كيف بتحب بنت عمّك ؟

[الريس]

شو يا شباب بدنا انحمسكم شوية ، ونخليكم اتفضفضوا ، يلا تنشوف ، كل واحد يقلنا كيف بحب بنت عمو تكون -يعني مرتو- ؟ شو هي الصفات يلي بحبها فيها ؟
وانتو يا حريم ، يلا من هون ، ما بدي شوف حدا منكم أبدا ، الموضوع للرجال الزكرتية وبس .

الريس ، بحب البنت يلي بستحي كتيير ، وتوطي صوتها هية وعم تحكيه ، وبطب وجها وبتحمر ، ومحسوبكم بطير وبصير بدنيا تانية .

وبحب البنت يلي بتكون أدد حالها وبتعرف تمشي أمورها ، مش متل الهبولة ، يعني في منهم اذا طلعوا من الحارة تبعيتهم بضيعوا ، وفي منهم وين ما شلحتهم بأي مكان ، بأي مجتمع ، بأي موضوع للحوار ، على طول بيعرفوا شو بيعملوا ، وبيعرفوا يخلصوا حالهم ...

وكمان بحب البنت المثقفة ، ما أصدي ثقافة اسلامية ، يعني من كل شي ، اسلامية وسياسية وطبخية ، و... وعاطفية و...
وبحبها تكون بتفهم ، وبتفكر ، لأن هذه صفة نادرة ببنات اليوم ، ولما بقول بتفهم ما ضروري تكون شيخة وقارية كتب دين كتيير ، لأن الله وكيلكم في مشايخ قاريين ودارسين بس متل الجحاش ما عارفين كوعهم من بوعهم ، وبنفس الوقت شوفو الأعرابي يلي استدل على وجود ربنا من السماء والأرض وانو البعرة بتدل على البعير ...... هذا كان انسان عايش مع الخواريف مش متعلم بس بفكر ، وبشغلو ، وأنا هذه أهم صفة بدي ياها بمرتي انها تكون بتفهم ، صدقوني ما بقدر عيش مع صبية قعلها على غير قعلي ، بترأها ضربة من أول يوم بجيب أجلها .

وما رح احكي عن الخط السياسي لأن هذا الشرط متضمن ضمن شرط الفهم والذكا ...

بس أكيد كمانو بدي ياها حلوة ، وهل البند ما رح حكيكم فيه ، لأن رح تعرفوا مين هية الريسة ساعتها ، شنها أحلى واحدة .

[kalamoun_28]

السلام عليكم ورحمة الله وبركاته,

الله محييّك يا ريّس أنت و الريّسة.

أخي الكريم, المواصفات التي أدليت بها حول ماذا تريد في المرأة, ألم تبالغ فيها كثيرأ؟

أقصد أنك تريد كل هذه المواصفات في امرأة واحدة أو أربعة ؟

سلامات, نزيه خداّج ملاّط

[أم سفيان]

عارفة الحريم ممنوع يفوتو بس فايتة تساعدك بس
بتعرف لمن الرجال والمرة بتزوجوا مع الوقت بيروح الحياء اللي بيناتن وبيصيروا معودين عبعض فمنشان اتضل الريسة بتستحي وبيحمر وشا وبتوطي عيونها لمن بتشوفك رح إعطيك الحل المناسب
دايما أول ما بتشوفا قلها كلمة بتكره تسمعها يعني سمعها شي بهدلة على الخفيف ساعتها بتبطل تحكي وبتطلع بالأرض وعالكبت رح يحمر وشا وهيك بتضل الريسة متل أول يوم خدتا فيه
بس متأكد مانك ناسي شي صفة هيك ولا هيك

[الريس]

يمكن يا معلم نزيه تكون حسيتني زدت الشروط وضيقت و... بس كمان يا أبو الشباب أنا برأيي انو الزواجة بدها هيك تضيي وأكتر ، شنو المرا يلي بدي عيش معها ، رح ضلني عايش معها للموت ان شاء الله ، فأي اختلاف بسيط بيني وبينها ، وأي صفة فيها تناقد مزاجي قد تسبب المشاكل فيما بعد . يعني الخاطبين ، بكونوا هالشغلات ما مشتلقين عليها ، لأن بتكون صفة الجال والكلام الحلو ، مغطاية على كل شي ، ولكن هذه الصفة مش دايمة ، بكرا الجماعة بعيشوا تحت سقف واحد وبيتعودوا على بعضهم ، وبخف الغزل وبتظهر الصفات يلي كانت مخباية وهون بتبلش المشاكل . بعدين يا معلّم نزيه ، ليش لحتى خفف من الشروط ، وأنا صرلي يلي بدي ياه ، بس طبعا من خارج القلمون -مش لأن القلمون ما فيها هيك شي ، يمكن يكون فيها ويمكن لأ ، بس لأن أنا وقعت عيني على بنت من برات القلمون ، وما كان قصدي لا أيبل ولا شي- .

يعني في قاعدة كتيير حلوة بالطلب ، انو اذا بدك تطلب علطول طلب أحسن شي ، يعني شوف النبي صلى الله عليه وسلّم شو بقول لأصحابوا ، قللهم اذا كنتوا عم تسألوا الله الجنة ، فطلبوا الفردوس الأعلى ، واحنا هيك لازم نكون ، يعني اذا الشب بدو يأيبل على صبية لازم يحط أحسن مواصفات ويفقس enter لحتى يبلش الsearch معو ، وبعدين اذا ما لقي يخفف شوية ، ويرجع يبرم من جدسد ، وأحيان بكون الشرط يلي حاطوا الواحد مش أساسي بشخصية البنت بل فيها تكتسبوا ، يعني مثلا الطبخ ، اذا الواحد لقي بنت أمورة وآدمية وبنت ناس و... بس ما بحياتها لاقطة كبريتة ، معليش يخدها وبعدين أمها أو أمو بعلموها الطبخ ، انو هذا مثل في صفات كتيير غير الطبخ يمكن اكتسابها .


وبالنسبة لكلام أختى أم سفيان ، بارك الله بك على النصيحة وأهلا وسهلا فيكي بالموضوع ، بس شو بيعمل يلي ما لو قلب يعلي صوتوا بوجها ، ليكي خيتو أولك هذا الشي بيتغير بعد الزواج ، ولا رح ضلني هيك -بين بعضنا تشتوش ، قدامها- .

[Nader 3:16]

يا اخي شروطي شوية صعبة و ببقا بكتبها مع بعض التعديلات!!!!!!

[Nader 3:16]

بس اهم شغلة يكون صوتها احلى من النقشبندي!!!!!! ساعتها ..........

[الريس]

ما كان خاطر على بالي يا أبو الشباب هذا الشرط ، بس على كل أنا بالنسبة لي ما بحس انو مهم كتيير ، لأن أولا كل البنات بحس انو صوتهم حلو ، وتاني شغلة في عندها شي بغطي على صوتها .

الله وكيلكم في شباب عندهم شروط بتفرط الضحك ، مثلا واحد بدو ياها بتعرف اتحلّ مات وواحد مدري أيش ، اتخيلوا هدال أول يوم بالزواج شو بيعملوا ، يعني أول يوم بالنقلة على البيت ، أولك شو بيعمل ، بحلوا بيتاغور ههههههههههههه

[Madiz]

issetni sghir 3a hal shaghlet

[Nader 3:16]

سكووت و لا صغير ما تخليني افضحك

[ach]

سلام

للحقيقة مافيني ساعدكم أنا و خبركم كيف بحب بنت عمي تكون لأن أول شي علقت و تاني شي اذا بدي بلش اعطي مواصفات يلي بحبها بعتقد بتكون آخر مشاركة الي معكم لأن سيعتها رح تعزوا فيني:d

[من هنا و هناك]

لك يا ريس مواصفات بنت عمي قريبة على مواصفات بنت عمك
فاذا لقيت وحدة احجزلي اختا بركي بنصير عدايل
اهم شي بدي ياها محل ما ارميها تجي واقفة
و تكون حلوة و شاطرة و بتفهم عليي من اول كلمه مو عيد و زيد كتير
و تكون شطورة بالطبخ
بالاضافة الى ثقافتها المتنوعة
و تكون بتهتم بحالها مو ارجع عالبيت لاقي ريحتها بصل و توم و شعرها منكوش و تيابها الله يستر عليها