عوكر المدوكر

**moustafa** · 05-12-2007, 09:50 PM

ههههههههههههههه
كتيركتير حلوة هالقصة

**الشامي** · 08-12-2007, 06:46 AM

السلام عليكم

...

الله يبارك فيكم، طرائف مميزة ... وينك يا شيخ جابر ...؟

.

أخوكم

**جابر دملوك** · 01-01-2008, 04:18 AM

(37)
عوكر و بارودة الدِّك.
عوكر كان عريس بأول طلعتو.
بيوم من الإيام حب هالعريس إنو يتمشى شويه هو و عروستو صب العوينة.
عوكر كتير مولع بصيد البر.
طلب عوكر من جارو بارودة الدك " ألَّك يمكن يطرلو شي من إدامي "
عوكر إخد البارودة و وأتل وصل ع عين الجامع حضي بعروستو.
العروس آلتلو : " ألت لرفيقتي تحتى تروح تمشي معنا ... معليشي "
" متل ما بدك " جاوبا عوكر.
وأتل جات الرفيقة حب عوكر إنو يأبطا.
عوكر حط كبسونة بالبارودة و رفعا ع الرفيقة و هيه مانا عارفه و بدو يفئس الديك.
في شي ضرب ع راسو و ألو : " و شعرفك ما يكون فيا ضرب و ناقصو بس كبسونة ؟ "
عوكر إسانو بدو يأبطا بس رفع البارودة صوب السما و أوص.
و عينك ما تشوف إلا النور.
و إدنك ما تسمع إلا الخير.
و إذا بضرب شي 4 صابيع بيرعد بالمنطقة و بيأبطو هو كمان.
و إسودت الدنيا بعيني لعوكر و ما عاودوا إجري يحملو منيح.
و صحيح عروستو و رفيقتا أبطوا من الضرب بس ما عرفوا شكان رح يصير لو ما يرفع عوكر البارودة صوب السما.
عوكر ترك عروستو و رفيقتا و حمل حالو و راح لعند جارو صاحب البارودة.
شلحلو عوكر البارودة و ترأو نأفت دين بهدلة و ألَّو :
" ولا ... كيف بتعطيني بارودة فيا ضرب ... و ما بتؤلي ؟ "
جاوبو جارو : " و الله نسيت "
ألو عوكر : " و ليش البارودة فيا ضرب أصلاً ... و هي محطوطة بالبيت ...
عم يأطع سُمُن من فوق التخت و لا رح تلاقي فِرّ و شُكُب بالحِمام ؟ "
" لا و الله لا هيكه و لا هيكه بس مبارح وصلت لحد البيت بعد المغرب و ما حضيت بشي أوصو ...
ف ألت ضيعانو أوصو بالفضا ... أُمت تركتو لتاني يوم ... و وأتل جيت لتاخد البارودة نسيت ألك " جاوبو الجار.
عوكر ألو : " بتعرف لو ما ألله ستر كان صاحبك عوكر مرتكب أكبر جريمة أتل و كُلو بسبب ضربك هلي ضيعان تأوصو بالفضا"

**الزاهر** · 01-01-2008, 04:28 AM

يا زلمة............الحمد لله على سلامتها!!!

**مصطفى معتوق** · 01-01-2008, 04:31 AM

هههههههههههههههههههههههههههههههههههههههههه

مشكور عم جابر

ذكرتني بستي الله يطول بعمرها

كل ما تشوفني حامل سلاح تقلي :" يا ستي انتبه ." قوم انا قلها فاضي يا تيتا

تقوم تقلي بيدكها بليس .

**جابر دملوك** · 01-01-2008, 04:43 AM

الله معكن يا جماعة الخير.
و الله إشتأنالكن كتير.
و متل ما قال قطر الندى ... كنا شوية مشغولين ... و رجعنالكن.
إن شاء الله يكون الجميع بخير و الله يبارك فيكن.

**دوكر** · 01-01-2008, 04:50 AM

يا هلا بالمعلم دملوك.....
يا ويلاي.....رجع المعلم جابر معناتا رجعة البسة ع وجهنا.....الله محي اصلك .....هادا احلى راس سنة مع هل الؤصة الحلوة .......
يسلمو.....
و يعطيك العافية ....
اخوكم دوكر المعوكر.......

**جابر دملوك** · 01-01-2008, 05:06 AM

و الله يا دوكر إنت بالألب إنت و كل هالأعضاء الطيبين و الطيبات.
الله يبارك فيكم جميعاً.

**جابر دملوك** · 07-01-2008, 07:24 AM

(38)
عوكر و أضية الأسماء.
مصيبة عوكر إنو إذا طلع من بيتو و راح ع الشغل و صدفت إنو شاف واحد و سلم علي و رد عوكر السلام صار أيو شخص بيحضى في عوكر بعد الشخص ألأولاني رح يعيطلو بنفس الإسم.
ع سبيل المثال مرة عوكر حضي بواحد إسمو جان ف سلمو ع بعضن
" صباح الخير عوكر "
" صباح الخير جان "
بعد شي 3 دقايق حضي بواحد إسمو راب
" صباح الخير عوكر "
" صباح الخير جا "
و كان رح يقلو جان بس إستدرك و كان شوية متأخر لأنو ظمط بنص الإسم و بدل ما يقول راب طلع لا هو قايل جان و لا هو قايل راب
طلع قايل : جان + راب - ن - را = جاب
يعني : " صباح الخير جاب "

**دوكر** · 07-01-2008, 09:22 AM

يا هلا بالمعلم جابر .....
هههههههههههه....يأطع خملو هل العوكر......هههههههههه.....حلوة................
يعطيك العافية ......
اخوكم دوكر المعوكر...........

**مصطفى معتوق** · 07-01-2008, 01:23 PM

اللي يعينو لهالمعوكر

ما في شي صاغ

**ابو عمر** · 08-01-2008, 04:19 AM

سمعوا يا شباب
اَل في مرّة عوكر كان اَعد بالبيت مع هل المرة....ودايقتو خلاؤو من الضجر....اَم فجأة دقَ الباب!!!!!.... اَم عوكر وركض حتّى يفتح ويشوف مين في عالباب.....فتح الباب وطلع بوشّو عامل البلدية....
سألو عوكر:"خير شو بدّك؟؟؟...."
اَم جاوب عامل البلدية:"لا والله سلامتك...بس جاية إسأل،عندكن زبالة؟؟؟"
اَم عوكر قلّو لحظة يا ابني حتّى إسأل المرة....عيّطلا وسألها:"يا مرة، في عنّا زبالة؟؟؟"...اَم قالتلو المرة:"اي أكيد في"
اَم عوكر الذكي قلّو لعامل البلدية:"اي عنّا ..!!!..."، وطبش الباب بوشّ العامل، ونزل هالعامل المعتّر مانو فاهم خمسو من طمسو........هاهاها

**fadi** · 08-01-2008, 04:25 AM

لهيأة دوكر عطول هيك

**جابر دملوك** · 13-01-2008, 09:47 PM

(39)
عوكر و المأذونية.
عوكر صاحبنا بيشتغل جمركحي.
طلب عوكر مأذونية لمدة أسبوعين من الضابط تبعو ف ما إذنلو إلا بأسبوع.
عوكر حط براسو بدو ياخد الأسبوع التاني غصبن عن دعس راس الضابط.
أبل ما ينتهي الأسبوع الأول راح عوكر لعند الدكتور تياخد تأرير إنو مريض.
وأتل وصل عوكر ع العيادة آلولو إنو الدكتور عم يداوم اليوم بالمستشفى.
حمل حالو عوكر و راح ع المستشفى.
عوكر ناطر دورو بغرفة الإنتظار إلا و بيحس بوجع قال بينو و بن نفسو " يمكن شوية غازات ... هلأ بنفسا بالكوريدور "
طلع عوكر ع الكوريدور و الوجع صار يزيد.
رجع عوكر و طلب يشوف الدكتور بسرعة و ما عاود في يصبر.
" يا عمي خليك بالدور " آلتلو السكرتيرا.
جاوبا عوكر " دخيلو الله ما عاد فيي " و صار يعيط .
سمع الدكتور الصريخ و طلع ت يشوف شصاير.
عوكر ماسك بطنو و عم يصرخ " آخ يا بطني "
الدكتور فوت عوكر و فحصو طلع معو الزايدة و فوراً نألو ع غرفة العمليات.
و بعد العملية الدكتور ألو لعوكر لازم ترتاح شي أسبوع وما لازم تروح ع الشغل.
و هيكه عوكر عطل الأسبوع التاني و دعس راس الضابط بس غير شكل.

**Nader 3:16** · 13-01-2008, 09:57 PM

اهلين بجابر دملوك وينك منك عم تبين...

و الله شتقنا لؤصص دوكر.....

مشكووووور عالقصة و ابقا ما تطول علينا

**أيمن غ القلموني** · 13-01-2008, 10:02 PM

مشكور خيي جابر ، وناطرينك.

**الزاهر** · 14-01-2008, 01:08 AM

ههههههه...........أنا أصتي شوية قريبة عليها.......بس غير شكل!!!!

**fadi** · 14-01-2008, 01:35 AM

مشكور يا أخ جابر والله ئصص بتفرِّط من الضحك

**جابر دملوك** · 14-01-2008, 01:45 AM

الله يبارك فيكم جميعاً.

**دوكر** · 14-01-2008, 01:50 AM

يا هلا بالمعلم جابر ......
يعطيك العافية ........و الله ؤصصك بترجع البسمة و الفرحة ع ؤلبنا.......
اخوكم دوكر المعوكر...........

**ابو عمر** · 15-01-2008, 01:45 AM

هادا يا شباب...كان مرّة دكتور جامعه اسمو عوكر عم يلعب كبّا(ورق)...طلع معو "قص،ريّا،بنت،شبّ،عشرة،تسعة،و تنين كبّه....." قام طلب بأربعطعش....
وكان مناسبو الحظ إنوّ هوّا يلّي بدّو يفتح من إيدو.....قام وبذكاؤو الخارق فتح تنين الكبّه.....وكان غاشي من الضحك إنّو ما حدا في يخسّرو.......وهيكة، خسر الدكتور عوكر اللعبة....وضحكت عليه الألمون كلاّ....وتوتة توتة، خلصت الحتوتة....

**Nader 3:16** · 15-01-2008, 01:50 AM

اهلين بابو الروم كيفك؟؟

ههههههههههههههههههههههههه هادي كتير حلوة الؤصة تبعيت الكبّة!!!!!!
انو هو اصدو يخلي الورق القوي لآخر اللعبة كعنصر مفاجأة!!! لوووووووووووول

اهلين فيك

**fadi** · 15-01-2008, 02:37 AM

لأ يا نادر اصدو يشلحن وراء الكبه

**الزاهر** · 19-01-2008, 12:05 AM

عوكر وصيام عاشوراء!!!

وبعد ما عرف عوكر أمتن بيصدف عاشوراء.........نوي الصيام .........وخلص.........بدو يصوم.........ما في مجال.........وفاء يوم الجمعة من بكير وانطلق بكل حزم للجامعة......ولا على بالو..........أول ما وصل فات على الدكان واشترى دف سنكرز.....وتنكة عصير.......وفات عهالجامعة عم يأرمش سنيكرز...........خلصت المحاضرة رجع عوكر عالبيت بيلائي أمو محضرتلو الصفرة........صحن زباع أخضر بحامض وبيض مئلي وشاي ووو.........بيفأعها بدن أكل مرتب........وبيؤوم يتوضا......وهو وعم يتوضا أبل ما يروح عالجمعة بيغشى الضحك وبيخبر أمو..........المهم...........وبعد ما خلصت الخطبة اللي كانت عن أهمية الصلاة في حياة الإنسان وعن أن كل الأديان السماوية تأمر بها....بيتوجه عوكر لعند صاحبو اللي كان واعدو بدو يعطيه ملف.......وعند صاحبو في براد عصير.......بيشتري عوكر أنينة عصير وبيأعد يمزمزها عرواء........لكن بيتذكرها هو وعم يصلي العصر.........ومنيح اللي تمالك نفسو وما غشي الضحك.........وما عاد لو ألب يطلع عالبيت ما يؤوم يرأعها بطن أرنبيط أبل ما يوصل المغرب..........

الله يتأبل صيامنا وصيام اللي صامو!!!!.......ههههههههه

السلام عليكم

**Amal** · 19-01-2008, 12:13 AM

ههههههه حلوة هادي القصة ..

شكرا للاخ زاهر..

**دوكر** · 19-01-2008, 02:54 AM

يا هلا بالمعلم أطر......
ههههههههههههههههههههه...................
ؤصة حلوة ........
يعطيك العافية .......
اخوكمدوكر المعوكر.........

**fadi** · 19-01-2008, 03:57 PM

مشكور يا زاهر

**moustafa** · 20-01-2008, 01:43 PM

هههههههه القصص تبعيتكن يا زاهر و يا جابر بفرطو من الضحك.... الله يبارك فيكم

**جابر دملوك** · 20-01-2008, 08:36 PM

(40)
عوكر و إمتحان ال TOEFL
وأتل جا عوكر ع أماركة من كزا و عشرين سنة بلش يدرس إنجليزي متلو متل بقية الطلاب لأنا ثقافتو كانت عصفوري و فرنسي ب بلادو.
عوكر لو أرايب بأماركة جا أبل منو ب كم سنة فآم نصحو إنو يتسجل ع بكير ب إمتحان ال TOEFL لأنو إذا سجلت اليوم الإمتحان بيكون بعد شي شهرين أو تلاتة و منشان يتعود ع جو الإمتحان.
و الله عوكر ما كذب خبر آم راح و سجل للإمتحان الجاية و أبل ما يجي موعد الإمتحان آم راح و سجل منشان الإمتحان هلي بعدو (هالإمتحان بيعملو أكتر من 12 مرة بالسنة)
بتمروء الإيام و بيجي موعد الإمتحان و عوكر متخوف لأنو مانو متعود ع هالنوع من الإمتحانات بدا تركيز و سرعة و هو مصيبتو إنو سمعو أليل ب إدن اليمين و أطرش رسمي و ب إمتياز بالشميل.
وصل عوكر ع المحل هلي بدون يعملو في الإمتحان طلعت قاعة طول ب عرض.
وأتل عوكر شاف القاعة إفتكر إنو كل واحد بيحط سماعات ع دني بيسمع منيح و ما حدا بيشوش علي.
إلعممااا شو هالمصيبة رح يبلش الإمتحان و ما حدا فتح سيرة السماعات و الضجة من جوات القاعة و من برة شي ما بينحمل.
عوكر سأل واحد ما في سماعات ت نحطى ع دينينا جاوبو شايف هالمسجلة هلي ع المسرح من هانيكة رح يطلع الصوت.
عوكر عرف حالو سائط و لو كان فطحل لأنو بعيد عن المسجلة متل دكان نبيل القص الله يرحمو و دكان إبن سعد الله.
بلش الإمتحان آل عوكر " أمي رمتني و الملائكة إستلقتني "
الإمتحان في عدة أقسام شي في قواعد و شي بدو إستماع و بتجاوب ع الأسئلة من فهمك للأصة.
بلش عوكر الإمتحان و كل شي كان تمام لأنو عم يحل أسئلة القواعد شي بيعرفو و شي ما بيعرفو.
و بعد حوالي ربع ساعة بيصير حادث خطير بالمنطقة هلي عم يصير فيا الإمتحان و بيجي كل شي في سيارت بوليس و إسعاف و طيارة هليكبتر و أصوات واوي واوي واويو طب طب طب طب و عينك ما تشوف إلا عوكر كف أعد و مد إجري لأنو ما عاد في يسمع شي وأتل بلش القسم السمعي.
عوكر ألك سائط و سائط خليني علم الأجوبة ع الطشاني ف آم بلش يمريئ أصبعو ع الأجوبة هو و عم يقول " ON BION BINO SOUFALA KATINO SOUFALA KATAKTAK ON BION BE ON BION BE " و يعلم الجواب هلي بيوصل أصبعو علي.
طلع عوكر من الإمتحان لا تعود ع الإمتحان ولا تعلم شي " تعلم العصا ب جنابن صحيح " " بس حط براسو إنو بالإمتحان الجاية رح يروح بكير و يقعد جنب آلة التسجيل مباشرةً ".
بتمرؤ الإيام و بيجي موعد الإمتحان و عوكر ما بينام و لا ثانية بالليل هو و عم يفكر كيف بدو يروح بكير ت يطلعلو كرسي جنب آلة التسجيل.
المهم عوكر حمل حالو و راح مبكر و وصل أبل ما يفتحوا حتى القاعة.
عوكر كتير إنبسط وأتل وصل و ما كان في حدا أبلو و القاعة هالمرة طلعت أظغر من القاعة الماضية ب شوية.
المراقبين فتحوا القاعة فات عوكر و أعد بعيد عن الآلة شي متر أو متر و كم سنطي هو و فرحان و عم يدحك بعبو.
وأتل جات ساعة الصفر و رح يبلش الإمتحان بيقوم واحد من المراقبين بيجرب الآلة ت يشوف كنو بتشتغل و لا لأ.
و عينك ما تشوف إلا النور تتشوف عوكر كيف كانت رح تصيبو سكتة وأتل طلع إنو الفيش هلي شاكبين في آلة التسجيل ما بيشتغل و دوروا ع فيش تاني ف ما ليئيوا إلا واحد ب آخر القاعة آمووا راحوا شاكبين الآلة في و طلبوا من الطلاب إنون يدير كل واحد منون كرسي و هيكه صار صاحبنا عوكر بآخر القاعة و أكيد صرتو بتعرفو كمالة الأصة.
و هيكه طلع عوكر الأول بس بالساقطين.

**الزاهر** · 20-01-2008, 08:48 PM

ههههههههههههههههههههههههههههههههه

الحلو بالأصة إنها بتحسها بتضجر...........وبس تأرا آخر كم سطر...........بيجيك ضحك عن كل الأسطر!!!

أضحك الله سنك عمو!!!

**دوكر** · 21-01-2008, 12:12 AM

يا هلا بالمعلم جابر........
ههههههههههههه......الله يخليلنا ياك ايشودا.....ههههههههه.......حلوة ......
يعطيك العافية ......
اخوكم دوكر المعوكر.......

**fadi** · 21-01-2008, 12:59 AM

مشكور يا اخ جابر

**THE TERRORIST** · 21-01-2008, 09:55 PM

بارك الله بكم جميعاً...
قصص و لا أروع...
مهضومة جداً...
مشكورين...

**جابر دملوك** · 04-02-2008, 12:26 AM

(41)
عوكر بوو plastic

عمو لعوكر آخد واحدة من أوروبا و عندو ولاد منا و هنه عايشين ب بلد مرتو.
من وقت للتاني كانوا يحملوا حالن وينزلوا ع الضيعة بالصيفية.
عوكر و أرايبينوا كانوا يلعبوا مع ولاد عمو.
هادول يعلموا هادولك شغلات و هادولك يعلموا هادول شغلات تانية.
من جملة الشغلات هلي تعلما عوكر و أرايبينوا من ولاد عمو غنية للولاد الظغار باللغة الإنجليزية.
هالغنية علقت براس عوكر و حفظا بصم و ما عاودت تمحا من ذاكرتو مع إنو بلغ من الكبر عتيا ... صح ما شاب راسوا ... بس إشتعل الذقن شيبا.
الغنية هلي حفظا عوكر و دلو يرددا هي :
Ba Ba Plastic
Hani Hani fou
Yastir Yastir
Bina Tfou
Wanti Damastir
Wanti Dabe
Wanti Damastir
Apronde
عوكر دلو يغني هالغنية بالصيغة الفوقونية لأبل عشر سنين لورا و كان رح يدلو يغنيا لولا ما جات بنتو بيوم من الإيام من المدرسة عم تردد غنية شبيهه بالغنية هلي حافظا هو.
وأتل سمع عوكر الغنية هلي عم تغنيا بنتو قال : " سبحان الله نفس اللحن ... ما بيصير توارد أفكار ... أكيد سارقين اللحن مني"
و بعد ما شاف الغنية مكتوبة ع الورقة قابله مع هلي حافظا لقي في فرق بسيط :

Ba Ba Plastic
Baa, baa, black sheep
Hani Hani fou
Have you any wol
Yastir Yastir
Yes sir, yes sir
Bina Tfou
Three bags full
Wanti Damaster
One for the master
Wanti Dabe
One for the dame
Wanti Damaster
And one for the little boy
Apronde
Who lives down the lane

**Nader 3:16** · 04-02-2008, 12:36 AM

اهلين بجابر دملوك...
كيفك؟؟؟
يا زلمة فرطت من الضحك.....

يلا نوطرين كل جديد ...بس ليش هالمرة منك ملون الؤصة كالعادة؟

**دوكر** · 04-02-2008, 12:38 AM

يا هلا بالمعلم جابر...
حلوة...
يعطيك العافية...

**عمار الفلو** · 04-02-2008, 02:09 AM

والله هاقصص بتروح الهم عن القلب

الله يخليلنا اياك ياك جابر

**الزاهر** · 04-02-2008, 02:14 AM

يا هلا بالمعلم جابر ....
كتير حلوة....
نوطرين الؤوصة الجاية...

عدينا دوكر!!!..........هههههههههه

**حُسَينْ ... !** · 04-02-2008, 11:24 PM

سلام عليكم
شكرا لك اخي جابر دملوك على هذه القصص الرائعة التى تزيح الهم عن القلب ، و نحن دائمن في انتظار كل جديد

**محمد أحمد الفلو** · 05-02-2008, 12:30 AM

رائع

الله يبارك بالأخ جابر

**جابر دملوك** · 08-02-2008, 08:11 PM

(42)
عوكر عم يمثل طرزان
(10) (11) (12) عوكر كان عُمرَوو وأتل زعل هو و أُمَوو.
" روح مادي إعملك شي بآ و لا تسألني عن شي أبداً " آلتلو أموو.
" ما رح إسألك عن شي أصلاً و مادي تجيبيلي شي " جاوبا عوكر.
" مين جبلك هالأميص هلي لابسا مَو أنا ؟ " آلت الأم.
" هيههه خُدِييا مادييه " جاوب عوكر.
" و هالبروتيل منين جايبا ؟ " آلت الأم.
" يا لطيف ع أد مانا لأطة خدييا كمان " جاوب عوكر.
" بدك تؤلي إنك عفرت زيتون و إشتريت هالسكب الأديداس ما هيك ؟ " آلت الأم.
" جِبتي و مانو عاجبني و دييئ ع إجري خُديي " جاوب عوكر.
" و هالبنطرون إنتا نزلت ع البلد و إشتريتو من مصرياتك ما هيك ؟ " آلت الأم.
" و هادا البنطرون كمان مادي هو مادي شي منك " جاوب عوكر.
" و كلسون البستوني منين جايبو ؟ شايلو عن منشر الجيران ؟ " آلت الأم هي و غاشية الدحك.
عوكر بينو و بين نفسو " منين هالورطة شبدنا نعمل ؟ "
" الكلسون جبلي هو أبي "

**الزاهر** · 08-02-2008, 11:15 PM

هههههههههههههههههههههههههههههههههههههههههههههههه.. ...........الله يخليلنا ياك عمو جابر.............كيف بدنا نضحك بهالبلد بلاك؟؟؟

**جابر دملوك** · 16-02-2008, 09:52 PM

(43)
عوكر و الفانوس السحري.
عوكر سئيل و دموو تئيل و إذا لبص ع واحد بيلبص و ما بيعاود يحل عنو و بيصير متل خيالو تمام سواء في شمس ولا ع ضوو الشمعة.
بيوم من الإيام بيسمع عنكوش الباب عم يندق و من ع بكرة يا صبح يا فتاح يا رزاق.
صحيح ما كان غافي ساعتا بس بيقوم بيفتح الباب هو و مستغرب.
بيحضى بعوكر ملبص منخارو بالباب.
" و لك شجايبك ب هالوقت ما عندكون ساعة بالبيت ؟ " بيسأل عنكوش.
بيجاوبو عوكر "ما بعرف يا زلمه في شي شألني و جابني لعندك ... أكيد عندك فانوس سحري و حفيتوو ف أمت طلعت أنا الجني الأزرق تبع الفانوس "
رد علي عنكوش و أللو : " إنت الساديئ : أختي كانت مأعده إبنا الظغير ع النونية ت ( ... ) و بعد ما خلص آمت غسلتا و الظاهر حفتا منيح ف أمت طلعت إنت الجني الأزرق تبع النونية و حملت حالك و جيت.

**الزاهر** · 16-02-2008, 11:59 PM

السلام عليكم

هاد فانوس.................هههههههههههههههههه

شكرا جزيلا على هالقصة

**جابر دملوك** · 17-02-2008, 06:01 PM

(44)
عوكر و بدلة الكاراتيه.
من أول يوم بلش عوكر يتعلم فيا الكاراتية صار يلبس البدلة و يكزدر فيا بالضيعة و ياخد بوزات ع الرايح و الجاية.
فلقنا بمشاويرو كما لو كان ما حدا إسا تعلم يحرك إيديي و إجريي و إخد الحزام الأبيض.
كل العالم صاروا بيعرفوا إنو عوكر عم يتعلم كاراتية و إنو صار لازم يكون بيعرف يلعب هاللعبة بس ما حدا شافو عم يلعبا.
بيوم من الإيام بتصير مشكلة بين عوكر و واحد تاني بنص دين الضيعة.
ف بيقوموا بيعلقوا خبيط ببعضن.
عوكر بيتبهدل بهدلة لبو دينا و بينمسح في الأرض و العالم مستغربين بيصير هادا عوكر لاعب الكاراتية يصير فيي هالشي.
جريو مناخير عوكر و تموو دم ف العالم ردوون عن بعضن و راح هاداك الزلمة.
طب واحد ع عوكر و أللو : " ع حد علمنا إنك بطل بالكاراتية ... واحد ما بيلعب أي لعبة فأعك بدن من كعب الدست و بزأك الدم و رن أدومك ... و ما إدرت تطالو بضربة واحدة "
رد عوكر : " آخ لو كنت لابس بدلة الكاراتية "

**Nader 3:16** · 17-02-2008, 07:05 PM

هههههههههههههههههههه
مشكووووور يا معلم جابر ...حلوة هادي الؤصة...

بس وينو دوكر تبعنا موء عم يبين عالمنتدى؟؟؟!!!

**الزاهر** · 17-02-2008, 08:46 PM

ههههههههههه...............يحرء ديبو هالهوكر!!

**روعة** · 18-02-2008, 05:26 PM

قصة أنقلها لكم على لسان عوكر مباشرة":
الخميس الماضي اشتريت سطل لبنه و نسيتو متل العاده عند رفيقي
السبت كنا عم نتغدى عند واحد لبناني غيرو فجبلي الأول سطل اللبنه وكنت بيومها شاري كلساتات وراكيت تنس
حطيت السطل بالبراد عند رفيقي ... وكانت السهره لازم تكون عند الشباب السوريين

ونحنا و طالعين نسيت اللبنه و تزكرت الرااكيت والكلساتات
وعند الشب السوري انتبهت اني ناسي اللبنه ... وبآخر السهره يا حزرك شو صار
نسيت الراكيت والكلساتات عند السوري

يعني عنجد اني ولا أسطل من هيك بالنسيان
ناسي عند واحد اللبنه و عند التاني الراكيت والكلساتات

ملاحظة: دوكر هو ليس الذي يكتب في المنتدى لأني لا أعرفه
فقط إستعملت إسمه كما يفعل الأخ جابر

**جابر دملوك** · 18-02-2008, 09:31 PM

(45)
عوكر و جمع بدون قصر.
بيوم من الإيام فاء عوكر متأخر شوية ف راحت عليي الترويقة و إهلو كان رح يخلصو الغدا.
قالولوا : " يالله لحق حالك معنا أبل ما نقوم "
عوكر ما حر حالو أبداً .
عمل شاي و حط حبتين زيتون و خرطين جبنة البأرة الداحكة و سكب صحنين لوبية بلحمة و لُبنِية.
" بسم الله " و بلش ياكل زيتون و جبنة و يشرؤ شاي.
هو و خلص قال : " الحمد لله من الترويقة و بسم الله من الغدا و بلش باللوبية و اللُّبنية "

**حُسَينْ ... !** · 18-02-2008, 11:21 PM

سلام عليكم
ههههههههههههههههه.....مشكور يا شيخ جابر.......

الموضوع: عوكر المدوكر

أدوات الموضوع

عرض

عوكر و بارودة الدِّك.

؟

عوكر و أضية الأسماء

؟

عوكر و عامل البلديّة

عوكر و المأذونية

عوكر وفتّة كبّا...

السلام عليكم و رحمة الله و بركاته.

عوكر و إمتحان ال Toefl

عوكر بوو plastic

عوكر عم يمثل طرزان

عوكر و الفانوس السحري

عوكر و بدلة الكاراتيه

عوكر و جمع بدون قصر

ضوابط المشاركة