عنوان غريب و أنا كنت محتار تحت أي موضوع بالمنتدى ! هون والا بموضوع الأخ أسامة عن العادات القلمونية.
المهم يمكن هادي من العادات هالي اندرست بالقلمون , لما كنا زغار جيت فترة طويله عشت فيها بحارة العين وكانت إحدى العادات إنو كل ما واحد يعرف مظلئطة أو مدبرة يبلغ عنا بالحارة ويجتمعوا ولاد الحارة للتوجه نحوها مشان يحرقوا


أنا متذكر متل مني شايف شاشة الكمبيوتر لما توجهنا مرة حتى نحرق مدبرة على طريق النبعة مقابيل السجريقة(متزكرينا - هادي الشجرة يلي كنا ناكل زهرها ).

متذكر وقتا كان معنا فطيس(محمد القص) والشرشور( أيمن القص الله يشفي) وصلاح و عامر حبلص وصلاح حليحل و مبقا زاكر مين...

المهم الخطة سهلة , تجميع ما أمكن من القش والحطب حول فتحة المدبرة وحكش وكو المدبرة واشعال النار بالحطب ..... وهيك بيطلعوا الدبابير وبيحترقوا .. وبالأخير منفتح الوكر ومنشيل البيض وبتنباد المدبرة عن بكرة بوا

بلشت المهمة وتطوع الأخ أيمن القص لحكش المدبرة بعد ما كنا جمعنا الحطب وشعّلنا النار.

وبلسنا نتفرج على الدبابير عم تحترق , و هون كانت المفاجأة .. طلع في فتحة تانية للمظلئطة وعبشوا فينا الدبابير وخصوصا بالأخ أيمن الله يشفيه وبلش يزحف ويبرم عالأرض وبعدين بلشنا نركض وطلعنا من المعركة شي بعقصتين شي بتلاتة ....


ومن يوما تعلمنا ننتبه على كل وكورة المدبرة ونسدا كلها الا واحد

وبعد كم يوم حرقنا واحدة تحت العامود الأبيض عالأتوستراد (حدا زاكروا) وكانت العملية ناجحة 100 % -يعني بدون ولا عقصة- ورحعنا شلنا قراص المدبرة....

وهادي آخر مرة بحياتي واعي فيا لحرق مدبرة

وفي الختام لا بد من التذكير بأنه حسب تصنيف الأخ أسامة للعادات في القلمون , تكون هذه العادة من العادات السيئة لقول الرسول محمد صلى الله عليه وسلم (لا يعذّب بالنار إلا رب النار).

الله يتوب علينا وعالشباب ,

أسأل الله الذي جمعنا في دنيا فانية , أن يجمعنا في جنة قطوفها دانية.