عوكر المدوكر

[جابر دملوك]

(31)
عوكر و السجدة.
ياما و ياما رفقاتو لعوكر شدوا في ت ينزل معُن ب رمضان ع صلاة التراويح و ما كان يئبل أبداً.
و بيوم من الإيام و بعد كزا رمضان ألَّك :
" و لك يا أبو العك لش ناتع هل الراس ع الفاضي نزل و جربلك شي مرة متل هل الخلايئ "
و فعلاً قرر عوكر أفندي إنو ينزل و كان عند كلمتو و أثبت إنو رجال و الرِجال قليلُ.
صحيح عوكر كان حاسس حالو غريب هو و عم يصلي العشا بس وأتل بلش بالتراويح كان كل شي صار طبيعي.
عوكر كان وائف بالصف الآخراني.
الإمام بلش بسورة فيا سجدة و عوكر ما كان بيعرف إياما من القرآن إلا الفاتحة و الصمد و الناس.
عوكر وائف عم يتعبد و مرنخ ع الآخر.
وصل الإمام للسجدة و قال : " الله و أكبر " و سجد و سجد المصلون إلا عوكر لم يكن من الساجدين.
المعتر ركع ع ركابو. إطلع ع يمينو و شمالو كلن إنبطاح.
قال : " و لووو شصاير بهالدنية " حمل حالو و سجد .
الإمام قال : " الله و أكبر " و حمل حالو و طلع و طلعوا كلن إلا عوكر قام من السجود و قعد ناطر السجدة التانية.
إلا و بيلاقي الكل واقفين قال بنفسو : " عم يلعبوا علي يعني "
حمل حالو و طلع و الإمام كمل قراءت الآيات و عوكر حط براسو إنو المرة الجاية رح يكون أول واحد ع الأرض وأتل بيقول الإمام : " الله و أكبر "
الإمام خلص من هون و قال : " الله و أكبر " و ركع و الكل كانوا راكعين إلا المعلم عوكر سجد.
و ما حس بحدا معو تحت ع الأرض قال :
" و لووو شو هالمصيبة هادي ما رح تمضى هالليلة ع خير عدنا "
بس بسرعة عمل حالو إدارك الأمر حمل حالو و طلع ت يركع معن بس ما بيلاقين إلا سجدوا و صار وحدو واقف.
قال لحالو : " و لك عم يعملوا نكاية فيي يعني و لك شعاملن ؟ "
قام تركن ساجدين حمل حالو راح و لبس صباطو و طلع ع الضيعة و هادا وج الضيف.