ذكريات في مدارس القلمون.........

[Nader 3:16]

كم كانت جميلة الايام التي قضيناها في صفوف القلمون...و الكل عنده ذكريات مع الاساتذة و الدروس....

يعني كل واحد ذاكر شي قصة حصلت معه في الصفّ او قصيدة قديمة مشهورة او شي درس ترك في نفسه انطباعاً...

فليشاركنا هنا...::


و سأكون اول من يبدأ:

وقت كنا بصفّ الخامس و كنا عالمنهجية القديمة لساتني متذكر استظهار كانو الطلاب حافظينها عن ظهر قلب...و اذكر ان استاذ اللغة العربية كان سمير خداج و كان لون كتاب العربي اخضر(ما بعرف اذا ذاكرو يا زاهر) ...و القصيدة كانت بآخرو حسب ذاكرتي...و بعتقد انو الكل سامعها او قاريها :


القصيدة تقول:

دارت مطحنتي يا جاري.......تهدر قرب النهر الجاري
تدعو الفلاحين اليها.........اهلا اهلا بالزوار
لبوها بغلال البيدر....لبّوها بالقمح الاسمر
من خيرات السهل الاخصر....فأغنّي و يطيب نهاري

دارت مطحنتي يا جاري.......


و لسا متذكر انو اول درس عربي كان عنوانو طيور ايلول...و انا اتمنى ان احصل على الكتاب...شو يا ارشيف زاهر ما عندك ياه...؟؟؟

يا الله يا شباب ورجونا همتكم اكيد عندكم قصص...يعني علقات او طرد من المدرسة او تكحيش لبرّة او شي من هالحكي....

و السلام عليكم و رحمة الله و بركاته

[مصطفى معتوق]

طلاب البلمند بيحقلن يشاركو ؟؟
او هاد الموضوع بس لتلاميذ مدارس الضيعة ؟؟؟؟؟؟؟؟؟

[Nader 3:16]

هلء انت مو من الضيعة يا معتوق!!!! يعني بحقلّك تشارك.....

بس ليش ما تسجلت بشي مدرسة قلمونية اذا كنت عارف انو بدك تشارك بهيك موضوع

الله يسامحك...على هذه الغلطة الشنيعة

و يا الله ناطرين مشاركتك......لأنو شكلك كنت ريس الصف و الفزع ما تكون ريس المنتدى

يا الله توكّل على الله و حط المشاركة

[الزاهر]

بتعرف يا نادر انو عندي 3 نسخ منو!!!!!
ههههههههههه

أوووووووووووووووف
احلا درس هو "أبو صابر"
وفي عندك.....دق قلبي دقات عنيفة عندما سمعت ابي يقول لأمي....... دبرنا له مدرسة!!!!!
ياااااااااااااااااااااااااااه

[دوكر]

يا هلا بالمعلم نادر تلاته ستاعش...............

يا ويلاي بتعرف اديش حلو هل الموضوع لي فتحتو .........يعطيك العافية.............

بتعرف ......احلى ايان ايام الثانوية.........ياي اديش كان عنا ؤصص........اديش هربانين ......اديش شاغلين بالأساتذة..............ياي...........

ناطرين ؤصصكن ......................

[Nader 3:16]

هلء يا شباب بدنا مواقف و قصص و شغلات...يعني ما بتكفي عبارات الشكر...بدنا همة...يا الله يا زاهر و يا عوكر و يا معتوق و يا ريس و يا ابو صطيف....ناطرينكم

[مصطفى معتوق]

هاد يا معلم نادر كان في حقلة لوز وقف للدير داير مندار المدرسة ...

وان اخوك معتوق بفصل الربيع يشن غارات على اللوزات هو والعصابة تاعيتو وكان شعارنا خلال الحملات انو مال الدير سرقتو حلال ....

وكان معنا اخي وصديقي الرفيق فيليب مالك نائب قائد المجموعة

بيوم من الايام نحنا ونازلين هبي بهاللوزات ما منشفلك الا الرفيق نبيل قبرصي (المعروف بعمو نبيل) جاية صوبنا وبيده عصا غليظة .........

اتاري كان الرفيق نبيل حاماتي من قلحات ضامن اللوزات من الدير هو والرفيق نبيل شراكة ... والعصابة نازلة فيهن هبي على اساس هنة للدير .........

والله كلنا يلي فيه النصيب وهربنا لمن شفنا نبيل بس المسكين فيليب وقع بالاسر واعترف علينا وتاني يوم تعرضنا لقصاص مرتب من ادارة المدرسة .......

[habouleh]

طلاب البلمند بيحقلن يشاركو ؟؟
او هاد الموضوع بس لتلاميذ مدارس الضيعة ؟؟؟؟؟؟؟؟؟

خلص بقى عرفنا انك كنت بالبلمند يا كلاسسسسسسسسسسسسسسسسسس

[RAMADAN]

خلص بقى عرفنا انك كنت بالبلمند يا كلاسسسسسسسسسسسسسسسسسس

ايه والله انو كلاسسسسسسسسسسسسس و خلسننننننننا يقى لعمييييييييييييي على قولة الزعيم

[أبو شريك]

هلا بأخي و حبيبي رمضان,.ايه للكلاسسسسسسسسسس ما في تنين بيختلفو على معتوق بس في واحد تاني كمان ما لزم ننسى و انت بتعرفوا

[Nader 3:16]

هههههههه ...سرقة لوزات الدير طلع حلال بالآخر.........

اهلين بالاخ معتوق..و بكل من هو غيران من معتوق

و يا الله ناطرينكم ...وين البقية...؟؟؟ كل هالاد كنتو عائلين بالمدرسة.؟؟؟؟؟؟

[Arsenic]

والله شي حلو كتير إنو الواحد يتذكر شي من الماضي.
بس أنا عنجد بستغرب كيف بتتذكر هيك أشياء قديمة كتير.
نس رح ؤلك قصة بالقسم أول لما إشترينا (كيس ريحة) وفجرناه عساعة الإقتصاد وكحشوني أنا وبعض الشباب .

و جاء في بيان اللجنة المنفذة للعملية...:


اننا في اللجنة نتبنى العملية البطولية و التي قام بتنفيذها مجموعة من كوادر اللجنة و من بينهم البطل Arsenic و التي كانت عبارة عن تفجير كيس رائحة يحتوى على غاز الكبريت....و قد انتشرت الرائحة في ارجاء الصف... و سجلت بعض حالات الاختناق في صفوف الطلاب خاصة الفتيات..و قد تم اعطاب ساعة الاقتصاد بالكامل...

و تم تكريم منفذي العملية و إعطائهم يومين إجازة.....

[Nader 3:16]

اهلين بالزميل Arsenic هههههههههههههه

و الله ايام بتاخد العقل....بتزكر انو البيانات صورناهم بالاول....وين صاروا ؤولك؟؟؟

لسا في كتير عمليات خصوصاً عساعات الفرنسي و الجغرافيا.....

و ان شاء الله الى عمليه أخرى ضد احد الاساتزة!!!!!!!!!!!!!!

[Software]

طلاب البلمند بيحقلن يشاركو ؟؟
او هاد الموضوع بس لتلاميذ مدارس الضيعة ؟؟؟؟؟؟؟؟؟

والله اذا الموضوع عن الطلاب القلمونيين يعني بيحقلن بس اذا عن مدارس القلمون ما ما بيحقلن إلا إذا نقلوا البلمند عالقلمون رح نشفلك الحج حتى طلاب الثانوية (تجمع المدارس) ما بقا يحقلن يشاركو

[فنكلوز]

what's silly logo in fact very silly

[яiиda]

who ask you

[fadi]

[Nader 3:16]

نوجه دعوة خاصة للأخ زاهر.....لحتا يغطي الاحتفال......كونو صحفي بارز في منتدى القلمون...

و نذكر بأنه سيكون هناك خطاب تاريخي بمناسبة الإحتفال

[THE TERRORIST]

شكراً يا نادر على القصص يللي حكيتها عنّي.... و أنا كنت حابب شارك بالموضوع بس للأسف ما فضل شي إحكيي....
يللا معليش...
و ميشان فادي... أنا من أوّل الطالعين بإذن الله...
و دوع

[fadi]

انشالله الخطاب رح ينحط عالمنتدى مع الصور
بس منّا حلوة منك يا نادر تعزم زاهر بس منشان التصوير زاهر من اول المعزومين و اكيد رح تجي الصحافة العالمية تنقل الخطاب التاريخي الذي يلقيه سيادة فخامة الدكتور السيد ********
لم اكتب اسمه بسبب الأوضاع الأمنية من شان م يغتالو بس م تزعلو الأربعا بتعرفو مين و هيك م بأسر بيعاود فيكن تغتالو
يتخلل السيران :
البدء بتلاوة لما تيسر من القرآن الكريم لشيخ قراء اللجنة
كلمة لفخامته
انتساب اعضاء جدد الى اللجنة و اداء القسم
انشاد لفرقة اللجنة للفن الإسلامي
ترقية للأعضاء و القادة
لعب غول و توزيع جوائز قيمة للفائزين
و أخيراً اكل و عصير على انواعه

[Nader 3:16]

يأطع خملك يا فادي صار شي 100 واحد عم يسألوني ايمتن الطلعة و اي ساعة و اديش الدفع ...

عجبني مشروع الاحتفال....بس مين هو شيخ القرّاء..؟؟؟؟(أبو صطيف)

[fadi]

تم تحديد الوقت الساعة السابعة و النصف صباحاً

[حُسَينْ ... !]

سلام عليكم
مشكورين يا شباب على هذه القصص الجميلة
و احبت ان اشارك معكم بي قصة صارت معي مع انطوان فرح
بي يوم من الايام قررنا انو نشتغل بأنطوان متل العادة يعني
كان متل عادتو عم يقرا النص و يفسر الكلمات الصعبة و انا و شب من الشباب الطيبة قاعدين ورا و ح نموت من الضجر ، قام طلع معي فكرة بغري قلتلو للي قاعد جنبي هيكا هيكا الفلم قلي تكرم
هوني رفعت أصبعي قام انطوان نصدم ، حسين عم يرفع اصبعو بدو يشارك؟ ما بصير اكيد في شي ، "تفضل سأل" بكل لهفة كان عم يقلي أنطوان ، ساعتا بادرت بالسأل "استاذ شمعناتا confuste (اسمي القديم بالمنتدى) "صار هو يطلع بالنص لي عم يفسرو "بأيا سطر؟"
"لأ يا استاذ منا بالنص هادا"
"لكن وين إريتا؟"
"مفيني قلك" و انا فارط من الدحك
"طيب بس قلي بأيا encyclopedie أريا"
"مفيني قلك"
"معأني مني سامع فيا ، بس براجعلك بالمراجع لي عندي و بردلك خبر بكرا"
هوني انا نكعت الشب لي جنبني
"استاذ استاذ ... شمعناتاconcrate؟"
هوني انتبه انو عم نشتغل فاي
"قمو طلعو لبرا"

و اسا فس قصص كتير صايرة معنا بالمدرسة ، و الله احلى ايام ايام المدرسة .

مشكورين

[Nader 3:16]

السلام عليكم يا confuste

بس دخلك شو معنى Solivotaire!????

كنا نتمنى انو تكون هون تحتا تطلع معنا!!!!!! بس بسيطة مرة تانية ان شاء الله....

[حُسَينْ ... !]

كيفك يا ندور؟
هههههههههه اكيد ما بعرف شمعناتا
صحتين على قلبكن ، و سلم على الشباب

[fadi]

اهلين ب حسسون
على سيرة انطوان صار بالأول اصا و هي
انا و كنت بالثنوية كل الأساتذة كنت عيطلن ابو شي متل ابو وسيم , ابو زياد و اخدو الشباب منّي هل الشغلة و صارو هنه يعيطولن هيك بس م كان في غير انطوان م منعرف هو ابو مين , فمرة اجتمعنا و اعجئناها علي و اسئلنا يا استاذ انطوان انته ابو شو فرد و ئلنا ابو مشي فصرخت انا ابو مشي ابو مشي و ردو الشباب ورايي فخوت من هل الشي و من وئتا من عيطلو ابو مشي
سلامي الحار الى : ابو وسيم , ابو زياد , ابو رامي , ابو شوقي ..........

[ابو عمر]

طيّب سمعوا هل القصّة....في مرّة واحد بلا ما نذكر اسمو كان عم يتغالظ على ساعة الأستاذ محمد غنوم، اَم عيطلو الأستاذ و لبجو أول كف، والتاني، والتالت، والرابع، والخامس، والسادس،و السابع، والتامن...اَم هوّا ورجع على محلّو سألوا رفقاتو ليش سكتّلو؟....اَم قلّن أنا ما سكتلو، بس لو يمدّ ايدو ويسفقني اسّا كف كنت بدّي جيب أجلو....
(الشبّ صبور يا عمّي.... ما فيكن تعتبوا عليه....وعلى فكرة هادي القصّة موثوق منها....)

[Nader 3:16]

ههههههههه...حلوة منك يا رامي....مينو داه الابضاي هيك!!!!!

و اهلين فيك انت و فادي منورين الموضوع

[fadi]

يا هلا بالأخ رامي و الى ئصه اخرى بس مع ذكر الأسماء

[ابو عمر]

والله يا فادي صرلي شي ساعة عم أكتب هل القصّة، مافي عربي على الكيبورد.....هلكت لأن ماني حافظن

[ابو عمر]

والله للأصص عندي مليون.....يعني إذا بدي احكي قصصي بس، بدّي شي سنة، لأنّو الأستاذ رضوان كان يعيطلي ثعلب من كتر ما هلكتو...ببقا بمرّقلكن كم قصّه ان شاء الله

[fadi]

له يا رامي هلء هيك كان يعيطلك
نحنا ناطرين الأصص وبدك تصبر علينا و تكتب بالعربي لأني انا متلك مفي عربي بالكمبيوتر بس الحمد لله متعود و كمان بالبيت كلو مفي ولا كيبورد عربي

[ابو عمر]

هاده يا شباب، حصل ذات مرّة في مدرسة المنار الإسلامية أن طرد الثعلب من حصّة الفرنسي من قبل الست عزيزة حمّود.....و هوّا واطرد الزلمة من هون، نزل على سيّارتها من هون.....وإذ بكون معو كيس من هيدا يلّي بتكبس عليه،اَم بيكبر وبيفجر وبطلّع ريحة يا محلى الريحة الطازة الأصليّة،....المهم، حضي هالثعلب بشبّاك السيارة مفتوح على أدّ الكيس....اَم بيكبس الثعلب هالكيس و بيدحشو بالسيارة، و بشدّ الشباك بالطالع حتّى يحبس مظبوط.....هلّق الفكرة إنّو ما حدا من الأساتذة بيعرف مين بس الصفّ كلّو سمع بالقصّة....اَم تاني يوم، بتجي الست عزيزة على الصف....وبتسأل مين الرزيل والبلا أخلاق يلّي شالح كيس ملبّس مدري Bonbon معفّن بالسبارة.....و راح الشعب كلّو فارط من الدحك...هاده اللّي انبطح بالأرض و ماعاد في يهدّي...والتاني يلّي صوتو وصل عبيتنا...وهيك.......مما أدى إلى طرد بعض التلاميذ من الصف، وأكيد الثعلب من بيناتهم...وهيك مرأت أوّساعة بيحضرها الثعلب..(على فكرة،هالقصّة لها تتمّة، ببقا بذكرها إن شاء الله).....يلاّ سلام

[Nader 3:16]

ههههههههه حلوة الؤصة يا ابو الروم.....بس بقولوا الشباب اخدوا اجازة ما بؤولوا انطردوا!!!!

[Nader 3:16]

بالاول وئت كنا بالقسم تاني..ضجت الدنيا بقصة الرسومات المسيئة لشخص النبي عليه الصلاة و السلام...

عندها قرر قائد اللجنة انو ينعمل مظاهرة احتجاج ضد الدانمارك عالفرصة...و وقتها امر القائد برسم عدد من اعلام الدانمارك لإحراقها...و ما بتلاقي بالصف الا يلي عم يرسم ما في حدا منتبه ...و الاخ فادي عم يحمس الشباب بصف العلوم العامة و عم يحضر الخطاب يلي بدو يلقيه الرئيس بالفرصة...

و عملنا مظاهرة شارك فيها كل اعضاء اللجنة بالاضافة الى الكثير من التلاميذ...و صار ترديد عبارات ضد الدانمارك (يا دانماركي ويا ئيئا و يا .....عتيئو) و من هالحكي...

و قد انصت الجميع لخطاب الرئيس الذي اكد فيه على استنكاره للعمل الشنيع ...
و بعد الانتهاء من الخطاب تم احراق اعلام الدانمارك و دوسها تحت الاقدام....
وصل الله على سيدنا محمد!!!

[fadi]

وئتا عملنا غنيه عن الدانمارك بس انا مؤ متذكرا فإذا حدى كان متذكرى من رفقاتنا يحطلنا ياها و بتبلش يا دانمارك و يا ئيئا يا تاسومه عتيئه..............
و مشكور يا نادر على ذكر هل الئصص

[شحتوت]

الله الله الله على هل الموضوع الحلو الله يعطيك العافية يا استاذ نادر ويزيد من أفكارك النيرة على فكرة أنا كنت كتير مشاغب بالصف بس ماني متزكر موائف حلوة هلق بسيطة الشباب بوفو وبكفو

[Nader 3:16]

اهلين بالمعلم شحتوت....

و بالنسبة للمعلم فادي...ما فينا اذكر هادي الخصوصيات هون...هادي الغنية من خصوصيات اللجنة!!!! ولو يا فادي

[moustafa]

يا الله......... أدّيش كانت إيام حلوة... و هيدي الغنية كانت بتجنن.... هههههههه الله يرجع هاديك الإيام.......مشكورين يا شباب

[Nader 3:16]

اهلين بأبو صطيف...نوطرين منك كم ؤصة جديدة...

حكيلنا تنشوف ؤصة العلءة مع روعة الشعاّر!!!! اذا ذاكرها

[fadi]

يا نادر روعة الشعار ئصتا ئصه و هي من احلا الئصص يلا شدو همتكن و كتبوا و اذا في شي ناسينو انا بذكركن فيي

رح بلش فيا من الأول:
هادا يا شباب كنا وئتا بالقسم تاني و كان صف العلوم العامة جمب صف علوم الحياة و الصفين بالبناية المجاورة للثانوية يعني كان بدكن تاكسي لتوصلو , و بيوم من الأيام كان عنا نحنا عل الحصة السادسة جغرافيا و أبلنا كان صف علوم الحياة عندن جغرافيا يعني الحصة الخامسة و المعلمة اللي بتعلم هل المادة هيه روعة الشعار فيا ساده خلصت المعلمة الحصة من عند علوم الحياة و كانت جاية لعنّا و يومتا كان التوزيع فكانت المديرة الفقدة للشرعية موزعه هدايا للناجحين و جايبين علامات منيحة و المعلم نادر كان طالعلو هدية آم عطيا ل آدي فمنرجع للئصة و هيه و جاية بدّا تفوت عالصف كان الباب مسكر و يومتا مبعرف مين كان خالع الدرفه التانية لأن الباب عنّا كانو يفتحو درفه واحده بس , فعم تفتح الباب و تشد و متقدر ليش؟
هادا لأني انا كنت قاعد ورا و فاتح الدرفه التانية و عم احكي مع الشباب تبعن صف علوم الحياة و من بيناتن آدي بدّور و يا حرام المعلمة تشد و منّا منتبها اني انا حاطط اجري عالباب منشان مينفتح و بعد شي 5 محاولات باءو بالفشل انتبهتلي و بلشت تعيط عليي و عصبت كتير من هل الشغلة , انا لا خدت ولا عطيت معا لأن كان صاير كتير ئصص بيني و بينا ئبله
بتفوت المعلمه عالصف و بتقعد عالكرسي و انا و كم شخص عم نحكي مع شباب علوم الحياة و نضحك عبعضنا عل العلامات اللي آخدينا بتعيط المعلمه عليين فبروحو و بيضل آدي عم يحكي معو فبتئولو المعلمه نإبر من هون بيبعد آدي نتفه من شان ميعاود مبين عليا و بكمل هكي معي بترجع بتقولو م سمعت نإبرين من هون ف لمعلم آدي مبيستحمل هل الكلمه لأن اول مره سكتلا بس بترجع بتئولو نإبرين يا باطل حرامه تئول لواحد هيك ,
المعلم آدي بيعصب و بيجي بيفتح باب الصف و بدو يهجم عالمعلمه و يئتلا فبنط انا و بمسكو و مبخلي يفوت عالصف و هو عم يبهدل المعلمه
بجرو برات الصف............
و بترك التكمله للشباب

[Inno 3:16]

إيه ما أحلى هاللأيام عم تفتقلنا جروحاتنا يا أخ نادر و الله أيام ما بتنتسى

[عمار الفلو]

أنا متابع بس عالسكيت

[flauritta]

فلتسقط الادارة الفاقدة للشرعية!!!
و مشكورين يا شباب عالعمليات البطولية......
وتحيا اللجنة و ننتظر زيارتكم القريبة لتخليص الثانوية من الادارة الفاقدة للشرعية.

[flauritta]

فلتسقط الادارة الفاقدة للشرعية!!!
و مشكورين يا شباب عالعمليات البطولية......
وتحيا اللجنة و ننتظر زيارتكم القريبة لتخليص الثانوية من الادارة الفاقدة للشرعية.

[Nader 3:16]

بالنسبة لموضوع لجنة الاخوات بالاجتماع الجاية منتباحث الأمر....

اليكم بعض انواع المشاغبات التي كنا نعملها بصف القسم اول:::

كان احد الشباب يءوم بنص ساعة الاقتصاد يقول بصوت عالي (وحدوه) فكل الشباب بصوت واحد (لا اله الا الله)...

يقوم شب تاني صلّو عالنبي و كل الشباب ( اللهم صلي عالنبي)

او مثلاً تكون معلمة الاقتصاد بدها تعمل مسابءة صغيرة بعشر دئايء
فكل مرة نسألها يا madame خطية ولا كتابية ؟ و هي منا منتبها عشي ........
و احياناً الشباب ما يكون جاي عبالهم يعملوا المسابءة فنفتح الكتاب نقرا بصوت عالي عم ننءل البنات...

و اذكر مرة اني اكلت عقوبة من رءيس اللجنة لأني اخدت ستة و نص ععشرين عمصسابقة الاقتصاد بينما كان الحد الاعلى المسموح به لشباب اللجنة هو اتنين و نص...و من يومتها تبنا و الحمد لله......

يا الله بزيادة عليكم اليوم...الى وقت آخر بإذن الله...

[ابو عمر]

أصحا حدا يغلط مع فاروق ها..... يعطيك العافية على هالقصّة الحلوة......و بالنسبة لموضوع فادي....يا خيّي صار بدها حرق دواليب.....شوفولنا شي حل ... مظاهرة أو أي شي...

[Nader 3:16]

السلام عليكم...
أهلين بدوكر و بأبو الروم...كيفكم؟؟

ما دام هيكا يا دوكر لازم انتا تحكيلنا شي ؤصة عن الاستاذ فاروق!!...
يعني صرلك من اول الموضوع بتءول عندي ءصص و ما شفناك كتبت شي اسا....

[Inno 3:16]

سلام.
مشكور كتير يا أخ نادر على هالقصص الحلوة.
أما بانسبة لدوكر فأكيد ما حيحكي شي لأنو مانو متعلم عند الإستاذ فاروق.(خارج عن الموضوع)-الأدمن

[دوكر]

يا هلا بالمعلم نادر...
المشكلة متل ما ألك المعلم انوو...ما فيني احكي منو لأني مني متعلم عند الاستاذ فاروق ...بس لأنو الؤصص لي بدي احكيا ازا اريا ايا حدا من الشباب رفؤتي او الصبايا لي كانو معي ايام الثانوية دوغري ح يعرفوني...عندي مع الاساتذة افلام و مواءف كتير...و حتى مع دكاترة الجامعة...ههههه...الؤصة متل ما ؤلتلك...
يعطيك العافية...
اخوكم دوكر المعوكر...