كان ياما كان

[nana]

[Nadine]

مساء الخير والبركة

جايبتلكم اليوم حكاية كتير حلوة ومهضومة عن ديبو
إسمها
صبي الحارة


هاد ياسيدي كان في شب معتر كتير إسمو ديبو
وديبو بيشتغل صبي الحارة
إي نعم صبي الحارة
يعني بيشتغل صبي عند الخضرجي واللحام والفران
وديبو شايب راسو من كتر مامرق على راسو من قصص وحكايات لأهل الحارة
هو بيعرف الصغيرة والكبيرة بالحارة
يعني هي يلي بتطلب منو يجبلها لحمة جمل بدل الغنم من دون علم زوجها
وهاد يلي بوصيه على صبغة للشعر
يعني بالمختصر بيعرف كلشي بالحارة
وصاحبنا ديبو مالو مكان ينام فيه غير الجامع
وبأحد الأيام إجا المؤذن أذن للصبح وصللوا صلاة الصبح وتيسرت الناس
وبقي ديبو ورفيقوالمسكين نايمين بالجامع
قام ديبو سكر هالباب منيح
وحط راسو بدو ينام
مابيجيه نوم
بقوم بيقعد وبيسند ضهرو على هالحيط بجنب المايكرفون تبع المؤذن
وبالغلط بيسند ضهرو على مفتاح تشغيل المايكرفون
وبصير صوتهم بلعلع بالحارة لعلعة من دون مايعرفوا
وبقللو ديبو لرفيقو
والله يا تحسين لو بتعرف شو مرق على راسي حكايات مابتصدق
بقللو متل شو
بقللو ديبو كلشي بدك ياه
كلشي بدك ياه
ليش شو يلي مامرق على هالراس
بقللو ديبو
شفتو لأبو رياض يلي كان عم يصللي هون من شوي
لاتصدق إنو هاد شعرو الحقيقي أنا يلي كنت جبلو الصبغة
وام خليل الها 20 سنة وهي بتطعمي زوجها لحمة جمل على اساس إنو غنم أنا بإيدي كنت جبلها اللحمات
وأم جمال
لاتصدق إنو يلي لابستو بإيديها دهب
هاد كللو تنك وأنا يلي طليتلها ياهم بمي الذهب
بس أمنتك بالله أوعك تحكي لحدا
أنا اول مرة بعمري بيطلع من تمي هالحكي
ولو ياديبو كمل
وبنت الخياط لاتفكرها سهلة ياما موصلها مكاتيب يإيدي من إبن أبو أحمد
لك إيه شو بدي أحكيلك لأحكيلك
وأبو فريد السمان ياما شايفو بعيوني عم يخلط مي بالحليب
لك قوم صبلك كاسة شاي قوم
لك حتى الشيخ شوقي إمام هاد الجامع لاتفكرو سهل
بحرم على غيرو وبحلل لنفسو
متزوج تنين والتالتة بالسر وأنا يلي عم آخدلها الخضرة كل يوم
نفسو خضرة هالشيخ
لك حتى رئيس المخفر هون عم تلفي لعندو كل يوم مرت أبو حازم حتى يظبطلها طلاقها منو
شو بدي احكيلك
وياعيني بتعرفو لجميل إبن أبو جميل
لك هاد يلي ساكن ورا الجامع بالظبط
إي شبو
لك هاد يالطيف إلطف فيه يارب
هاد منصاب بهداك المرض كش برا وبعيد
لك إي متل اني عم خبرك والله لو يعرف هالمسكين انو منصاب بهداك المرض ليروح فيها اليوم قبل بكرة
لك حتى ابو فريد وشريكو ابو ايمن
لك هاد ابو فريد مالو ثقة بشريكو ابدا
كل يوم بقللي خللي عينك ع المحل بغيابي
وابو ايمن نازل فيه سلخ عن حل وجنب
لك بتعرف ياديبو المرحوم ابو خالد رحمة الله عليه
إي شبو رحمة الله عليه
بتعرف ياديبو إنو كان متزوج تلاتة ومرتو الاولانية نايمة بالخسة ولابتعرف شي
أي علي الحلال لو بيعرفو شو كان يعمل بحياتو لحتى يروحو على قبرو ويعملو هيك وهيك بقبرو
بس انا مافيني احكي شي
وماصدقت الله بعتلي واحد درويش متلك يحمل عني هالحمل
وهيك صوت ديبو عم يلعلع لعلة بالحواري
والناس فاقت وبلشت تنتشر بالشوارع
وإسمع صريخ النسوان والقتل والضرب
والطلاق
وابو خليل بصوتو العالي بقلها لحمة جمل عم آكل لكن يابنت ال ....
ولك طالق
وهالمسكين المريض بهداك المرض أجيتو الجلطة وتيسر
وأبو حازم بقوص مرتو وصاحب المخفر
وحكاوي كتير صارت بالحارة
وديبو ولا هو هون
عم يكمل سرد قصصو
\\
وياما صبيان الحارة عندهم اسرار
بس ديبو حظو معتر
خرب الدنيا هالمسكين من دون مايعرف شو عم يساوي
ماضلت وحدة بالحارة على زمة زوجها
ولاضل واحد بيحكي مع جارو
وصارت جرائم قتل
إيه هالدنيا مليانة حكاوي واسرار وكل حارة فيها هيك واكتر
وكل بيت فيه سر وحكاية
والسلام عليكم ورحمة الله
بشوفكم على خير إن شاء الله وتعالى