يوم.... في حياة طالب!!!

[الزاهر]

والله يا هلا بالجميع!!!!
يالله.....شدو همتكم......لأن اللي بيخبي بألبو......بيزيد همو!!!!


مشكور زعيم......

[shanzimer6]

السلام عليكم:
تعو تننتقل من العلوم_ الجامعة اللبنانية_ القبة إلى ال CNAM_ الجامعة اللبنانية_ أبي سمراء....ونسمع شممكن يزعج الطالب ويقهرو.

كنتم قد أمضيتم يوماً في العلوم مع أخونا قطر الندى, بس أنا قصتي, رح حاول تكون مختصرة, بس المشكلة اذا بالعلوم التاريخ يعيد نفسه كل يوم, عنا كل يوم شكل. بسم الله....

كنت هاديك السنة, ومتل كل العالم, معجوقة منتقلة من شي اسمو مدرسة إلى شي جديد اسمو جامعة.شو هالعزّ... صرنا متل العالم, ما في نظام مدرسة, ما بتلبس مريول, ما في فرصة,و.... كتير معجوقة خلصت مدرسة, ودرس يومي, يلا طالعة جرب الجامعة, اعمل يلي بدي ياه, ما ادرس كل يوم, ما عندي إلا مسابقتين كل السنة....نصحوني بهالجامعة, ورديت عالبابا وفتت عهالجامعة المحترمة_ كيف منا محترمة وبيطلعلك شهادتين: واحدة لبنانية والتانية فرنسية_.
المهم...ولما بتكون بأمس الحاجة لعالم بتعرفن في مكان جديد, وغريب, وبتتونّس بالقلمونيين, واذ برفقاتنا الشباب بيتركونا بالجامعة أول يوم وبينزلو _الله يسامحن_ المهم...صار ما صار ورجعنا عهالبيت في أول يوم من التعارف والانفتاح.
بشكل عام, جامعتي موجودة بمدرسة (طابق رابع) _طابق ويا دوب سايعنا_في مفرق ودنيا مقطوعة, بدوام سوبر, أبّهة, بتستحلي تتسجل فيا. الدوام بعد الظهر يعني الواحد بالأول بينبسط بيكفي النومة, بيدرس بكير, و...بيرجع بيطلع, ومنخلص ماكسيموم عال7. هدا الشي كان جديد عليّ, الا اني تأقلمت مع الوضع, وهل المرة منو بإرادتي لأن مجبورة والا بتروح عليّ, المواد ما بهن شي, منن كتير صعبين, بيدرس الواحد قبل البرسيال بيومين, وقبل لفينال بأسبوع وبيمشي الحال وبتنجح وبتجيب علامات حلوة ( اللهم اذا كنت متابع بالصف, منو متل الأطرش بالزفة).

ثم بالفصل التاني, أولو بتهلك تتسجّل, بترحلك 100 مشوار ميشان تمضي شأفة ورقة...كل دكتور عندو دوام, وشي بيجي من بيروت تيعلمك, فما فيك تفرض علين الدوام يلي بيريحك, بالعكس انت بدك تلتزم, والا كمان بتروح عليك.فبيطلع الدوام يلي كان بعد الظهر, قبل الظهر أحياناً لحد ال7 أحياناً.
فما في مشكلة, وما في أدة حلوة القعدة هونيك, تمام...
المهم مننجح أول سنة ومنطلع عالسنة التانية بنفس طريقة الدرس للفصل الأول. آم بيطلعولك بفنّوكة جديدة (تعمل ستاج) 3 أشهر كل سنة لأن مجبورة أعمل 9 أشهر ب3 سنين تحتى اتخرج.وانت بتبرّم عليه وبترجع بتدفعلن حقو ميشان يعادلو credit ...
يعني بصراحة, ما في غير بأ المصاري بهالجامعة. صرنا سنة تانية والحمد لله, الدوام غير شكل, كان بعد الظهر صار كل النهار, تقول عم اشتغل بشي مستشفى يقولولي بعرف حالي ساعتا, بس...يعني كان لازم روح عبيروت جيب إفادة سكن بالجامعة, وكمان بدا روحة عند Sleep comfort نؤمن فرشة للاقامة المؤقتة بالجامعة.

صرت بشوف شوفيرية التاكسي والدكاترة وتلاميذ الجامعة والبوّاب أكتر من أهلي ورفقاتي.
بالنسبة للأكل, ولا يهمك تنظيم غذائي مميز بشكل ما يبقا لحمة ععضمة, وكمان الشرب, الصلاة....في عنا مصلى كتير صغير, ما بيرتاح الواحد أبداً, ما بتلاقي غير انخبط هالباب جاية شي شب يصلي, وياما مصبّرة عباب المصلى ناطرة يطلعلي دور تصلّي, وكمان أكيد ما في تركيز بالصلاة,,,عالعجلة تتلحق ويلحق غيرك...وينك يا بيتنا؟اشتقتلك....
بالنسبة للأكل, في كازينو_ قصدي كافتيريا_ بكروم الزيتون, قريبة من الجامعة, فيك توصي عنفس أركيلة ومعسّل....كمان يمكن تضطر تضرب صحبة الدكتور ميشان اذا تأخرت عالصف يخليك تفوت....

عم قول صف, منو قاعة, لأن الشغلة الوحيدة المنيحة انو ما بيتغير عليك الجو كتير, متل بالمدرسة, ولا يكاد يتجاوز عدد التلاميذ ال 60 بالماكسيموم, والدكتور إدامك مجبور يضل يعيد حتى الحيط يفهم....ونرجع لموضوع الصلاة, ما بتعرف عأي أدان بدك تصلي, بيأدن 100 مرة....

هلأ اذا دوامك بكير, وخصوصاً بهالمدرسة, مدرسة جورج صراف يلي فيا اكتر من مدرسة مجموعين فيا, أيمتن ما جيت بتلاقين بالملعب أو مصروفين,,,يا ريتا كانت عإيامنا....
هدا بالنهار, اما بالليل, واذا كانت منا مقطوعة الكهربا, قول الحمد لله وخلي أبوك يدبحلك كم خاروف انو مضيت عخير وما وقعت عالدرج...أما اذا كانت مقطوعة, أوّي ذاكرتك واحفظ عدد الدرجات, اتّكل عالله وامشي, أو جيب معك ضوّ....هدا عالدرج..

من جهة تانية, الدوام هوا عندي أكره شي, لأن في كتير فراغ بين المحاضرات..فبضطر انزل عالبيت ارجع اطلع مرة تانية...وهذه الحالة هالفصل جاية 3 مرات بطلع وبنزل برجع بطلع وبنزل, وأحلى شي تطلع بالمرة التانية فبتلاقي الاستاذ غايب....

لما بتكون رايح بعد الظهر بتلاقي العالم راجعين, ولما لازم تنام, لازم تكون مفتّح راسك ومنتبه بالصف والا.....فلما بيكون عندي عالساعة 8 بكير, بكون منا سايعتني الدنية, رايحة مع العالم, منو وقتا راجعين....يعني كل الأجواء للدراسة مؤمنة ...

وأخيراً, لما بشوف " القلمون ترحب بكم", انفتحت بواب الجنة ادامي,....أحياناً ما بيطلع دوامك عدوام رفقاتك, فبتعذب أيوك يطلع يجيبك....

بوصل عالبيت أخيراً, عالباب....طبل وزمامير....
استقبال حار جداً,
هجوم عالصحن, بارد ولا سخن....
نص ساعة ماكسيموم صرت برا مع رفقاتي, بتبرّا من كل شي اسمو جامعة ودرس وورقة....

ما تؤاخذونا عالطولة.....
والسلام عليكم

[Nader 3:16]

بسم الله الرحمن الرحيم....

رح ؤلك يا زعيم زاهر ...كيف كنت انا و الشباب نقضي ايام الفصل التاني من السسنة الاولى في العلوم....

هادا يا سيدي بعد ما نجحنا بالفصل الاول بعلامات جيدة و الحمد لله ...الت مروتنا عالدرس...كتيييييير و شوفوا شو كنا نعمل...

كان يجي لعندي احد الاخوة الساعة سبعة و نص ....احياناً كانت تفتق معنا يكون الطقس حلو للصيد فكنا نعطّل عن الجامعة...

المهم كنا نوصل نوقف taXI من القلمون يأعد ينطّرنا شوية صغير و يمشي ...نوصل على موقف القبة و العالم والتلاميذ فوق بعضها ...ندلنا شي 10 دقايق ناطرين يطلعلنا محل باسيارة....

نوصل عالجامعة تكون اول محاضرة مبلشة او باقيلها شي دقيقة تتبلش...نحضر اول محاضرة...و بعدين نطلع نشم شوية هوا من هواء القبة الجمييييييييييل ...فدائماً بيخطر بال عالشباب انهم ينزلوا عالضيعة و بكون باقي شي 3 او 4 محاضرات...قال نازلين بدهم يتصيدوا...المهم ياما مقفيين محاضرات..

بتذكر انو في دكاترة شايفهم مرة او مرتين....
كنا دائماً نلاقي سيارات بالنزلةلأنو دائماً نازلين عبكير
ولكن في النهاية نجحنا و الحمد لله....

فما رح طول عليكم...الله يقويكم و يعطيكم العافية

[الزاهر]

ههههههههههههه.......أوووووووووووف........كل واحد عندو كصيبة من جهة يا أرايبة
من عندك بيجيه الواحد تعب جسدي........ومن العلوم بيجي الواحد التعب النفسي......والعما......والصرع......وال....والـ... ...والـ......
على كل.......كلو بيفيد......ليتعود الواحد عالصعوبات!!!
الحمد لله

[shanzimer1]

السلام عليكم..........
والله يا ارايب اسّا كم يوم وبطلّع شي كتاب رح سمي" مأساتي في العلوم".....
وما رح أعرف من وين بدي ابلش ولا كيف بدي خلّص اذا بلشت!!!!!!!!!!!!
بس رح قول كم كلمة بس انو آخر امتحان قدمتو فتّ عالقاعة وانصدمت صدمة عمري ....
كل اللي حولي كانو كببباااار وشعرن شايب ...........ولك ما بعرف شصابني يومتا ........
كرجوا دموعي.....وقلت يا دلّي اذا بعلّق متلن؟؟؟بس الحمد لله هدي المادة نجحت فيا...والله ريّحني ...عقبال الباقيين......

سلام

[محمد أحمد الفلو]

زكرتوني بالعلوم !!!!!! أو كلية الهموم
أنا أول ما بلشت أطلع عالجامعه كنت مهتم وبدي إنجح وبس( كنت حس إنو عالحفه بيكفي كتر ما هشام كان يهولي عن العلوم !!!)
في مره ما كنت عم إقدر ركز من الشباب ورايي
طلبت منن يسمعونا ، قام العبد قلي:
شو جايه تتعلم ؟ هالي جايه يتعلم بيقعد قدام
وبلش يعطيني دروس تيئيس .... لعمى ما أشطرن بالتيئيس

وأنا كنت بالبنك 15 يمكن

أما على سيرة فرنسا
متذكر إني لما رجعت من تولوز دلاتي حس الغسله بالبيت قد المغطس

كتر ما كانت المغسله زغيره بالسكن الجامعي
مابتسع إجر نمرتا 40 شحال بال 46

[almoghtareb]

السلام عليكم
لا تذكروني بالعلوم (العلوج) لان شو بدي اتذكر منك يا سفرجلة كل عضة بغصة
الاخ زاهر عم يحكي هلأعن العلوم من بعد ما كتير ظبطوا
ما كان الاخ زاهر وقت كانت المية تتجمع على البوابة ويحطوا كم خفانة ودولاب لحتى الواحد يقدر يفوت .....ما كان وقت ما كان في شي اسمو زفت بالجامعة.....
ما كان وقت كان السقف بيشر مية بي قلب القاعة...وارض القاعة كلها مية
مرة بذكر انو ابي سألني كنو ماشي حالي بالجامعة ف ألتو ماشي الحال حاطت ايديي و اجريي بمية باردة وفعلا كان وقتا في شتا كتير فوصلت مأخرفلأيت مطرح بالزاوية وكان السقف عم ينقط و تحتي بركة مية باردة