حقوق الرجال!!!!

أول الشي السلام عليكم...
تاني الشي رح خش بالموضوع من آخرو....
أنا ما بعرف ليش بكل المنتديات... بيعملو شي اسمو شقائق الرجال... حقوق المرأة... للنساء فقط... وما بعرف شو كمان... بس قولولي ليش حق الرجال مهضوم هيك... عطوني بس منتدى واحد في موضوع للرجال فقط... وإسا بقولو النسوان حقن مهضوم ومتاكل والقط بياكل عشاهن... معليش طلعو من هالأفلام بقى... رح تاخدو كل شي وما تتركولنا شي.... ولك ما بكفي قلوبنا آسرينا وحابسينا عندكم..
كل شي بيعملو الرجال صارت بتعملو المرأة... أما الرجال فبعدو محلو... لأ مش هيك وبس... صار في شغلات معليش المرأة تعملها بس الرجال لأ... ودائماً عم ينادوا بحقوقن... حقوقن قال... ليش إسا في شي ما أخدتو؟؟؟ ولك حتى بموضوع الزواج والتعدد.. بدكن مش بس تحبسولنا قلوبنا.. حتى شهوتنا يلي ربنا عطينا اياها بدكن تحطولا إشارات مرور... من هون ممنوع المرور.. ومن هون منعطف خطير جداً... ومن هون : خطر الانزلاق... وهونيك واقفة الشرطية عيونها عشرة عشرة على عينيك....
أنا رأيي صار لازم ندافع عن حقوق الرجال... عن مشاعر الرجال... عن أحاسيسو يلي ضاعت هباءً منثوراً...
مستحلي شي امرأة تهتم بالرجال مثل ما عم نهتم فين... آ فتحنالن ساحات ومنتديات... آ والله لو كان الأمر بيرجعلن.. ما فكرو فينا أبداً... معليش اسمحولنا بهالحكي.. لأنو لو إنتو بتطلعو بواقعية وتجرد.. بتلاقو إنو كل العالم بيهتموا فيكن.. وما في حدا عم يهتم فينا.... حتى إنتو.... بتجبونا أرض أرض... ترى الواحد بحب واحدة، وبتصير بتلعب بقلبو لعب.... وبترجع بتطلب منو لبن العصفور... وبيض نمل.... حجار المريخ... آ والله حطمتونا... كسرتونا
فـــــشــــــــــلـــــــــتـــــــــــونـــــــــ ــــــــــــــــا.......

أنا وأعوذ بالله من كلمة أنا... أطالب جميع الشباب بالوقوف إلى جانبي.... ودعمي في هذا الموضوع... وكنت حابب إعملو تصويت.. بس ما بعرف كيف الحقيقة...
يالله يا شامي.. مش إنت بدك تعملي انتخابات... يالله يا قاسي.. يا قلوبنا يلي متفقة.. يالله ما مهند شكشك فين بهالسيف... يالله يا خالي جابر دملوك... أرنا فيهم ما تعلمت من الحياة...
يالله ... الله أكبر ... الله أكبر... عليهـــــــــــــــم......... هجوممممممممممممممممممممممممممممممم

السلام عليكم يا جماعة ...

شلونكم ...

خيي فشلان وأنا لساتني عند ظني :)، نحن بحاجة لزعيم فشلان متلك.. يطالب بحقوق المستضعفين في الأرض ويحس من تجربتو بالفشل (اللي هو مش سبب فيها طبعا) بكتير ناس عم تفشل بهالدنيا بميادين مختلفة ... ليش ؟؟ ليس لأننا هواة فشل أو لا نسعى للنجاح، ولكن لأننا لا نجد من يشجعنا على النجاح ولا من يعيننا عليه... سواء كان بالبيت أو بالمدرسة أو بالطريق أو بالجامعة أو بفترة المراهقة أو بالعمل أو باختيار بنت الحلال (طول بالك معليش) أو بليلة الدخلة وبعدها الزواج وتربية الأولاد والحقوق المتبادلة بين الزوج والزوجة في البيت وبين الحقوق المتابدلة بين المرأة والرجل في المجتمع... يا خيي شو بدو يحكي الواحد ليحكي ..؟؟ قول الله (انتبه من الصوفية)...
فداخل البيت أزمات تعصف، يعني يمكن بسبب إختيار غير موفق بين (الأم والأب).. أو بسبب الأوضاع المعيشية الصعبة وتأمين لقمة العيش..أو بسبب عدم الوعي الكافي بالحقوق والواجبات...(وكلنا ذوو خطأ)..

وبالمدرسة وما أدراك ما المدرسة ( ما بعرف شو مهمتها الصراحة).. التربية والتعليم ... أشك في أنها تُطبق .. نحن لسنا مع لعن الظلام، ولكن مع إضاءة الشموع... ولكي نضيء شمعة لا بد من معرفة المشكلة ونقاشها من كافة جوانبها لنصل لحلول واقعية مُرضية.. كل منا شمعة أظن بعدها سيضيء في سماء قريتنا نهار جديد..

والمراهقة فترة حساسة .. ليس لها أي تقدير من أحد على المستويات التي ذكرتها جميعا...
والجامعة وحسن اختيار المجال (ليش أصلا شو في مجالات للواحد يختار .. هههه)..
والعمل .. الله المستعان ... يعني يا بدك تكون ابن شي حدا أو بدك تبوس اجر شي حدا .. أو بدك تشتغل عند شي زعيم بالجلي ( مع انو مجالك بيكون جيولوجيا)...

والخطبة والإختيار .. وهون الطامة .. يعني ان الواحد عرف يختار بدك يقبلوا فيه... يعني الدين صاير بالكتب والحكي بتصور بس ...وقلة من يراعون الواقع والدين ويختارون على أسس سليمة ويقبلون على أسس سليمة أيضاً.. ( طيب ما معها حق البنت ما تقبل .. وهي كل النهار والليل عم تحضر التلفزيون وتشوف شي بالخيال ... وما معو حق الشاب يدور على الجمال وهو كمان عم يتلطوع كل يوم بموديل شكل .. بالتلفزيون والطريق والجامعة ولك يا عمي .. بالجامع كمان .. يعني شو في فرق بين الجامع والطريق اللي فوق الجامع ما بتصور متر مترين...وبينما توصل بيكون صار بدك تجدد وضووووءك)...

وبعدين يا خيي يا فشلان.. بيجيك البيت... ههههه... يعني الصراحة شي بيضحك، يعني ان رضيت فيك صاحبتك الفشلانة، من وين بدكم تأمنو بيت يا معتر... يعني حسبتها أنا ان شقة 130 متر سعرها 50 ألف دولار وانت كنت محظوظ ودفعت شي 13 ألف دفعة أولى أديش بيبقى عليك كل شهر .. يا أبو الشباب شي 640 دولار بالشهر .. ومين يا حسرة فيه يشيل هيك مبلغ.. انت بتعرف مين ...ما في داعي نحكي...)
وإن جاك ولاد يا ويلك ان كنت من أصحاب العمل الحر ... وما كنت بيشي نقابة .. ومرض حدا من ولادك وين بدك تروح ... ؟؟

وبعدين صار عندك حفاضات بدك تحط نص شهريتك.. نعم لأن أمهاتنا كانوا متخلفين وقت كانو يستخدموا الشقف ويروحو يغسلو على العين ويخبزوا ويطبخوا وووو.. يعني بتعرف حساسية الرجوع للتخلف(لأن صار تعريف التخلف مغاير لما كان عليه سابقاً...).. وكلنا بالهوا سوا...

ويا أبو الشباب إن كنت أخطأت باختيار زوجتك وعشت معها قصة حب بالبداية ورضيت بالحكي معك على الخبزة والزيتونة .. بعدين الله أعلم شو رح يصير.. بتصور أقل شي بيصير انو تسمع انك فقير مكحكح وووو .. فشلان كمان ... وما الحق عليها .. لأن الناس هيك صارت تنظر لها الأمور بمنظار مادي بحت...

وعنا كمان ممنوع التعدد وممنوع الطلاق .. يعني بدك تعيش كل عمرك تعيس وتتمنى تجي آخرتك.. لتجرب حظك هونيك .. ويا ويلك ان كانت آخرتك عاطلة...

معليش ما قصدي زيدك من الفشل .. بس موضوع حقوق الرجال وحقوق النساء والواجبات المتبادلة.. ربنا سبحانه وتعالى أخبرنا هو والرسول الكريم كيف طريقة حلها.. إن كنا نريد أن نكون في خير وعلى خير .. فالرسول يقول (خير القرون قرني...)...والخيرية هنا في كل شيء .. مش فقط بباسطة العيش وتفضيل الدنيا على الآخرة والنظر إلى الدنيا كأنها ممر قصير سرعان ما ينتهي...ولكن أيضا من ناحية مهمة وزاوية منسية في أيامنا هذه بين مدعي الإلتزام أكثر من المتسيبين..ألا وهي الموازين التي نزين بها أمورنا كلها... فمن الحماقة مثلا أن ترضى واحدة أن تسكن مع زوجها في (كوخ من خشب) وإن هي رضيت لا يرضى عنها المجتمع ولا يتركها بحالها .. ومن الحماقة الشديدة أن ترضى أخرى أن يتزوج زوجها عليها ولو كان مقتدرا أو بحاجة لذلك لأسباب هو يعرفها ويقدرها.. وإن هي رضيت فالثقافة والمثقفين لا يمكن أن يرضو بهذا الإنحدار الكبير والعودة إلى عصر التخلف... ومن الحماقة أيضا أن لا تعطي كلام الناس أهمية ما دمت لم تخالف شرعا أو لم ترتكب جرما بحق أحد.. ولكن أنى لك العيش في مجتمع أصبح الكلام فيه يباع بالبلاااااش...

حقوق الرجال!!.. أظن أن من واجبنا أن نطالب بحقوق الإنسان كما ورد وأمر بها الإسلام .. الإنسااااااان ... للرجل وللمرأة .. للطفل وللمراهق .. للمتزوجة والعانس والمطلقة... فهل نحن لها يا خيي يا فشلان ...

فلنبدأ إذا بالمطالبة بحقوقنا ونستلم الراية مع من يقف في صفنا من النساء اللواتي يُفضلن التخلف القديم (كما يسميه البعض) على التطور الحديث (المظاهر البالية) .. وساعتها سنرى النور من جديد...

وسامحني خيي الفشلان .. فقد أحببت أن أثير جملة من الأمور ..

أخوكم:rolleyes:

بدي إفهم يا شامي، ليش إنت على طول كلامك مش مفهوم.. أو أنا ما بفهمو... يعني بالنهاية طلعت معي ولا ضدي.. ولا بالنص.. يعني إنت 8 أو 11 أو 14 آذار...؟؟؟؟؟ ههههههه
بس خلينا بالجد... إنت شو بدك توصل من هالكلام... فيني أعرف...

السلام عليكم ورحمة الله
على مهلك شوية على الشامي يا سيد فشلان.. ترى ما في غيرو داعمك بهالمنتدى.. على طول عم يصيط فيك... لا تقم تطلع شي بنت صبية.. وحاطط عينو عليك... وعاملي آدمي بموضوع التعدد....
مرحباً معلمي زيد... لا تواخذنا... بس بحب رد على الفشلان بنفس الأسلوب...
المهم يا فشلان... إنت قرأ منيح الرد بتفهم على الشامي شو بدو..

وأنا برأيي إنو عم يحكي عن مشكلة صارت متغلغلة بواقعنا.... والحقيقة إنو بالفعل صارت المطالب يلي بدو ينفذها الرجال أكبر بكتير من استطاعتو... هو ذكر أمثلة عن الحياة القديمة والجديدة... والحقيقة مع إنو في حنان للحياة القديمة.. بس كمان ما في الواحد يرجع لورا بالحياة... لو كان الواحد فيه يرجع لورا.. كنا بألف خير...
يعني أنا بضربلك مثل صغير عن مضار الكهرباء.... يا أخي قبل الكهربا.. كانت المرأة لما بتطبخ وبيفضل أكل... شو بتعمل؟؟؟ بتاخدهم لجارتا... منشان ما ينتزعو...
واليوم لما بيفضل أكل شو بتعمل... بتدحشن بالبراد لعبكرة.. وإذا في لعبكرة مدحوش من قبلة... بتدحشن بالتلاجة منشان بعد بكرة أو أسبوع أو شهر... فهل هذا بيعني إنو نقطع الكهربا عن البيت؟ أو ما نجيب براد؟
يا أخي اليوم صرنا عايشين بطريقة حياة غير عن الأول.. بالأول لا كان في وجع راس ولا شي... كان الواحد يوجعو جسمو من التعب... بس راسو فاضيييييييييييييييييييي، أما اليوم فبيوجعو راسو وضهرو وإيدو وإجرو..

يا عمي شو هالحكي هادا؟؟ أنا عم نادي بحقوق الرجال.. مثل ما النسوان بنادو بحقوقن... ليش حتى المرة تطلب ويصير كل شي بدا اياه.. يا أخي نحنا كل شي منطلبو من المرة شغلة واحدة ما إلي عين أذكرها هون.. بينما هنة هلأ صارت الواحدة ما بترضى بشي.. بدها السلولير قبل البيت... وبدها غرفة السفرة قبل غرفة النوم.. وبدها البيت باسمها ومش أجار.. وبدها السيارة قبل السكربينة.. وبدها وبدها وجبلا وجبلا... وإذا نسيت شغلة بتذكرها فيها رفيقتها أو أمها....
وبالنهاية بتطلع هية يلي حقها متاكل.. وواقفة بنص الشارع عم تنادي بحقوقها.... يا أخي نحنا شو فينا نعمل تا نعمل... الله وكيلك صرنا منخاف على النفس نعيش عانس أكتر منن...
وبالنهاية أكيد إذا ما جبلا يلي بدها اياه.. بيطلع الرجال أناني... وبخيل... وما بعرف أيش كمان..
أنا هادى يلي بدي أوصلو

سلام شباب...

الله يبارك فيك خيي عمر ...على المشاركة ..

ولو خيي فشلان .. أنا معك قلبا وقالبا...:)
بس الظاهر اني ضيعتك لأني زدت نقاط أخرى وأثرتها في نفس الموضوع ...فإن حسيت في شي مش واضح خبرني أي نقطة يا خيي وأنا بوضحلك ياهااااا.. أوعا تزعل...

أخوكم:rolleyes:

السلام عليكم وبعد

والله يا أخي "فشلان" ---(وهه رح دل حط إسمك بين إصبعين)---أنا موافئك تمام

وبالمناسبة وأنا أقرأ هذا الموضوع ضحكت كثيرا كثيرا
لأني تذكرت ما قال أحد عمومي ---(كتار كتير يعني الإحتمال تعرفوا أي واحد ضئيل جدا)---المهم مرة كنت جالس ببيت ستي وكانت مرت عمي عم تشكي شو عندها جلي وطبخ وووووو آم هالعم قال لها أتقبلين أن أتبادل الأدوار أنا وإياك، فأنت التي تذهبي إلى المدرسة وتعلمي الشياطين---(لا تفكر إنك عرفت أي عم. كلهم أسائذة تقريبا)--- وترجعي بس تجي عالبيت تطلعي عالبحر ووووو ---(كمان لا تفكر إنك عرفت أي عم. كلهم بحرية كمان)---وتروحي عالصيد بموسم التويني ---(كمان لا تفكر حالك عرفت مين. كمان تقريبا كلهم صيادة)---وبس ترجعي من الصيد تعلمي الشياطين ولادك وتحلي مشاكلهم مع أهل باقي الأولاد.......وكتير حكي وصف .وأنا اللي بروح بكزر كل يوم بجيب غراض الطبخ وبأعد متل المخترع الشغوف بعمل خلطة أكل جديدة كل يوم ---(والله بمراكز الأبحاث ما يطلعوا إختراعات جديدة أد النسوان)---وبعدين بس يجي الأولاد من المدرسة وبس يجي زوجي بيبلش يمدح بأكلي شو طيب وبروح كل يوم من عشية عندي كزار مع رفيئاتي ......وبيكمل عد الأمور التي تقوم بها نسوان القلمون كل يوم ---(عفوا نسيت الصبحية كل يوم عند الجيرانات"مؤنث الجيران" باللغةالقلمونية تاعة الفرن)---آمت المخلوءة سكتت واستحت وبلشت تضحك
يعني مع بعض المبالغة بالسرد نتتتتتتوووووفة ظغيرة بس

فكيف ما يكون لازم نطالب بحقوقنا بهالدنيه ونحنا اللي مأكولة حقوقنا ونحنا اللي منتعب كل يوم --(والله لو كل يوم تطلعلنا بجوهرة جديدة متل هادي يا أخي فشلان!)--- ولك علاأليلة نخلي النسوان يزيدولنا الأبض شوية، يخفيفولنا ساعات العمل، ولك بس يعطونا شوية من حقوقنا اللي سلبوها منا!!!

على أساس أن الحقوق كالطاقة لا تنقص ولا تزيد بل تتحول من جنس الرجال إلى جنس النسوان، (ولا مانكم شاغلين فيزيك ولا نتوفة) وهيك نص حقوقنا صارت عندهم ولازم نطالب بها. يالله ننزل عالشوارع ونعطل الدنية---ليش غيرنا أحسن مننا لحتا هنه يعطلوا الدنية وحدن؟

السلام عليكم

السلام عليكم ...

خيي عمر لو أني أدعو إلى عدم إستغلال التطور والتكنولوجيا، لما كنت رأيتنا نتحدث ونناقش هنا بطلاقة كل ما يخطر ببالنا ...;)

ما قصدته أخي أن الميزان الذي نزن فيه الأمور قد اختل.. وبدل أن نراعي وضعنا المختل أصلا سياسيا واقتصاديا واجتماعياً ونعمل على التخفيف من وطأته على كاهلنا بتنا نزيد الأعباء علينا ...وأنبه هنا أني قد لا أكون قد عانيت من الكثير من هذه الأمور .. ولكني عايشت وما زلت الكثيرين ممن يعانون منها...

أخي الحرية في الإسلام تعني الكثير ... والعبودية لله تعني أيضا الكثير.. فأنت حر من كل قيد إلا قيد الشرع (الذي جاء كقوانين المرور وإشاراتها ليرشدك حتى تصل إلى هدفك) .. والعبودية هي لله وحده، لا لتقاليد حكّمناها في رقابنا ولا في آراء تُفرض علينا على أنها الصواب وغيرها الخطأ...

يعني أصبح نصف حياتنا مظاهر .. والنصف الآخر خوف من كلام الناس حول هذه المظاهر.. فهل نحن بهذا نكون أحرارا حقا .. وعبيدا لله وحده حقاااا .؟؟ ..

أما زال كلامي مُبهما... ؟؟ هممممم

يُمكنني التوضيح حول ما يُطلب ... هههه

أخوكم:rolleyes:

تكبيير ، أخي فشلان ينصر دينك على هذا الكلام ، موضوع جد مهم ، وان شاء الله بس ارجع على البيت سأكتب رد مفصل ، وهيك مننتصر على أم سفيان و ............. وغيرها ممن يقفون في وجه حقوق الرجال

السلام عليكم ...

طولوا بالكم يا جماعة .. شو إحنا فايتين على حرب... هذا نقاش...وأكيد أخونا وسيم عم يمزح يا أم سفيان ... :)


أخوكم:rolleyes:

ماشاء الله آخدين رياحتكن على الآخر ناس بيقولوا عم حرض عالتعدد وما بعرف يمكن كون مطلوبة أمنيا من قبل لجنة المثقفات في القلمون وناس بيقولوا إني ضد التعدد ضيعتوني
كنت سأقر للرجال أن بعضا مما يقولوه صحيحا ولكن بعد أن رأيت هذه الحملة المكثفة ضدي عدلت عن الموضوع
ناطرة بدي شوف رأي الأخت نور و نادين أولا

أنا عم سن سيفى وجهز عدة الحرب لانو الظاهر الجولة الجديدة بدا عتاد كبير!!:d

أنا رح وزع دماليك شامية مستوية عالبنات إلي بأيدونا و بالشوكات رح أنغز هلي بيزعلونا.

إن النساء رياحين خلقن لنا نعوذ بالله من شر الشياطين

ana b2oul ya okht om soufyen ino lezem nballech il 7arb . w ba3den il rjel hineh illi ballcho ,,,o3din 3am ye7ko 3ala il okht om soufyen mfakrin mafi 7adan bi hal montada!!! 3am ollek mawdou3 zawej il mesyar assar 3layon ktir ,,,kan hal mawdou3 no2tet do3fon....mnet2assef ya akh jeber la2an ra7 oul moch ra7 n2ayedkon ....

ما بعرف يا شباب إذا ملاحظين إنو الأخوات ما عندهم أجوبة غير أجوبة عامة... لأنو ما عم يعرفو شو بدن يجاوبو...
بس نحنا ناطرين نسمع رأين.... لأنو بدنا نعرف هل هنة شايفين إنو لازم تصير بهالإيام المطالبقة بحقوق الرجال أو لأ... حاجتهم النسوان أخدوا حقوقن وحقوق غيرن....
نحنا ناطرينكن... محلات العامودي... ههههه

يا أخت نادين أنا لم أطلب التأييد الأعمى.
و لكن كما قال الرسول عليه الصلاة و السلام : أنصر أخاك ظالما أو مظلوما .....
عذرا لم يعد لدي الوقت الكافي لأكمل علي الذهاب إلى العمل

يا شامي هلأ ذكرتني بإيام زمان... إيام المرأة كانت تنتظر زوجها حتى يجي من الشغل.. وتقولو على قولة المهند: تقبر عضيماتي يا زوجي.. وتستقبلو وتطعميه.. وتغسلو إجريه.. وتبسلو إيدو... وكان إذا حكي من الهمسة تفهم... وين النسوان يلي هيكة اليوم...
الله وكيلك إذا همست همس بدها إنو يتنفذ كلامها.. وديرها على كزدار ومشاوير وعجبني هالفسطان.. وعجبني ما بعرف شو.. وهو مجبور يرد وينفذ... وما عجبك.. الله معك..
أنا إذا بدي قيس على إخواتي البنات.. يهنيالن.. لأنو أكيد زواجن رح يطبخولن كمان.. هادى إذا تزوجو.. أد ما صايرين شايفين بحالن... الله وكيلك ما بيتهدو...
ولك إذا لفوفة على الشغل ما بقى المرة بتلف لزوجها... ليش؟ لأنو ياي... كانت سهرانة مبارح مع رفقاتها... ومش قادرة تفيق بكير... يعني بالعربي الفصيح: انفلق.. بدك لف لفوفة وكول.. ما بدك.. ستين سنة....
آ والله زادوها.... زادوها كتير.. وقال أيش.. الأخت نور عابت على الأخت نادين.. إنو ذكرت الواجبات.. فما كان منها إلا أن دغري سألتها : فأين الحقوق؟ فزعانة على حقوقكن.. ليش في شي ضل برات حقوقكن؟؟؟؟

ايييييييييييه تعيش يا خيي يا فشلان... آه والله كانت أيام ...

الله يرحمها...

بس هيك عم تُثقل على القوارير .. والرسول عليه الصلاة والسلام يقول (رفقا بالقوارير..)...
يعني شو بدها تلحق المرأة لتلحق الله يعينها .. قول الله...ما بزيادة عندها ولاد(من زمان ما كانوا يجيبوا ولاد غير 12 فما فوق) .. وكمان عندها شغلات كتير لازم تعملها بالبيت...انت بتعرف من أمك أكيد ...

يعني طول بالك عليهن شوية... بس لعيونك أكيد رح يخترعولنا غسالة لغسيل الإجرين بنفس المميزات (المطلوبة)...وهيك ما بيعاد عنا مشكلة... بس بوسة الإيد والإبتسامة هذه لازم نلقيلها حل !!...:cool:

وهيك الدنيا بتصير إيزي ... وأكيد ما رح تكلف كتير هالآلة :)... يعني زيادة على ال100 ألف دولار اللي بدك ياهم لتقدر تشتري وتفرش بيت هالإيام، فيك تزيد عليهم ألف يا خيي .. وين المشكلة .. أكيد ما رح تفشل بتأمين ألف زيادة ...

لووووووول ... قولة أختنا نادين...

طبعاً أنا أقدر تعب الأمهات مع الأبناء .. ولكن أعيب على الأمهات في أحيان كثيرة تفضيل الأبناء على الأزواج ...

أخوكم:rolleyes:

اقتباس:

---

المشاركة الأصلية كتبت بواسطة فشلان

يا شامي هلأ ذكرتني بإيام زمان... إيام المرأة كانت تنتظر زوجها حتى يجي من الشغل.. وتقولو على قولة المهند: تقبر عضيماتي يا زوجي.. وتستقبلو وتطعميه.. وتغسلو إجريه.. وتبسلو إيدو... وكان إذا حكي من الهمسة تفهم... وين النسوان يلي هيكة اليوم...
الله وكيلك إذا همست همس بدها إنو يتنفذ كلامها.. وديرها على كزدار ومشاوير وعجبني هالفسطان.. وعجبني ما بعرف شو.. وهو مجبور يرد وينفذ... وما عجبك.. الله معك..
أنا إذا بدي قيس على إخواتي البنات.. يهنيالن.. لأنو أكيد زواجن رح يطبخولن كمان.. هادى إذا تزوجو.. أد ما صايرين شايفين بحالن... الله وكيلك ما بيتهدو...
ولك إذا لفوفة على الشغل ما بقى المرة بتلف لزوجها... ليش؟ لأنو ياي... كانت سهرانة مبارح مع رفقاتها... ومش قادرة تفيق بكير... يعني بالعربي الفصيح: انفلق.. بدك لف لفوفة وكول.. ما بدك.. ستين سنة....
آ والله زادوها.... زادوها كتير.. وقال أيش.. الأخت نور عابت على الأخت نادين.. إنو ذكرت الواجبات.. فما كان منها إلا أن دغري سألتها : فأين الحقوق؟ فزعانة على حقوقكن.. ليش في شي ضل برات حقوقكن؟؟؟؟

---

ma be3te2ed ya akh feshlen ino ken fi minon hal neswen !! la2an wain soro ,,bisir n2ardo,,walla ollek yemkin nezlo 3ala madineh w t7adaro ,,,,amma bil nesbeh la 7ko2kon fa ma tefza3o 72o2kon mawjoudeh w bizyedeh 3laykon ,, 7sedtouna 3ala hal montada,,into 3indkon il montada il siyesi ( il neswen ma byehtamo bil siyeseh) w 3indkon il montada il riyadi ( neswen mabyehtamo bil football) w 3indkon ta2riban kol web site la2ilkon ,,,,ye3ni la2an ma 3am ne7ki chi

السلام عليكم :)

أيهما أصعب السجود أم غسل الرجلين ... هل في ذلك مذلة من المرأة أم إهانة من الرجل ... همممم؟؟؟

عن أبي هريرة أن رسول الله صلى الله عليه وسلم قال: «لو كنت آمراً أحداً أن يسجد لأحد لأمرت المرأة أن تسجد لزوجها» وهذا الحديث صححه الحاكم وابن حبان ولفظه عند ابن حبان: «لو أمرت شيئا أن يسجد لشيء لأمرت المرأة أن تسجد لزوجها والذي نفسي بيده لا تؤدي المرأة حق ربها حتى تؤدي حق زوجها...» وأخرج ابن ماجة عن أبي أمامة عن النبي صلى الله عليه وسلم أنه كان يقول: «ما استفاد المؤمن بعد تقوى الله عز وجل خيرا له من زوجة صالحة إن أمرها أطاعته وإن نظر إليها سرته وإن أقسم عليها أبرته وإن غاب عنها نصحته في نفسها وماله» .

وفي حديث أسماء بنت يزيد الطويل قال رسول الله صلى الله عليه وسلم موجها كلامه لها وللنساء من خلفها (انصرفي أيتها المرأة وأعلمي من وراءك من النساء أن حسن تبعل إحداكن لزوجها وطلبها مرضاته واتباعها موافقته يعدل ذلك كله (الجُمع والجماعات وعيادة المريض وشهود الجنائز والحج بعد الحج وأفضل من ذلك الجهاد في سبيل الله) . قال فأدبرت المرأة وهي تهلل وتكبر استبشارا)

فما الغرابة إذن في غسل الرجلين وغير الرجلين ...لا أظن أن هناك غرابة أو مشكلة حتى .. :)

ولكن الظاهر صارت الردود إنفعالات متبادلة ...
وكمان منشان ما يزعلو الأخوات الكريمات ... ما بتصور فيها مشكلة ان الرجاااااااااال تنازل عن عنفوانو وغسلها رجليها خيي فشلان .. أم شو رأيك ..؟:)

أرجو أن نقول قناعاتنا بكل حرية .. وبكل صدق لتُناقش أيضا بكل حرية وبكل صدق...

أخوكم:rolleyes:

إنت مزوج، أنا لأ.. يعني قولة ما بقولو إنت خف حياك.. بس أنا لسا بستحي كتير...
بس معليش رح احكي من قريبو.... بعدان شو صرت من يلي بلونو الحديث والآية وصاحب الحديث والمصحح....
نحنا الشباب ما عنا مشكلة بغسل الرجلين للنساء وغير الرجلين (على حد تعبيرك)... لأنو نحنا احساسنا رح يكون مختلف.. هي رح تكون شايفة حالها منهانة يمكن.. بس نحنا بكون فكرنا بغير شغلات تماماً.....

بعدان ليش مستغربة يا أخت نادين من غسيل الرجلين.. مانك حاضرة ولا قصة شامية.. أم فكرك إنو عم يألفو القصص من خيالن.. نعم كانت النساء تنتظر زوجها... وتغسلو اجريه وغير اجريه..
وكانت تعتبرو إنو ابن عمها يلي على شوية رح تعبدو.. الشامي عم يحكي عن الشاميات... مش عن الأجيال الجديدة يلي عايشة على البسكوت والسيريلاك..

هلأ أكتر بنت بتفكر تجيب 3 ولاد ماكسيموم.. وإذا إجا الرابع بتشوف كنو بجوز تعمل اجهاض.... ما فيها وتعبانة وما بعرف شو.. ما بتتذكر المخلوقة إنو ستها كانت جايبة 28 وما كانت تشكي مثل ما بتشكي يلي عندها ولد واحد.. وما كان عندها غسالة أتوماتيك.. وجلاية أتوماتيك.. نشافة أتوماتيك.. وصانعة أتوماتيك... ومعلمة أتوماتيك... وشوفير أتوماتيك...

وما كانت كل يوم بدها قنينة ريحة وأصبع منيكور.. وأصبح حومرة.. وتلات نقط... معليش سمحولي ما إلي عين كفي....

ولك بس بكفي إنو كانت تعتبرو رجال البيت... مش هي الرجال....

لكن عين عم تحكو.. يا عيب الشوم على نسوان هادي الإيام... ما بقى عندن اعتبار لكلمة رجال... ولك أنا يلي بيجلطني كمان إنو بنادوا بحقوقن الضايعة قال... هاد الحكي معليش بجنني...

salam ya fishlen, ana yali byi3jibni inou bit2oul ra2yak bkel jor2a w haida el matloub akeed bas akeed fi hala2 shway ra7 yiz3alou men yali ktabtou bel ekher yemken , bas walla ya istez fishlen bala aya kezeb mwadi3ak 7ilwe w bit5ali el we7ed kel marra y7eb yi2rilak el mawdou3 w akeed aw2at bit5ali el ba3ed yid7akou w hek bass elii talabbb SHOU ISMAK li2an yemkin enta fishlen bas bi naje77 :D bas shou el esem, w haida el mawdou3 7ou2ou2 el rijel good 3ajabni bas leh fi rejjel hala2 malou e5ed 7ou2ou2ou kelon ehh fi niswennn walla ma bas btirkod bas zawja yiji tat3'asilou rijlehh bas byiji 3al bet kel shi m7adar w khaless w el mara ma2ila aleb ti7ki w t3ali sawta law el 7a2 3lehh bit2oul amri la alah w byitla3 el 7a2 3laya bass kamen fi niswen mabyihtamou bi rjelon bas akeed mitel mabi2oul el masal wara2a kol rajol 3azim emra2a salammmmm

ولك يا رولا صار أنا عندي فضول أعرفك قبل ما تعرفيني... والظاهر من حكيك إنك رجال مش مرة.... لا تقومي متخفية ما وراء الكواليس..... أو إنك خالقة من شي 100 سنة وهلأ لقيوكي... هادي أفكارك يلي عم تقوليها ما بقى تقولها ولا بنت بهالإيام... شو هربانة من كتاب التاريخ يعني...؟؟؟؟؟ هلأ المرأة تطورت وصار أفكارها غير هيك.... الله يستر هلأ ما تقوم عليك أم سفيان ونادين... ما رح يسكتولك أبداً...
أنا بدعيكي لإنك تسحبي كلامك.... جرصتين وبهدلتين.. كل شي محمييين نفسن على الرد.. هل جبتين أرض أرض.... الله يسامحك... هيك بتحكي..!!!!

بعدان يا قاسي شو؟؟؟ ما عم افهمك أبداً أبداً... يوم بتجي معي... وبتلينها.... ويوم بتجي ضدي وتقسى عليي... شو كاتب أنا.؟؟؟؟ ما حكيت شي.. كلها كلمة نقلتها عن الشامي.. يلي هو بيشيل وبحط.. وأنا ما عندي مشكلة.. يشيل كلمتو وكلمتي..
زعلتني منك يا قاسي..... هلأ ما عاود في حدا بصفي أبداً.... بس معليش يمكن شديت بالكلام قد ما كنت مبارح معصب لأنو صار معي هيك بالرحلة... لا تواخذني معلمي...

salam ya fishlen la2 ana manni rijel ana bint w 3omri 15 sine bi3te2ed asgar bint bel mountada w mabi3te2ed inou yali ktibtou 3'alat ana mi2tin3a fih hek w lashou ta2is7abou salammm,,

ما بعرف ليش هالتهرب من المواجهة... أكيد لأنو ما عندن شي يقدرو يجاوبو عليه... شو بدن يجاوبو لحتى يجاوبو.... ليش شو حكينا غلط... نعم نحنا الرجال يلي حقوقنا عم تتاكل...

أنا عارف إنو الأخت رولا حكيت صحيح ووقفت بصفنا... بس هلأ بكرة بقولو الأخوات، هادي بنت صغيرة إسا ما بتعرف شي... بس هادى يكون بعلمكن إنو شهادة لنا... لأنو الأخت بعدها على الفطرة... إسا ما اندعكت بالحياة مظبوط، منشان هيك كان موقفها معنا......

يا أخت رولا بهدلتي الأخوات بالمنتدى... هل عارفة هالشي إنت.... الله وكيلك ما بقى لن قلب عم يجاوبو... ما عاودنا سمعنا لهن حس أبداً...

وبعدان كمان أنا بطالب الشباب إنو كمان يشاركو بكثافة أكتر... ولا مانكن فاضيين.. بعدكم عم تضحكو من صلاة الجمعة اليوم.... لما الشيخ غلط وقال: وأما بنعمة ربك فسبح... بدل فحدث..
ههه الله وكيلكن ما ضل واحد عم يصلي ما فرط من الضحك... يالله.. الله يسامحنا.. بس ما كان بإيدنا....

ولك إلكم ألب عم تحكوا لسا-------ولك يومين تلاتة ورح تؤووم الأيامة-----ولك الألمون شاعلة وإنتوا لساتكم هون-----أومو طفوا نيران المهند ----أعلنها حرب عالمة ثالثة
يعني طلعت صح بعدنان ولينا لكن على فرق سنة وبس
ولك شو بكن



آه عم خرّف----لا تفكروا كتير فيها.


سلام

salam, :) walla la2 ana ma2asdi bahdel 7ada bas kel we7ed w 3endou ra2you bel ekher ana heik ra2yi w henne yemkin bishoufou el mawdou3 bishakel teni w ra2yon ger w kamen NADINE W OUM SOUFYEN ;) lezem yredou mishen na3ref ra2yon bel mawdou3:D

السلام عليكم
كيف حالكم يا جماعة ، والله شتقنالكم ، ما تواخذوني ما كنت قادر اطلع على الانترنت متل الخلق شنو الكمبيوتر كان معطل ، بس المهم أنا هلأ فضيتلكن .

أولا ، بعد أن قرأت المشاركات السابقة أؤيد ما كتب أخونا فشلان ، جملة وتفصيلا .

ولاحظت أيضا ، أن الأخوات عم يتمأطعوا فينا ، يعني فيما يخص حقوق المرأة منفوت ومندافع أول ناس ، شرط أن لا يتجاوز تلك الحدود التي وضعها الرب تبارك وتعالى ، ولما انفتح موضوع للشباب لأول مرّة ، بلشوا يهاجمونا ولكن لما تصدي لهم واحباط محاولاتهم ، تركونا وبطلوا يطلّوا صوبنا ، يعني على الأقل قولوا معكون حق ، خطيتهم هل الرجال حقهم ضايعة .
يعني بهل الإيام ، وبعد ما كترت جمعيات المطالبة بحقوق النساء وهل الطق الحنك ، تأثرت فيهم بعض المسلمات ، فباتوا ممن يروجون لبضاعة تلك الجمعيات ، ونسيوو انو الرجال عندو حقوق ، جعلوا العلاقة بين الرجل والمرأة علاقة حرب ، فالمرأة في تصورهم يجب أن تكون قوية ومناضلة في هذه الحياة كي تحصل على حقوقها .

يعني اليوم النسوان بشكل عام لازم يراجعوا حساباتهم ، يعني ما بصير اليوم الواحدة يكون عندها تفكير خاص ، لم تعرفه نساء العصر الذهبي ولا بعده ، وماشية بين الناس وعاملة لحالها قصة انو هي هلأ مظلومة كتير ورح تبكينا معها ، وهي أصلا ما عارفة شو دورها ، وشو علاقتها مع زوجها ، وكيف لازم تعاملو .
يعني معليش ما بتخصروا شي ، شوفو النسوان من زمان كيف كانوا ، شوفوا اديش كانوا يحترموا رجالهم ويوقروهم ، بهل الإيام الواحدة بدها تقعد زوجها بالبيت وتروح تمشي بعد العشة بشارع الدينين وبدها الشباب يغضوا بصرهم وما يطلعوا على الشارع لأن فيه نسوان ،واذا وهي عم تكزدر تفشكلت ووقعت على الأرض أكيد بتحط الحق على زوجها ، وبس ترجع من الكزدورة بدها تلاقي العشاء مجهز و .......... يعني لو فيه الرجال يحبل كانوا طالبوا فيها . فليش هل التفكير الأعوج يعني الواحدة منهم ما تغزها شوكة بالصين الحق على الرجل فهو الظالم المفترس وهي القارورة الناعمة المتاكل حقها على طول .

وأخيرا أقول لجميع الشباب عرفوا كيف بدكون تنقوا ، وما تنغروا بالجمال الخارجي ، أو باللباس الشرعي ، أو بانخفاض الصوت أثناء الكلام ، فبفترة الخطوبة عرفوا كيف بدكو تفضحوها للمخلوقة اذا كانت عند كويسة ولا عم اتمثل ، يعني استفزوها قد ما فيكن .

يا أخي الكريم والله معك كل الحق . بس معليش بدنا نتحمل شوي النابغبه بعتقد عرف حالو . ونرجع شوي للموضوع . و نحكي عن حقوق الرجل و المرأه بكل جديه . الانهم هم بناة المستقبل.

أنا اليوم طلعت رحلة.. بتعرفو شو معناها هالرحلة.. كانت رحلة العمر.. الله يبارك بالاخوة في أجيال لأنو عملولي خدمة ما بتنسى...
اليوم وصل أول Sms من قلبي لقلب فشلانة... ومش هيك وبس.. وصلني كمان Sms جواب....
إنتو بتعرفو شو معناها هالحكي يا قاسي..... أو بتعرف شو معناها يلي اسا ما عم تثبت على اسم... بعدان على أساس نشوفك.. وين رحتو انزويتو ما حدا سمعلكن حس.... شو خيفان من فشلان؟؟؟؟ يا سيد فشلان 2 أو موفق أو زاهر أو ما بعرف بكرة شو؟
أنا اليوم مش رح شد بالكلام وهادا من صالحك يا سيد أبو جاد... خلينا نتعرف... وخليني أعرف شو ماسك عليي حتى شانن حرب شعواء عليي هيك.. يعني معليش جابر دملوك ما عمل شغلك.. والقاسي عم يلينها ويقسيها... ليش إنت حامل حملتي..
أنا اليوم مش رح احكي.. ومش رح اتعشى.. لأنو قرص اللحم بعجين يلي كلتو بكفيني الحياة كلها... والصيفية مش رح شوب بتعرفو ليش.. لأنو هالتلجات الخفاف يلي نزلو عليي.. أنا وعم بصبص من بعيد لبعيد... رح يبقو بجسمي الحياة كلها....ووصلي حقي كرجال... خلص رح فض الموضوع...
بس هادى ما بيعني إني بكرة ما رح رد.. بدي رد.. وردي زلزال..... بإذن الله

نحنا يا معشر النساء.. ناطرين تعليقاتكم على الموضوع.. معليش تشاوروا واسألوا حدا إذا ما عم تلاقو أجوبة...
وإذا بدكن راسلوني وأنا بدافع عنكن.. يعني بقولكن شو لازم تقولو.. حرام والله زعلت عليكن... اتاكل لسانكن هيكة....

خي فشلان كيفك كيف صحتك. أنا جيت لأني حبيت شدشد على أياديك و قلك قلبي معك و يعطيك ألف عافية على هالموضوع الثوري روح الله يحميك و لك انت ريشة الذين لا أصابع لهم.

و بحي كمان الاخ المناضل الشامي يلي عم آزرك بكل ما أوتي من قوة بس بقولو انو نسي يحسب تكاليف العرس و العلامة و من وينلو المعتر دفعة اولى؟؟

و بعدين يا عمر انت ليش عم تتمترس بالبراد و الاكل الباقي يعني ما بينعمل اكل عالأد؟

وبضم صوتي لصوت أخي نجحان و بتوجه للجنس القاسي ليش مطنشات منكن عم تردو؟!! ما عندكن صبيان ما بتخافو ما يشبشبو و يصيرو من جديد فشلان ؟! وللا مطمنين بس عأيش معتمدين؟ ما تنسو انو الله يمهل و لا يهمل.........

إنتو بتعرفو شو معناها هالحكي يا قاسي..... أو بتعرف شو معناها يلي اسا ما عم تثبت على اسم... بعدان على أساس نشوفك.. وين رحتو انزويتو ما حدا سمعلكن حس.... شو خيفان من فشلان؟؟؟؟ يا سيد فشلان 2 أو موفق أو زاهر أو ما بعرف بكرة شو؟

يا أخي أنا بكره التلج وبعدين أنا لا أقوم بعمل (حتى لو كانت نزهة) تحت إسم "جمعيات" فأنا لساتني "شريف" من هذه الناحية. ولك كنا جيران بالرحلة لكن أنا يا أخي ما أدرت نام الليلة التي قبل الرحلة (كنت مكتر شرب شاي---ولك ما أنا من آل حليحل، وحليحل يعني شاي) فكنت ميت النعس. أمت نمت بالبوصطة وانتظرت لحتا رجعوا رفاقي----ثم بديت الرحلة تاعتي بس نزلنا على منطقة الغداء. وهونيك بديت الرحلة العالمية---يا ريتك طلعت مع "الأحرار" لكنت شفت طبيعة ما شايفها من أبل......والله ستحليتك تكون معي

أما بالنسبة لإسمي فأنا منذ ولدت وصاعدا "زاهر عامر أحمد محمد علي عوض حليحل" وانتظرلك كم يوم لحطلك صورتك بالمنتدى. خزّء هويتك يا خيي (كما يقول "أحمد بشير" الله يرحمو، جد وسيم غنوم)
لأنها ما رح تلزملك بئا----في مين محضرلك مألب كبير بس مش أنا----شخص حكيو بيأطع الصخر.



وصايرين كتار هالأيام
سلام

أنا ماني عارف ليش الشعب كلو صاير عم يهاجمني.. بس بدي أعرف شو عاملكن أنا.. والله أنا آدمي.. وااااااععع وااااااععععع
بكيتوني.. كلكن ما بتحبوني ليش؟؟؟
بس أنا مع هيك.. رجال.. ورح ضل نادي بحقوق الرجال... ويلي معو هويتي.. أهلا وسهلا...
أنا يا حبيبي مش خايف حتى متخفي... بس متخفي حتى خايف... ولو كان الواحد أصلا بيعرف كان عرف... وقولة ما بيقولو
أعلى ما بخيلك اركبو.. إذا بتعرف تركب خيول أصلاً....
أنا ماني فاهم ليش كل المشاركات صارت ضدي.. لا بقى حدا عم يحكي عن حقوق.. ولا زواج ولا طلاق.. بس ما في غيري بالساحة.. يا أخي عفووووووو عني بقا... حاج لاقطيني بالمقلوب..
أنا ترى إذا عصبت.. ما تلوموا إلا نفسكم...
بس هلأ بعدني رايق.. وعم اعمل متسامح ورح انسى يلي صار

بعدان اسمحلي فيها.. وما تعمل قاضي القضاة.. وتحكم على الناس بإنن مش شرفاء.. خلي المحاسبة لربنا... والدعوة لنا....

السلام عليكم جميعا :)...

يا عمي شو بكم طولوا بالكم على الفشلان ... عم يحكي باسمنا ويدافع عن حقوقنا...

روح خيي فشلان والله لو خضت فينا البحر لغرقنا فيه معك ...مشيها .. لا تقللي البيت مكسور والوزن بدو تزبيط...

هلا خيي المُغترب ... شرفت المنتدى والله ... نورت...

على كل يا شباب خللونا نرجع للموضوع، بعتقد انو موضوع مهم ...

أخوكم:rolleyes:

السلام عليكم ياشباب الطيبه بارك الله بكم . يا عمي شو هل فشلال ياعمي والله بينحسد لحبكم بالشيخ فشلان. والله معك كول الحق يا أخ شامي انك أن تخوض البحار ومبعرف شو............. يا أخ فشلان معرفت كيف لاقطينك بالمقلوب .بعدين يا أخ فشلان نححا مبنخلي حدن يدسلك على طرف و نحنو هنا . بعدين يا أخي الشامي أن رأي لزم نعرف حقوق الأخوه و المحبه بن الشباب و بعدين بندَور على حقوق الرجال و النساء لانو يلي خرًب و ضيع كل الحقوق هو كرهنا لبعضنا و الحسد الذي يضر الجميع . فأرجو منك يا معلم تهتم بل نهتم كولنا بهل موضوع

السلام عليكم ..

جزاك الله خيراً أخي أبو جاد .. تم فتح الموضوع في الساحة الإسلامية :) ..

ونتابع هنا في موضوعنا حقووووووووووووق الرجااااااااااااااااااااااال...

أنا أرى أن نبدأ بعرض حقوقنا حقاً تلو الآخر ..

فمن سيبدأ...فشلااااااااااااااان...

أخوكم:rolleyes:

بالمناسبة عندما يكون إجماع الأمة على خطأ موضوع فلا بد أن يكون هذا الموضوع خطأ
وهكذا أراك يا "شبح" ما شايف إنو الناس لا تحترم الأشباح ولاحئينك بالعصاية وين ما رحت
أنا خلص رح غير لهجتي معك من الآن فصاعدا


بعدين إنت عم تئول :"بعدان اسمحلي فيها.. وما تعمل قاضي القضاة.. وتحكم على الناس بإنن مش شرفاء.. خلي المحاسبة لربنا... والدعوة لنا....".

ليش مين آل عنكم فاسدين؟؟؟ حدا آلها أو لمّح لها


ولك يا أخي أنصحك بأن ......المشكلة بأن النصيحة بالأماكن العامة لا تكون نصيحة.......(فقط نصيحة) وأنا من الآن وصاعدا بما أنني عرفت عن نفسي بكل وضوح (زاهر عامر أحمد محمد علي عوض حليحل):d رح إرجع أكتب كما كنت أكتب عندما فتح المنتدى (بكل جدية وبدون أي هزل) إن شاء الله


ومبروك كل ما يطلع موضوع مهم نضيعوا بأحاديثنا الجانبية وبردودنا على بعضنا -----لذا أطلب من الشامي أن يفتح ساحة خاصة للمعارضين للفشل-----شو رأيك خيي الشامي:d والله كام يوم وتصير أول ساحة بالمنتدى.


مبروك تضييع الموضوع على نفسك

أما للعودة للموضوع فأول حق أضعه هو :
من حقي أن أحصل على حقي :d -----شو رأيك خيي الشامي


سلام محبّة

اقتباس:

---

المشاركة الأصلية كتبت بواسطة Zaher Eddin

ليش مين آل عنكم فاسدين؟؟؟ حدا آلها أو لمّح لها

---

أنا لا أقوم بعمل (حتى لو كانت نزهة) تحت إسم "جمعيات" فأنا لساتني "شريف" من هذه الناحية

ما بعرف إذا هادي الجملة بتعني إنو إنت لأنك شريف ما بتروح مع ناس مش شرفاء... هية هيك بتعني.. بس يمكن ما يكون إنت قصدك هيك.. صار شي تاني....

ونحنا منحكم على الظاهر والباطن نتركه لله عز وجل...

ومع العودة إلى موضوعنا... يلي ما إلو طعمة طلع.. إذا نحنا رجال وبس وعم ندافع على حقوقنا الضايعة... وين النسوان حتى يعطو رأين.. شو نحنا عم نطالب بحقوقنا من الرجال ولا من النسوان؟؟؟؟