هذه طفولتي

[الزاهر]

هذه طفولتي

موضوع نسرد فيه بعض التفاصيل عن أهم الألعاب التي كنا نلعبها أيام الصبا (طميم، لئيطة، آموع .... ) .... كيف كنا نلعبها وأين ... وما هي قواعدها ... وما هي أوقاتها ...

[الزاهر]

بسم الله الرحمن الرحيم


نبدأ السلسلة مع أهم الألعاب وأمتعها بالنسبة لي ... حاروئة الفطبول ... كما كنا نسميها ....

ورح أكتب شوية بالعامي وئت اللزمة !!! :)

وهي مرحلة مطورة من لعبة الطميم ... فسأجمل في هذه المشاركة اللعبتين إن شاء الله

ونبدأ مع الطميم
ويتألف اللاعبون فيها من جبهتين ... جبهة "اللي طامم (وهو أشبه ما يكون بالصياد الذي مهمته اقتناص الطايرين)" وجبهة "الطايرين (وهم كالطرائد الهاربة المختبئة)" ... ولهم "سمليحة" ... وهي المكان الذي يعتبر مركز اللعبة ... حيث "بيطم" الطامم ... وحيث الطايرين "بيؤولوه" ... والطم هو أن يقف الطامم قبالة السمليحة ويخفي وجهه بيده كيلا يتمكن من روؤية الطارين واتجاههم لمخابئهم ...

وتبدأ اللعبة بالتعارف ... فيجتمع اللاعبون ويعلن كل واحد اسمه كي يتعرف الباقون ممن لا يعرفه عليه .... ثم تجري قرعة بطريقة خاصة لاختيار الذي "رح يطم" .... وتكون القرعة أغنية بالعادة للأولاد وقرعة من نوع آخر للكبار ... (مثال :كان في --- عصفور --- عالشجرة ... عم --- بيعد --- للعشرة ... 1 2 3 4 5 6 7 8 9 10 ... والذي يصيبه الرقم 10 يطم)

يطم على السمليحة ... (حائط بالعادة أو شمعة بناء أو عامود كهرباء ... ) .. ويحدد العدد الذي عليه أن يعد حتى يصله ليحق له أن يبدأ صيده بعده ... ثم يعلن مجيئه بصرخة عالية ... "أنا جيــــــــــت!!!" ... ويبدأ بحثه عن الطايرين .... وبمجرد رؤيته لأحدهم يبدأ السباق للسمليحة ... فإذا استطاع الطامم قول اسمه ويده على السمليحة فيخسر الطاير ويصبح اسير ويجلس بانتظار أن يأتي طاير آخر ليحرره ... وإذا استطاع أحد الطايرين الوصول للسمليحة فيضع يده عليها ويذكر اسم الطامم فيحرر جميع الأسرى ويصبح على الطامم الطم من جديد والعد بسرعة لعدد سبق تحديده ثم يبدأ بحثه من جديد ...
وهكذا حتى يتمكن الطامم من اصطياد جميع الطايرين !!! .. ويستلم الطم أول من استطاع الصياد قول اسمه على السمليحة ...


أما حاروئة الفطبول ... (والفطبول هو الطابة بتعبيرنا !!!)
فتختلف قليلا ... لكنها تشترك في وجود سمليحة وطايرين وطامم وعد ....
فالسمليحة في هذه اللعبة مألفة من سمليحة + طابة
وبدل أن يكون على الطايرين وضع يدهم على السمليحة وقول اسم الطامم فيكون عليهم "شوط الفطبول" (قذف الطابة) لأبعد ما يستطيعون .. فيكون عندها على الطامم الإتيان بها ووضعها أمام السمليحة في مكانها والعد للعشرة ثم بدأ صيده من جديد .. وفي هذه الأثناء يهرب الطايرون من جديد ويتحرر "الملؤوطين" (الأسرى) ..

واللعبة هذا تتطلب لياقة بدنية عالية وسرعة تفكير ومهارات عديدة ... وهي من أجمل الألعاب التي كنا نلعبها ...


وكنا نلعب الطميم بالعادة في حارة العين أمام مصلى صلاح الدين الأيوبي ... الكائن أمام العين ... ونتخذ عامودا خشبيا سمليحة ... ولكوني كنت أصغر اللاعبين كنت دائما من الطايرين ... وكثيرا ما كنت أختبأ في شباك المصلى لصغر حجمي ... وكنت السلاح السري للطايرين ... أنتظر لآخر لحظة عندما لا يبقى غيري من الطايرين حرا .. وأنتظر ابتعاد الطامم عن السمليحة ... فأقفز من الشباك بدون أن يراني الآخرون وأحرر الجميع !!!!

أما حاروئة الفطبول فتحتاج لمكان لا يكون قذف الطابة بأقصى ما يملك المرء من قوة مؤذيا .. فعادة كنا نتخذ من حقل من الحقول شجرة نعتبرها سمليحة ... فلا يتأذا أحد من قذف الطابة ... وما شاء الله البركة بالأخ رياض سمير حمزة ... كانت له رمية صاروخية فيقذف الطابة 100 متر وأكثر بكل سهولة !!! ... وروح بروم عليها إذا بئا فيك تلائيها .. ومنكون نحنا صرنا بآخر ما عمر الله وهالطامم بيتعتر !!!! :) ....

وحاروئة الفطبول لا تصلح أن تكون لعبة شتوية لهذا السبب ... فكنا نبدلها بالطميم أيام الأمطار والوحل !!!!



ناطرين مشاركاتكم ها !!!! .. خصّة الأدام الكتير متل العم جابر والشامي وأبو حسن وهالفرئة .... :)

السلام عليكم

[دوكر]

يا هلا بالمعلم أطر و الله ......

عندك كل نهفة ؤصة ......يأطع خملك صحيح كل يومين بتزكر هل الألعاب و بقارنا بألعاب الولاد اليوم بي س بي و ما بلايستايشن و ما بعرف ايش .......و لك شوف الولد كيف بيطلع بهل الايام يا معلم ......ايشودو .....عنجد بتحسو معاق.......ما بيعرف يركد ......بيتفشكل بصابيع اجراي ........ما بيعرف يمسك الطابة .....بتلاقاي خنتة ......يعني عيب اذا كان الوالد راجع هيكا مغربيات على البيت و متلانمن فوق لتحت تراب و صنا ؟؟ ......وين العيب فيا......وقت اللعب ما بكون بتأم الكرافات........يعني لو تيابو .......يلعب المهم ما يأزيحالو كتير......خلو ينبسط بطفولتو .......هلأ هادا لي بكرا بدو يكبر و كل لعبو على الكمبيوتر .......شبدو يحكي لولادو مغامرات.......شبدو يتزكر......هو و كان بالكروم و نط عن الصخرة ......اكيد لأ.......بدو يتزكر انو ختم لعبة جي تي أي بليلا؟؟.....شو هل الانجاز.......في احلى من الذكريات من هل الألعاب الطفولية؟........يعني لو بصحلي ألعب طمين......بالحارة ما بأصر.......يعني كنا نأصد حارة العين الأبية من شان نلعب هل اللعب و تحديات........

يعطيك العافية......
اخوكم دوكر المعوكر......

[الزاهر]

يا هلا بالمعلم أطر و الله ......

عندك كل نهفة ؤصة ......يأطع خملك صحيح



آمين !! .. من تمك لباب السما !! (أولة النسوان !!!:))




........يعني لو بصحلي ألعب طمين......بالحارة ما بأصر.......يعني كنا نأصد حارة العين الأبية من شان نلعب هل اللعب و تحديات........




لك يا هلا بزميل الطفولة !!!

شفت كيف ... متل ما القلمون هي عاصمة العالم ... فـ حارة العين الأبية هي عاصمة عاصمة العالم !!!
مننا متعصبين أبدا ... ما هيك !!!
:)

معلم دوكر ... بدنا مساعدتك بكم لعبة ... مثلا الغلل ما بعرف قواعدها .. ما بحياتي لعبتا !! ... كذلك الآموع !!!

[AbouRajaa]

و الله يا معلم زاهر
نحنا بحارة الرفاعية بببنين
أكثر شي كنا نلعب بالغول و بالضَّرب !
الغول معروفة
و الضَّرِبْ نقَسِّمِ بَعِضْنا لَفْرَق و كل فرقة لها زعيم
و بيمشي الضرب
و الحرب يا أخ زاهر متل ما بتعرف
كر و فر
و يا ويلو يللي بتلقطو فرقة تانية
" لعبة حلوة ما هيك ؟ "

[Nader 3:16]

السلام عليكم....
وبما اننا قضينا نصف عمري في السماقة...و هي مجموعة الحءالي الموجودة في الضيعة و التي لها منافذ عديدة....وهي كانت الاساس عنا بالحارة....
كيف ما ضيعت الشباب كنا نلاقيهم بالسماقة...سواءً بالصيف او بالشتاء في النهار او بالليل...
المهم كنا نلعب العاب كتيرة بين هالحقالي...و من اهمها : الغول(بين الشجر)...الطمين...المصارعة الحرّة...و الطس بالزفير...و رح احكي قواعد لعبة الطس بالزفير...

لعبة خطيرة طبعاً و كل واحد من اللاعبين بيتحمل مسؤولية مشاركتو باللعبة...كنا نقسمها فريقين طبعاً...و قبل بدأ المواجهات تكون الجولة التحضيرية و التي هي عبارة عم تجميع الزفير اما بتنقايته من الشجر مباشرة او لمّه عن الارض...

و تنقسم المواجهات الى قسمين:

المواجهات الغير مباشرة: (لازم تكونوا نازلين عالسماقة تتعرفوا المقصود)...السماقة فيها صار عالي وواطي و بهذا النوع من المواجهات يكون كل فريق بأحد الصارات و تبدأ المعارك بقذف غزير من الطرفين للزفير بالعالي و يتم الاحتماء تحت الشجر...و عادة هذه المواجهات تنتهي دون اصابات تذكر.

المواجهات المباشرة: التي تتم ضمن الصار الواحد بحيث نضع حدود للفريق يمنع قطعها...و يقوم كل فريق بتحضير المدرعات و المضادات و التي هي عبارة عن رفاصات لشي فرشة محروءة..ترد الزفير عن المتحاربين..و عادةً ما تنتهي هذه المعارك بإصابات خطيرة...مهيك يا جنرال هديد؟؟؟ ههههه

ويا ما ناس مكسرة العوينات و شي مروح عينو و شي مدري ايش من ورا هاللعبة يلي بشوفها احلى من ال PSP ...


اما بالنسبة للعبة المصارة الحرة ...فكانت العادة هو انا نسرق شي فرشة او نلقيها و نسرق دعامات حديد و حبال و يتم انشاء الحلبة...و كنا نتابع المصارعة عالتلفزيون..فكنا نتقن كل الضربات...و كنا نلعب TAG Team يعني 2 ضد تنين او واحد ضد واحد حسب الموحودين...بس للأسف ما كان فاي احزمة للفائزين...وعادة المباريات تتخللها عروضات فنية من الاخ ريان بلوط و ال SIFINGO ....وماكانت كتير مؤذية لأنو كنا نعرف نمثلها صح....وانا كنت حب اعمل ضربة اسمها Stunner ...

ربما تسألون كيف كنا نقضي كل هالوقت بالسماقة مندون اكل ولا شرب...بسيطة السماقة فيها كل انواع الاشجار المثمرة على مر السنة : رمان (عفكرة اساتني و الله حافظ الرمانات الحلوين من الحامضين)...زعرور....حامض جنارك و خوخ و كتير شغلات لا تحضرني الآن....وكنا كل يوم في نشوي بطاطا بالليل....كل مرة نطلع عند الست وصال و تعطينا بطاطا او من عند نجلة او مرت الفضل...

عيادة طبية::::: كان بس واحد ينفدغ او يصيبو شاي ...فوراً نطلعوا عند نجلة...
يعني شبدو الواحد احسن من هيك...

الله يرحم هاديكا الايام....حياة الحقالي و الحارة....

وبالنسبة لهلأ...لا تعليق لأنو مفي شي من اجواء ايام زمان عصعيد الضية و فاي العاب انقرضت نهائياً...

ورح ارجع كفّي مرة تانية بقية الشغلات.

[hadid]

يا ليت الطفولة تعود يوماً !!

أنا بحكم وجود بيت جدتي الله يحفظها ويطيل عمرها بحارة الشهيد ،،، كنت أقضي كل أوقات طفولتي بالسماقة (طبعاً صيفاً وأثناء العطلات التي كنا نأتي فيها إلى القلمون لأني أنا من مواليد جدة ودرست فيها 12 سنة )

شباب السماقة هم
أنا
أخي (أمير الثّباب)
خالي طارق حمزة
عبد السلام العتم
الجنرال نادر الأبيض
الجنرال وسيم بلوط
طه التنبكجي
مصطفى الحلو
عمر الحلو
علي الحلو
هودوز
كوري
سيفينغو
وسيم حبلص
هاني بيضا
جبران حبلص
طيب حبلص
أديب حبلص
ريان بلوط
أحمد سليمة
عبود منصور
مصطفى سعود
مازن إسماعيل
فادي الأبيض
فراس الأبيض
أحمد عمران
أحمد التحاح
فيصل لعلع
عبدالله صهيون كان ينزل كمانة
والجنرال القائد (لاحقاً)
وكتير كتير غيرن لا أذكرهم وفي جيل كان مستلمها قبلنا بضم العابد وفي قبلو أجيال بس البشع إنو نحنا كنا آخر جيل هالولاد الأصغر منا بيلعبو بالحارات ومعادو بينزلو عليها !!

ويعود تدريب أعضاء اللجنة المبجلة على العمليات بمختلف أنواعها إلى السماقة بصفتها ساحة التدريب الأساسية

تدريب على الطمّين، المزة، كرة القدم، كرة طائرة، آص نشاب، طس زفير وزنخلخت (بعدني لهلق ما بلفظ الكلمة صح)، تدريب تعربش على الشجر والحيطان، لك وحتى كان عنا تمرين سباحة (أنا دربت أحد الإخوة ولكنه مانتفع، دلو خايف ما يغرق)
عمل الشاي، مناقيش على الصوج، قطف الزهر والفواكه الصالحة للأكل (كل هيدا دعم لوجستي)
وكمان كان عنا تعليم بالسماقة طبعاً هالجانب لا يمكن أن نهمله وكنا نتسجل بدورة تحفيظ القرآن بالمنار فكنا نقوم بحل الواجبات والحفظ بالسماقة بالكثير من الأحيان
كان كل واحد عندو لعبة جديدة بالبيت يجيبها معو ونتشارك اللعب فيها وهيك

وكان من أهم الأعداء هم حارة العين !! وكانت هيي السبب بإنضمام العديد منهم إلينا لاحقاً منهم محمد الخباز وآخرون

كل ما نعمل شي معهن يعني مثلاً لعبة غول كانت تنتهي بعلقة مرتبة آخرها كانت يوم يلي لعبنا ضدهم ماتش فوتبول وكانو فايزين علينا 2 ل 0 وما كان بنا إلا أن أعلنا الحرب عليهم ( أنا ما بعرف لليوم سبب العلقة أو كيف بتدت بس الجنرال نادر من شوي قلي إنو لما كنا خسرانين كان جبران منو عم يلعب فأشار إليه الجنرال وسيم والجنرال نادر لإفتعال مشكلة وما كان به إلا أن دفش اللاعب شيبوب وقتها كان من لعيبة فريق العين ) وفعلاً بتدأ الضرب ويومتها بتذكر إنو أنا شخصياً علقت مع أحدمهم ومسكني من رقبتي آم حملتو وألقيتو جانباً ووقتها ضربناهم عن حق وحقيق يعني لو ما ردينا بعض الشباب كانو أذوهن لتبعون العين أذى حقيقي... فما كان بهم إلا أن بدأوا بالهروب ( نحنا عددنا أكبر منون بكتير والمعركة على أرضنا وقتها اشتغل مش طس الزفير اشتغل طس الأحجار ونحنا منعرف كل شي في مخارج فهني وهاربين التفينا حولهم الكثير من المرات يعني المساكين ماعادو يعرفو يهربو وكان بيننا الأخ هاني بيضا هيدا ما معو عقل صار يطصن بأحجار كبيرة حتا على الطريق إديم الناس هههههه )

وكان عنا بالسماقة خيمة منصوبة نجتمع فيها بالليل على شوي البطاطا ورواية القصص المفزعة عن الجناني والحيايا والذئاب وهيك

وكان عنا حلبة مصارعة يلي تكلم عنها الجنرال نادر وهيدي شي جديد من أواخر ما ابتكرناه بالسماقة وكان الأخ ريان بلوط بقلد المصارع جيف هاردي كتير منيح وعطول يبهرنا بتقليدو والجنرال نادر يبهرنا بتقليد المصارع ستون كولد ستيف أوستن لذلك ترون في إسمه nader 3:16 لأن المصارع كان رمزه Austin 3:16 (فضحناك يا نادر) ههههه

الجدير بالذكر إنو أي لعبة من هيدول كانت تمتد بكل الضيعة ومنها محصورة بالسماقة ( الطمين والمزة والحروب الأخرى ) وما كنا نأبه للناس بالشارع أبداً ويا ما صايبينون وهاربين منن وكاسرين قزاز و و و و و .....

وكمان كنا مداومين بالسماقة دوام حتى إنو البعض كان ينام بالخيمة !!!
وفي قصة بس ترجاني الأخ نادر على عدم نشرها لأنها جرصة !! جرصة كبيرة !!

نحنا ناطرين مشاركاتكم !!!

[Nader 3:16]

ولا تنسى كيف كنّا نزين الحارة من جنب مدرسة البنات عالاعياد. وكنا نعمل مسيرات بالحارة و احياناً حملات تنظيف للحارة.
والحمد لله الآن الحارة صارت مزينة اكتر بعودة بلال.
يعني حارتنا انا بشوفها احلى حارة بالعالم. خصوصاً و انها تطل على السماقة.

و اصحا بالك تذكر هاديكا الؤصة. لأنو فضيحة ..منو جرصة...
و انا سأكمل بقية القصص. تباعاً لما بكون معي وقت كافي ان شاء الله.
وبسيطة مقبولة منك قصة ال 3:16 ..الله يسامحك..
سلام ولا تنسى الفيديوهات يا هديد. الله يرضى عليك.

[محمد أحمد الفلو]

و الضَّرِبْ نقَسِّمِ بَعِضْنا لَفْرَق و كل فرقة لها زعيم
و بيمشي الضرب
و الحرب يا أخ زاهر متل ما بتعرف
كر و فر
و يا ويلو يللي بتلقطو فرقة تانية
" لعبة حلوة ما هيك ؟ "





حسب ما خبرني زيان إن ب ببنين كان جزء من ها لعبه الرجم بالحجارة ... يمكن هادا أحلى شي باللعبه :1 (1):

[جابر دملوك]

فِرَاخ ... فِرَان
كلمتين أريبين ل بعضن ب يلخبطوا وأتل ب ينآلوا ب سرعا.
و طبعاً هادا سر اللعبه.
هادي يا أوادم عبارا عن فرئتين أد بعضن.
فريئ إسمن فِرَاخ و التاني إسمن فِرَان.
(1-1) (2-2) (3-3) هلي ب يلتآ.
و واحد عم يدير اللعبه.
ب يرسم حِيْزَين ع الأرض ب سوِية بعضُن و ع بعد فشختين عن بعضن البعض.
كل فريئ ب يوأف ع حيز منن و مستعدين يركدوا ب الإتجاهين حسب الكلمه.
إزا الحكم آل " فِرًاخ " فريئ الفراخ ب يركد ورا فريئ الفران ت يؤتلن.
و الأتل طبعا رزه ع الضهر يمكن تعلم ع شهر.
و العكس إزا الكلمه كانت " فِرَان "
و الفريئ هلي ب يُبْآ منو لعيبه بيكون هو الرُبْحَان.
بس مصيبه اللعبه إنا بتعتمد ع سماع الكلمه
و الكلمتين متل مَنْكُن ملاحظين ما بيختلفوا إلا ب الحرف الآخراني.
و ياما اللعيبه ب يخبطوا ب بعضن لأنو كل واحد سمع شكل.
^| |^
^| |^
^| |^
*

[الزاهر]

شكرا جزيلا لكم على تفاعلكم ... بارك الله بكم

يا صبايا وبنات المنتدى ... مك تحكولنا شوية عن ألعابكن ؟؟ .. هادول اللي كنتو تلعبوهن إنتو وصغيرات ... سي سي مدري ايش ... وهالألعاب اللي فيها اغاني .... والعفريتة وهالأمور ... شو أصتهم ؟؟

[AbouRajaa]

حسب ما خبرني زيان إن ب ببنين كان جزء من ها لعبه الرجم بالحجارة ... يمكن هادا أحلى شي باللعبه :1 (1):




أحلى لما واحد بيوقع بالأسر يا أخ حميطون
شو بياكل ضرب ؟؟
شو بيتبهدل ؟؟؟
الحمد الله الذي لا يحمد على مكروه سواه

[مايا]

السلام عليكم ورحمة الله وبركاته
كان في لعبة نلعبا نحنا البنات
وهي انو كان بنات يعني شي خمسة او أكتر نعمل دائرة ونغني ( فتاتي فتاتي (ماما ) أكلوا خبزاتي ( ماما ) خبزاتي طرايا (ماما ) شغل السرايا ( ماما ) كيف الضحكة هههههههههه وكيف البكية هوهوهو)
ولسا في كتير متل العفريتة وايام الأسبوع والطمان وعالى واطي ووووووووو
بس لنترك مجال للأخوات .........
وشكرا أخ زاهر على الموضوع .......
وبعدين انتو عم تحكوا انو الولاد عنكم بيلعبو بلايستيشن ايه نحنا البنات يلي عمرهم خمس سنين ( الا من رحم ربي ) صار حكيهم كلو على هيدا طلع فيني وهيدا حكاني وهيدا عطاني وردة ومدري شو ........ فاشكروا ربكم انتو أفضل من غيركم بكتير ........

[Barbie]

السلام عليكم و رحمة الله و بركاته ,

من الألعاب التي كنا نمارسها : خريطة , شرطة و حراميه , الطميم , لءيطه, عفريته , و ( القاموع و الكلل بس هلء ماني ذاكره كيف كنا نلعبن ) , و( بيت بيوت : إنو نعمل حالنا متل أمهاتنا كبار و منزور بعضنا ... و هيك )

و كمان : يا سلوى ليش عم تبكي , فتحي يا وردة , و إسن كم لعبه متل ( un elephant ) و ( passe passe ) و طاء طاء طائيه ه دال الأغاني ...

اسن كان في لعبه اسمها " الحواجز " , إنو منكون على البساكل و في حواجز ما فينا نمرء إلا إذا عطيناهم ورقه ( و كنا نستعمل ورق الشجر ) و أكيد كان فيا تفاصيل زياده بس نسيتها .

و آخر لعبه بذكرها , هي لعبه خاصة . ما لها اسم , يعني كنا نغمض عيون واحده و نمشيها على الطريق ... و بعدين بدها تعرف لوين وصلنا ( لأي حارة أو مكان ) .

[حُسَينْ ... !]

شكرا جزيلا لكم على تفاعلكم ... بارك الله بكم

يا صبايا وبنات المنتدى ... مك تحكولنا شوية عن ألعابكن ؟؟ .. هادول اللي كنتو تلعبوهن إنتو وصغيرات ... سي سي مدري ايش ... وهالألعاب اللي فيها اغاني .... والعفريتة وهالأمور ... شو أصتهم ؟؟


:)
بتعرف هل اللعبة بتفرطني من الضحك !!


si si si

mi mi mi

o mina

o mina do

bashkaleta zinawer

:) اكيد في كمالة بس ما بعرفها ، و عارف التعليق :) شلاك دخل بهيكا اشياء ؟ ، بس حبيت فيدكن ، عسى ان يكون لنا اجر :)

[روعة]

حروب بالونات المياه

أما المتحاربون ف "حارة البقاع" و"حارة طحطح"

مركز تعبأة الذخيرة من طرفنا كانت حنفية ستي أم أبي رحمها الله

ومركز الرشق الأساسي كان بلكون بيتها

وكل ما كانت كمية المياه المعبأة مدروسة بشكل جيد كل ما تلّت عدد أكبر من الأعداء

هذه اللعبة صبيانية

وكان دورنا تعبأة البالونات

مدربين منيح:)

[أيمن غ القلموني]

السلام عليكم ورحمة الله وبركاته
وبعدين انتو عم تحكوا انو الولاد عنكم بيلعبو بلايستيشن ايه نحنا البنات يلي عمرهم خمس سنين ( الا من رحم ربي ) صار حكيهم كلو على هيدا طلع فيني وهيدا حكاني وهيدا عطاني وردة ومدري شو ........ فاشكروا ربكم انتو أفضل من غيركم بكتير ........



إن شاء الله بهمتكون وبهمة الفتيات أمثالكن بيصوروا بيقروا قرآن وصحيح البخاري

[lina k]

السلام عليكم,والله موضوع حلو كتير وبينسينا شوي مصايب العلوم..........

أنا بذكر كلّ الألعاب يليّ كنت إلعبها, بتذكّر إنو كنا نلعب"un elephant",كنا نعمل دائرة أنا ورفقاتي وبلّش لعب...وكمان كنا نلعب لعبة"sheri sheri mingo"كانت من ألعابي المفضلة وكمان لعبة"passe passe passera" ولعبة"ja ja jeci" ولعبة"bombon bombon bombarella" ولعبة "العفريتة" وفي لعبة "توك توك توك مين أنا الديك"(بذكر إنيّ كنت دايماً إختار اللون الأحمر).وأحلى شي بطفولتي, إنو كان فيها حروب بين الصبيان والبنات.وبتذكّر إنوّ مرة بصف الرابع,كنا عم نلعب بالكروم حدّ مدرسة المنار وكنا شي 10 بنات وفجأة بيجوا الصبيان وكان من ضمنهم(ما رح أذكر أسماء هنا عرفوا حالن:)) وبدن يكحشونا ساعتا نحنا ما قبلنا وبلشت الحرب صاروا يرمونا بالحجار ونحنا نصرّخ وأحلى شي بالموضوع إنو واحد منّن (الله يسامحو:)) ضربني بخفانة عإجري ساعتا صرت إبكي قامت وقّفت الحرب وهربوا الصبيان(كانوا خوّفين كتير) وحملوني البنات(ما رحنا على البيت رحنا نطالب بحقوقنا) ورحنا عند أهالي الصبيان وشكيناهن(أخدنا حقنا)...............وكمان بذكر مرة كنا عم نلعب لعبة,مين بيقدر ينطّ عن أعلى درجة فكلّن نطوا عن الدرجة التالتة وأنا حبيت إني نط عن الرابعة وأصريت على هالشي وعملتا نطيّت بس بعدين ما عرفت شو صار فتحت عيوني ولقيت حالي عند الطبيب وطلعت مكسرة أصبع إيدي وأنفي,وحسب ما قالولي قال أنا نطيّت بس بلا ما نطّ على الأرض كفيت طريقي وفتت بالحيط وصار يلي صار............(بس المهم إنيّ طلعت جريئة أكتر منن:))وكمان كنّا نلعب basket ball مع ولاد خالي تحت بيتن(كانوا يتقاووا علينا أنا وأختي ويربحونا بس بالغش لأنو يعملو فرقة صبيان ضد فرقة بنات يعني ما في عدل...خصوصاً إبن خالي الكبير كان ما يقبل فينا حلفاء معو بالفريق لإنوّ بيعتبرنا ما منعرف نلعب وخصوصاً أنا ما كان يقبل يفوّتني معو أبداً بالفريق..ياي إديش باكية من وراء هالشغلة....متذكّر يا أخ أيمن:)) وإسا في ألعاب كتير .........والله ذكريات رائعة يا ريت منقدر نرجع الزمن لورا لنعيشا من أول وجديد ونتلذّذ فيها...............

(عفواً,بعرف حكيت كتير بس هادي الذكريات بحبّ عطول إحكيها من كتر منا حلوة)

[أيمن غ القلموني]

وكمان كنّا نلعب basket ball مع ولاد خالي تحت بيتن وإسا في ألعاب كتير .........والله ذكريات رائعة يا ريت منقدر نرجع الزمن لورا لنعيشا من أول وجديد ونتلذّذ فيها...............






إيام والله وكان الصبايا دايمن خسرانين

[الزاهر]

أنا بذكر كلّ الألعاب يليّ كنت إلعبها, بتذكّر إنو كنا نلعب"un elephant",كنا نعمل دائرة أنا ورفقاتي وبلّش لعب...وكمان كنا نلعب لعبة"sheri sheri mingo"كانت من ألعابي المفضلة وكمان لعبة"passe passe passera" ولعبة"ja ja jeci" ولعبة"bombon bombon bombarella" ولعبة "العفريتة" وفي لعبة "توك توك توك مين أنا الديك"(بذكر إنيّ كنت دايماً إختار اللون الأحمر).




طيب ما في شوية تفاصيل عن كل واحدة لنفهم شو هاد !!!



وبالنسبة للي ذكرتيه بعدين ... نسيتي تذكري إنو مرات كنتو تتبلو عبعض ناس بدون دليل !!! :)

[lina k]

طيب ما في شوية تفاصيل عن كل واحدة لنفهم شو هاد !!!


إن شاء الله برجع بفصّل كلّ لعبة بس مش هلّق لإنو ما معي وقت......بدن شرح كتير.........





وبالنسبة للي ذكرتيه بعدين ... نسيتي تذكري إنو مرات كنتو تتبلو عبعض ناس بدون دليل !!! :)

مش قصة تبليّ بس كانوا يهاجمونا بالمئات فما نعرف مين يليّ ضرب فنتّهم الكلّ:)

[أيمن غ القلموني]

وكمان كنّا نلعب basket ball مع ولاد خالي تحت بيتن(كانوا يتقاووا علينا أنا وأختي ويربحونا بس بالغش لأنو يعملو فرقة صبيان ضد فرقة بنات يعني ما في عدل...خصوصاً إبن خالي الكبير كان ما يقبل فينا حلفاء معو بالفريق لإنوّ بيعتبرنا ما منعرف نلعب وخصوصاً أنا ما كان يقبل يفوّتني معو أبداً بافريق..ياي إديش باكية من وراء هالشغلة....متذكّر يا أخ أيمن:))


أكيد متذكر ، ولو إيام ما بتنسا ، ما تواخذيني أدش بدك تعويض على البكى ، آلاف الدولارات بس بأفلس .........


الله وكيلكن دايما بهدلة من أبي لأني مبكي الأخت لينا ؛

كنت فنص منيح على ولاد عمتي ، بس كانت هوايتي البسكة بول:) ، يا الله لو كملت كان يمكن أفضل من العلم والله أعلم:)

[hadid]

o mina
o mina do
alasenfay
zena aho
passe karita zindawe zindawe
pass karita zindawe zindawe
أختي يا أختي
طفي الشمعة
أومي ضويها
بخاف من بوبي
بوبي مات
وين أبرو
تحت التينة
شو لبسو
شروال أبو
وين أبو
بالمدينة
شو عم يعمل
حمص بطحينة

هههههههههههههههههههههههههههه

شو كيف ؟؟؟

شو رأيك يا حسين بكتب عن ما يِلْمِسْ تبع سوق الحجاز إذا بعدك ذاكرو ؟؟ ولا بكتب عن سوق حراء ؟؟

ههههههههههههههههههههه

يلا هيدي تشجيعة للبنات

ما حدن يعلق أنا أصغر واحد بين ولاد عمومتي وعماتي وأغلبيتن بنات !!!

[القسام]

وما تنسوا كمان لعبة شرطة وحرامية والعرجة وكنا نلعب إنسان حيوان و إكس أو والعفريتة على أنواعا ( البندورة _ زيرو _ طيارة ) .

[حُسَينْ ... !]

شو رأيك يا حسين بكتب عن ما يِلْمِسْ تبع سوق الحجاز إذا بعدك ذاكرو ؟؟ ولا بكتب عن سوق حراء ؟؟

ههههههههههههههههههههه




شوا هادي ؟

ما يِلْمِسْ لو ان لعبة طفولية كنت كتب عنه ، بس بدنا صور :) عملك طلة على السوق بركا بتلاقي !!

[hadid]

ههههههههههههههههههههههههههههههههههههههههه

[جابر دملوك]

ب الدكاكين
واحد ب يدير اللعبة و واحد ب يطُب ع شكل الركوع ب الصلا.
و البائيين بدُن ي نُطوا من فوء هلي طابب.
المدير وهلي طابب ب يِتِفَأَو ع دكان مُعين ب الضيعا
و كلمة السر ب تكون شغلة ب تنباع ب هالدكان.
ب يطُب هلي علي الطَّب و المدير ب يُركُد و ب يحُط إِيدَي ع ضهر الطابب
و ب ينط هو و مفرشِخ إجرَي.
إجر ب إتجاه الراس و التانيه ب إتجاه ل ما بعرف أيش ( الشو إسما يعني.)
و هو و ناطط ب يؤل : " أول ما فتحنا دكان و (ب يزكر إسم الدكان) "
و بعد منو ب يبلشوا اللعيبه كل واحد ب ينط ب دورو و ب يزكر إسم شغله ب تنباع ب الدكان.
و بس واحد يزكر كلمة السر ب يُدْأَر و ب يصير دورو إنو يطُب.
و الشاطر هلي ب يؤل شغله ب تنباع ب الدكان لا ب تخطر لا ع البال و لا ع الخاطر ت حتى ما يطُب و ينكِسِر ضَهرَو.

[hadid]

هههه حلوة لعبة الدكاكين ... بس ما قلتلنا إنت كنت من يلي بينكسر ضهرن ولا كنت مدير ؟؟

[جابر دملوك]

أنا كنت نُط و مادير

[Arsenic]

في لعبة متل ما بذكر إسما المزح الجحاشي بس ما كنت أعرف إلعبا و ما كل العالم بيعرفوا يلعبوا
و هي عبارة عن طربيط شخص بصخرة كبيرة و ندكربو بالوادي يا زلمة وئت بتذكر هالشغلات ما بتمنى إرجع ولد...

[ramo]

في لعبة متل ما بذكر إسما المزح الجحاشي بس ما كنت أعرف إلعبا و ما كل العالم بيعرفوا يلعبوا
و هي عبارة عن طربيط شخص بصخرة كبيرة و ندكربو بالوادي يا زلمة وئت بتذكر هالشغلات ما بتمنى إرجع ولد...
أهلا بال Arsenic شو أيمتا شكّلت الحزب؟

[Arsenic]

يا هلا ب رامو الغليظ من one week.....