(54)
عوكر و فَيِّة الحمار.
بيوم من الإيام إحتاج عوكر يروح مشوار بعيد إيام ما كان (الحمار هو الهاندا) و (البغل هو المرسيدس)
صاحبنا ما كان عندو لا هاندا و لا مرسيدس ف إضطر إنو يطلب من جِحَّاش المنطآ يوصلو.
عوكر ركب ع الحمار و الجِحَّاش آد الحبلة و مِشْيَوا.
ب نص المشوار وئفوا ت يرتاحوا و يتلأحولون شوية و كانت الدنيا شوب و ما في شي يِدَّروا في لا شجر و لا حجر.
عوكر فرش حصيرة ظغيرة و تلأح ب فَيِّة الحمار.
الجِحَّاش شأل عوكر من إيدَي و إجرَي و شندفو بيعيد هو و حصيرتو و ألَّو : " إنت صحيح مستأجر الحمار منشان المشوار بس ظل الحمار ل صاحب الحمار "
و تلأح محلو.
نفض حالو عوكر و آم ت يرد إعتبارو و يفهم الجِحَّاش إنو هالحكي غلط لأنو الحمار و منتفعاتو للمستأجر ت يخلص المشوار.
لا هادا يئتنع مع هاداك و لا هاداك يئتنع مع هادا.
و دلُّون أكتر من ربع ساعة عم يتخانأو ت حتى مرأ واحد ف عملوا حكم بيناتون.
الزلمه حكم مع عوكر. الجحاش آم ما إبل.
هلأ صاروا 2 ضد الجحاش.
بعد شوية مرأ واحد تاني سألو عن الموضوع ف صف مع الجحاش.
هلأ صاروا 2 ضد 2.
و الرِّجالَيْن تحمسوا للموضوع أكتر من عوكر و الجِحَّاش.
ب هالفترة سلحب الحمار هو ظِلَّو و بِعِدوا عن المنطآ.
عوكر و الجحاش إشتلؤ ع الشغلة ف راحوا يدوروا ع الحمار.
و الرجالين دلون متكابشين ب الإيدين و عم يتآتلوا ع ظل الحمار.