يوم.... في حياة طالب!!!

[الزاهر]

يمكن تستغربو بداية ليش حطيت الموضوع بهالساحة......
رح ألكم ليش.....لأن بعد ما تأروه....رح تشوفو المعاناة.......
وفي نسبة كبيييييييرة من شبابنا......عانت .....ورح تعاني متل بطل المغامرة!!!

فتأملو يرعاكم الله!!!

الموضوع طويل......وبدو وئت.......لكن كله من ألب دماغي....من ذاكرتي.....من خبرتي....من تجربتي!!!!

السلام عليكم ورحمة الله

اليوم رح احكيلكم مغامرة......لكن من نوع آخر......من نوع آخر عالآخر!!!!
هي أشبه بطراجيديا اجتماعية......كنت بطلها العام الفائت......ورح يكون لها أبطال كثر العام هاد.....الله يفرجها عليهم!!!!......وهيك كل عام!!!
"المغامرة" هي مجرد أحداث يوم واحد من أيام الدراسة (السنة الأولى) في الكلية، كلية العلوم.
سمعو لنشوف!!!!!

يوم.....في حياة طالب!!!

الساعة 5 بكير.....بيرن المنبه......وأد ماني نعسان.....بطفيه.....وبكفي نوم.....بيرجع يرن....ويرن...ويرن.......بطفيه عالآخر.....بيرن الكمبيوتر......وبيصرصع أهلي.......بيأوم البابا بيرشني رشة موية....منشان فيئ......أوم يا بابا صار وئت الجامعة!!!!
الله بيفرجها ومنؤوم من الفرشة......منغسل وشنا.......ومنجهز......منلبس......خلص....الحمد لله...جهزنا!!!
منحمل هالشنطة ومننطلق.....بتكون ساعتها الساعة شي 5 وتلت!!!

مننطر عالموقف......ومننطر....ومننطر......عسى نلئي تاكسي!!!!
وهون أصة تانية.........بالعادة....التكاسي بتمرأ عالساعة 5 ونص إذا ما لحأتو راحت للساعة 6......إذا وصلت 6 ودقيقة.....راحت للـ 6 ونص.....وإذا شي يوم مدت النومة.....وراح عليك تاكسي الـ 6 ونص......ما في داعي تطلع عالجامة أبدا......رجاع نام أحسن!!!!.....هلأ بتعرفو ليش!!!!

الحمد لله.....لأينا تاكسي......طلعنا بالتاكسي......تاكسي مهرغل زائين عليه خشب لسفينة نوح (عليه السلام) ........مشي التاكسي......وبلش يلفحك الهوا البارد.....بتجلد من البرد....بيوجعوك صابيعك......ما بتعاد شايف إدامك......وأد ما كنت لابس......برد مش طبيعي......بيدورلك السخان.......بيطلع هب غبرة......يا ويللال......صرلها مجمعة بالسخان سنين!!!!
وصلنا على الموقف.....نزلنا من هالتاكسي......واتجهنا نحو الموقف التاني......بدك تلحأ حالك......بتكون صارت الساعة ستة إلا ربع....إذا كنت آخد تاكسي الخمسة ونص من القلمون!!!!

وعلى بالك تنطر وتنطر وتنطر........الدقيقة بهالبرد متل دهر كامل!!!!!.....وأخيرا...تعبا التاكسي.....وأعدت جمب الشوفير مع واحد تاني......بيفظرك أد مانو لئيم...وما بيحس بغيرو!!!!


مشي التاكسي......
وعلى زوائيئ يمرأ فيها.........وكل وادي عالطريق ما شاء الله......بيحط وادي النبعة عأفاه بجيبة اليمين!!!!!.......وكل جبل.......ولا الأرنة السودة فيها تنافسو.......الحمد لله ما في طريق متل العالم!!!.....ما بتلحء توصل على نهر بو علي إلا بتكون على نتوفة بك تتفوع!!!!!.......وأخيرا......إذا أطعت النهر....خلص....هانت......هيك بتظن!!!!
لكن الحمد لله.....أطعنا النهر.....ومشي الحال......وبلشت الطريق السريع.....وبتؤول مهندس مصصم الطريق......ما بيصير...إلا لامين شي حمار أجلكم من عند المعلم مالك.....وهو مهندسها.....مستحيل يمر يوم....إلى بيجي الشوفير رح يتدهور بالوادي!!!!.....والتقاطع......الحمد لله ما بيصير إلا 3 حوادث كل يوم هونيك.......بس 3!!!!!
إذا مضيت على خير وما صرت بخبر كان.......ساعتها مشي الحال.....بتوصل عالقبة.....وبتؤول خييييييييييييييييييي.....وصلنا.......


وبعد كل هالطريق......بتكون صارت الساعة شي 6 بكير......ومجرد ما يوؤف التاكسي.......بدك تلحأ حالك......هون الأصة أصة حياة أو موت!!!!!.....بتفوت عالجامعة ركد......بتتوجه نحو القاعة تاعتك.....بتفوت من الباب.....وشو بتشوف يا حزركم......بتشوف قاعتي......
قاعتي.....اللي بدي قضي فيها 8 ساعات يوميا......قاعتي اللي فيها 398 مقعد مثبت.....وما يقارب الـ 40 كرسي عادي!!!!.....قاعتي اللي محجوزة نص المقاعد فيها من الساعة 6......والدوام بيبلش عالساعة 8........قاعتي اللي اللوح فيها طولو 12 متر.......قاعتي اللي المايكرو فيها صوتو بيصرصع.....لكن ما بينفهم.........قاعتي اللي فيها سخان بيبرد......ومكيف بيسخن!!!!....قاعتي اللي بينكسر فيها ضهرك من المأعد......وبيصير خلال أسبوع بدك عوينات......قاعتي اللي الدكتور فيها بتشوفو متل نملة عالأرض......أد مانو بعيد عنك.......قاعتي وقاعتي وقاعتي!!!!!!!


الحمد لله......لأينا مأعد بنص القاعة......لحأنا حالنا!!!!.......بس الساعة 6......والدوام بيبلش عالـ 8.....شو بدي اعمل......وما بتلحأ تسئل حالك السؤال إلا بتسمع صوت "طزرررررررررراااااااااااااااااااااااععععععععع!!!!" ............معدتك.........بتكون ميت الجوع.......لأن ما بتلحأ تتروأ بالبيت!!!!.......وبعد ما أمنت حجز إلك بالقاعة.....بتطلع من الجامعة وبتروح عند بياع الكعك.......وما بتسدأ بهالبرد كيف في منأل.....وبتطلب كعكة.....وبتدفا على هالمنأل!!!...ياااااااااااااااااااااااه....شو حلو الدفا!!!......ولبينما يحضرلك الكعكة......بتروح توصي على حلّة نسكافيه......منشان تضلك مصحصح...بعد هالفيئة عالساعة 5.........أكيد بعد كل هالعناء....ما بدك تضيع المحاضرة!!!!......وبتأعد تتروء مع العصافير .....


وإذا كنت محظوظ وعندك رفاق أوادم بالجامعة...(كوني وحيد بفرعي....ما معي حدا من القلمون.....فلازم اضرب صحبة الغرب)...بيأعدو معك وبتتروؤ مع بعض!!!!.....وبتشكو هموم بعض.....هاد بيألك دكتورنا مسطول.....هاد بيألك دكتورنا ختيار مكحكح......هادي بتألك دكتورنا حكيو مش مفهوم......وهاد بيألك دكتورتنا خطها ما بينأرا.....وهاد اللي بيألك دكتورنا في وشّة!!!......وخود على شكاوي ومشاكل.......الله وكيلكم أصغر دكتور بالجامعة عمرو فوء السبعين سنة!!!!....إلا بعض استثناءات قليلة!!!!.....

وأفهم دكتور فيهم ما بيعرف السباط من رغيف الخبز!!!!


ومنشان ما كون ظالم......في دكاترة عظماء......والحمد لله معظم اللي بيفهمو من عنا من القلمون......
من مثل ناصر الخطيب......وأخوه أحمد.......وغيرهم.....



وبلا طولة حديث.......هاد لأنك محظوظ.....حجزت محل بنص القاعة.....شايف حالك أد الدنية ومانك سئلان......أما أذا شي يوم ضيعت هالبرنامج هاد....يمكن تلائي محل بأواخر القاعة....بعيد عن الدكتور بس شي 40 متر....ساعتها.....إذا نزلت عالبيت أشرفلك ......والله أشرف بكتير!!!!

المهم.....ونحنا أعدين عم نتحادث.....يتبلش العجئة......ولبينما تصير الساعة 7 ونص......بتكون على شوية جمدت من البرد.....وصرت إنت والكرسي المكسور اللي آعد عليه بوظاية!!!!وبس تصير 7 ونص.....صار لازم تروح عالقاعة......لأن إذا تأخرت.....ما بتعاد فيك تفوت من العجئة.....وإذا ما كان حدا آخدلك حجزك....وعلأت معو.....وكلتلك شي موس...بتكون ملك زمانك!!!!.....بتأعد محلك.....وبتنطر....وبتنطر.....وبتنطر......وبرضو بتنطر.....وكمان بتنطر.....هالنص ساعة بتحسها لا نهائية.....أد ما في برد......والحمد لله.....حُررت القدس......


إجا الدكتور.....دكتور .....من فوتتو بتعرف إنو مسطول.....ما فيها كلام......سحنتو والسرماية زي بعض!!!!!.....بيفوت.....وبتبلش المحاضرة ببهدلة ومشكل مع اللي آعدين بالصفوف الأمامية.....مسكرين الطريق عالوافدين الجدد.....اللي بدهم يفوتو....يأيبلو على محل......ومن ساعتهم يرجعو......القاعة مليانة...وفيها فائض!!!!!


وبلش المسطول ....عفوا.....الدكتور بالمحاضرة......بتأعد ساعتين زمان على كرسي مهرغل....أصغر تغوير فيه بيمرأ جمل!!!!......وإذا مرو هالساعتين على خير.....بتعتل هم .....معي ربع ساعة.....بين المحاضرة هادي واللي بعدها......بدك بربع ساعة......تؤوم من محلك....وتطلع من القاعة....هادي العملية وحدها.....بدها شي 40 دقيقة.....وبدك تروح تشتري منؤوشة.....وأنينة عصير....وتاكل....وترتاح.....هادي بدها شي ربع ساعة......وإنت معك لكل هاد.....15 دقيقة....طيب....ما أكلنا.....وما طلعنا من القاعة.....نطرنا ....إجا تاني دكتور.....وبلشت المحاضرة.....وهي ساعتين تانيين......بس خلص.....لزء بطنك بضهرك.....بدك تاكل ما في كلام.....يا بتاكل يا بتموت......معك كمان ربع ساعة....بس هالمرة....بتبلش تجهز حالك نفسيا من أبل نهاية المحاضرة بنص ساعة......بتجهز حالك لمعركة الخروج من القاعة......وإذا نجيت من المعركة.....وإدرت تطلع بدون إصابات.....بتروح ركد ومتل الصاروخ بتعمل برمة على الدكاكين.....بتشتري أكلك....وأنينة عصير.....وبوجك على مكان الوضوء.....بتتوضا.....وبتصلي الضهر وحدك.....لأن ما فيك تصلي مع الجماعة....بتتأخر عن المحاضرة.....وبتاكل بهدلة وبيكحشك الدكتور......وبعد ما تصلي بوشك ركد عالقاعة....وهوم مصيبة.....بيطلع إدامك 400 شخص عم يحاولو كلهم يفوتو من باب بيمرأ 2 رفاع مسرنكين من متلي!!!!!.....وراحت على شي نص ساعة لبينما الكل يفوت.......وراحت نص ساعة من المحاضرة.....بدو يعوضها الدكتور إنو يمشي متل الصاروخ.......لا بتلحء تكتب....ولا بتلحء تفهم.......هو إنت أصلا بالكاد شايف المكتوب لأن الطبشور بيفرط فرط......ومانك سامع......لأن المايكرو ما شاء الله.....جودة ولا أنقى!!!


بتروح على مقعدك.....وبتبلش المحاضرة....وإنت بدك تاكل.....وتنتبه.....وتفهم......وتكتب.....وتتدفى ....وتفرك إيديك.....بنفس الوئت!!!!!

[الزاهر]

مضيت المحاضرة......منرجع لمعركة الخروج......وإنت معك ربع ساعة....بدك تطلع من القاعة بدون أضرار.....وتروح ركد على مكان الوضوء....وتتوضى.....وتصلي العصر.......ومتل القزيفة ترجع عالقاعة......ومنرجع لمعركة الدخول.....ولتأخير نص ساعة.....وتتكرر أصة الحصص السابقة!!!
وأخيرا.....بلشت آخر محاضرة.....وإن بئي عندك شوية كاز......بتصبر....وبتؤول لحالك....يا ولد.....هلأ صرلك صابر 6 ساعات.....ما فيك تصبر ساعتين زمان.....وبتدلك عم توعد حالك إنو يالله.......هانت......ما بئي غير ساعتين....كلها محاضرة يا زلمة!!!!.....وبيمرأ الوئت.....كأنو كل ثانية دهر.....خصوصي بعد كل هالتعب......وإذا كان الدكتور من فريق المجانين.....بتلائي شي يسليك......بتضحكلك نتوفة......وديرك على إشارات السير.....وبزاء عالطلاب....وتلبيط......وحكي مناقض لبعضو.....وكلمات ما لها معنا.....ولك مين عطاه شهادتو ما عم استوعب.....!!!!






المهم......وإنت بنص المحاضرة.....بيكون أرب المغرب.....وبلش الجو يبرد من جديد........
ولبينما تخلص المحاضرة....بيكون باقي شي 5 دقائق للمغرب......






وأخيرا......خلص الدكتور......وشو بيصير يا حزركم......المعركتين اللي صارو بالسابق.....سلطة عجناب اللي بدو يصير.....400 طالب ميتين التعب.......بدهم كلهم يطلعو من الباب (اللي بيمرأ 2 مسرنكين زيي) خلال خمس دقائق......وهالدفاتر اللي عم تطير.....وهالبنات اللي عم تصرخ.....وهاد اللي تدعس عليه......وهاد اللي وئع عن الحرف.......مستحيل تمضي على خير!!!!!.....






خيييييييييييييييييييييييييييييييييييييييييييييييي. ......الحمد لله....طلعنا!!!!





وتوجهنا نحو بواية الجامعة.......بدنا ننطر التاكسي.....لكن الحمد لله.....هون بك تتعارك مين بدو يطلع بتاكسي....ما بك تنطر......حاصله......بتركب بهالتاكسي.......وبيكون المغرب أساسا مأدن من شي 10 دقائق.......وبتتوجه تزولا نحو التل......ونفس أصة الطلعة......مصيبة.....لكن هالمرة....في شي غير شكل.....في عجئة على مدخل المدينة!!!.....وأتحداك إذا بتوصل عالبيت بالقلمون أبل العشاء!!!...بتكون معجزة ربانية!!!!






بتوصل عالألمون.....وبتؤول يا ريتني ما وصلت....يا ريني عملت حادث وما رجعت.....بتوصل ميت التعب....بتوصل بيستقبلوك أهلك كأنك كنت مسافر شي 30 سنة......بتوصل إجريك مكسرين......بتوصل ميت الجوع....بتوصل عينيك مسكرين من النعس........بتوصل ويا ريتك ما وصلت.......بدك ترتاح.....وتتغدى......وتدرس.......وتروح عن نفسك......أكيد بالبيت.....
شي اسمو رفقة.....نساه.....شي اسمو كزار.....كمان نساه.......شي اسمو رياحة.....ما تفكر فيه...شي اسمو حياة.......ما في داعي توجع راسك.......بتنام......وعتلان هم بكرا......رح يتكرر الفلم هو ذاتو كل يوم.....كل يوم ......وكل يوم!!!!!






بتبلش السنة.....في 400 بالقاعة......وبيخلص الفصل الأول....بيصيرو 120....
280 طالب ...شي مات.....شي انتحر (على زماني في واحدة انتحرت....دكتورها صرلو عم يسأطها بمادة 3 سنين.....وهي متفوقة) شي راح على مستشفيات مجانين......شي انتبه على حالو شو عم يعمل ودبر راسو بشي محل تصليح سيارات......شي لئي جامعة تأنيه ولو متأخر.....





ومن هالـ 120 اللي بقيو للفصل التاني.....في 100 منهم بياخدو أدوية أعصاب....و40 من هادول فكرو بالانتحار شي 3 مرات......ومن الـ 120 في 76 معيدين!!!!
ومع نهاية الفصل التاني.....يبقى في بالقاعة ما لا يزيد عن 15 طالب!!!!!

هذه كانت تجربتي في كلية العلوم.....كنت طالب فيزياء......وقررت 3 مرات خلال العالم إني مستحيل بأي شكل من الأشكال إني كفي بهالجامعة.......وخبرت أبي بهـ 3 مرات.....إنو أنا مؤ فيني استحمل!!!......لكن.....في كل مرة....كنت افتح كتاب الفيزيك.....وتعجبني مسئلة.....فحلها.....وتعجبني اللي بعدها.....وحلها.....واللي بعدا...واللي بعدها.....وارجع غيير رأيي!!!



وبنهاية العام......ومع اقتراب نهاية الفصل التاني......وصلت لمرحلة إنو بلشت ارسم اكتر....بلشت ما أطلع عالجامعة......بلشت ما اطلع عالضيعة......بلشت اعتزل العالم......لكن والحمد لله....مع نيتي إني ارسب......وعزمي.....وهمتي على الرسوب.....ما بعرف كيف نجحت......كنت ادرس المادة ما بين أذان الصبح.....وموعد الامتحان......وأطلع أدمها!!!.....لكن بالنهاية........زمطنا!!!!!!!!!



هادي هي "المغامرة".......اللي عشتها......واللي رح يعيشوها طلاب السنة الأولى هالعام...والعام القادم......واللي بعدو وبعدو وبعدو........
الله يبعدكم عن هيك معاناة!!!!
بس بيني وبينكم.....الحأ عليي.....أنا اللي عندت وما أبلت إلا بدي فوت عالعلوم.....ولك يا بابا.....بلالك هالشغلة.....ولك أحي الجامعات كلها مفتوحة بوشك......ولا كنت اقبل.....إلا العلوم!!!!......خرجي.....تجربة صعبة.....لكن مهمة......وضروري الواحد تمر عليه ظروف صعبة........ليعرف قيمة النعم اللي الله عطاه ياها!!!!




دمتم بكل خير.....
والسلام عليكم!!!!

[الريس]

ولك يا عمي ما في حدا بالدنيا مرتاح ، قولوا الحمد لله ، واطلع بالناس يلي دونك ، في ناس من الساعة ثلاتة الصبح بروحوا على النكيش ، وفي ناس أفضل ، وفي ناس أسوء ، قول الحمد لله ، وعلى طول اطلع بالناس يلي حالتهم دون حالتك -طبعا فيما يخص أمور الدنيا- ، وبالنسبة لأمور الدين اطلع بالناس يلي هم احسن منك .

[الزاهر]

ولك الله يخليك يا ريس......عنجد بيشرفني تكون أول من رد على أول موضوع لي من شي شهرين!!!!

على كل.....أنا قلت في نهاية الموضوه هالشي....ولو بطرقة تانية
خرجي.....تجربة صعبة.....لكن مهمة......وضروري الواحد تمر عليه ظروف صعبة........ليعرف قيمة النعم اللي الله عطاه ياها!!!!
الحمد لله......الحمد لله....ولك كوادرليون الحمد لله!!!!

[دوكرة المعوكرة]

كلامك مزبوط 100% و كلنا عشنا هالعيشة المقرفة
بس انا كنت احسن منك كنت احمل اغراضي و ارجع عالبيت لما ما لاقي محل
نحن خلصنا من هالهم و هلق دور الصغار و الجداد
الله يصبرهم

[الزاهر]

ولك والله بس اتذكر هاديك الأيام.......ما بعرف كيف بحس......بضحك وببكي!!!!
وبتمنا ما حدا يشوفها!!!!!

[عبد الرحمن الفلو]

شبدك تؤول اذا جيت عفرنسا !!!

[shanzimer6]

السلام عليكم:

إهداء لكل طالب كان أو ما زال أو سيكون يوماً في رحاب العلوم....

وينهي الطالب الثانوي

نشيطاً مفعماً حيوي

ويوصي الوالد الابنا

بنيل العلم كي يهنا

ويختار العلوم له

لأنّ القسط يعجبه

ويأتي طالب العلم

إلى التسجيل في يوم

فيا عجباً من المنظر

كأنّك بت في المحشر

وكلّ يدفش الكلا

فيغدو الجسم منحلا

وتنزوط العيون ولا

مفرّ هناك أو حولا

وينقطع الهواء أخي

مع التدفيش والسلخ

وأقضي الوقت منتظراً

بوسط العجقة الكبرى

فويلي ثم شحاري

متى ستكون أدواري

وإذ بعد ساعات

وتدعيس وضربات

توقفت تسجّلت

وتلميذاً هنا صرت

وكان بذاك تدميري

وتشحيري وتعتيري

بأيّ خطيئة قمت

وأيّ خرابة جئت

كثير ما نعانيه

من التشريد والتيه

ألوف الناس في الصف

ترى الكتف على الكتف

فذي القاعات لا تسع

وحلّ بظهري الوجع

من الكرسي والمقعد

إذا حركته أرعد

ودكتوري يحدّثني

حديثاً كله صيني

فشرح الدرس لا أسمع

وخط اللوح لا أقشع

وذي الكورات فشكلة

وتعتير وبهدلة

وتخرج آخر الدرس

طرشت عميت مع خرس

فكيف نجاحنا نلقى

ونحن بهمنا نشقى

وقالوا جاءك الزفت

وظنوني لذا ارتحت

غداً يتساقط المطر

وتلقى الزفت ينقشر

يعود الوحل للركب

فيا ويلي ويا تعبي

فنصرخ حينها" تيتي

كما رحلت قد جيتي"

ولكن ما يواسيني

يخفف كل أحزاني

هم أنتم أيا صحبي

رفاق العلم والدرب

فأنتم بسمة العمر

وأنتم طلة الزهر

ونجم شعّ وهاجا

ونور فاض أمواجا

وأنتم عطرنا الزاكي

وورد دون أشواك

فأهديكم سلاماتي

وفيضاً من تحياتي

أحيّي كل أحبابي

ورابطةً لطلاب

على الخيرات تجمعنا

إلى العلياء ترفعنا

وأدعو ربنا المولى

يديم لقاءنا الأحلى

بكم يا طلعة البدر

وشمس الكون في الظهر

إعداد: بشار إسماعيل

[دوكر]

يا هلا بالست شانزيمر.........
يعطيكي العافية ع هل النءل ......انا و عم ؤراها كنت عم ؤل ءصيدة سامعا......و عم اسأل حالي وين........ت حتى شفت المؤلف......يا هلا بالمعلم بشار اسماعيل........و لك وينك يا زلمة ....ؤلولنا انك روحت ع فرنسا........كوما سفا؟........تحية مني لاك يا معلم.....
اه اه ....ايام ........عنجد رغم كل هل المصاعب لي بالعلوم......كنا نلاءي انو لها نكهة تانية......فيا روح حلوة...........
المية لي بطنإط عليكي من السأف........هههههههه........
احلى الشي وءت لي بدك تؤرا وين طالع ....بأيا قاعة بالامتحان......بدك تجي ابل ستة ايام....و في عالم كانت تدوخ.....هههههههه.....ؤل تأخر ع الامتحان....اسا ما لءي اسمو...ههههههههههه.....
اسا النتائج....بعد شهر طل ت تكون خفة العجءة.........
اه اه........
يعطيكي العافية
اخوكم دوكر المعوكر...........

[الزاهر]

[دوكر]

يا هلا بالمعلم زاهر .......يا ويلاي ....كيف راءيع هل الصور..........كتير حلوين.....ازا عندك اسا حطلنا.................و لك ياويلاي .........كأني ؤعد بالقاعة هلأ و الدكتور عم يشرح...............ليك كيف ؤعدين فوء بعضون.....هههههههههههههه......حلوين........
يعطيك العافية..................

[shanzimer6]

تكاثرت الدروس غدت تلالا
وذهني من تكاثرها تلالا


وجامعتي تزيد هموم عيشي
وترمي صوب أحلامي النبالا


أساتذتي عباقرة ولكن
إذا شرحوا فلست أعي مقالا


وإن أشكو إليهم ما أعاني
أرى غضباً لديهم وانفعالا


ويلقون إتهامات جزافاً
على التلميذ يلقوها وبالا


يقولون:" العلوم ديار جدّ
لأهل العلم ليست للكسالى


بكم صارت خراباً أو مزاراً
لعشاق يرون بها جمالا


وضيّعتم جهود الأهل ظلماً
وتفريطاً وهدراً وانحلالا


فما أنتم تلاميذ ولكن
شباب صاع في الدنيا وجالا"


أساتذتي الأفاضل أعذروني
فصدري ضاق والصبر استقالا


أتيت إلى العلوم أروم نفعاً
وعلماً لا جدالاً أو سجالا


ولكني صدمت بها وضعت
وأحلامي بها صارت خيالا


فمشكلة العلوم هنا أراها
مناهج زادها الدهر اعتلالا


زعمتم أنّكم غيّرتموها
وأنّ الدرس للتيسير مالا


وأنّ نجاح طلاب العلوم
بأيديهم, فأحسن منه فالا


فإذ بدروسنا تبقى هموماً
وتهتف للرسوب بأن تعالا


فلم يطرأ من التغيير شيء
سوى أسماء بدّلت احتيالا


وإن صلح المعلم والكتاب
وأبدى طالب العلم امتثالا


ينال مع الدروس أذىً وسقماً
يهدّ الجسم أو يردي الغزالا


فإنّي جئتها وخرجت منها
بضيق تنفّس وزد احولالا


فعذراً يا أساتذتي وأهلي
إذا ما الشرح عن حالي استطالا


ولكني فجعت ورغم أنّي
طلبت العلم لم أطلب محالا


فجامعتي تريد شباب عزّ
يرون العلم كسباً أو نضالا.

إعداد: عبد الرحمن قلاوون.

[الزاهر]

أييييييييييييه !!!
أيام كانت

[Nadine]

إهداء لكل طالب كان أو ما زال أو سيكون يوماً في رحاب العلوم....

كتير حلوة القصيدة ذكرتني بإيام الجامعة. مشكورة يا ارايبة على نقلها.

ومشكور يا اخ زاهر على هالصور .

[shanzimer6]

السلام عليكم:

أرجو من المشرف الكريم أن ينقل هذا الموضوع إلى موضوع :" يوم في حياة طالب".... لدورانه حول نفس الموضوع....
وشكراً...

[الزاهر]

يا هلا بالضيوف............الموضوع موضوعكن...........خدو رياحتكن!!!!

[malikatou lwouroud]

كتير حلوين هالقصائد مشكورة يا أخت شانزيمر 6 واللّه عم تخوّفوني من الجامعة!!!

لا واللّه شوّقتوني اطلع وجرّب منيح فيا شويّة أكشن ما بها شي....
بسّ بحبّ طمّنكن أنو من كم يوم عملت مقابلة مع مدير كليّة العلوم وواجهنا بكلّ هالمشاكل وقال انّن ناويين يوسّعوا القاعات (ان شاء اللّه!!!) وقال مفكّرين يفتحو ماجستير بالشّمال لما يتعذّبو التلاميذ بالنزلة عبيروت(بسّ عيش يا كديش تينبت الحشيش.....)

كمان سألتو عن التّمييز والتعصّب الديني اللّي شفنا صورة عنو من كم يوم بسّ نكر وقال منو مظبوط فسمّعتو شريط سجّلتو لاحدى الطّالبات هي وعم تشك من هالمشكلة فعبأّ وسكت(هههههههههههههههه....)
بسّ بحبّ أول للأخّ نادر أنو متل ما في دكاترة الواحد منن بيبقى تراكتور بدل الدّكتور في دكاترة رائعين بالعلوم وغيرا متل عبير نور و خالد حسين و بشّار الحسن وغيرن كتيررررررررر اللّه يعيننا السّنة الجاية!!!!!!!!!!..............

[Nader 3:16]

MIN ALLEK????
MAFI 7ADEN BIKOLL L 3OULOUM BYA3REF Y3ALLEM CHAY ISMOU PRINCIPE...YALLI BYA3REF Y3ALLEM BYA3REF YKHALLINI 7OLL EXERCICE MA AKTAR MA I7TIRAMI LI BA3D AL DACATIRA W MOU L KOLL WA LAW KENOU MIN L ALMOUN

[malikatou lwouroud]

lah ya 2a55 Nader ana ma3ak innou fi ktiiiiiiiiiirrrrrrrrr dakatra bil3ouloum ma byifhamou bass fi kaman dakatra byihlakou 3atlamizon w biyfahhmou tlamiz ssanawi 2add ma tari2iton hilwe w basita bass ma3 l3elem innou ma3loumaton ghazira w min 2afham nnas baddi 2is2alak
ddoktor Khaled Hussein 3allimak shi??eh walla tari2tou ra2i3a w ba3den byitsahal ktiiiiiiiiiiirrrrrrrrr bittishih w hada bil3ouloum

[Nader 3:16]

ولك هادا واحد....


عم امزح مع انو ما بعلمني بس بشوفوا بالجامع كتيييييييييييير ...اخلاقو عالية و بيحكي كتيييير بالسياسة.....

لوووووووووووووووووووول......

[Nader 3:16]

بالمناسبة سألت واحد من رفءاتي كان يتعلم عندو...
بس ما حدا يزعل::::

سمعت انو منو كل هالأد بالتعليم....

[wassim.h]

eh heda rfi2ek elli allak hak 3an l doctor kholed hussein shaklu ahbal w manu mit3allim bil marra la2an Dr.5oled ma3ruf innu min a7sen l daketra bil 3ouloum w ar7amoun bil 3alemet
fa ollou yro7 ynem a7senlaw

[wassim.h]

w ti3li2an 3an l 7adis li ablu ya nader w ya malikatou lwouroud
sa7i7 ya Nader innu ma3ek 7a22 mafi 7aden bil 3ouloum bia3ref y3alllem principe mazbout.... bass bikol l jem3at hak w iza mfakker l jem3a l 5assa ghar hak fa inta gholtan ....l jem3a l 5assa btisma3 3anna inna sahleh la2an shi3arouha(idfa3 tanja7) manu la2an l daketra a7san w bi3almu principe ....hiyeh bil asl el mar7aleh l jem3iye el w7ed lezem yi3timid 3a 7elu ya3ni el doctor bya3tik 15% w inteh l be2i 3lak wel jem3at l 5assa ma7a ya3tuk ma3loumet aktar min el 3ouloum..... bass l boshe3 bil 3ouloum innu l 3adad kbir w baddak tfi2 abkar minshen ti2dir ti7jizz ma7al la ti2dir tshof l doctor:S...bass halla2 smi3t innon baddon y2alilou 3adad l mitsajlin jded...ya3ni mafi yitsajjal aktar min 3adad m3ayan ..yimkin 150 talib..nshalla ykun hak minshen illi badon yod5lu sine oula yirte7ou aktar...oulou 2aaamin

[مايا]

السلام عليكم ورحمة الله وبركاته
هههههههههههههههههههههههههههههههههههه
الحمد لله يلي ما فيني فوت علوم ههههههههههههه .

[Nader 3:16]

شباك يا زاهر بالش تفتيح بهل المواضيع القديمة؟؟؟ ءلي في شي.؟؟؟؟؟

[الزاهر]

بما اني شتئت للكلية حبيت ارجع افتح الموضوع شوفو .. فألت بفوشلكم ياه منشان الطلاب الجداد بالعلوم يعرفو النعمة !!

[T a c o]

هههههههههه... يااااااااي حلوووووووووو الموضوع .. كتيييير ...!!! شكرااااااا ..!!

[الزاهر]

السلام عليكم



اليوم وفي طريقي للكلية في كل سيارة أجرة ركبتها جرى حوار أعجبني أقتبس منه لكم التالي (من الذاكرة):

من موقف القلمون إلى موقع التل شاهد السائق أحد الباعة الذين يجرون عرباية ؛ فعلق قائلا :
آل البلدية (ويقصد بلدية طرابلس) بدا تمنع تبعون العربايات لأن آل بيسيآو للسياحة ... بيضرو السواح كتير ...

إنو هالجور اللي بطالرءات هادي ... ليك ليك (ويدلنا على مجموعة من الجور العميقة أمامنا) ... هالجور هادي مفيدة كتير للسياحة ...


لازم يصوروا ويعملو عنا ربورتاج ... يبعتو لبلاد برا ... ليعملو طرئهم متل عنا ... أد منها مفيدة للسياحة !!!! ... لا ضروري ... ضروري كتير !!!

شاطرين بس يأطعو أرزاء العالم ... لك ما حرام هادال ... ما عندهم عيل وولاد ... آل سياحة آل !!!


أما من موقف التل إلى موقف قبة النصر؛ فكان بجانبي جيشي ... وعلقنا على الطريق بسبب حادث أمامنا وتوقف السير ... فعلق الجيشي قائلا لقائد السيارة :" إنت كنت تروح من تبعون الدعوة شي ؟؟ ... لأن كأني شايفك أبل" وأجاب قائد السيارة بالإيجاب ... وبدأ يشرح له من أين لو مر لكنا وصلنا ... من طلعة المسجد العمري وأكمل:

هادا يا سيدي الكريم العمري ولي من أولياء الله .. عندو كتير كرامات أخي ...

آل شكين أخي ... آل كان بس يجي لعندو زوار ... كان يئيم صفوة ... صفوة هادي تبعت النار ... بتعرفها لك صفوة ... ويعملهم منها أهوة أخي ... من الصفوة !!! ... سبحان الله !!!


وإسا شكان ... لك أخي عندو كرامات كتير أخي ... كان مرة من المرات بدو يدبح خوروف أخي ... آم جاب عودة .. عودة عودة هالأد (وأشار بطول فتر) .. ودبحو وسلخو فيها ... عودة ... (منيح اللي ما ألو شويه فيها كمان ).

لك عندو كرامات كتير أخي .. أصحاك تفكر أخي هاد كلام شو ما كان ... كلو حء وصحيح ... لكن أخي .. ولي ولي ...

إسا آل شكان ... (وفي هذه اللحظة لقينا الحادث ولم يكمل بقية الكرامات !!!! ... الحمد لله ... )


فهكذا بدأ يوم الطالب حضرة جنابي اليوم !!!!

[هادي شقرة]

والله يا اخ زاهر الله يبارك فيك .. فرط من الدحك وءت ءريت هل ءصا .. ايشودا يا زلمه ..بصراحة كنت عم إبكي من الداحك .. الله يعينكن و يعين كل التلاميذ الي رح يخوضو هل تجربة الصعبة

[أبو الشوارب]

السلام عليكم. الآن ايام الشدة يا اخ زاهر لما كنا بالسنة الأولى كانت رحمة بالنسبة للسنة التانية خصوصاً انو نظام المواد شديد. وعجبوني القصائد الموجودة في الموضوع . وتحية للأخ أبو صطيف الذي ترك الكنام. الله يوفقك يا اخ مصطفى وادعيلي انجح بهالمواد.

[Nader 3:16]

السلام عليكم
رجعت اريت الموضوع كلو و فرطت من الدحك! يأطع خملك يا زاهر.
المهم
بما انو في جيل جامعي جديد من شباب الالمون الأشاوس.
يسمعونا صوتهم.
وكمانا...!
مبارك حكيلنا يومياتك بالبلمند.
زاهر و طه وانس وربيع بالحدث ببيروت.
وسام و عمار و فراس و ...بفرنسا.
الاخ اسامة و الارسنيك يحكولنا عن بطولاتهم ورزالتهم بالعلوم.
الشباب الأشاوس وسيم و سامر والحسون و اسامة بالجامعة العربية.
الاخ أبو حسان ابن فرج الاثري القلموني السلفي الملقب ب ramo يحكيلنا بطولاتو بالهندسة.

ملاحظة: ما بكتب الا ما الاخ مبارك يكتب.!

سمعونا صوتكم من جديد!

[الزاهر]

قريبا ان شاء الله d:

[ramo]

وعليكم السلام
ما عندي بطولات لإحكيها يا أخي , لأنّو لسّا ما كوّنت رفأة
دايماً بوعود وحدي على الفرصة وِبْ بَلِّشْ كَدِّشْ لَفّوفْتَيْ أو إذا منّا عاملتلي الماما لفّوفة , بحطّ راسي على الطبئة وبنام

بس سمعت إنو شبّ رزيل إسمو نادر وسام الأبيض , يلي مقابل بلكون بيتن في تليفون كبير , عاجبتو بنت وهّابية من البلمند
خبرنا كيف بلّشت معك الؤصة وكيف عم تتطوّر مشان يستفادو منّك الشباب

[Nader 3:16]

وعليكم السلام
ما عندي بطولات لإحكيها يا أخي , لأنّو لسّا ما كوّنت رفأة
دايماً بوعود وحدي على الفرصة وِبْ بَلِّشْ كَدِّشْ لَفْتَيْ أو إذا منّا عاملتلي الماما لفّة , بحطّ راسي على الطبئة وبنام

بس سمعت إنو شبّ رزيل إسمو نادر وسام الأبيض , يلي مقابل بلكون بيتن في تليفون كبير , عاجبتو بنت وهّابية من البلمند
خبرنا كيف بلّشت معك الؤصة وكيف عم تتطور مشان يستفادو منّك الشباب

اهلين بالرامو....
ءريباً ان شاء الله أخي الرامو..اليوم بالسهرو تكرم عينك....
أخوكم دوكر المعوكر...

[ramo]

[Nader 3:16]

السلام عليكم أخانا الفاضل ramo.
القصة منا سهلة ، بدها أَدَح شاي و لفوفة لبنة و بحكيلك.
هل أنت مستعد؟

[A7MAD]

هنه أول 100 سنة صعبات

والباقي بيتيسر من عند لالله

كويس عدينا مرحلة السنة الاولى والضياع

يسلموا دياتك أخي الزاهر

[الزاهر]

هنه أول 100 سنة صعبات

والباقي بيتيسر من عند لالله

كويس عدينا مرحلة السنة الاولى والضياع

يسلموا دياتك أخي الزاهر

يا هلا بالشعب المناضل :d

[EVA]

لا عنجد اللي بيفوت عهالصفحه بتترتفع معنويّاتو الله يبشركم بالخير من اليوم عم نترقّب مصيرنا الاسود بالجامعة ....لا اله الّا الله ..

[EVA]

هههههه
حتى لو بدنا نعمل طبّ .....اوّل سنه بالعلوم ....يلّا من هلق لوقتا الله بيفرجا....الله يعينكن آل العلوم