عوكر المدوكر

[جابر دملوك]

(34)
عوكر و صلاة الجمعة.
بطل أصتنا اليوم عوكر الشبيب ياما كان بوو يذكرو بصلاة الجمعة و هو مانو هوني و بس يصير وأت الروحة ع الجامع يطلع بفنوكة إنو أسا بدو يتحمم و ما في يروح بلا حمام و أغلب الأحيان كانت تروح علي الصلاة .
بس بوو ما أطع الأمل منو و كان عطول يذكرو و يكرر هالشيئ كل جمعة.
و بيوم من الإيام الأب ما عاد في يستحمل عوكر و أعذارو و خاصة بعد ما ألو :
" يا عوكر ما بقى في غير ساعة للصلاة
فإذا ما تحممت إسا عجل روح تحمم و بسرعة "
جاوبو عوكر : " ساعة ... شبده تأديني الساعة
إسا بدي سخن الموية و إرجع فوت إتحمم
ما بأدر بتأديني الساعة "
ألو بوو : " الساعة بتأديك و بزيادة عليك ... بس حروكه شوية "
بلش عوكر يتباطأ و يماطل و الشغلة هلي بدا 3 دقايق يعملا بربع ساعة لحتى ما يروح ع الصلاة.
بس بوو أعدلو و حط نؤرو من نؤرو و ألو : " ماني داعس من هوني اليوم إلا و إجري ع إجرك و لو بدا تروح علي الخطبة
و بدي شوف كلمة مين بدا تمشي كلمتك و لا كلمتي "
هلآ بعد ما سخن عوكر الموية فات ت يتحمم و أعد يغني أغاني مرسيل خليفة هو و عم يتحمم و بوو كل نتفة يطبلو ع الباب و يأولو : " شهلك نتفة رح نتأخر "
و عوكر ما يرد لأنو هو عم يحاول يتأخر أظضنيين.
بس بوو عمل فيي حيلة و طبلو مرة و ألو :
" إذا ما بتطلع بظرف دقيقة أنا رح روح "
و قال لأم عوكر : "أنا رح إعمل حالي رحت و أليلو أنو بوك راح لشوف شبدو يعمل "
و فعلاً طلع لبره و طبش الباب و أمو لعوكر خبرتو إنو بوو راح.
عوكر جاوبا : " عن جد مع إني خلصت بسرعة منشان ما زعلو "
الأب رجع فات ع البيت و عمل حالو إنو نسي شي و تفاجأ عوكر ببوو بس صار إدام الأمر الواقع و ما بقى في ما يروح معو ع الجامع.
حملوا حالن و مشيو الأب مستعجل لأنو عارف حالو ما بقى رح يلحق ع الخطبة وعوكر ماشي ع الدؤه و نص.
و صلو ع الجامع كان الإمام مصلي الركعة الأولانية و عم يقرا الفاتحة من الركعة التانية.
الأب لحق الركوع مع الإمام بس عوكر أعد دقيقتين يقلع الصباط و ما دخل بالصلاة إلا و الإمام كان صار بالإبراهيمية.
و كُلا نص دقيقة و بيسلم الإمام و بيسلموا المصلين إلا هلي جاو متعوقين و عوكر كان آخرون.
كل المتعوقين بيكفوا هلي راح عليون
إلا عوكر بيسلم مع الإمام و بيصير برا أول واحد.
طلع عوكر لبرا و مفتكر حالو أدى الفرض و عمل الواجب و
عجبتو الفكرة كتير.
و ساعتا حط براسو إنو ما يزعل بوو أبداً
و قال و الله مافي أحلى منا بيجي الواحد ع الإبراهيمية
أو إن فلقت حاله ع التحيات يا سيدي
وكلا دقيقتين و بيصير برا متلو متل غيرو هلي صرلو ساعة منؤع بالجامع.