إذا ما حدا من المغتربين عندو أخبار , يا ريت يحكيولنا الشباب شعم يصير معن وكيف عايشين , متل أخونا أبو جهل (حاسس هالجملة غلط , ما لأيت غير هالإسم؟؟)..أنا رح إحكيلكن شعملت بهالعطلة (خميس وجمعة):
يوم الخميس , كان عنا لعبة غول مع فريء بالقطيف , رحنا بالباص لأنو منطأة بعيدة شوية عن منطئتنا , كان الفريء التاني منتخب من الدرجة التانية(بيلعبوا متل بارشلونا) , أما فريء شركتنا فكل واحد كرشو متر , ما في غير أنا ورفآتي اللبنانية بنركد شوية ,وأكيد مسحناهن مسح للفريء التاني , صحيح خسرنا عشرة صفر , بس كانت الرحلة كتير حلوة , وخصوصي الجو بالباص , حسيت حالي طالع عالأموعة ...رجعنا عالبيت بليل ,تحممت ومشيت عالجبيل (منطقة بعيدا عنا ساعة ونص بالسيارة) وكنت متفيء مع رفيئي نروح عصيد السمك تلني يوم..وصلت بالليل لعند رفيئي ,عرّفني عرفآتو و رحنا عالنادي لعبنا شوية بليار , رجعنا فرطناها عشا مرتب ورحنا نكزر عالكورنيش , كتير كتير منظمة وحلوة المنطأة , كلا شجر وزرع , ومتل ما فهمت إنن معمرينا عالطريأة الأوروبية , حتى إنو في محلات الطريق عاملينا حجر بدل الزفت (متل وسط بيروت) , والكورنيش أحلا من كورنيش الخبر , وعلي وايرلس كمان..المهم , إحنا وعم نكزر أنا ورفيئي بتعلملو خطيبتو , وبيدل يحكي معا شي ساعة ونص وكانت الساعة وحدة بليل وأنا ناطر رفيئي بغفا عطرف الكورنيش , وبكون ماريء واحد سعودي , بسلم عليي وبيألي "تبغى شي يا أخ " بألو لأ ما إبغى شي , بيألي شكلك مانك زين
إذا بدك شي ألي , بألو لك والله ما بني شي بس ناطر رفيئي وغفيت ,.. وهيكا نسفتو بهدلة لرفيئي.. ورجعنا عالبيت شي الساعة 1:30
عيرت التلفون عالساعة 4:40 دئيئة ونمت , رن التلفون عالساعة 3:00 كالعادة , مين عم يتصل ؟؟فئت مروبص , وبلشت بهدل عن بو جنب , مني متذكر حالي شحاكي ..
فئت عالساعة 4:40 , رحت دأيت عغرفة رفيئي ورجعت عغرفتي عملت حالي نايم , وتاري رفيئي صاير معو أصص من أبلة ومفكر إنو البيت في جناني وأنا مني عارف , جا رفيئي تيفيئني لإيني نايم !! صار حايص , رايح جاية , هربان ألبو ...مين كان عم يدأ الباب؟!!
صلينا الصبح بالجامع ومشينا عالصيد , أول ما وصلنا حضينا برف بوري شي 300 كيلو , وكنا شاريين طرحة (شبكة بيشلحوا عالسمك), ضاربين هالحساب , أول كم شلحة ما زبطوا معنا , منو هين الطرح , ما في غير أبو لشعيل و عبدالحليم الطبشة بيعرفو يطرحوا بكل الألمون , بعد كم شلحة اكتشف أوسّ الطريأة ,.. بالشلحة الخامسة طلعت الشبكة عم تلمع , في بألبا ستة كيلو , وصار كل شلحة نشيل خمسة أو ستة كيلو ...شلنا منن 16 كيلو وضجرنا ...ما كانو كبار كتير , بس اكتشفنا إنو هالسمك منو بوري , بعد ما إرينا عنو , طلع إسمو ميد , وهو سمك متل البوري بس بيجي أصغر منو (البوراية بيصير طولاmax 40 سم , الميد 25 سمmax ),..
بلشنا نتصيد بالمولينايات , وكان عم يعلأ كم سمكة حلوين , شي بيشبه الجربيدن وشي بيشبه الصراغيس بس كلو عأكبر في كم حبة نص كيلو الواحدة , وفجأة بسمع رفيئي عم يعيطلي , أوووووووووووووووووسّ , ركود ...بجي بلائي عالألو سمكة كبيرة ,بنزل عالموية بسحبلو ياها , سمكة بتشبه الجراوي أو التريخول , بس مانا ولا واحدة منن , بعد ما زناها طلعت كيليين..
كنا عم نتصيد حد الورشة تبعيت رفيئي , كان في سنسول طويل فايت بالبحر , وممنوع حدا يفوت لجوة , أكيد نحنا مسموح لأنو رفيئي هو المسؤول عن الورشة ..المهم , بعد ما علإتلو السمكة الكبيرة لرفيئي , كان في شحن عم يحمّل صخور ماريء من جنبنا , وشكلو كان مأرب علينا تيشوف السمكة , ...
بعد ما اتصيدنا بالمولينا , كان معنا شي أربعة كيلو صراغيس وجربيدن , بيمرء الشحن (الله لا يعطي العافية) وبيدعس سطل السمك , بجي أنا ساحب سمكة و مبسوط بلائي رفيئي وائف مبوّز , باطلع بلائي السمكات مرسومين عالأرض كأنا مارأة علين محدلة , سمكة بأربع عينين ..شي لو دنبتين ...ومن هالأشكال ...لمن شفت هالمنظر ما عاد فيني هدي وغشيت عأفاي من الدحك......
بعد هالحادثة ضبينا غراضنا ورجعنا , بالرجعة كان في منطأة(بركة أدّ ملعب الأحدب) بالبحر تابعة للورشة , فكانوا مسكرينا وعم يفضوا من الموية ...والسمك عم يفرفر لأنا نشفت البركة , كان فيا كم بأحة موية بس , نزلنا أنا ورفآتي صرنا نلإط سمك , مني شايف متل هالمنظر إلا عالAnimaux...
رجعنا عالبيت تحممنا ورحنا عالجامع(عصلى الجمعة)..كل العالم كانت عم تسمع الخطبة إلا أنا ورفيئي كان شخيرنا طالع بالمادنة ..بس كانت الخطبة رائعة (هيك آلولي)..عن أيش كانت الخطبة الخطبة أولكن؟!!
بعد الصلى نمنى شوية , رجعنا نضفنا السمكات (كانو البورايات والسمكة الكبيرة وشوية سمك متفرقات ) اللي نجيو من دعسة الشحن , وخدناهن لعند المطعم , إلي السمكات وعملنا صدر صيادية كبير(أد صدر العقيقة) عوجو كل السمكات , أما الجرو وكم سمكة كبار فعملنا منن سمكة حرة ..
اتصل صاحبي برفآتو و بالمقاوليين اللي بيشتغلوا معو , وعملنالك وليمة سمك ببيت واحد سعودي معن ..
إحنا وعم ناكل كلن الGeneral Forman... آعد حدي , كان ياكل ويشلح ريسان السمك إدامي , وأنا إطلع مستغرب , شعم يعمل هادا!!!
لمن خلصنا إكل بلش هو ورفيأو يعدو ريسان السمك اللي إدامن , كل واحد يعد الريسان اللي إدام التاني وينخز علي اديش بياكل!!!...
بعد الإكل أعدو يحكوا أصص عن حالن لما كانو صغار , وكان عندن كتير أصص حلوة , وما كانوأ يخلونا نمشي أبل ما نشرب عصير , (كان مودي إبنو يجبلنا عصير) و راح هاداكا وما عاد يعرف يرجع , رح تصير الساعة عشرة ...(طلع في ستة سعوديين عالئين مع بعضن بالمول , مكسرين نص المول).....وأنا كان عندي مشوار طويل تإرجع عمنطئتي...
وكلشي نكوعتو و لبطّّو لرفيئي ما كان يأوم , بالآخر فركتو أرصة من اللي بتعجب خاطرك ..آم صرح صرخة رج المبنى ..وهيكا اشتلأو عليي كل اللي آعدين وصاروا يدحكوا.....
ودعنا الشباب ومشينا , بتريء الرجعا كنت رح أغفا أنا وعم سوء ..خصوصي أنا وكنت عم إسمع أبو خاطر ...وصلت عالبيت شي الساعة 1:30 بالليل , كان في آفة طولها مترين جنب البوابة تبعيتنا , دعست عليا ودليت ماشي أد مني نعسان (بس طلعت مأتولة ) , عيرت المنبه عال7:30 ونمت,.... لما رن المنبه بكير هفيتو لبطة ودليت نايم , فئت عالشغل الساعة تسعة..كان بدي شي جرافة تتشيلني من الفرشة ...(بس غريبة ..مني متذكر حدى اتصل فيني بالليل!!)..
أكيد عندي كتير صور حلوة , رح إرجع ودين لإهلي ورفآتي ....
خيي...خلّصت ...
دوكر المعوكر
المشاركة الأصلية كتبت بواسطة دوكر
