اليوم رح أحكيلكن قصة الزوجة الملعونة
أي نعم ملعونة هلئ رح تشوفو شو عملت
بزوجها ربي يكسر أيديها ورجليها

هادا ساداتي ياكرام كان في رجل طيب صالح
متزوج وحدة اللهم عافينا وارحمنا واحفظنا
يامين يشوفها رايحة جاية
من بيت شقاع لبيت رقاع
وفي حوليها شلة نسوان يالطيف الطف يارب
والزوج مهتم بشغلو وبس
وتارك أمور البيت للزوجة
وفي أحد الايام بيجي للبيت زوجها وبقول :
يابهيجة قومي حطيلي لقمتين بدي أفطر رح يأذن المغرب
بتقللو بهيجة :
أي شو أحول يعني مانك شايفني عم حط حنة
بتقللو روح على النملية في رز ولبن
بقلها حرام عليكي اتقي الله الدنيا رمضان وانت عم تحطي حنة بهالوقت
بتروح بتوقف هيك متل يالطيف يعني يالطيف متل الجنية وبتقللو
شو بدك تتحاسب عني أبن عمي
كل مين عقلو براسو بيعرف خلاصو
وكل عنزة معلقة من عرقوبها
اي نعم ياساداتي ياكرام
بتقعد بهيجة وبتكمل حط حنة
وزوجها بحط راسو وبنام بدون فطور يعني على حبة التمر
هو بنام زوجها من هون
وهي بتنط متل الحيةبتلبس تيابها
وبتتبودر وبتغندر وبتمعط حالها بالحمرة معط
بتحطلو على انفو حشيشة مخدرة
وبتفتح الباب وبتطلع برا البيت
اللهم عافينا واحفظنا وارحمنا
بتروح هي ورفقاتها السيئين متلها على السهر
اتاري كل وحدة منن بتعمل نفس الشي بزوجها
وكل زوج منهم قد اللوح
بياكل وبنام متل التيس
الله يعزكم يعني
والله رجال آخر زمان
الهي ينتقم منهم
ماعليكم غير بالمهم
بتبقى هي و الزوجات الطالحات الحقيرات سهرانين على دق ورقص وفقص وخلع
لوش الضو
بترجع كل وحدة منن بتنام بفرشتها ولا كأنو شي حصل
وبهيجة كمان بترجع وبتحط راسها وبتنام
وبفيق زوجها متأخر على غير العادة على شغلو
بقوم بدون سحور بيركض على الشغل
وهي مقبورة نايمة (ريتها نومة بلا فيقة)
اي معلوم سيدي بدها تنام لانو كل الليل على رقص وخلع
يالطيف الطف
يعني المخلوقة تعيبة
زوجها بهداك اليوم حس بالتعب
وقال بدي ارجع على البيت بكير شوي
اي نعم بيرجع زوجها على البيت بكير
وبشوفها
بكرا منكمل ومنشوف شو شاف زوجها بالبيت