عوكر و البنت هلي شعرا أشأر
(50)
عوكر و البنت هلي شَعرا أشأر.
بيوم من الإيام فات عوكر ع الكافيتيريا متل العادة ت يتغدا.
هو بيقعد ع هالطاولة ت ياكل من أكتر من عشر سنين.
بس هاليوم بالزات كان قاعد ع الطاولة هلي إدامو بنت شعرا أشأر.
البنت قاعدة و دايرة ضهرا و شعرا الأشأر الدهبي بياخد العقل.
عوكر بينو و بين نفسو قال : " أكيد صاحبة هالشعر ملكة جمال العالم "
عوكر مانو مصدق أيمتن تقوم و يشوف وِشا.
بتمرؤ كم دقيقة و هالبنت بتحتاج تجيب شليمونة ف بتقوم ت تجيبا.
عوكر بيهيي حالو ت يشوف أكتر ما في من هالوش حلو.
البنت هي و رايحة ت تجيب الشليمونة بتدير ب إتجاة عوكر.
عوكر غصبن عنو بيقول : " الله يئطع عُمرَك من بين السعادين ظَعيع ... لحِئِتْنا خطا ع الفاضي "
طلعت ملكة جمال العالم رجال بيشبة وليد هلي جنب بلاط.
عوكر و السُّمْنِة هلي أوِّصا مدبوحة.
(51)
عوكر و السُّمْنِة هلي أوِّصا مدبوحة.
عوكر نزل ع الضيعة بعد فترة طويلة أضاها ب أَجْنَبْيَة.
ب هالنزلة حب يطلع ع صيد السمن.
ف بيوم من الإيام بيدبر مشوار هو و خوو عنبر و رفيئ خوو عملوش.
و صدفت ب هاليوم إنو الدنية صارت تندف و إنتلت السما سمن و بلش الخرطوش يلعلع.
عملوش يأوص و يلم و عوكر مدري أيش و يطم لأنو يأوص و كأنو عم يأوص ع تنك بيبسي.
عنبر ما إدر يدبر بارودة ف طلع معن مِنَّا بيكزدر و مِنَّا بيتفرغ ل دبح السمامن هلي رح يوئعون عوكر.
إِرِب وأت المغرب و بلشوا الشباب يجمعوا كتافن ت ينزلوا من الحرش ع الضيعة.
صاروا يعيطوا لبعضون و تيشوفوا كل واحد ش مأوص.
عملوش كان مأوص 23 سمنة لِئِي مِنُّون 17 و ضيع 6.
عوكر كان مأوص 27 سمنة لِئِي مِنُّون ماشاي و ضيع 32.
لأنو فوق ال 27 ضرب هلي روحون هو و عم يجرب البارودة ت تظبط ع كتفو ضيع 5 ضروب وأعوا من جيبتو و ما حس فيون.
عملوش شفأ ع عوكر ف غمز عنبر و عنبر فهم عليي فوراً.
بعد دقيقتين بتمرؤ سمنة ف عملوش ما بيأوص عليا و بيخليا ل عوكر حرام ما تزفر بيقول.
عوكر بيتنيشن و بيأوص و بيبلش يركد و يؤل : " وأعت وأعت ".
الحئيؤة لا وأعت و لا شي و يمكن ما سمعت الضرب.
عملوش بيسأل عوكر : " وين بتأدر وأعت "
عوكر بيجاوب : " ب هاك الداحة "
التلاتة بيبلشوا يأيبلوا بس ع أيش يا ترى و لو دلوا لتاني يوم ما رح يلاقوا شي.
عملوش بيشيل سمنة من مشكاكو و بيشلحا ع الأرض و بيعيط ل عوكر و بيؤلو : " أَحِّنِي لأَيْتَا "
بيركد عوكر هو و عم يقول :
" يحريئ أبو عرضا ... ألتلك الضرب كلو جايا فيا ... و أنا بأدر كل السمامن هلي أوصت عليون وأعوا متل هادي بس بدك مين يلائيون "
السلام عليكم و رحمة الله و بركاته.
ههههه...... ذكرتني يا أخ نادر بهل القصص ... الله يبارك فيك.... و الله إيام!!!!!!!!!!!
عوكر لُوْ صَبْحَة بس َمنو مسؤول
(53)
عوكر لُوْ صَبْحَة بس مَنو مسؤول
عوكر شب طيوب و أنجبار و ما بيحب المنظرة.
هو جديد ع المنطأه ما لو كم يوم جايه.
يوم الجمعة بيحمل حالو و بيروح ت يصلي.
عوكر بيوصل أبكر من غيرو شويه لأنو طلع بكير من البيت كان خايف ما يضَيِّع ب الطريئ.
بيؤعد بأول صف و صدفت أعدتو ب المحل هلي بيؤعد في عضو ب لجنة الجامع و هلي بيعمل الإعلانات بعد الصلا.
و ع فِكرا عوكرنا بيشبه مسؤول الإعلانات بشغلات كتيرة.
(الطول - الكسم - لون الجلد - الصبحة - ... )
بعد شوية بِجَي واحد باكستاني و بيؤعد جُمِّنَو و بيفتكروا هو مسؤول الإعلانات.
الباكستاني بيوأف يصلي ل بينما تبلش الخطبة.
بلشت الخطبة و بعد شي دئيأتين بيجي واحد تاني باكستاني و بيعطي الباكستاني الأولاني ورؤة.
هَلَأ الباكستاني الأولاني بيؤرا الورؤة و بيعرف إِنَّا شوية إعلانات ف بيحطا إدام عوكر و بيخبطلو ع فخضتو و بيأشرلو ب إيدو إنو بعد الصلا.
عوكر بيستغرب إنو كيف واحد ما بيعرفو و لا بعمرو شايفو أو حاكي معو بيخبطلو ع فخضتو.
عوكر ما عجبو الوضع أبدا و لو منو خايف إنو يروح أجر الجمعة كان حكي معو.
عوكر بيشيل الورؤة و بيحطا إدام الباكستاني و بيأشرلو ب إيدو إنو ما لو علاؤه ب الموضوع.
الباكستاني بيرجع بيشيل الورؤة و بيحطا إدام عوكر و بيخبطلو ع فخضتو مرا تانية و بيأكدلو ب إيدو إنو إنت مسؤول الإعلانات و إنت لازم تعملون.
و ها الشي كُلَو إدام الخطيب.
و الخطيب يعيد و يكرر " يا عالم يا هووو ... ما تروحوا أجر الجمعة ب شغلات ما لها طعمة "
و الورؤة دلت تروح و تجي بيناتون و ورمت فخضتو ل عوكر و هِنِّه حريصين ع إنو ما يروح أجر الجمعة.
و لو ما خلصت الخطبة و الصلا ل صار مع عوكر غرغرينا ب إجرو الشميل و صار بدا أطش.
