مشكورين عهالموضوع الحلو
بس أنا برأيي إنو أهم الشي بالإسعافات هو التطبيء ...
المأصد إنو الواحد بس يصير إدامو شي حادث لا سمح الله , رح يتلبك وما رح يعرف شبدّو يعمل.

والحئيئة إنو هالموضوع ذكرني بأوصة صارت معي أول ما وصلت عالسعودية :
كان يا ما كان ...المهم من الآخر ...هادا لما وصلت عالسعودية, رحت عالسكن يللي أمنتلي يا الشركة , طلعت ساكن حد عمي, بنفس المجمع (سبحان الله), وكانت الدنية صيفية ,فكانت عيلتو لعمي وولادو معو , وهالشي خفف عني وحشة الغربة شوية (الحمد لله), و بيوم من إيام العطلة ,
الله بيعميلو عألبو لعمي وبقرر ياخدنا مشوار تنركب عالدبابات بعد ما ولادو نخرولوا عضم راسو (وأكيد كان أوسّ هو المحرّض), المهم وصلنا عالهاف مون (محل في ساحات وتلال رملية) وشفنالك
هالسعوديين بالشين تشفيط وتعربش عالتلال , و المعلم أوسّ ما بيحب هالشغلات إلا شوية ...
استأجرنا كل واحد دباب كبير ,آم ابن عمي الصغير(كان عمرو شي 9 سنين) اتسلط بدو دباب كبير
ودل متنحر براسو تحتى إخدو , مع إنو ما بيئدر يسيطر علي ...
بلشنا نعربش عالتلال ونتجدبن متل هالسعوديين ...بعد شوية , بنشوف دباب آلب عبعد شي 300م
بنعجل أنا والconfuste وبنرحلوا بسرعة عالدبابات , بنلائي واحد وائع وآلب فوأو الدباب
وفجأة بيوصل عمي بالجيب , بيطلع إبن عمي الصغير هو اللي وائع وآلب الدباب عبطنو ...
وعأساس إنو أوسّ عامل دورة إسعافات وآخد شهادة من الصليب الأحمر , بس تربطوا إيداي وما عاد
يعرف شبدو يعمل ...
عمي كان ملبك أكتر مني ...آم عمي حملو لإبنو وأنا عم ألو ما تحملو(كنت فزعان ما يكون مكسور في شي ) بس ما كان يرد عليي...
كان عم ينزل دم مع الريء من تمو وكان صدرو من تحت عم يوجعو كتير (كان آلب علي الدباب), وكان وشو متلان رمل , ...
بعد ما صحصح أوسّ (كان مصطل معو الكومبيوتر ) , تذكر كم كلمة من اللي تعلمن ..
غسلنالوا وشو لإبن عمي...أعدنا بالجيب من ورى , أعدنا بوضعية نصف جالس(خفت ما يأوم معو نزيف داخلي) , وشلحت أميصتي غطيتو فيا (تلافياً للحالة الصدمية), وطفينالوا المكيف , وألنالا لأمو تدل عم تحكي (تسألو شإسمو , ورأم التلفون ...), وخدنا بسرعة عالمستشفى....

المغذى من الموضوع إنو الشغل عالأرض غير عن الكتيبة عالورق ...وإذا الواحد ما كان متدرب عالأرض , رح يصطل متل ما أنا صطلت ...

وبعد ما خدنا دورة ال 17 ساعة , كنا ناوين ناخد دورة ال72 ساعة (يللي بياخدها بيصير مسعف)
و كان عنا مشروع حلو أنا ورفآتي , كنا ناويين نعمل فرئة إسعاف بالضيعة , بس للأسف غمضنا عين وفتّحنا عين , صار كل واحد منا ببلد.....
بتمنا من الشباب بالضيعة يكملوا هالمشروع (إذا إسن في شباب بالضيعة)

مشكوين عالمعلومات (رح إرجع راجعن انشالله , لأني تارك كتاب الصليب الأحمر بلبنان) , بس شكلن أد الكتاب عشي مرتين!!

الله يوجهلكن الخير يا رفآتي و انشالله بنلتآ مع بعضنا أريباً , ....

عفواً عالإطالة , مني معود كتر حكي ..