من فعاليات معرض الفتيات: وصفة الحليب المركز

[روعة]

الحليب المركّز أو المكثف

.
المقادير:
- كوب واحد من حليب البودرة.
- كوب واحد من السكر.
- 2\1 كوب من الماء الساخن جداً.
- ملعقة كبيرة من الزبدة (ملعقة شوربا).

طريقة التحضير:
في الخلاط الكهربائي, ضعي كوب السكر, كوب حليب البودرة, ملعقة الزبدة ثم2\1 كوب الماء الساخن. إخفقي هذا المزيج مدة دقيقة ونصف الدقيقة دون إنقطاع.
من الأفضل ترك هذا المزيج في وعاءٍ محكم الإغلاق مدة 24 ساعة قبل إستعماله. بعد هذه الفترة بإمكانك إستعماله كما تريدين.

أمل محمود الأيوبي

.................................................. ...............................

[Nadine]

جزاك الله خيرا

[روعة]

أهلاً بك
الفكرة إقتصادية من أجل التوفير
و من أجل مقاطعة المنتوجات الداعمة للكيان الصهيوني

[Nadine]

انا لا استعمل حليب البودرة , ممكن تعطيني الوصفة مع حليب سائل . شكرا لك

[روعة]

السلام عليكم ورحمة الله وبركاته
طبعاً لا يمكن إستعمال الحليب السائل بسبب كثافة الحليب في الوصفة
إليكن اليوم هذه الوصفة:

جبنة الأكواب

المقادير:
250 غرام من القريشة.
4\3 الكوب من الحليب على درجة الغليان(أو 150 مل).
100 غرام من الزبدة.
1 ملعقة (قهوة) من الملح

طريقة التحضير:

ضعي المقادير في الخلاط الكهربائي إخفقيها جيداً حتى تحصلي على كريم ناعم ثم ضعي المزيج في أكواب محكمة الإغلاف في البراد.

كيفية تحضير القريشة:

إغلي2 ليتر من الحليب , ضعي القليل من عصير الحامض أو الخل الأبيض ودعي المزيج يغلي قليلاً , دعيه حتى يفرط ثم صفيه لتحصلي على الكمية المصفاة.

أمل محمود الأيوبي

[Nadine]

جزاكم الله خير , سأجربها واخبركم بالنتيجة.

[HARD]

هل احد يعلم كيف تحضر
cheese cake

[العبد الفقير]

ليش اسا ما حدا رد على أخونا هارد ،بدنا نعرف كيف بيعملوا cheese cake
وأنا بدوري بدي أعرف كيف بيعملوا العكوب ، لو سمحتوا بدنا سرعة أكثر بالرد

[amer]

اتمنى تطوير هذه الصفحة لجمع المعلومات حول كيفية تحضير الماكولات
على حد علمي انت متزوج يا اخ وسيم , لماذا تسال عن تحضير العكوب
بدك تاكل عكوب عالسريع كمان (صحتين)
اذا انت عايش بالقلمون وعم تسال عن كيفية تحضير الطعام فما بالك بالمعترين المغتربين متلنا , شو بدنا نطلب تانطلب
الشكر للاخوات

[HARD]

ليش اسا ما حدا رد على أخونا هارد ،بدنا نعرف كيف بيعملوا cheese cake
وأنا بدوري بدي أعرف كيف بيعملوا العكوب ، لو سمحتوا بدنا سرعة أكثر بالرد

,ولله الغربة صعبة يا اخ وسيم ، ولكن ما معي وقت لتحضير العكوب يا امر

[العبد الفقير]

معلم عامر ، يرضى عليك ما اطلع علي هل الصيت أبدا أنا مني متزوج بكرا بتخربلنا بيتنا ببطل حدا يطلع فينا .

معلم هارد ، بسيطة يا عمي بتعملها بأيام العطلة ، على كل أنا كنت عم اسأل عنها مشاني شنو بكرا بس اتزوز ست الكل ما بدي عزبها بشي أبدا أنا بطبخلها
هدي دعاية بس ما حدا يصدق

[Nadine]

السلام عليكم , انا برأي انو لازم يكون في منتدى خاص بالطبخ و الحلوى , بس على كلن انا جبت كيفية صنع ال cheese cake

المقادير:2 علبة بسكويت شاي- 55 غرام زبدة - 120 غرام جبنة طرية حلوة (مثل KIRI)
1 كوب حليب سائل - 1 مغلف بودرة جيلو - 1 كوب ماء ساخن - 3 ملاعق طعام سكر - فواكه للتزيين.

الطريقة:

لتحضير طبقة البسكويت: يطحن البسكويت ناعما ثم تذوب الزبدة وتفرك الزبدة مع البسكويت وترص جيدا في قالب متحرك القاعدة.

لتحضير طبقة الجبنة: يذوب الجيلو في كوب الماء ويضاف له الحليب والسكر ويوضعوا في الخلاط مع الجبنة ويضربوا حتى يختلطوا جيدا.

تدار خلطة الجبنة فوق طبقة البسكويت وتوضع في الثلاجة حتى تجمد، تقريبا 7 الى 8 ساعات.

تزين الكيكة بالفواكه ثم تقدم .

[HARD]

شكرا على الاهتمام ، وفعلا انها سريعة التحضير ، ولكن يتم اكلها بعد 7ساعات ، يعني تاني يوم من عملها

[العبد الفقير]

وين وصفة العكوب ؟ شو احنا كخة ما حدا برد علينا ، بس الشيز كايك ؟

[amer]

السلام عليكم
اقدم اعتذاري الشديد للاخ وسيم غنوم , م تآخذني صرت عم ضيع شوي لان انا خارج القلمون , ولا تفتكر انو الاعتذار كلمة وخلص , بس اذا بدك بكتب بكل مشاركة انك غير متزوج وانك ناطر .................
روء شوي يا اخ وسيم عل الاخوات , عم يشوفولك كيف بتحضر العكوب .

[العبد الفقير]

السلام عليكم
ولا يهمك يا أبو الشباب ، بس كنت خربتلنا بيتنا ، يلا بسيطة ، فداك يا حبوب .

[Nadine]

السلام عليكم,
من ناحية ال cheesecake , ياريت تراقبوها حتى ما يصير فيها ثلج , بس تجمد طبقة ال cheese صارت جاهزة للاكل .

اما من ناحية العكوب فهي اكلة لذيذة جدا, وهاهي طريقة طبخه:

تغسل نبت العكوب جيدا من الرمل ثم تقص الاشواك البارزه بمهارة فائقه (يفضل لبس الكفوف البلاستيكيه)

وبعد قص الاشواك يغسل العكوب ويجفف ثم يوضع بالزيت الحار حتى يصبح لونه ذاهبي داكن

يوضع العكوب مع اللحم والملح والبهارات (حسب الرغبه) بطنجره ويتم على النار حتى نضج اللحم

وخلصت الطبخة, تقدم مع الارز.

عندي سؤال : كيف عرفوا انوا العكوب بيتاكل مع انوا نبتة شوكية؟

[العبد الفقير]

أخت نادين ، بارك الله بك على هذه الوجبات ، وجعلها في ميزان حسناتك .
عذبكناكي معنا ما تواخذينا، والله يارك فيكي

[HARD]

العكوب كما هو معلوم انه يعيش في الاماكن الباردة وانا استنتج من ذلك القصة التالية:
انه يوم من الايام في واحد جوعان عالق بالثلج عم برم على طعام ماذا يعمل؟ ماذا يفعل؟ .. فحت في الأرض فجرح يده فنظر جيدا فاذا به يجد نبتتا فيها اشواك فقال في نفسه سوف أفحت أكثر حتى اصل الى الجذور ففحت هل الزلمه حتى وصل الى مراده عند اذ اقتلعها وأكلها مع شوكها هذه المرة .
ملاحظة : العكوب نزعه صعب كثيرا من الارض وانت اوانت بحاجة الى معول او شئ حاد وكبير ، السكين أو الموس لا ينفع .

[HARD]

ولله في وقت سابق عملنا التشيز كيك التي لا تحتاج الى وضع في الفرن ولقد اكتشفت نوع جديد من المثلجات واسمه الكعكة المثلجة ولكن للامانة ولله شهيد على ما اقول اطيب بوظة اكلتها في حياتي ، لذلك شكرا للاخت ندين ومن أرا د التشيز كيك فعليه بكلام وملاحظات الاخت .

[العبد الفقير]

جرب هل الكوكتيل يا خيي هارد ، ودعيلي ، وشوف انو الذكور أشطر من الاناث بالطبخ :

- بتقشرتفاحة وبتفصفصها منيح من البذر وبتشلحها بالخلاط ، وبترجع بتزيد فوقهم شي خمش موزات ، وملعقتين سكر ، وليمونتين ، ونصف فنجان-قد فنجان القهوة- مزهر ، وفانيليا ، وشوية زيت ، وخفقهم ، وبس ينخفقوا منيح ، سكبهم بكباية وحط على وجههم شوية سمسم لتحسين الطعمة والتزيين ، جربها ودعيلي . واذا بستخدم القدامة بسكر كمان بيمشي الحال .

كما انصحك بتجريب لمناضة الدبس :

- شوية دبس رمان بكعب الكباية ، وأكمل الكباية بالماء ، وحط سكر وحركهم وشربهم ودعيلي ، هيدي سريعة وطيبة وكتيير بتفيدني عند وجع الرأس .

[HARD]

اخي وسيم مشكور كتيير انت مميز ،الى الامام .
اما بالنسبة للطبيخ فالنساء هم الافضل بالاجمال ، يعني ان نفس النساء في الطبخ افضل من الرجال وان كان الطباخ رجلا مثلك اخي فأنا على طول احن الى طبيخ امي وعندما اكل اي نوع من الطعام اقول ولله أمي تصنعه بشكل افضل وهي تضيف علية كذا وكذا ....
وانا اقول لامي والى كل الاهل والاقارب والاصدقاء ...

وين الأيام تطول فيها سهرتنا

صارت أحلام نذكرها بدمعتنا

يا رب يعيد أفراحنا ومباهحنا

بشوف الحبيب ويا قلبي صبرك صبرك


***

طعم الليمون عاإمو كبر وزهّر

فرخ الحسون من عشو راح وطير

عتبة هالبيت تحكي أنا بتنوّر

لما الحبيب يخطو أرضي ويرجعلك

http://www.enshad.net/audio/Ya_Misaa...d_M_-_Demo.ram

[العبد الفقير]

السلام عليكم كيف حالك يا معلم هارد ، ما خبرتني جربت الكوكتيل واللمناضة ؟ جربو ورح اتغير رأييك .
وريتو يسلملي عبد الفتاح بهل الأنشودة كتيير حلوة ،بس قولك وين بلاقيها كاملة ؟

[HARD]

نعم اخي وسيم السلام عليكم
بالنسبة للدبس هذه الشغلات من اصعب الشغلات التي فيك تجدها بالجودة المطلوبة ، ولكن مشكور اخي .
واليك الرابط ولك حرية التنزيل
http://www.enshad.net/audio/Ya_Misaa...%20b%20new.mp3

[العبد الفقير]

وبالنسبة للكوكتيل جربتوا ؟

ومشكور كتيير على الأنشودة ، رح نزلها هلأ

[HARD]

ولله وسيم لم اجربها بعد ولكن اعدك سوف اجربها ولكن مع بعض التعديل على المكونات ، مشكور خي .
نعم اخي وسيم استمتع بكلمات هذه الانشودة التي لا انفك اتمتم بها في وحشتي

[HARD]

هناك فطائر جد مشهورة في الغرب ومن بينهم فطيرة التفاح
Apple pie ولا اعلم ان كان احد من زوار هذا المنتدى علم بها ولكن هي كتتتتتتتر مشهورة فهل من يعرف كيفية تحضيرها .

[Nadine]

Apple Pie

مدة التحضير : 30 دقيقة_ مدة الطهي: 50 دقيقة_

المقادير: 2 تفاحات مقشرين ومبروشين_نصف كوب زبده غير مملحة_ 1 و نص كاس دقيق (plain flour) _نصف كاس سكر _1 بيض_1 ملعقة صغيره قرفة_2ملعقه كبيره بيكنج باودر.

الطريقة: اولا يجب ان نحضر الفطيرة:يخفق البيض +الزبده +ربع كاس سكر ثم يضاف الدقيق و بيكنج باودر وتعجن . ضع العجينة في البراد لمدة نصف ساعة.

يخلط التفاح +القرفة +ربع كاس سكر.

تفرد نصف كمية العجين في صينية ثم يضاف فوقها التفاح ثم تفتت باقي العجينه على التفاح يمسح وجه القالب بصفار البيض مضافا اليه الفانيلا . تدخل الفرن على نار GAS 7 لمدة 10 دقائق وبعدين تخفض لدرجة GAS 5 لمدة 40 دقيقة.

ينثر عليها قليل من السكر الناعم عند التقديم.

[HARD]

الله اكبر بهذه السرعة نعم وصلت الطريقة مشكورة انت على فعلك .

[samy]

Ingrédients :

Pour la pâte :
200 g de petits-beurre
125 g de beurre
50 g de sucre roux
1 pincée de sel

Pour la garniture :
700 g de petits-suisses ou de fromage blanc égoutté
1/2 cuillère de sel
200 g de sucre en poudre
le zeste et le jus d'1 citron
4 oeufs


Pour 6 personnes
30 min

Préparation :


Ecraser les petits-beurre (rouleau à patisserie par exemple). Faire fondre le beurre.
Mélanger les miettes des biscuits avec le beurre, le sucre et le sel.
Tapisser le fond d'un moule à manqué (avec fond amovible) en tassant bien le mélange (avec le fond d'un verre par exemple).
Mettre au réfrigérateur pendant la préparation du gâteau.
Ajouter, un par un, les 4 oeufs entiers aux petits-suisses, verser le sucre et le citron. Bien mélanger.
Etaler cette crème sur la pâte sortant du réfrigérateur.
Faire cuire à four préchauffé th 4/5 pendant 50 min. Démouler tiède et servir.

[المهند]

كتار منا اليوم عايشين عالبسكوت والشوكولاوالكورن فلاكس وما بعرف شو.. بينما اكل جدودنا كان الاكل المفيد ويلى خلاهون يعيشوا سنوات بصحتون وقوتون!!كانوا ياكلوا خيرات الارض من عدس وفول وحمص ومجدرة ومخلوطة وبرغل...كان السكريات قليلة جدا ياكلون..كانوا عايشين عالطبيعة ومع الطبيعة وكانت الطبيعة تعطيون افيد انواع الطعام..للاسف نحنا اليوم فقدنا هالامور جيل ورا جيل الا ما رحم ربك..لهيك انا رح حاول انى كل مرة اعطى اكلة مفيدة جدا لاجسامنا الضعيفة ورح اختارا من اكلات جدودنا..هالمرة بنصحكون تاكلو بخبزة الزيتون مع العسل!!يمكن البعض يستغرب الملح مع الحلو!!..بس صدقونى شى غير شكل بجد..جرب مرةورح تدعولى كتير..ومتل ما بيقولوا:"مفتاح التم لقمة"

[فشلان]

شو القصة يا سيف... رح تقلبلي اياها شعر وعواطف.... القصة ما بدها كل هالأد... كول وصحتين... ويعطيك العافية...
بس أنا معك.... مش بالعسل مع الزيتون لأني ماني مجربو..... بس بدبس الخروب مع الزيتون... والمبدأ هو ذاتو.. مالح مع حلو... بس شغلة ولا أحلى من هيك..... سآل مجرب....

أنا كنت حابب شارك بهالموضوع.. بس للأسف ما بستفاد.. لأنو أمي ما رح تقعد على الإنترنت حتى تعملي الوصفات... وحتى لو جبتلا هنة.. يعني الله يعينها... مانا فاضية لهيك شغلات... وإخواتي البنات بدي يكون معي خمسين ألف مينيموم حتى أطلب منن شي شغلة..... بس ليش أنا ما بعملهن.. الجواب عندي.. لأنو إذا عملت الكوكتيل رح يطلع عصير بندورة..... وإذا عملت تشيز كايك... رح تطلع مجدرة على الأرجح... محسوبكن فشلان.. مش مين ما كان...
بعدان يا قاسي زعلان إنك مسافر... ملوع بهالأناشيد.... بكرة بترجعلنا بالسلامة... بعد عشرين سنة شغل.. مانن كتار....... بعدان شوبك قاعد عم تتأمر على هالبنات... عملولي كذا.. وجيبولي كذا... الله يعين يلي بدك تاخدها..... والمساكينات يا حرام عم يردو عليك.. بس منيح.. الناس لبعضا...
أما السيد المقدام وسيم غنوم... هادي كلمة إنو إنت رح تطبخ رح تفتح عليك بواب كبيرة.... أنا لما بخطب.. أشة ما بشيل.. لأنو دغري البنات بياخدوها كسرة.... سألني بعرف من إخواتي... مرة بالغلط ظبطت تختي ومن وقتها لهلأ ما عادوا طلوا على الغرفة أبداً. أو إنك عم تحاول تدبر لحالك عروس بطريقة غير مباشرة... فهمت عليك أنا....
وإنتو يا بنات ويا نسوان... شو قاعدين على كتاب الطبخ وجاهزين... تركون يقبعوا شوكن بإيدن، وشوك العكوب كمان... إذا كل ما طلبوا طلب لبيتوا، بكرة بيتعودوا على الدلع..

وهلأ شيلو الهزل على جنب... كتير حلو هالموضوع ومفيد... بس للأسف ماني مستفاد منو بشي أبداً
يالله بخاطركن شباب...

[HARD]

خي فشلان انت ناجح اذا اراد الله، من يدرك فشله فهو ناجح ، اخي الله يبارك بكل المشاركين يعني اخي اقله ان نشكر من اخذ من وقته واهتم بطلنا وبحث وصاغ كلماته لكي تصل الينا ونستفيد منها اخي انت اطلب وانت على الراس ، وشكرا من صميم القلب الى المشاركين والمميزين في هذا المنتدى .

[العبد الفقير]

خيي فشلان ، هيأتك اساتك فشلان لأن ما كشفت القصة هل المرة على المظبوك متل العادة ، أنا اذا بدي دبر عروس ما بلحق ، لأني نيقة كتيير يعني اتصور بكل الجامعة مني شاييف حدا حلو -اللهم الا واحدة أو اثنين- ومن ثم اذا لقيت واحدة حلوة بدو يكون قعلا بيركب على قعلي ، لحتا ما انتّف بعضنا بالبيت ، يعني في كتيير اعتبارات صعبة بهل الإيام فخلينا نعمل شيعة أحسن .
وبعدن يا خيي فشلان ما تخاف ، أنا ما رح أطبخ بالبيت أبدا ولا رح اعمل شي ، يعني المرة هي يلي رح تشتغل ان شاء ، بس أنا بحب أعرف اتعلم الطبخ من هلأ لأن آخرت كل شب بس يكفي من جامعتوا ينشلح بشي بلد من بلدان العالم ، وأنا ما بستحمل أكل شغلة مش على ذوقي ، فخليني جهز حالي من هلأ ، وما تصدق اني بيوم من الأيام رح أنا اطبخ بالبيت ، اخص على الرجال .

[المهند]

جربو هالخلطة هعيدي كتير نافعة للفاشلين يا فشلان وبكرة بتدبر حالك فيا فى حال انكحشت شى مرة من البيت من قبل وزارة الداخلية:d ..لفة زباع وزيت وبتاكول معا تفاح ..شغلةةةةةةةةةة..واكلة الدراويشششششششششششششششششششششششششششششششششششششششششش: d

[فشلان]

الله يعطيكن العافية... خاصةً السيف المهند... متعب حالك... يعني ست ستات بيت ما فين على هالوصفة المحرزة... هي صحيح طيبة وخاصة بالصيف على البحر... بس يعني ليش معذب حالك هالأد؟؟؟ ما بيسوى...
أخي وسيم الظاهر إنك أنيف كتير وزيادة عن اللزوم... بعدان على مهلك، لا تشوف بحالك كتير... بكرة بتقعد عزابي معتر... بعدان أنا أخدت على حكيك.. والرجال بينربط بلسانو.. خاصة إذا كان طويل...:d :d
ومعلمي القاسي الهيئة رخيتها معنا.... على كل حال أطلب وتمنى شبيك لبيك الصبايا والنسوان بين إيديك... لو طلبت لبن العصفور عم يجيبولك اياه... يا ريت بطلب شي عروس وبأمنولي اياها... :d :d أحسن ما أطلب كعكة الباذنجان.. وعصير القرنبيط المحلى... وزنود البطيخ أبو لبى...
وجبتي لهذا اليوم: لفوفة لبنة وزعتر وزيتون... وخاصة من إيدين ... !!!

[المهند]

شو رأيك يا فشلون بافوفة الشنكليشة مع الخس؟!!! العمى هيدا سوبر عالاكل واكلة اهل الصفة الدراويش..نحنا يعني

[amer]

[Nadine]

مشكور اخ عامر فعلا طريقة ناجحة 100% بعد التجربة

[الريس]

يا صبايا ، ويا حجات ، ويا أوادم ، في شي حدا بيعرف كيف بشلوط الراس ؟؟؟

وبعد ما شلوطوا شو بعمل ، بس يرضى عليكم تأنو ، لأن يمكن اعملها على راس جمل ، اذا ما لقيت راس خاروف .

[الريس]

ولاااااااااااااااااااااااااععععععععع ، ولا وينكم ، وين رحتو ، منتدى طويل عريض ، ما حدا بيعرف كيف بشلوطوا راس ، العتى ، شي هالنسوان هدال ، خلص يا شباب ما لكم الا برّات القلمون ، يلي بيخد من القلمون بعيش بلا راس -يعني بلا ما يكل راس-

[الزاهر]

خيي أنا بألك كيف....بس على مسؤوليتك!!!!

بتجيب خاروف.....وبتجيب فراعة.....بتحط الخاروف على الطاولة......وبتعلي الفراعة.....(متل بـ توم وجيري) وبتأطعلو راسو
بعدين......بتكبلو الجسم كلو......وبتحط الراس بالطنجرة.....وبتضلك تغلي فيه لحد ما يدوب بالمي......وإذا نشفو المويات أبل معليش فيك تزيد شوية.....وبس يدوب على الآخر.....بتسكبو بألب أداح....
وبعد ما يفترو......بتحطهم بالتلاجة وبتعملهم بوظة....
وبس يجمدو منيييييييح ......بتعزم كل رفاقك.....على البوظة أكيد....وبتأدملهم ياه.....وهيك هنه وعم ياكلوه بيتشلوطو تشلوط!!!!!!

منيح هيك......شايف......نسوان هالأيام ما بيعرفو يطبخو......نحنا اللي منعرف نطبخ!!!!

[الريس]

ولك يقصف خملكم ، عأيش عاملين حالكم بنات ، وبدهم يتزوجوا قال ويفتحوا بيوت ويبزروا و...... واسا ما في ولا واحدة فيون بتعرف تعمل عكوب ، ولك شي هالجرصة هذي ، خلص يا شباب مالكم الا برات القلمون ، والله برّات القلمون في كل بنت بتخد العقل ، أخلاق ودين وجمال وثقافة وكل شي بيتمناه قلبكم ......

أنا ما دخلني ، أنا لقيت يلي بدي ياه ، بنت بتخد ضبنات العقل من عكار ، ودعولنا تتيسر ، وعنجد يا شباب مش عم امزح ، شيلو فكرة القلمون من راسكم على الآخر ، بنات القلمون شاطرين ، يروحوا يكزروا بعد العشا ويطصهصنوا بالطرقات ويطأو حنك ، ويألفوا مواضيع ، وما في واحدة منهم بتعرف تشعل كبريتة .

وما حدا يضحك على حالوا ويقول بتبقى تتعلم ، اصحا بالكم تنغروا بالشكل وتفكروا انو الشكل البراني بخبي على شغلات تانية ، أبدا أبدا ، برات القلمون في أشكال أحلى ، وبيعرفوا يعملوا كل شي . وبعدين يلي عم يتزوجوا عم يديروها على البيض المقلي أو الأكل الجاهز أو اذا اهلهم بيبعتولهم شي من طبخهم .

[فرع المعلومات]

شو ياريس

حابب تجرب مرة ثانية من برات القلمون

ما اخذت درس من اول مرة

ولا بتحب ذكرك

[المجاهد]

eh wala mashkour ya 3amer 3al 2iktirah lazem titawar w lazem ykoun fi kol yaoum 2akleh li2anou 2al migtirbin ma 3indon kibra w mashkourin kolkon

[الريس]

شو ياريس

حابب تجرب مرة ثانية من برات القلمون

ما اخذت درس من اول مرة

ولا بتحب ذكرك

أول مرّة كانت حالة خاصة ، ومشكلتي ما كانت مع البنت بنوب ، كنا متفقين مع بعضنا ومن أحلى ما يكون ، بس اهلها مصيبة ، ما بقدر انسجم معهم أبدا أبدا ، وهي اختارت اهلها ، فقلتلها الله معك .

أما ست الكلّ الحالية ، من أول يومين سألتها عن اهلها واذا كانو نيقة ، فقالتي أنا عندي حياتي الخاصة وما بسمح لاهلي انهم ينغصوا عليها أبدا أو يتدخلوا بشكل غير مبرر ، الله وكيلك كنت حابب بوسها بين عينيها ، بس بتعرف الوضع ، يعني الخطيبة "شمّ ولا تدوق" ، الله يعينا يا عمي .

[الزاهر]

وبعدين.....شصار بالموضوع......وينكن يا نسوان المنتدى؟؟؟؟؟

[أيمن غ القلموني]

السلام عليكم

إذا بيسمحو الصبايا يكتبولنا وصفة للكنافة سهلة ولا تتطلب الكثير من الوقت
وشكراً سلفاً

[أيمن غ القلموني]

والله إللي بيعتمد على فتيات القلمون بموت من جوعو ، معقولة ما حدا بيعرف وصفة الكنافة

[Nadine]

كنافة بالقشطة


المقادير :

نص كيلو عجينة كنافة

علبة قشطة نستله

كوب زبدة مذوبة (130 غ

3 كوب حليب طازج

2 م طعام دقيق طحين

2 ملعقة طعام نشا

نصف كوب سكر

رشة ماء الورد + ماء الزهر

كوب جبن الموازريلا

كوب قطر

الطريقة

تمزج الحليب + دقيق طحين + نشاء + سكر بالطنجرة

يوضع المزيج على نار هادئة مع التحريك المستمر حتى يصير جامد

ثم يضاف عليه جبن الموازريلا ثم يسكب وهو ساخن في طبق حتى يبرد

تمزج علبة قشطة مع الخليط السابق لتصبح جاهزة للاستعمال.



تقطع خيوط الكنافة الى قطع صغيرة وترش عليها بماء الورد والزهر

تدهن صينية بقليل من الزبدة ويفرش فيها نصف خيوط الكنافة

وتوضع نصف في صينية التقديم

وتصب عليها نصف كمية الزبدة

ثم تصب عليها كريمة القشطة وتغطي بباقي خيوط الكنافة وتخبز

في فرن سابق التسخين على درجة حرارة لمدة 30 – 40 دقيقة

او حتى يصبح سطحها ذهبيا

يصب عليها القطر فور إخراجها من الفرن حتى تتشرب به

وترش بالفستق وتقدم ساخنة