عريس لبناني معتّر....

[أمّ البراء]

السّلام عليكم اخواني في المنتدى....كيف الحال؟؟؟ أريد أن أخبركم أنّه بقي 19 يوما لموعد الامتحانات عندي..لذلك سأضطر لأترك المنتدى مدّة هذه الفترة! والى ذلك الحين أترككم مع فكاهة مريرة من واقع بلدنا المرير....على أمل أن تنال اعجابكم....أدعوا لنا بالتّوفيق!

حبّبتا وما سألت لا عن أهل
ولا عن قرابي...
وقصّتنا من طقطق للسّلام عليكم
ملياني غرابي...
كنّا سوا بنفس المدرسي!مسابقاتنا
نفس الاجابي...
وطريقنا واحد!بتتيتّم اذا بغيب!وبجنّ
اذا كانت غايبي...

وبعد مرور السّنوات....
كبرنا أنا والمحروسة بنت الجيران!
وصرت شوفا بالسّرقة ورا الحيطان...
لكان؟أنا بجي عاللّبنانيّة تعبان!
وبيّا ودّاها ع طبّ الآي يو بي!


راح يحدّث نفسه يقول...
يا زلمي الجامعة كلّا همّ وغمّ....
واجران طريق...اي من وين بدّي لمّ؟؟؟
محاضرات بتصرع ودروس ما بتنفهم....
اي ما رح ضيّع فيا شبابي....

وبعد تقبيل ألف يد....وجد صاحبنا عملا لا بأس به...وأتاه مخبر يقول أنّ بنت الجيران قد تقدّم لخطبتها عريس لقطة! فقرّر على عجالة أن يتقدّم ويخطبها.... ولكنّ الأمر يحتاج الى خلوة مع الأهل أوّلا...
رح خوض الاستحقاق! مين بيزايد؟؟
فوافقو أهلو بالنّصف زائد واحد....
وبقي التّلت المعطّل حضرة الوالد...
قال شو؟يقطع الخطّابي!


الأب:
يا ابني شو بدّك بهاللّبكي؟؟؟
الخطبة قرف! برّملك ع غير هالحكي...
يعني هلّأ بيّا كرمالك يا زكي
رح يشيلا من الطّبابي؟؟؟


الأمّ:
ما الك الّا تفاتحا بالموضوع.....
وتسكبلك قدّاما شويّة دموع...
مين بيعرف؟يمكن تطلّعنا من هالجوع....
أنا شي كذّابي؟؟؟؟

الأخ الأصغر:
امّي معا حقّ!القصّة ما بدّا خلوي!
يا أللّه اختا الزّغيرة شو حلوي...
بكرا بعمل عديلك!يلّا خيّي خلّيك قوي!
شايف أراءنا شو مصيبي؟

صاحبنا:
اي واللّه! آراءكن أكبر مصيبي!
ولك بدّي أعرف أنا ليه هيك عقابي؟
مابتفكّرو الّا بحالكن!وستّين عمري ما ارجع
لا أنا ولا حبّي....


ومضى المسكين ليقابل بنت الجيران....
أنا بقى البابا بدّو قصر وجنيني وملعب!
والماما بدّ طقم ألماز وطقم دهب؟؟؟
واخواتي بدّن كلّ وحدي عقد!ومضبوبين بالعلب!
وأنا ناطرتك يا حبيبي...


أخونا:بسّ يا حياتي الدّنيي غلا!
البنت:وأنا؟ما عندك ياني أغلا؟؟
أخونا:طيّب انطري شويّ! أزمة ومنحلّا...
البنت: أيمتا ؟بسّصير شايبي؟؟؟


وغادرت حبيبته وتركته سارحا يندب حظّه! فاذا بصديقه يسرع اليه بنبأ سارّ....
الصّديق:ولك ما سمعت اليوم الأخبار؟؟؟
قال مجلس الوزرا طلّع اللّيلة قرار
لرفع الأجور!شو باك بعدك محتار؟؟
أخونا: ولا يا فهيم!وينوّي المجلس النّيابي؟؟؟


وأكمل المسكين:
آخ! آخ! لبّسونا الفقر تلبيس...
شحّدونا اللّقمة وموّتونا تدعيس....
عيشي يا امّي وشوفي ابنك عريس....
لمّا يبقو ينتخبو الرّئيس....

يعني ما رح اتجوّزلترضى ايران وسوريا....
وتحلّ أميركا أزمة الصّواريخ مع روسيا...
وانشلّا لوقتا بكون مع الحور العين عم بتمخطر!
هيدي يا ناس...حكاية عريس لبناني معتّر....

[яiиda]

مشكورة اخت امّ البراء قصّة حلوة .سلام

[المحروم]

بارك الله بك أخت ام البراء والله جميله جدا
يعني متل مابقولوا دعستي بقلبها للمشكله
الله يعينا نحنا الشباب

[السجين]

مشكورة أختي أم البراء عالموضوع الحلو

[الزاهر]

هل المفروض اضحك................أم إبكي............لأن هادي حالنا كلنا!!!


بارك الله بك أم البراء..........أسلوب مميز وطريقة عرض جميلة

[مايا]

شكرا اخت ام البراء وعن جد هيدي الحقيقة

[أبو شريك]

مشاركة مميزة جدا والى الأمام

[أمّ البراء]

مشكورين على مشاركاتكن وابداء رأيكم بالموضوع! وفعلا أللّه يكون بعون كلّ الشّعب اللّبناني ما بسّ الشّباب اللّلبناني....