الاساتذة المميزون.
السلام عليكم و رجمة الله و بركاته.
من منّا لم يمّر على نخبة الاساتذة القلمونيين الذين تخرج من تحت ايديهم كل ذوو الاختصاصات في القلمون من دكاترة و صيادلة و مهندسين و و......فكانوا الموجهين للطلاب في سنيّهم التأسيسية.
كل اخ او اخت له او لها تجربة مع الاساتذة في القلمون .. سواءً بطريقة اعطائه او بعض عاداته في الصفّ.
فالهدف من هذا الموضوع هو ان يذكر كل اخ او اخت الاساتذة الذين يراهم مميزين بنظره وبعض من عاداتهم اثناء اعطائهم الدرس. بشرط ان يكون الاستاذ من القلمون.
وانا سأبدأ من اساتذتي و معلماتي في مدرسة الصبيان .
الأستاذ عبد الله الشيخ (حفظه الله): انا ببصم بالعشرة انو كل الطلاب كانوا ينطروا ساعتو بالنطرة و يمكن كانوا يحسوها احلى من ساعات الرياضة و الرسم بالرغم انو الاستاذ عبد الله كان يعلمنا تاريخ و جغرافيا و بشكل عام هالمواد منا محبوبة من قبل الطلاب. ولكن كان يعطيها بنكهة خاصة وبحاول يمثلنا الوقائع و يضربلنا الأمثلة و كان الأهم عندو انو التلميذ يكون مثقف ولذلك كان كل مرة يحكيلنا عن آخر الاختراعات بالعالم آخر التطورات السياسية و هيك شغلات.
وكان القضيب يرافقه دائماً في حصصه و يا ويلو يلي بشاغب عساعتو!!!!...
من مميزات مسابقاته انها كانت سهلة جداً و كان يجيب شي معقول و سهل عالجميع.
وكمانا كان اسرع استاذ بتصليح المسابقات.
بصراحة استفدت كتير كتير من هالاستاذ و الله يجعل كل معلومة وصّلنا ياها بميزان حسناته.
الأستاذ حسن عبيد(حفظه الله): من منّا لا يعرفه, ولم يتعلم عنده, و لم يتأسس في اللغه في احضانه.
من اهم مميزاته : انو كان يضبط الصف بطريقة لا مثيل لها (فلا تسمع الاّ همسا). يحب الترتيب بشكل رهيب. يعتمد اسلوب السؤال ضمن الدرس لحتّى يعرف اذا الطلاب متابعين او لأ.
يشهد الله اني استفدت كتيير كتييير من الاستاذ حسن خصوصاً بقواعد اللغة العربية و بكتابة المواضيع الإنشائية.
من عادات الاستاذ حسن: التدخين كتير بالصف....(اسمحلنا فيها يا اخ ابو حسن) هههه.
وكمانا التخبيط عالطاولة بسبب او بلا سبب.
ولكن هذا لا يمنع انه كان ينبوعاً فياضاً و معطائاً في التعليم. نسأل الله ان يحفظه لطلاب القلمون.
هذين اثنين من النماذج الذين تلقيت العلم على ايديهم. و يوجد الكثير الكثير. سأقوم بذكرهم لاحقاً.
بس يا ريت الإخوة يلي أكبر منّا يحكولنا عن اساتذتهم لأنو نحنا ما تعلمنا عندهم او اذا عندهم تجربة مع اي استاذ يرونه مميز يحكولنا ياها.
وكمانا الخطاب موجه لطلاب المنار و الثانوية و مدرسة البنات.
