أخوّتنا,,,,,,,,إلى أين؟؟؟؟؟

السلام ا السلام عليكم ورحمة الله و بعد:
الإخوّة في الله, شعار رفعه الشباب المسلم لبناء العلاقة فيما بينهم,و كثير منهم من استمع الى المحاضرات و قرأ الاحاديث و النصوص الشرعية المتعلقة بهذه المسألة,و عاهد نفسه على معاملة اخوانه المسلمين بأخلاق و تعاليم الإسلام.و كثير من الاخوة و الحمد لله التزم بما عاهد نفسه عليه.
هذا بشكل عام.
و سأنتقل الى المسألة التي اريد ان اناقشها و التي تحدث بين شباب القلمون الذين رفعوا شعار الالتزام.
للأسف هناك بعض الاخوة ممن يصلون في المساجد و محافظين على لحاهم و رغم ذلك ترى العداوة و البغضاء بينهم و على غير سبب واضح. و تراهم لا يلقون السلام على بعضهم و اذا رأى احدهم الآخر تراه ينفر منه و يحاول الابتعاد عنه.
وقد وصلت العداوة الى ان يصف الأخ أخاه بالكلب و كلمات تشمئز منها النفوس.
و سنفترض اسوأ الاحتمالات انه اخ من الاخوة كان سلوكه خاطئ بعض الشيء,فترى الجميع يبتعد و يقاطعه و يغتابونه و يتكلمون عن تصرفاته الخاطئة دون ان يكلف احد منهم نفسه بنصحه.....
هل هذه الاخوة التي طنت اذننا؟؟؟ هل هكذا يجب ان يعامل بعضنا بعض؟؟؟؟
نتكلم عن الاخوة و نحن ابعد الناس عنها!!!!
انا تكلمت عن حالة من الحالات التي رأيتها بأم عيني!!!
هذا عند الشباب و لا اعلم اذا كان نفس الامر ينطبق على الاخوات.
فكيف الخروج من هذا المستنقع العميق؟؟؟؟ ننتظر آرائكم المنطقية و القابلة للتطبيق ولا نريد كلام ملائكي و حلول مثالية مصاغة بشكل جميل لا تقدم ولا تأخرّ....
وآخر دعوانا ان الحمد لله رب العالمين.

موضوع جميل حقاً......
أخي العزيز نادر .... إنّ العداوة الظاهرة عند بعض الشباب تتعدد أسبابها...
بحسب رأيي أكتر الأسباب المساهمة في نشر الضغينة و الكره بين الشباب هي الكذب و النفاق و الخيانة....... على ما أذكر أنّه يوجد حديث للنبيّ عليه الصلاة و السلام , منّي متذكّرو كلّو بس بما معناه إنّو المؤمن معقول يكون بخيل و معقول يكون جبان بس ما معقول يكون خائن أو كذّاب ..... لذلك أود أن أقول لكلّ هؤلاء الشباب إنن ينتبهوا عحالن ميشان ما يفقدوا صفة الإيمان أو صفة التديّن ..............
الله يبارك فيك أخي العزيز نادر على طرحك موضوع متل هذا ... و إن شاء الله نستفاد منّو نحنا و كلّ الشباب سواء بالمنتدى ولاّ بالخارج....
بانتظار مشاركة الأعضاء ذوي الأفكار الجهنّميّة لوضع الحلول اللازمة .......و شكراً

النفاق و الكذب و الخيانة!!!....لا مو هيكا يا اخي...للأسف انو السبب هو العقول!!!...
يعني مثلاً انا ما بتعجبني عقلية و تصرفات اخي المسلم فأنا كإنسان مسلم بدال ما روح انصو شبعمل؟؟؟؟ بقاطعوا بدون سبب مباشر و الاحلى من هيك بدي ما خلي حدا يحكي معو كمانا!!....يعني شغلات شايفينها قدامنا.....و ما في شي لا من الكذب ولا من النفاق!!!!........
الؤصة ؤصة عقليات يحكمها فكر خاطئ في هذه المسألة!!!....
فهمت شلوووون؟؟؟؟؟؟

هههههههه
طيّب رح إمشي معك يا أخي نادر....
عم تقول إنّو السبب هو العقول.....
طيّب يا أخي العقول أيشو يللي بخلّيها هيك؟؟؟؟؟ حسب رأيك !!!!!!
أنا حسب رأيي النفاق هو يللي بيجعل من العقل شيء مخالف للشكل الخارجي....
مثال على ذلك بتشوف واحد لحيتو إسا شويّة و بدءّ بالأرض بس هو شقفة منافق....
يعني هذا الإنسان مثلاً مافيك تاخد منّو حق و باطل و ما فيك تعرف كيف بفكّر......هذا مثال بسيط عن يللي قصدك إنت عليه

اخ تيرروريست طول بالك وية يعني حاسك معصب.
اسا شوية و بتفجر حالك فينا عمهلك شوية....
العقلية هي تنشأ مع الانسان و لكن في هكذا مسائل دينية لازم الواحد ينزل عن جحشتو و يضحي شوية....يعني فهمنا انو انا عقلي ما بيركب عفلان ...بس عندي حقوق وواجبات تجاهو و ما لازم ننكرها...بس اني قاطعوا و احكي معو تحججاً بالعقلية فهذا شيء خاطئ .!!!
وانا اساتني مني موافقك عفكرتك..لأنو ما معقول كل ما تنين ملتزمين بطلوا يحكوا مع بعضن انن منافقين!!!...شباك حكي منطق..

طيّب.......
أولاً أنا منّي معصب أبداً.... بالعكس كتير رايء
بس القصة يا نادر إنو الإنسان المؤمن حقاً هو يللي بيكسر حواجز الشيطان من قدامو....
و من هذه الحواجز ( العقلية الصعبة)...
فيعني إذا هو عنجد هو مؤمن فيعني لازم يكسر هذا الحاجز ....... شو ما بتوافقني الرأي؟؟؟؟ بس الؤصة إنّك بدّك تعرف أصلاً كنّو هو مؤمن حقا و لا لاء!!!!!!!!!!!!
ما كل واحد بتشوفو بصلي و بصوم و..... يعني مؤمن........ عرفت..........
و أكيد إنت ما فيك تعرف شو في بصدر الإنسان........فمتل ما قلتلك لازم الواحد يشد همتو من ناحية الدين و هو منّو لحالو بصير بحس إنو عقليتو غلط و بترجع الأمور بتظبط منها لحالها.... أنا هذا رأيي

فإذاً اتفقنا على ان المسألة هي مسألة عقلية خاطئة و ان الحل يكون بأن يضحي هذا الامسان بشء من عقليته ليتبع المنهج الصحيح.
طيب رح نرجع للموضوع.....
اذا انا شخص ما بتعجبني تصرفاتو!!!!! ولك لحتا بطّل احكي معو......و لك و الله العظيم حتى السلام عليكم في ناس ما بقولوا لبعضهم!!.....و الاحلى من هيكا انو الواحد منهم بدو يفرض عليك مع مين بدك تحكي...
يعني يا تيرروريست رح نفترض انك عالء مع واحد انتا...فهل من حءك تجاي تءلي ما تحكي معو مثلاً.؟؟؟؟؟
و قصة الايمان انتا ما فيك تحددها ..بس فيك تستدل عليها من التصرفات نوعاً ما....

الشغلة البشعة عنا بالقلمون انو لو الشخص رجع صلّح تصرفاتو بدلن عم يحكوا عليه كيف كان و ووو......و ان شاء الله تكون فهمت خلفية الموضوع لأنو رح تابع بشق تاني بعد الانتهاء من هذا الشق.

موضوع كثيرا ما يخطر على بالي أخي نادر ... وأقولها وأنا جد آسف وقلبي يعتصر ... كثير من شباب القلمون ينطبق عليه مضمون الآية بظاهره .... أفتؤمنون ببعض الكتاب وتكفرون ببعض ... فكما أسلفت ... كثير من الشباب يمكن تصنيف "تدينه" على أنه Sphere وليس كرة ... فهو ظاهره ملئان لكن باطنه في الحقيقة فارغ ... فهو أخذ من الدين كله مثلا الصلاة وهز الإصبع فيها ورفع اليدين بعد الركوع وتشمير البنطال ... ونسي أن الأخلاق والمعاملات من أهم أسس الدين عندنا ... ونسي أن قذف مسلم بغير دليل بصفات هي ليست فيه أمر كبير ... ونسي أنه عليه "كمسلم" أن يكون قدوة لغيره ممكن لا يظهر عليه تدين .. وممن هو بعيد عن الدين. وكمن أخذت من الدين المعاملات والأخلاق الحسنة لكنها لم تتحجب ... ولا تستحي من قولها أنا غير مقتنعة بالحجاب ... وتقخر بهذا الدين ....


لكن هل هذا هو الإسلام .... هل هذا هو الدين الذي أنزله رب العباد ... وجائتنا به رسله ؟؟


لكن ما السبب لكل هذا ؟؟

لعل من أهم الأسباب مرور شباب القلمون بفترة من الزمن لا جماعات فيها ولا موجهين ولا مشايخ فاعلة .... فكل منهم قرآ كتابا أخذ بما فيه وظن أن كل ما هو مختلف فهو غلط!!! .... ولم يتلق العلم الشرعي إلى من جهة واحدة ... فقه وفقه وفقه .... ناقصا منه فقه المعاملات ..... هل مر عليك يوم حاضر فيه شيخ من مشايخ القلمون عن كيف تربي ولدك ؟؟ .... أو كيف تتعامل مع "الآخر" ...أو كيف تحدد موقفك في ظل الظروف الحالية في البلد أو أو أو ... أم أن محاضراتهم كانت على الدوام عن الإسراء والمعراج ووفات الرسول صلى الله عليه وسلم وعن وعن وعن ... لكن لم يتطرأ أحد يوما لما في هذه الأحداث من عبر وعظات يستفيد منها المسلم من ناحية حسن التعامل ...أو لما هو ضمن حسن التعامل مع المسلمين وعن الأخوة الحقة ووووو .....



والسلام عليكم

ونسي أن قذف مسلم بغير دليل بصفات هي ليست فيه أمر كبير
أخ زاهر هذه النقطة بدي ارجع ناقشها على انفراد لأنو صارت منتشرة كتيير...ما رح فوت بالتفاصيل. و جايا اوانها.
لعل من أهم الأسباب مرور شباب القلمون بفترة من الزمن لا جماعات فيها ولا موجهين ولا مشايخ فاعلة
يا اخي مين الك لو كانت غائبة بعض الشيء ولكن محاضرات الاخوة وطلعت من اذنينا اد ما سمعنا عنها....و ما في حدا منو سامع ما لا يقل عن 10 محاضرات بهذا الخصوص.
ولم يتلق العلم الشرعي إلى من جهة واحدة ... فقه وفقه وفقه .... ناقصا منه فقه المعاملات ..... هل مر عليك يوم حاضر فيه شيخ من مشايخ القلمون عن كيف تربي ولدك ؟؟
للأسف كما اقول لك دائماً الدعوة صارت فقهية بحتة...و موضوع كي تربي اولادك بدو جلسات و ما بدو مجرد محاضرة عابرة.

عكل حال بشكر مشاركتك يا اخ زاهر و يا ريت نحاول نتعاون على تفعيل الموضوع خارج المنتدى يعني بالمساجد و بالشارع .حتى يكون الموضوع عملي وليس مجرد كلام على المنتدى.

سلام.....
بدون مجاملات موضوع في محلَه يا أخ نادر......
بسَ كأنكم بعدتو عن الموضوع شوي؟؟؟؟؟؟؟
الموضوع مش بس متعلَق بالدينين.....لأنَو هيدي الظاهرة موجودة عند الدينين و عند غير الدينين................
المشكل على العموم و بأكثر المرَات بيصير وقت بيكون في مجموعة شباب رفقة مع بعض و بيجي شخص دخيل أو عضو جديد لهيدي المجموعة و بعض أعضاء المجموعة بيكونو ما بيعرفو و مانهم متقبلينو و حاكمين عليه بطريقة خاطئة يمكن بناء على منظرو أو طباعو ......
بس الشي الصحيح إنو فعلا في بعض الإخوة طباعهم حادَة و عقولهم صغيرة ببعض الأمور ......

بعدين أهمَ ظاهرة طالعة بالضيعة عن جديد (شوي) قصَة الإتهامات المتبادلة و أكبر يعني في كتير عنا بالضيعة (ما شاء الله) ما عندهم شغلة و لا عملة إلا تصنيف الناس مثلا: هادا مخابرات و هادا ما بعرف شو إلخ............ قال على أساس هنا الفهم ضجر منهم و بيوزعو فهم على الناس و قادرين من دون ما يتعرفو على الشخص يحكمو إذا مخبر ولا لأ..........و من ضمن هالناس رفيقي مادي أذكر إسمو كل ما شاف شخص بيعملي هادا كذا و هادا كذا و..........برأيي إنو هادي النظرة عم تولَد كره للشخص يعني مختصر مفيد العالم بهاالأيام بتصدَق كل شي بينقال عن فلان مثلا و أنا بصراحة بحسَ بعض ناس بينظرولي إني مخابرات و ما تتخيل الإحتقار يلي بحتقرو للشخص يلي بينظرلي هالنظرة ....ما رح كمل هلَق ................بكمل بمشاركة ثانية إنشاء الله

الموضوع مش بس متعلَق بالدينين.....
مبلا انا اقصد المتدينين ...لأنو الدينين هم من عندهم الوازع الا و هو الدين ...يعني اذا تنين متخاصمين و مو دينين اكيد الاخوة بيناتن ليست في الله و بالتالي هذا ليس موضوعنا...
المشكل على العموم و بأكثر المرَات بيصير وقت بيكون في مجموعة شباب رفقة مع بعض و بيجي شخص دخيل أو عضو جديد لهيدي المجموعة و بعض أعضاء المجموعة بيكونو ما بيعرفو و مانهم متقبلينو و حاكمين عليه بطريقة خاطئة يمكن بناء على منظرو أو طباعو ......
بتصير...بعرف و هذا خطأ كبيييير,,,,,,,ولكن مع الوقت هالمسألة بتلحلح!!!..وصايرة معي ابل هلء ....وهلء الاشخاص هم من اعز اصحابي.
بس الشي الصحيح إنو فعلا في بعض الإخوة طباعهم حادَة و عقولهم صغيرة ببعض الأمور
هذا الذي نتكلم عنه ..الطباع الحادة و بينا ان لازم الواحد يتخلى عن طباعه الحادة بالمعاملة مع اخوانه..!!
بعدين أهمَ ظاهرة طالعة بالضيعة عن جديد (شوي) قصَة الإتهامات المتبادلة و أكبر يعني في كتير عنا بالضيعة (ما شاء الله) ما عندهم شغلة و لا عملة إلا تصنيف الناس مثلا: هادا مخابرات و هادا ما بعرف شو إلخ.
يا ؤيت تأجل هالموضوع شوية لحتا نعرف نحلحل المسألة الحالية!!!...مع انو القضية يلي طرحتها انتا و زاهر مهمة جداً...
لكن خلونا بالقضية الحالية...و يا ريت من الجميع المشاركة.

يا أخ نادر هالمسائلة كتير مهمة والله و عنجد بتأثر ع صيت الدينين و للأسف هالشي صايز معي يعني بيكون كتير صحبة معي بس هيك ما بعرف شو صاير معو بيكون خاوتا و هيك ....

يا هلا بالمعلم نادر ....و الإخوة الأعزاء الذين أبدوا ملاحظاتم و تعليقاتهم .... التي غير إعادة صياغة رواية هذه المشكلة لم يوفقوا في فهم فحواها ... بل و ابتعدوا ... فعندما ترجع الظاهرة إلى النفاق و .. ..و ... هنا تزيد الطين بلة و تدخل في مجموعة المعنيين من جهة أخذ فكرة خاطئة عن الآخر و الحكم عليه بما لا يعلمه إلا الله ....

و لما ندخل مثل هذه التصرفات في جزئيات أخرى من الأخذ ببعض الدين و ترك البعض الآخر .. أرى أن هذا أيضا ابتعاد عن الموضوع .... لأنه بهذا أنت تتهم الكل عدا عدد قليل بهذا لأن القليلون هم فقط من لا يقعون في هذه الظاهرة ..... و حتى من يظن أن مثل هؤلاء أخطؤوا تجده بدون ما يشعر ابتعد عنهم بطريقة أو بأخرى و بالتالي وقع فيما وقعوا فيه .....

لهذا دعنا نعزل الظاهرة عن التدين و نأخذها بصفة أعم ...

باعتقادي حل المشكلة موجود و ليس ملائكيا و لا شيء من هذا القبيل

و بالنسبة إلى المشكلة تبدأ عندما ترى أن الآخر ( الشخص الذي بدأت تبتعد عنه ).... أصبح يعمل أشياء أو أبدى أشياء أو على الأقل إن كان من شلتك قديما ... أصبح يعمل أشياء لا تنبغي .... بل و أشياء بعيدة كثيرا عما يجب عليه فعله على الأقل من منظور هذا الشخص الثاني (الذي أخذ موقفا )....او بدت له اشياء لم تكم بادية .....

نضرب مثالا فقط بالمتدينين لا للحصر ... تجد الرجل يصاحب الرجل و يحب كل ما يأتي منه و تعجبه عقليته .......
و بعد تغذيه بفكر معين صوابا كان أو خاطئا .... و هنا نعتبر أن الفكر الجديد هو الصواب للتمثيل ...

فيصبح يرى ما كان حسنا قبيحا أو على الأقل تقصيرا ..... فتتغير نظرته شيئا فشيئا من صاحبه .......

لكنه لا يذهب و يفضفض عن كل هذا بل يأخذ موقفا بقصد أو بغير قصد ..... و الإنسان بطبيعته لما يكره أعمالا من شخص ما يسقط قدر هذا الأخير و بالتالي الأول لا يصبح مهتما لأمره بل و قد يكرهه ....

مما استخلصته .... يجب على الإنسان أن يحدث أخاه لما يرى منه شيئا أو اشياء يكرهها .... و يحاول فيما بعد فهم المبررات التي أعطيت له ... إن كانت منطقية أو فقط مسألة وقت فبها و نعمت ... و إن كانت ليست حقيقية و قد تكون مناقضة للأفكار التي عنده .... فلينصح ...... و إن راي أن لا جدوى

فليضع نصب عينيه أمرين اثنين

1- " من ذا الذي ترضى سجاياه كلها **** كفى بالمرء نبلا أن تعد معايبه "

2- أن الإنسان لا يكره لذاته و إنما لأعماله ... فليكره من الشخص خطأه و ليس شخصه ( إن فهمت هذه ... فمادخل إلقاء السلام و الإبتسامة و المعاملة بالحسنى ..فيما كرهه من الشخص ؟؟؟؟)

اعتقد أن هذه هي الطريقة السليمة لتفادى مثل هذا و الله أعلم ....
..... و لكم أن تحكموا .... بس جربوا قبلا ;)


سلام

السلام عليكم و رحمة الله و بركاته....
أرى أمامي ردود مهمّة بما تحويه من كلمات و تعابير.... لكن هل توصلنا إلى الحلّ حقاً؟؟؟؟
متل ما قال الأخ نادر ... روّءوا بالكم شويّة يا محمّد و زاهر لأنّ الموضوع بدو وقت لتنحل المشكلة المطروحة فيه.......
هللء حسب ما قال أخونا الكريم , "ضيف على القلمونيين".... إنّو الحلول لازم تكون على الشكل التالي :
1- " من ذا الذي ترضى سجاياه كلها **** كفى بالمرء نبلا أن تعد معايبه "

2- أن الإنسان لا يكره لذاته و إنما لأعماله ... فليكره من الشخص خطأه و ليس شخصه ( إن فهمت هذه ... فمادخل إلقاء السلام و الإبتسامة و المعاملة بالحسنى ..فيما كرهه من الشخص ؟؟؟؟)
الكلّ منّا يحب و يكره ...... بس ما لازم بس نكره نقاطع بعضنا... لازم عالقليلة يكون فينا شويّة فهم و نلقي السلام .. هذا على القليلة..... أمّا إذا كنّا شايفين إنّو الشخص المطلوب هو يللي بيكرهنا و عم يحاول إنّو يقاطعنا و يشنّ هجمة علينا ... ساعتها منحاول نحكي معو و نتفاهم... عسى و لعلّ يكون في كم نقطة منلتقى فيها و ساعتها بنبلّش نبني علاقة جديدة تعتمد أولاً على المحبة في الله ... ملاحظة: <<<يمكن بالبداية ما تكون موجودة هالمحبة ..بس مع الوقت لازم تنوجد و إذا ما نوجدت سا عتها صار في قصة تانية>>>
و ثانياً على الروابط المشتركة.......
رح نفترض نحنا إنّو عقولن تنيناتن صعبة كتير و ما بتتنجّر ... ساعتها ... لازم يكون في بيناتهم سلام .................

السلام عليكم و رحمة الله و بركاته ,



قال صلى الله عليه وسلم: ((إن من أحبكم إلي وأقربكم مني مجلسا يوم القيامة أحاسنكم أخلاقا)).

قال عليه الصلاة والسلام: ((ما من شيء أثقل في ميزان المؤمن يوم القيامة من خلق حسن؛ وإن الله يبغض الفاحش البذيء))
وفي رواية: ((وإن صاحب حسن الخلق ليبلغ به درجة صاحب الصوم والصلاة)).

و روي عنه صلى الله عليه وسلم أنه قال: ((إن هذه الأخلاق من الله تعالى؛ فمن أراد الله به خيراً منحه خلقا حسنا)).
وروي عنه صلى الله عليه وسلم : ((إن الخلق الحسن يذيب الخطايا كما يذيب الماء الجليد)).

يكفينا فقط الإقتداء برسولنا الكريم , و بأخلاقه حتى تنتهي المشاكل فيما بيننا .
القصة ليست بهذه البساطة طالما أننا لا نفهم الدين فهما ً صحيحا ً .

قال النبي صلى الله عليه وسلم : [ الدين المعاملة ] .
و سوء الظن هو أصل تفاقم الخلافات ... لأنه يؤدي إلى إنعدام الثقة ... و بالتالي إطلاق الأحكام على الناس عشوائيا ً و كأن الذي يشك بغيره غير معرض لأن يخطىء !!!!!

كل منا لديه ظروفه و هو ليس مجبرا ً بإعلانها للجميع !!! و من هذا المنطلق فاليفكر كل شخص بغيره و بأنه لديه ظروف .... و أنا كإنسان لا بد أن أحس به و أقدره كي أحظى أيضا ً بتقدير الآخرين لي .

و يكفي أيضا ً أن نعامل الناس بما نحب أن يعاملنا الغير به .
و لا ننسى أن كل إنسان مسلم و خاصة ً الملتزم هو مثال لغيره , و تصرفاته تعكس للآخرين ديننا ... فلينظر كل منا إلى ما يفعله و إلى تصرفاته .

اقتباس:

---

المشاركة الأصلية كتبت بواسطة THE TERRORIST

السلام عليكم و رحمة الله و بركاته....
أرى أمامي ردود مهمّة بما تحويه من كلمات و تعابير.... لكن هل توصلنا إلى الحلّ حقاً؟؟؟؟
متل ما قال الأخ نادر ... روّءوا بالكم شويّة يا محمّد و زاهر لأنّ الموضوع بدو وقت لتنحل المشكلة المطروحة فيه.......
هللء حسب ما قال أخونا الكريم , "ضيف على القلمونيين".... إنّو الحلول لازم تكون على الشكل التالي :
1- " من ذا الذي ترضى سجاياه كلها **** كفى بالمرء نبلا أن تعد معايبه "

2- أن الإنسان لا يكره لذاته و إنما لأعماله ... فليكره من الشخص خطأه و ليس شخصه ( إن فهمت هذه ... فمادخل إلقاء السلام و الإبتسامة و المعاملة بالحسنى ..فيما كرهه من الشخص ؟؟؟؟)
الكلّ منّا يحب و يكره ...... بس ما لازم بس نكره نقاطع بعضنا... لازم عالقليلة يكون فينا شويّة فهم و نلقي السلام .. هذا على القليلة..... أمّا إذا كنّا شايفين إنّو الشخص المطلوب هو يللي بيكرهنا و عم يحاول إنّو يقاطعنا و يشنّ هجمة علينا ... ساعتها منحاول نحكي معو و نتفاهم... عسى و لعلّ يكون في كم نقطة منلتقى فيها و ساعتها بنبلّش نبني علاقة جديدة تعتمد أولاً على المحبة في الله ... ملاحظة: <<<يمكن بالبداية ما تكون موجودة هالمحبة ..بس مع الوقت لازم تنوجد و إذا ما نوجدت سا عتها صار في قصة تانية>>>
و ثانياً على الروابط المشتركة.......
رح نفترض نحنا إنّو عقولن تنيناتن صعبة كتير و ما بتتنجّر ... ساعتها ... لازم يكون في بيناتهم سلام .................

---

شكرا على المداخلة و على التوضيح ..... هذا ما كنت أقصد بالضغط ......كما تقولون (يسلم تمك :d )

..... إن شاء الله نسمع مداخلات أخرى تكون مفيدة و بناءة

..... ملاحظة : كلامك الجميل لا يصدر عن terroriste لكن عن رجل محب للسلام لووول

...... سلام

تم نقل الموضوع إلى ساحة "شؤون وشجون قلمونية" لأنه نقاش حول موضوع الأخوة بشكل عام وخصوصا حول بعض الظواهر التي تحصل بين الأخوة في القلمون ...

أهلاً فيك أخي عزيز ....
كلام الأخت باربي هو كلام صحيح 100 بال100 بس يا ترى إذا قلنا هذا الكلام لهؤلاء الأخوة هل سيغيّر من طباعهم من شيء
؟؟؟؟؟؟

رح بلش بمشاركة باربي هي ذكرت:
سوء الظن هو أصل تفاقم الخلافات ... لأنه يؤدي إلى إنعدام الثقة ... و بالتالي إطلاق الأحكام على الناس عشوائيا ً و كأن الذي يشك بغيره غير معرض لأن يخطىء !!!!!
و انا بقول انو هادي هي المشكلة الاساسية .....ويلي عم تنفر الاخوة من بعضهم!!!!!....و هادي شغلة ذاتية يعني الواحد هو لازم يشتغل عحالو ودائماً يحسن الظن بالناس اذا ما شاف اي شيء عليهم......و مني عم ؤول انو الحذر مو ضروري و لكن يجب تغليب الثقةو ابرازها...مع توخي الحذر في بعض الحالات الخاصة....
و لا ننسى أن كل إنسان مسلم و خاصة ً الملتزم هو مثال لغيره , و تصرفاته تعكس للآخرين ديننا ... فلينظر كل منا إلى ما يفعله و إلى تصرفاته
هالجملة كثيراً ما ترددت هذه العبارات و الكل يحفظها لكن قلما نجد من يلتزم بها...و خصوصاً انو احياناً نشتكي من انو الغير دينين عم ينتقدوا عتصرفات الدينين.

رح تابع مع الاخ عزيز كلامك جميل لكن في نقطة اريد توضيحها!!!....احياناً قد تكون في فرقة اصدقاء و يدخل شخص جديد عليكم...و بعض الاخوة عندكم لم يعجبهم الشخص لإعتبارات معينة...(آخدين فكرة مسبقة عنه خاطئة).....فهل تتوقع من هؤلاء ان يقوموا بنصحه او بتكليمه ان اخطأ..بل سيزدادون بعداً عنه.

<<<يمكن بالبداية ما تكون موجودة هالمحبة ..بس مع الوقت لازم تنوجد و إذا ما نوجدت سا عتها صار في قصة تانية>>>
اخ تيروريست كلامك مزبوط انو الواحد يمكن يتضايق شوية اذا شخص بدو يفرض حالو عليك!!..ولكن بدك تراعيلو مشاعرو يمكن عم يحاول يتقرب منك لأنك انسان منيح..فببداية المسألة ممكن تتضايق ولكن المحبة بتصير موجودة.

اما بالنسبة يا تيرروريست بدك تجرب و تشوف....اذا حدا مستعد يضحي شي شوية!!!!.......
و لنا متابعة في قضية (اساءة الظن بالغير و القاء الاتهامات).

بالفعل كلام الأخت باربي هو الصح ...شكرا ً لكي على هذا الكلام ... بارك الله بك ..

و شكرا ً لك أخي نادر على الموضوع المهم .. جزاك الله خيرا ً..

بالفعل كلام الأخت باربي هو الصح ...شكرا ً لكي على هذا الكلام ... بارك الله بك ..

وكلام غيرها كمانا صح.....الا كلام الارهابي بالاول ما كان منطقي ابداً....و لعل توقيع باربي
من الصعب ان تعيش ملاكاً بين البشر...لو معاني بعيييدة وواقعية.....

و شكرا ً لك أخي نادر على الموضوع المهم .. جزاك الله خيرا ً..
اهلين فيكي بس لو كتبت شي مشاركة مفيدة بالموضوع كان افضل لأنو هيك حكي لا يقدم ولا يؤخر.....يعني هالمشاركات خلوها للمواضيع المنقولة....ما تزعلي بس منشانكم...

وكلام غيرها كمانا صح.....

و أنا ما ألت غير هيك , الجميع كان كلامن منيح , بس أنا برأي كلام الأخت باربي منطقي كتير و صح ..

بس لو كتبت شي مشاركة مفيدة بالموضوع كان افضل لأنو هيك حكي لا يقدم ولا يؤخر.....يعني هالمشاركات خلوها للمواضيع المنقولة....ما تزعلي بس منشانكم...

شكرا ً لك على النصيحة ... بس أنا بشوف إنو لما بعطي رأي بمشاركة حدا تاني بكون عم أعطي رأي و لو ما رأي نفس الشي ما كنت ألت هيك ....

السلام عليكم....
يلي عندو اسن مداخلة عالشق الاول من الموضوع يضيفو بسرعة قبل الانتقال الى الشق التاني من الموضوع.
وشكر لكل من شارك و ابدى رأيه.

والله معك حقّ يا اخّ نادر بهيدا الحكي لأنّو عنجد ما بعرف من وين بيجيبو هالكره لبعضن هيدول العالم وبالاخص الاصدقاء والأهل حتّى؟؟؟؟؟ ما بعرف انّو ليش يعني على شي لا يستحق الذّكر متل انّو عمل بنكاية !!! الله يعين ! مشكور على فتح هيك موضوع والي رجعة ان شاء الله عليه......
سلام:(

اقتباس:

---

المشاركة الأصلية كتبت بواسطة Nader 3:16

يلي عندو اسن مداخلة عالشق الاول من الموضوع يضيفو بسرعة قبل الانتقال الى الشق التاني من الموضوع.

---

المشكلة برأيي، هي في تربية المرء نفسه على الأخلاق الإسلامية ومراقبتها وحمل جوارحه جميعها على الإلتزام بها، وبالأخص الحفاظ على سلامة القلب من الأمراض التي تعتريه. فمن يسلك هذا السلوك، إنما يسلكه لأسباب منها:

- عدم معرفة ما يجب على المسلم التزامه من الأخلاق الإسلامية
- عدم مراقبة الله في قوله وفعله
- أمراض في قلبه ونفسه من هوى وغيرة وحسد ولؤم، إلخ.

المشكلة أيها الأخوة ليست في ارتكاب الخطأ، فكلنا خطاؤون، وإنما المشكلة في من يخطئ ثم لا يعود إلى نفسه حين يختلي بها ويراجعها ويرى مكمن الخطا عنده ويحمل نفسه على تصحيحه ويعاهدها على عدم العودة إليه أبدا. خصوصا حين يكون الخطأ بحق الآخرين وليس بحق نفسه فقط !

وأنصح الأخوة جميعهم، بمطالعة مقدمة كتاب "إغاثة اللهفان من مصائد الشيطان" لابن قيم الجوزية ففيها كلام يوزن بالذهب حول أمراض القلوب وكيفية الشفاء منها. وقد كنت لخصتها قديما في أوراق سميتها "اللؤلؤ والمرجان من فوائد إغاثة اللهفان" لكنها ليس بمتناول يدي ... ولعل الله ييسر لي اقتباس شيء من فوائد الكتاب ووضعها هنا ليستفيد منها الأخوة...

مشكور يا اخ ابو حسن على هذه المداخلة الطيبة.

- عدم معرفة ما يجب على المسلم التزامه من الأخلاق الإسلامية
هادي بستبعدها لأنو الكل مثل ما ذكرت انو المحاضرات طلعت من اذنيه, لكن اذا كانت بالفعل موجود ناس ما بيعرفوا شو هي الاخلاق الاسلامية فهي بالفعل مصيبة.
- أمراض في قلبه ونفسه من هوى وغيرة وحسد ولؤم، إلخ
هادا يلي بأدّي برأيي الى اساءة الظنّ بالغير و اعطاء فكرة مسبقة خاطئة نظرة سيئة عن الغير.
و رح حاول ايبل على هذا الكتاب بمكتبة الجامع و اقرأ فيه عسى انو نستفيد ان شاء الله.
و سأطرح الشق الثاني من الموضوع في الايام القادمة.

-قذف مسلم بغير دليل بصفات هي ليست فيه
-في كتير عنا بالضيعة (ما شاء الله) ما عندهم شغلة و لا عملة إلا تصنيف الناس
رح بلش بالشق التاني من الموضوع و التي يتحدث عن االنقطتين المذكورين, لأنو للأسف صارت منتشرة كتير عند الشباب بالقلمون!!!....بجاي الواحد عامل حالو فهيم كبير..و شبءلك ولا انتبه من هالشخص هادا كذا و كذا...بتسألوا كيف عرفت...بءلك و لك انتا شبدك انتبه منو و بس...و ببلشوا يصنفوا الناس عزوقهم...و للأسف في ناس عرفوا انو الناس عم تحكي عنهم كلام من هذا النوع فكان سبب في بعدهم عن المسجد....و ما في داعي اعطي امثلة!!!!....
انا بعرف انو بالمعاملة بين الاخوة لا بد من احسان الظن بالغير دائماً...لحديت ما يبين شي واضح لا سمح الله...و لكن انو شكّل فكرة مسبقة عنو و ممكن تكون غلط و اتهموا بشغلات ما انزل الله به من سلطان فهادا شي منو مءبول ابداً....!!!..

من كم يوم كنت ماشي مع شخص الشباب الله يبارك فيهم ناشحينو نشح...عم اسألوا ليش هيكا صاير موء عم تحتك بالشباب (الي اجري بالساعة يلي اتعرفت فيها عهيك عالم بصنفوا العالم عطريقتهم)!!!!!....
فإلى متى سنظل هكذا!!!....بدنا نراقب الكل...و ما حدا مستعد يراقب تصرفاتو!!!...شاطرين بالانتقاد على الغير و بس!!!...
ننتظر تعليقاتكم..!!!

هذه رسالة لطيفة في الباب للشيخ الدكتور بكر أبو زيد بعنوان:

تصنيف الناس بين الظن واليقين

يا هلا بالجميع .....
كيفكن؟....

"سلام عليكم"

"و عليكم السلام........"

"كيفك يا معلم ؟" (مع ابتسامة اخوية)......

"احسن منك الحمد لله...." (ابتسامة مصطنعة.....كأنو منو تايؤ....)

هوني صاحبنا (لي حكيو بالأحمر ) حمل حالو و راح......حس انو منو مرغوب فاي .......

"ليش هيكا جاوبتو ؟؟....."

"و لا هادا انا من زمان حاتط علاي و ع افكارو X كبير.....يا خي ما فيني شوفو و لا اسمع بأسمو.......واحد ......."

"ؤف ؤف .....ليش شاعملك؟؟؟"

"منو عاملي شي ......بس يا خي ما بيعجبني ....."

"طيب و ازا ما بيعجبك ....هيكا بتحكي علاي ....." حمل حالو هل الأخ و مشي و هوا متدايء من الكلام لي حكاي رفيؤ........

هادا مشهد زغير من كتير من المشاهد لي سامع منا ايام الضيعة ....ايام التعامل مع العالم ......هلأ منيح لي عم نلاءي وءت نحك راسنا.......المهم ......

هذه المشاركة نءلتها من موضوع دوكر تبع الX و شفتها انها بتجسد الحالة الصحيحة!!!!...

و انا رح وءف الموضوع على هذا الحد لأنو في ناس شكلها ما لها الب تشارك بالموضوع و بلا ذكر اسماء...و بطلب من كل من ينطبق عليه الكلام المذكور انو يراجع نفسو في هذا الشهر الفضيل و آخر دعوانا ان الحمد لله رب العالمين.

walla ana 3indi ra2i kaman bi hal mawdu3 3inna 2urta bil 2almun w manu bas bil almun bas khalina bi day3itna w nhil masheklna ba3den nshuf mashekel ghayrna il muhim hal 2urta mfakrin il islam da2in w 3abse w mishikle ya 3ammi il mishekle ana bi ra2i bi masheyikhna lezem abil manfahim illi manu miltizim shu huwe il islam innu n3alim il multazem shu huwe il islam minshen ya3ti fikra hilwe 3an il islam sa3ita bikun fina n3alim illi manu miltizim il islam

ليش حاسس حالي انو كنت معصب وءت كتبت هالموضوع؟؟؟ هههههه....
على كلّ حدا عندو شي اضافة؟؟؟؟؟ لأنو اسا ما وصلنا لنتيجة

بارك الله بك اخ نادر موضوع مهم وجميل وخاصة في ايامان الحاضره واظن الان المشاركات التي سبقت كانت كافيه في تجسيد الواقع
انا بعتقد انو نحنا نفتقد الى اي حس اخوي وما المهم الي منقولو يعني دائما بتلاقينا عم نقول يا اع فلات او اخي في الله كل هالشغلات مهمه بس بدنا حقيقتها
يعني مين منا اذا سمع شي عن شخص من ومنيح بيروح بيسئلو عن صحة هالكلام
او اذا شاف شخص عم يتصرف باي عمل خاطئ بيروح بينصحو ولك بينشح عرضو قبل ما يتاكد ليش الزلمه تصرف هيكا او حتى اذا سمع عنو شي بتلاقي اخد موقف وما بيتبين
وهيدا الي صاير بيناتنا للاسف
كم من اخ اذا صار سوء تفاهم بينو وبين اخ تاني بيتنازل هو منشان يحل الخلاف وخيركم من يبدا بالسلام
كم من اخ بيكون حريص على مساعدت اخوه وقت الحاجه او وقت الشده
كل هيدول ما في منن
من منا لم يسمع عن بلال رضي الله عنه والصحابي الذي نعته بابن السوداء وكيف كان التصرف منهم
من منا لم يسمع بالرسول صلى الله عليه وسلم عندما وخذ احد الصحابه بعود على ما اعتقد فاوجعه فاقترب النبي منه بابي وامي هو وقال له بان يوخده مثلما ما وخذه

فكيف الخروج من هذا المستنقع العميق؟؟؟؟ ننتظر آرائكم المنطقية و القابلة للتطبيق ولا نريد كلام ملائكي و حلول مثالية مصاغة بشكل جميل لا تقدم ولا تأخرّ....
وآخر دعوانا ان الحمد لله رب العالمين
كما قال الشيخ ألألباني رحيمه الله -
التصفية و التربية - هذا و الله أعلم