."
"و نحنا كمان بنتشرف انو تكون صهرنا ......بس الصبية بدا تكمل علما......."
"طيب ......؟؟؟" (هادي هيا ....من اولا يا دوكر ....حميل حالك و مشاي.......ههههههه.......)
و حابب اسمع رأيكن ......و بدنا مساعدة الصبايا بهل الؤصة .......و كمان الشباب ........

يعطيكن العافية ........
اخوكم دوكر المعوكر........

دوكر

02-02-2008, 11:13 PM

Barbie

03-02-2008, 02:45 AM

السلام عليكم ,
أول شي , أغلبية الصبايا بحبو , انو يلي بدو يخطبهن يكون بحبون كتير كتير و منيح معون و صريح 100% , و أكيد هوا يلي لازم يبادر بالأول , انو يحكي عن حياتو كيف كانت , عن درسو و شغلو هلق ......

شو بحب , شو بيكره , و هوا يلي لازم يسأل البنت , لأن بتكون كتير متلبكه , ببلش عادي , كيفك و بيسألها عن درسها و تدريجيا ً المواضيع بتزيد , و بيصير بيعرف من كلامها كيف شخصيتها و شو بتحب و شو بتكره , و ساعتها بصير يعمل كل شي هي بتحبو , و بحاول يحسسها انها أهم شي بحياتو , أكيد ضروري يكون صادق , على طبيعتو و أهم شي و ما يصطنع .
و هيك بخلي البنت تتعلأ في و طبعا ً كل واحد عندو أسلوبو و طريقتو لي بتميزو .

أهم شي ما يتغير الشب بعد الخطبة , و اذا كانت البنت منيحة من واجبو يأمن لها كل شي حلو و صادق و يكون مقتنع باختييارو .

و العلم شي كتير مهم , و من حقها تكمل علمها , و هادا شي لازم كل شب يتأبلو و يكون عم يشجعها . لأن العلم بي ايامنا أساس للمستقبل و لو كانت بعدها سنه أولى لازم الشب ينطرها اذا بدو ياها و متعلق فيها و بي هل المدة بكونو تعرفو أكتر على بعض .

أخر شي , ما لازم ننسى الذوق و اللباقة , يلي بميزو الشب عند البنت و بخليها تشوف حالها في إدام العالم كلن .

ان شاء الله يكون حكي بفيد . و مبروك سلفا ً ..... الله يهنيكن .
( نتبه عليها منيح كتير , خصوصي اذا كانت منيحة و طيوبه و بتعرف الله , لأن نوادر الشب يلاقي صبية منيحة و حلوة بزماننا )

الزاهر

03-02-2008, 07:29 AM

...... , لأن نوادر الشب يلاقي صبية منيحة و حلوة بزماننا )

هلا هنة ما هالأد نوادر يا خيي.........بس الواحد بدو يعرف وين بدو يأيبل!!!...........

أف.........Barbie......عفوا..........خيتي!!!

مشاركة مفيدة........والله يهنيك يا دوكر...........

هلأ يا دوكر وئت بك تخطب بنت....(مش عم احكي عن تجربة ها!!!!.....هههههه)....أكيد بدك تحاول تحكيها لتعرف كيف بتفكر.........بس برأيي هادي فرصة للتصنع.........إذا بتلائي شخص يحكيلك عنها يكون ثقة وموضوعي بيكون منيح كمان........

أما شلازم تألها وشلازم تحكيها............باعتقادي لازم يكون في كم سؤال بس محضرلن من أبل..........وخليك عفوي تلقائي مرن هاد أفضل شي!!.........ومن هالأسئلة إنو شبيعنولك هالمصطلحات:"الخطبة" ...."الزواج" ........."العائلة".........."الأولاد"......."الصبر"..........ومن هالأصص............وأكيد بدك تكون إنت عارف بالأول شبيعنولك!!!!...........ثم بتحكي اللي بك تحكيه...........بتستطرد بالأفكار الواردة يعني............ثم بتألها دورك بالسؤال!!!!!...........وما تتوقع اسئلة محبوكة..........إنت صرلك اسبوع عم تحضرهم.........هي عم تسألك وهي متلبكة وما عم تعرف تحكي..........فإذا كانت اسئلتها محبوكة.........أصحاك تدير وشك عنها وأهلها وتروح تأيبل عغيرها...........لأيت كنزك!!!

هاد رأي "غير مجرب".....هههههههههه.........فشو رأي المجربين؟؟؟

سلام!!!!

فشلان

03-02-2008, 10:03 AM

بسيطة جدا

تعا لعندا بمظهر الفارس على حصان أبيض، وكون مسرح شعراتك ومطولن شوية.. وعاملن ليس.. وخلين يطيرو بالهوا لما الحصان عم ينطنط...

وقلها: قاصدك يا أحلى الحلوين....

وخلص.... وأنا بضمنلك تعيش لمدة شهر كامل بتعاملك من أحسن معاملة.. وبتشوفك بالدنيا....

لا تواخذني ما فيك تعطي النسوان مهلة أكتر من شهر... لأن بعد شهر بينسو.... (بس أنا فشلانتي غير :D)

تانشوف رد النسوان... ضربنالن على الوتر الحساس...:1 (43):

ولك دووووووووووووووووووع

دوكر

03-02-2008, 01:03 PM

يا هلا بالجميع...
يا هلا بالست باربي...يسلمو ع هل الأفكار...
و يا هلا بالمعلم أطر...ما ضروري تكون مجرب...يسلمو...
و يا هلا بالمعلم فشلان ...هههه ...فكرة حلوة...يسلمو...
ان شاء الله لاي رجعة...
ناطر اسا شباب و صبايا يشاركونا...
يعطيكن العافية...
اخوكم دوكر المعوكر...

دوكر

04-02-2008, 11:57 PM

يا هلا بالجميع........
شكلو محدا بدو يؤلنا شلازم نحكي .....بدي اضطر اعتمد ع حالي و علي بيطلع معي ارتجالي.......

"سلام عليكم...."
"و عليكم السلام......يا هلا بالصهر ...كيفك؟؟...."
"الحمد لله.........انتو كيف؟......"
"شبتحبو تشربو ؟........"
"يسلمو ......ما بدنا نعزبكن....."
"ولك له بدك تزعلني منك يا صهر.......عزابكن راحة ....كم دوكر عنا نحنا......"
"الله يبارك فيكن.......متل ما بدكن....." (بلشت احمر ......و يتغير لوني.....هههههه......)
"طيب ما بدك تحكيلك شي كلمة مع عوكرة ....شباك مستحي .....ؤم .....ؤم ت شوف....كلشي الصالون كبير.....ان شاء الله جاين توعدو هوني معنا .......تروكنا نحكي بالسياسة .......و شوفو شبدكون تحكو انتو......."
"ؤعدين عم نسمع و نتعلم منكون...."
"ؤم ت شوف ........"

"آآآآآآآآ........(يا الله من وين ورطونا هل الورطة .......و الله الحكي صعب.....شبدي ؤل.....) كيفك؟.........." (هوني بلشت طفي و ضوي ....كل الألوان .....هههههه)......
" انا منيحا انتا كيفك؟....."
"الحمد لله .....و كيف هل الجامعة .....؟"
" الحمدلله.....انتا كيف هل الشغل......؟"
" الحمد لله....."
..............................................
...................
.........
....
"آآآآآآآآآآآآ.........(احمر ....ازرء......اخضر....اصفر......ههههههه.....)..... ..كيف هل الايام.......؟......(شكلنا بدنا نضلنا هوني....ههههه.....)"
" الحمد لله....."
"شرأيك بالليبرالية .....؟"
"هههههه......."

يتبع..............

يا شباب و يا صبايا .....وينكن ....ان نوطر.....و محا كمل ازا محدا سعدنا و عطينا افكر.........
يعطيكن العافية.......
اخوكم دوكر المعوكر............

الزاهر

05-02-2008, 12:13 AM

يأطع خملك يا دوكر..............فتكرت حالي عم طالع موضوع العم جابر!!!!

المهم...........هلأ بتألك هي إنو شو بدنا باللبرالية...............وبتألك شو مفهومك للحياة الزوجية!!!

شو بتألها إنت؟؟؟

Nader 3:16

05-02-2008, 12:30 AM

ولك هادا دوكر بدك تخطب و لا ضرسان و ما بتؤول لحدا...

بس الله يطعمك ما تعزمنا عالعرس!!!! ساعتها بتشوف شي ما بيعجبك!!

المهم انا ما رح اءدر فيدك بشي...و لا حتى زاهر..

لازم توخد المسألة من المتزوجين و تستفاد من خبرتهم و تجربتهم ...

و مبروك سلفاً.....:):1 (22):

ابو عمر

05-02-2008, 03:12 AM

أنا برأيي أخي دوكر....أول سؤال سألها يا كنّا كانت مصاحبة.....و مين و كيف....و شدّلّي حيلك بلا خلوعة....ورجيها إنّك رجّال.....و أصحا تخلّيها تحسّ إنك تشتوش قدّام البنات...والله بتاكلك بلا ملح و ما بتخلّي فيك ولا فرمت لحمة....كون الكل بالكل....وكون الدنية كلها....و خفّفلي من أسئلتك ياّي بلا طعمة..قال ليبرالية قال....هه....و بيني و بينك، تقّل العيار شوي....هنّة هيك بحبّو...موفّق....سلامات...

mahbouleh

05-02-2008, 12:56 PM

دوكر

05-02-2008, 07:14 PM

يا هلا بالجميع....
اول شغلة يسلمو للمعلم أطر و المعلم ابو الروم و الست مهبولة ع المرءة ع الموضوع...و كمان المعلم نادر...هلأ هو صحيح الواحد احسن الشي يسأل مجربين ...بس يا معلم كمان حلو اسمع افكاركن و تخيلاتكن بالموضوع...
تاني شي بدي ؤل اني اساتني ناطر ارأكن...
يعطيكن العافية...
اخوكم دوكر المعوكر...

أيمن غ القلموني

05-02-2008, 09:48 PM

أهلين بالمعلم دوكر ومبروك سلفاً وإن شاء الله بتتوفق بحياتك ؛

سأكتب بالأخضر

"سلام عليكم...."
"و عليكم السلام......يا هلا بالصهر ...كيفك؟؟...."

"الحمد لله.....والله حاسس حالي طاير من الفرح وكإني هلأ خلقان ، وبتطلع بخطيبتك إنت وعم تحكي ميشان تحاول نتفة نتفة تطلع من الحيا إللي إنت في وبنفس الوقت بتكسر حاجز الرهبة إللي بينك وبينا....انتو كيف؟......"
"شبتحبو تشربو ؟..
والله على ذوق .....عوكرة

"بدنا نعزبكن...معنا اليوم .."
"ولك له بدك تزعلني منك يا صهر.......عزابكن راحة ....كم دوكر عنا نحنا......"

"الله يبارك فيكن.......متل ما بدكن....." (بلشت احمر ......و يتغير لوني.....هههههه......)
منا مشكلة...............
"طيب ما بدك تحكيلك شي كلمة مع عوكرة ....شباك مستحي .....ؤم .....ؤم ت شوف....كلشي الصالون كبير.....ان شاء الله جاين توعدو هوني معنا .......تروكنا نحكي بالسياسة .......و شوفو شبدكون تحكو انتو......."
"ؤعدين عم نسمع و نتعلم منكون...."
"ؤم ت شوف ........"

"آآآآآآآآ........(يا الله من وين ورطونا هل الورطة .......و الله الحكي صعب.....شبدي ؤل.....) كيفك يا ست الكل؟.
كيفك يا أجمل فراشة؟:1 (1):
........." (هوني بلشت طفي و ضوي ....كل الألوان .....هههههه)......
" انا منيحا انتا كيفك؟....."
"الحمد لله .....و كيف هل الجامعة .....؟"
شباك نتط عالجامعة أوام ، بتكون عايفة خلاقة منا ؛ قل مثلاً ليكي والله بيتكن أحلى من بيتنا بتعرفي لش لإنك مزينتاي :1 (86):
" الحمدلله.....انتا كيف هل الشغل......؟"
" الحمد لله....."بس والله إن هالإيام مني بأفضل حالاتي ، عقلي منو معي ، لش ، لإن منك مخليتيلي عقل ..........:1 (31):.

هك هك بيطلع الحكي منو لحالو............................................. .
...................
.........
....
"آآآآآآآآآآآآ.........(احمر ....ازرء......اخضر....اصفر......ههههههه.....)..... ..كيف هل الايام.......؟......(شكلنا بدنا نضلنا هوني....ههههه.....)"
" الحمد لله....."
"شرأيك بالليبرالية .....؟"

أيشودا ، بس منا مشكلة ؛ أوم إنت وياها وقيبلو على معناتا على الإنترنت ، هك بينكسر إسا أكتر الجليد إللي بيناتكم ، وإذا ما عندن نت بالبيت سألو حدا من يللي قاعدين وهك بتكون عم تفوت نتفة نتفة بالجو .........
"هههههه......."

يتبع..............

موفق ، وهدا مثل طلع معي عالسريع ، فيك تبدل .:1 (11):

دوكر

05-02-2008, 10:37 PM

يا هلا بالمعلم ايمن...
شو هل الكلام المعسول...بس من هل الجهة ما تعتل همي...ههههه...
بس منو من اول أعدة...
يعطيك العافية...
اخوكم دوكر المعوكر...

Barbie

05-02-2008, 10:54 PM

السلام عليكم ,
أنا سبأ و شاركت بي هل الموضوع . على أمل يكون حكي صح و بفيد , و كمان هلق حابه علق على يلي قالو أبو الروم , ( طبعا ً مع احترامي لرأيو ) , بس أنا بحس انو ما لازم يسأل البنت اذا كانت مصاحبه من قبل أو لاء , لأن هل السؤال محرج كتير و بلبك البنت زيادة , و هي بالأصل بتكون كتير ملبكة .....

بعدينا , هوا لسا عم يبلش يحكي معها و يتعرف عليها لأول مرة , ف هل سؤال بلعكس بزيد الحواجز لأن كتير كتير خصوصي و بسبب احراج أكيد كبير , و ما بظن انو ح يلاقي جواب على هل السؤال , و ممكن البنت تنزعج منو , بوقت هوا بدو يأربها منو و يبني علاقة حلوة معها , و يخطبها . و يحط نفسو محلها و كان في واحدة بحياتو و حدا لسا ما بيعرفو منيح , سألو ف شو موقفو ؟!!!! يعني بلا هيك أسئلة , معقدة , بعدين و اذا كان مثلاً حدا يعجبها , عادي , كل شخص منا معرض ل هل شي , و هادا شي منو عيب و طبيعي . لمهم انو ما يتخطه الحدود . و بالأخير بكون هدا شي مضى و راح و مفي لزوم يدخل بعلاقتن .

هادي مواضيع أصلا ً , غلط تنسأل , لأن بتخلي الحكي مبني على شي جامد , كأن أب عم يحقق مع بنتو . لأن لنفترض كان في حدا بيعجبها فبكون هادا من الماضي لأنها هلق عم تتعرف و تحكي مع خطيبها بل المستقبل اذا صار نصيب .

الواحد بيفوت , عندو ثقة بنفسو و حابب يكون أقرب حدا بهالدنيا عند يلي ح يخطبها , ف من الأهم , يفتح قلبو لها , و يحكي هوا عن نفسو , يعني عن مراحل حياتو لي مرء فيها , و المواقف لي سبق و تعرضلا , هيك بيتقرب منها ان شاء الله , و بصير بياخد رأيها , يعني بيدرس كيف هيه بتشوف الأمور و كمان هيه ذات الشي . و في يمزح معها ميشان يكسر شوي شوي الحاجز يلي بيناتن.

و برجع بقول أهم شي عند أي بنت , انها ترتاح للشخص لمتأدملها , و تحس انها عندو أهم شي , و هون كل شب و أسلوبو و شطارتو بالحكي .
و الصراحة و العفويه أهم شي , لأن الحكي يلي طالع من قلبو بس يكون حقيقي بفوت دغري على قلبها و هادي أقرب طريقة , بتخلي كل تنين مبسوطين مع بعض ان شاء الله .

rami

06-02-2008, 02:17 AM

أنا برأيي المتواضع واستنادا للمقولة "سآل مجّرب وما تسأل حكيم" بنصحك تعمل متل ما عمل أخوك الشبح وأن تترك الأمور تسير على بركة الله ودون أن تتصنع وتتحضر، احمل حالك وروح ووحدو بيطلع الكلام والتصرفات
وصدقني حينها سيكون كل تصرف
ارتجالي ووليد لحظته
ما يعني أنه سيكون طبيعيا مئة بالمئة وبريئا من أي تصنّع وهذا مهم جدا لبعدين
، المهم أن تذهب بنية صافية
وسترى أن الله سيسهّل أمورك وستبدأ بالحديث لتجد نفسك
أنك ترتاح بسرعة كبيرة وتتقدّم
لمرحلة تحسّ نفسك من أهل البيت بفترة وجيزة المهم كلو يكون عالفطرة وعلى بركة الله والله يوفّق يا ربّ.

دوكر

06-02-2008, 02:36 AM

rami

06-02-2008, 02:42 AM

يا هلا بالجميع ...
يسلمو ع المشاركة...
بس حبيت اكيد ع فكرة الأرتجال و عدم التصنع...هادي فكرة كتير مهمة...انا برأي الواحد ما لازم يتصنع الحركات و الكلمات لانا هادا صار ضد الهدف لي جاية من شانو ...انتا خطبت الصبية و عم تتعرف علايا و هي كمان من حءا تتعرف عليك ....ف ازا بدو يصير في تصنع و توعد تجيب مراجع ت تطلع كلمة فا محا تتعرفو ع بعض و محا تعرفو كنو ممكن يصير انسجام بعدين....
يعطيكن العافية...
اخوكم دوكر المعوكر...

تكرم عينك أخي دوكر ولكن لا أعرف لم لم تذكر إسمي بالشكر في حين تذكر الجميع حين تشكرهم ، أنا أحس أصلا أن هناك حزازيات بينك وبيني (وليس بيني وبينك) ولكن لا أدري لماذا؟ هل آذيتك يوما أخي الكريم؟ لأعتذر منك بس! وشكرا

ابو عمر

06-02-2008, 08:43 PM

[quote=Barbie;39609]السلام عليكم ,
أنا سبأ و شاركت بي هل الموضوع . على أمل يكون حكي صح و بفيد , و كمان هلق حابه علق على يلي قالو أبو الروم , ( طبعا ً مع احترامي لرأيو ) ,

واللهي هيك أفحمتينا....يلاّ ما بأثّر.....سجليها واحد صفر إلك....مشكورة:1 (32):....منبقا منردّها إن شاء الله.....وأنا 100000% مع فكرة الإرتجال....وعدم التصنّع....لأنن بينزعو الدنية كلها... و خيي دوكر.... ركّز على الغزل.... لأنّو مفتاح الدخول إلى صميم القلب مباشرة.....و بس يطلع معك كم جملة....ودّيلنا هنّة بمعيتك....لأن أم الروم روح قلبها تسمعهن منّي....سلامات....:1 (22):

ساميا

07-02-2008, 01:10 PM

السلام عليكم ورحمة الله تعالى وبركاته
لن أخوض في تفاصيل أول لقاء كيف يجب أن يكون فهي تختلف من موقف لآخر، وليست في رأيي هي المهمة في مثل هذه الخطوة، لأن التفصيل والتيسير والتوفيق لن يكون إلا بإذن الله رب العالمين وهو خطوة ثانية وليست أولى...
فمن وجهة نظري (وبعد تجربة) إن أراد الإنسان النجاح في أي عمل فلا بد للنجاح من مفاتيح تفتح بها أبوابه ويدخلها من أوسعها،...
أولها وأهمها بعد إستخارة الله عزوجل الإخلاص لوجهه سبحانه وتجنب المزالق أو الطرق الملتوية ولا ينسى الإنسان أنه إن أراد التوفيق فلا يلتمسه بمعصية، فالفتاة في هذه المرحلة لا تزال محرمة عليه وعلاقته بها محدودة جداً وضمن شروط، يحق له النظر إليها والتحدث معها لكن بضوابط، وليعلم أحدنا أن البركة تمحق من أي عمل تخالطه معصية.. فإذا وضع نصب عينيه قول الحق سبحانه:" أفمن أسس بنيانه على تقوى من الله ورضوان خير أمّن أسس بنيانه على شفا جُرُفٍ هارٍ فإنهار به في نار جهنم..." ودخل البيوت من أبوابها، ولبى نداء الحبيب المصطفى عليه الصلاة والسلام:" فإظفر بذات الدين تربت يداك.." فلن يجد صعوبة بعدها في تفاصيل أول لقاء وسيلاحظ أن الألفة ستسعى إليه دون أن يتكلف في البحث عنها لأن الأرواح جنود مجندة ما تعارف منها إئتلف وما تناكر منها إختلف...

دوكر

07-02-2008, 02:53 PM

يا هلا بالست ساميا...
مشاركتك اغنت الموضوع...يسلمو...
و كنت بتمنى انا تكون فيا تفاصيل اكتر...
هلأ يا ست ساميا حكيتي عن المنزلقات...ف اتمنى ان تطرحوا لنا بعضها من اجل ان نتجنبها...
يعطيكي العافية...
اخوكم دوكر المعوكر...

ساميا

07-02-2008, 04:42 PM

أخي دوكر
سألت عن المنزلقات، ولا أظنها تخفى على إنسان اليوم...
لكن المشكلة هي إن كانت المنزلقات في عرفنا اليوم أصبحت أموراً عادية من خلال ما ألفناه اليوم وتعودنا على ممارسته بشكل طبيعي بتأثير من ثقافة الإعلام المشوهة التي دخلت بيوتنا اليوم بشكل سافر...
لقد لاحظت من خلال المشاركات التي تلت طرحك للموضوع مغالطات في مفهوم الصراحة ورفع الكلفة التي يجب أن تكون من بداية الموضوع..
فليست الصراحة هي نبش في الماضي أو محاسبة الشخص على أمور إرتكبها سابقاً ربما ندم عليها..
وليست الصراحة إطلاق العنان للسان في وصف كل ما يجول في النفس من مشاعر إعجاب أو..
ورفع الكلفة لا يكون بإزالة جميع الحواجز والتصرف مع الفتاة وكأنك من محارمها، تخرجان لوحدكما (ولو أمام أعين الناس).. وتستغل فرصة أن لا يكون هناك من يسمعك في كلام على الهاتف مثلاً فتتكلم بما يحق لك أو لا يحق لك..
ليس معنى فترة الخطوبة والتي تبدأ بمجرد أن نويت على الموضوع وحصلت على أول إيحاء بالموافقة، ليس معناها أنك تستطيع أن تتغاضى عن أمور كثيرة بحجة أنك تسعى مع خطيبتك لكي يفهم أحدكما الآخر قبل العقد..
أنت بمجرد أن تكون رجل ممن يرتضى دينه وخلقه وأمانته، فسوف تكون صاحب أهداف سامية ويكون الزواج إحدى الوسائل التي تعينك على تحقيقها وهكذا في إقدامك على هذه الخطوة لا ينبغي أن تخلط السيء بالحسن، وفهمك كفاية...
لك أن تتحدث بما تشاء وبكل وضوح في أمور عن نفسك وشخصيتك وما تحب أن يكون وما تحلم به في مستقبلك، وما الذي شجعك على هذا الإختيار، ولك أن تبدي إعجابك بتصرف أو خلق أو حتى خلقة دون التجاوز في الكلام ففي التلميح أحياناً ما يغني عن التصريح، ولا مانع من الهدايا المتبادلة (تهادوا تحابوا)،.. دون خلوة أو إنتهاك لمحارم الله... وليس معنى هذا أن يكون حديثكما دائماً مسموعاً لمن حولكما.. لكن يكفي أن تكون الجلسة على مرأى من الغير.. وإعلم أن من راقب الله تعالى في نفسه وعلم أنه مطلع عليه في سرّه وعلنه فإنه سبحانه سيتكفل له في الغيب المجهول الذي هو مقدم عليه في مشروعه هذا...

دوكر

07-02-2008, 05:47 PM

يا هلا بالست ساميا...
يسلمو...عنجد وفيتي...
بس بحب ؤل كلمة انو سكوتي ع بعض المشاركات و الأراء المغلوطة منو موافقة ع الكلام لي جا فيا...
انا طرحت الموضوع من شان اسمع رأي كل واحد منكن ...و ان شاء انا بعد كم يوم بحط رأي ...
يعطيكي العافية...
اخوكم دوكر المعوكر...

أيمن غ القلموني

07-02-2008, 06:58 PM

وليست الصراحة إطلاق العنان للسان في وصف كل ما يجول في النفس من مشاعر إعجاب أو..

المهم إن كل شب يعرف إن مراقب من الله عزوجل وإن إسات بفترة الخطوبة ومنو محرم عالبنت .
أما الصراحة فمعناتا العفوية وعدم التصنع، الكلام بدون تكلف وبدون تخطي الحدود .

دوكر

12-04-2008, 03:09 PM

يا هلا بالجميع .......
اه .....نسينا هل الموضوع.......شو بنكملو ؟......ولا بلاها؟.....
طيب ........طيب....طيب........ح كملو .....هههههههه.....
اه ......الحكي طلع ملاو علاقة بالواقع.....يعني الألوان لي حكينا عنا هوني ما بتوصف و السعور محدا فاي يوصفو.....ياويلاي.....ايشودا........بتحس حالك واقع بورطة كبيرة .....بس ورطة من احلى الورطات.....بتلاءي حالك عم تتلبك بالحرف.....نص الأحرف بتصير تطلع معك غلط......بس منيح انو العالم ما بحاسبوك ع هل الشي لأنون حاسين فيك.....ههههههه......
هادا انتا كشب........اه .....فشحال ازا كانت دوكرة من اكتر الصبايا حيا بالدنية .......

يعطيكن العافية .......
اخوكم دوكر المعوكر..........

wassim.h

12-04-2008, 03:48 PM

انا بايد اخي ايمن بالنسبه للعفوية وعدم التصنع، لان هيك هيك بيصيرو بيعرفو بعضن بحء وحئيء ...و بيعرفو اذاكانو مناسبين لبعضن او لأ, وبيعرفو اذا فيون يكفو حياتن كلّا مع بعضن,,احسن من التصنع بيكونو التنينن عم يغطو عيوبن ,,, و بعد فترة من الزواج بتبين الاخطاء وكل واحد ببين اصلو...و هون بيكون الواحد علء....يعني اذا ما تأقلم!!صعبه الرجعه!!!!
فالانسان لازم يكون عطبيعتو ,,والحيى منو عيب!!! ويعتمد عالله ويفكر بعقلانيه,,و اذا حس انا مانا ععقلو بس عاجبو شكلا كتير...يستخير ويعتمد عالله...وعسى ان تكرهو شيئاً وهو خير لكم والله يوفقك اخي دوكر ومبروك سلفhttp://qalamoun.com/Forum/images/icons/icon10.gif

wassim.h

12-04-2008, 04:09 PM

وبتمنى أخي دوكر اذا فيك تغير اسم الموضوع و تحطو"مشاكل ونصائح" منشان الكلّ يطرحو مشاكلن وياخدو نصائح:)

яiиda

12-04-2008, 04:47 PM

يا اخّ دوكر الموضوع مهمّ حقيقة والله يوفّقك......بسّ ازا بدّك رأيي فلازم البنت تكون مهذّبةبسّ منو خجولة أبدا"ومنّو طالع عليها حكي ...ومتل ما قال ابو الروم شوف اذا كانت مصاحبة ابل الشّي لأنّو هادا ابشع الشّي من البنت انّا توقف مع شبّ باالزّواقيق او على البرندات......وبعدين الباقي عليك :1 (31)::d;)........سلام

яiиda

12-04-2008, 04:55 PM

يا اخّ دوكر انتا الموني اصلي اصلي.. بهنّيك
بسّ ازا هيّة ما كانت المونيّة مش رح تفهم عليك ويا الله ادّيش بدّك تتعتّر تا تفهّمها.:):D;)....سلام

яiиda

12-04-2008, 05:12 PM

هلأ يا اخت باربي الشّخص مالازم يسأل الصّبيّة ازا كانت مصاحبة لأنّو أكيد بدّا تستحي الا ازا كانتبلا حيابسّ هي كمان كان لازم تفكّر بالمصاحبة ابل ما تعملا وبعدين خلّيّا تتحمّل نتائج عملتا .؟....
لازم بالأوّل يستفسر عنّا ويشوف ازا كانت مصاحبة......
وهلأ شو بكن عملتو البنات بلا تهزيب بالمرّة هو بالاصل اهل البنت بيسألو عن الشّب ازا مصاحب أو ازا فالت على مزاجو منّو العكس وكمان يا أبو الروم بعد السّؤال عن البنت لازم الواحد يسأل عن نفسو ؟؟
على كلّ الله يوفّق العايزين.
سلام

яiиda

13-04-2008, 03:26 PM

سلام شو سكّرتو على الموضوع يا اخ(دوكر)

فرح

13-04-2008, 04:24 PM

سلام لل جميع..اول شي بدي ادحك ههههههههههه..عنجد يا اخ دوكر طريقة طرح الموضوع كتييييييير مهدومة..معقول طيب تكون مهدوم هيك و ما تقبل فيك العرووووس؟؟؟ ههههه...على كل حال متل ما نصحوك الاخوان انو لازم تستخبر عن البنت و تعرف شوي عن حباتا الخاصة اكيد كرمال الاحراج الى رح تنحط في انت وياها...ما رح اشرح كتير لان حالين ما بتتخيلو يا اخوان المعانات الى عم عانيا لان عم اكتب بال عربي!!!! صار معي انزييييوااااط الحمد لله:] ......و ايزا بالنيهاية ما مشي الحال..انتحرررر...:] هههههه...علا اساس انو رح تموت ايزا ما بتتزوج!!!! هههه عم امزح يا اخوات ما تخافو ان شاء الله جاي نصيبكن:).........الله يادم اللي في الخير للجميع ان شاء الله...:) سلللللللللام:)

دوكر

13-04-2008, 04:34 PM

يا هلا بالجميع...
يسلمو ع المشاركات الحلوة....
يعطيكن العافية...
اخوكم دوكر المعوكر...

همسة

13-04-2008, 05:17 PM

اولا مبارك الخطبة اخي ..
و ثانيا , أاسف لاني لم اقرأ الموضوع سابقا , على كل , هناك مقالة للد. جاسم المطوع تجيب على بعض تساؤلاتكم لذلك ساضعها في موضوع منفصل و ان رأى الاشراف الدمج فلا بأس ..

دوكر

26-11-2008, 11:18 PM

يا هلا بالجميع .......
كان في واحدة معنا بالمنتدى اسما همسة مهيك؟.......وين صارت ؟.....عيطولا ......وقلولا انو موضوعا لي حتطو عن الدكتور جاسم .....مفعولو كتير منيح ....و مفيد......
أيمتن يا شباب و يا صبايا بدنا نكمل الموضوع؟ ...........
يعطيكن العافية......
اخوكم دوكر المعوكر..........

روعة

27-11-2008, 12:21 AM

أنقل الطلب

ولا أضمن الإيجاب

SIRAH

30-11-2008, 06:35 PM

ما شاء الله عليك يا معوكر ما بينعتل همك ابدا هههههههههههه
لازم سؤالك يكون نصايح لاهل البنت يلي رايح لعندن لان هني يلي رح يتلبكو قدامك ماو انت ههههههههه
بس بقلك شي كل شي قسمة ونصيب يعني هلمرحلة رح تمرؤ وتعدي متلها متل الموت ما في داعي تخطط ولا تفكر توكل على الله وروح ومتل ما بتجي تجي
واهم شي تكون انت مقتنع بالبنت انها هي يلي بدك تشاركك حياتك يعني ما المهم امك تكون عاجبتها ودالتك عليها ولا اختك ولا قرايبينك المهم انت يا ريت تكون فهمتني

دوكر

30-11-2008, 09:27 PM

يا هلا بالست او المعلم سيره......
صحيح كلشي قصمة و نصيب ......بس اهم مرحلة الواحد يعقل فيا و يتوكل....لأنو هاي حياتو .....من هوني بدو يأسس و يبني اسرة......فإذا ما عرف يختار .......محا يكون مرتاح......و ازا طلعلو واحدة ادامية متل دوكورة........بتفهم علي .......بتعرف بأيش بفكر.....بتعرف شبدو ......بتحس بلي بحس فاي ......مبسوطة انا معو .....و هو مبسوط انو معا.......اخلاق....دين.....تفكير ....جمال........الحمد لله .......
بعدين مين قال انو امي منقيتا......إلبت الدنيا ت لءيتا .......ههههه.........
يعطيكن العافية ...........
اخوكم دوكر المعوكر....................

almo7eb

30-11-2008, 09:47 PM

هوي صحي أنا إسمي المُحِبّ، بس ريتوا يِضْرَبْ هالحُبّْ إسَّن ما تعرفت علي، بس متل ما بيقولوا " ما مِتِتْ ؟ طَيِّبْ ما شِفِتْ مين مات ؟ "
فا يا شباب نصيحة لله ، ما حدا يفكِّر يحِب إلا إذا كانت خِطِبتو قريبة ! أحسن ما يشوف نجوم طالعة عطول !

اشرف

30-11-2008, 10:13 PM

يا هلا بالمعلم المذنب.......
هلأ كل واحد لو رأي .........و ماحدا لو معك معأنو رأيك منو واضح.......بس في شغلة .......انو انا طرحت الموضوع منو ت ناقش من وين الواحد لازم يوخد......بس لي كنت حابب نحكي فاي هو شلازم الواحد يعرف عن لي بدو يخطبا .......و ايشيا الأفكار لي لازم يحكو فيا بفترة الخطيبة ........
و ناطرين الشباب و الصبايا.......
يعطيكن العافية ........
اخوكم دوكر المعوكر.........
منقول مع بعض التعديل... والله يوفق كل من نوي السترة بالحلال ع سنة الله ورسوله...
يحلم كل شاب وفتاة باليوم الذي يجد فيه من يشاركه حياته، غير أن الكثير منهم يفتقدون لمهارات اختيار ذلك الشريك، والأسس الواجب توفرها فيه.. حتى إن تمت عملية الاختيار فعلا، وبدأت الخطبة فإن الكثير من الشباب لا يجيدون كذلك فن الغوص في شخصية الشريك لتحديد ملامحه من خلف قناع التجمل الذي ربما يضعه البعض خلال فترة الخطبة.
فكيف نعرف مدى ملاءمة الطرف الآخر لنا؟ ومتى يجب علينا الابتعاد؟ ومتى نكمل الخطبة؟ وما هي الأسئلة التي يجب أن نطرحها، والمواقف اللازم حسمها قبل إتمام الخطبة أو حتى بعدها؟.
إن الدين أساس كل شيء، فإن كانت الفتاة متدينة حقا عرفت كيف تحترم زوجها وتعاشره بالمعروف، وأيضًا تحفظه في عرضه وماله وقت غيابه، وتلم بالأسس القويمة في تربية الأبناء.
وثانيا: ألا يعلم أحد بتفاصيل حياتهما المشتركة، ولا يتدخل طرف ثالث بينهما إلا في حالات الضرورة القصوى التي يحددانها مسبقًا.
أما الأمر الثالث فهو: الاتفاق على ألا يتم إجراء مقارنات بين حالهم وأحوال الأقرباء أو الأصدقاء من أي وجه؛ فظروف كل شخص تختلف عن الآخر، ومثل هذه المقارنات تؤدي إلى الكثير من المشاحنات المستقبلية.
أهم ما يجب على المقبلين على الزواج اتباعه هو دراسة الطرف الآخر جيدا وعدم الاستعجال، وكذلك جمع المعلومات عن شخصية الشريك المحتمل، سواءً السلبية أو الإيجابية.
وعليه أن يقوم بموازنة الجانبين جيدًا، وتقرير إذا ما كان يمكنه التعايش مع العيوب والتغاضي عنها أم أنها من شأنها أن تعطل مسيرة الزواج.

أسئلة للطرف الآخر ليتسنى له معرفته على حقيقته والتعرف على فرص استمرار الحياة معه..

1-ما هو طموحك في الحياة والهدف الذي تسعى لتحقيقه؟
ليتحقق ما إذا كانت هذه الطموحات تتناسب معه أم لا، فقد تكون أقل مما يطمح إليه أو تتعارض معه.
2- ما هي الصفات التي تحب أن تراها في شريك الحياة؟
وذلك لدفع الطرف الآخر للحديث ومعرفة ما بداخله وما يحبه وما يكرهه ومعرفة مدى مناسبته لنا.
3- تحديد الموقف من جميع المسائل المصيرية، مثل إنجاب الأطفال، والموقف من عمل المرأة، وحدود العلاقة مع الأهل... إلخ.
4- معرفة إذا كان أحد الأطراف يعاني من مشاكل صحية أو عيوب خلقية تجعله غير قادر على مزاولة حياته الاعتيادية.
5- من هم أصدقاؤه وكيف يتعامل معهم وكيف يعاملونه؟ إذ إنه يعتبر قياسا لشخصيته.
6- معرفة شكل علاقته بوالدته ووالده وإخوته؟ وكيف يدار أسلوب الحوار داخل البيت الذي نشأ فيه؟
7- ما هي درجة علاقته بربه ومدى تدينه؟
كل هذه الأسئلة يجب أن تطرح على الطرف الآخر، ويجب أن يجتهد لمعرفة مدى ملاءمة الأجوبة للواقع، حيث يتعمد البعض الإجابة بإجابات ليست صحيحة لرسم صورة معينة لدى الطرف الآخر.

محمد أحمد الفلو

01-12-2008, 09:08 PM

فا يا شباب نصيحة لله ، ما حدا يفكِّر يحِب إلا إذا كانت خِطِبتو قريبة !

نصيحة قيمه:1 (54):

الرجل المعتدل

02-12-2008, 09:25 PM

دوكر

23-05-2009, 01:54 AM

ههههههههههههه ....
يا شباب هلأ صار فينا نكمل الموضوع من كل الجوانب .... وينكم ... محدا صار معو شي جديد ؟..... قصدي بالموضوع محدا يروح فكرو لفكرة تانية ....

Amer-ol-tabche

23-05-2009, 02:38 AM

يا لائمي في هواهُ و الهوى قَدَرُ

لو شَفَّكَ الوَجْدُ لم تَعْذل و لم تَلُمِ
أنا بدي علء على بيت لشعر إلي حاطوا ألمحب بكلمه واحده
**** فخامه****
أكيد هو بيت من قصيده مدح بالرسول صلى الله عليه وسلم

وبالنسبه لموضوعنا ف يا دوكر روح خبص بالحكي راح تعملنا منا قصة ،،، لسانك بضيع ١٠ محققين..............ماشالله http://forum.qalamoun.com/images/icons/icon12.gif

Amer-ol-tabche

23-05-2009, 02:49 AM

فا يا شباب نصيحة لله ، ما حدا يفكِّر يحِب إلا إذا كانت خِطِبتو قريبة ! أحسن ما يشوف نجوم طالعة عطول !
أنا بخالفك الرأي تماماً ،، ليش النجوم الطالعة من ايش بتشكي http://forum.qalamoun.com/images/icons/icon6.gif

ramo

21-11-2010, 07:38 PM

يُرْفَع للفائدة ( لبعض الناس )
موضوع جميل :o

Nader 3:16

22-11-2010, 12:53 AM

يُرْفَع للفائدة ( لبعض الناس )
موضوع جميل :o

بارك الله فيك يا أخ رامو على هذه التذكرة المهمّة.
سؤال.
شرأيك بطريقة دوكر ؟
هل توافق عليها؟
انا حسيتها ضياع.
ونتمنى على بعض ناس و دون ذكر اسماء انو يشاركوا كون عاشوا او عم يعيشوا الوضع .