كان ياما كان

[Nadine]

كلكم بتذكرو ا المطلقات الأربعة
مفيدة , سعيدة ,رغيدة , وجيدة
هالأربعة متل كل سنة ومتل مابتعرفوا بقضوا رمضان كللو سوا وعلى طق حنك وحكي ولعي
وهاد رمضان إجتمعوا عند الكبيرة فيهم وجيدة
وبلشو يحضروا إفطار
ورح نشوف شو قصتهم هي السنة

اول يوم مجتمعين بأرض الديار عند وجيدة وعم يجهزو طعام الإفطار
وجيدة بتوقف وبتصرخ على شللتها وبتقول :
يالله يانسوان خلصونا عجلوا شوي باقي للفطور ساعة بس
إنت مفيدة أوعك متل هديك السنة تنسي الملح للتبولة
وأنت ياسعيدة بلا لعي خلصينا
وأنت يا رغيدة إقطفيلك شوية ياسمين وإشلحيهم بالبحرة
وبلشو هالنسوان طبخ ونفخ
ومدوا حصيرة على أرض الديار جنب نافورة المي وصفوا هالصحون صف
وكانت الاكلة الرئيسية اليوم شاكرية ورز من تحت إدين أختكم سعيدة
على صحن كبة نية على جاط شوربة
وفتوش على جاط تسقية
ويخرب بيتهم شو بدللو حالهم هالنسوان الأربعة وبحبو بطونهم
ويلي فالقني ياجماعة إنو بياكلو ووين بروح هالأكل مابينصحوا
ماعلينا خلونا بالمفيد
إجتمعو حول هالسفرة وناطرين فرج الله وضرب المدفع
وكل وحدة منهم حاطة إيدها على خدها وزعلانة أبصر شو صاير معهم هي السنة
وياعيني عاملين أطيب الأكلات بس عينهم مو بالاكل وربي يشهد على كلامي
طلعت فيهم وجيدة هيك وقللتهم شو ياصبايا إفردوها
ولسا لسا مانطقت الكلمة وكان المدفغ بيضرب وببلشو أكل
لو زتيت الإبرة بتسمع رنتها
أي سيدي بتسمع رنتها وطنتها كمان
مافي غير قرقعة الصحون أبصر ياجماعة شو صاير معهم
ماعلينا خلونا بالمفيد هلء
بيخلصو اكل هالصبايا وبقوموا بللموا هالأكلات
بلا طول سيرة بيقعدوا وبجهزوا هالأراكيل وإبريق عرق السوس
وبتوقف هيك وجيدة وبتقول شو رح تبقو هيك ساكتين
ماتحكو شبكم شو صاير معكم
بتنط مفيدة وبتقول :

السنة الماضية طلقنا من زواجنا
يالله ياصبايا مين بدها تبلش تحكيلنا شو صار معها بالسنة يلي راحت
بلا طول سيرة بيوقع الاختيار على أختكم مفيدة
وبتركز هالأركيلة وبتمسح دموعها من على خدها وبتقول :
\\\
اوف اوف اوف
معقول صارت الساعة عشرة
لازم روح
بكرا بكملكم القصة وبتعرفو شو صار مع مفيدة الغالية

[ali hazim]

السلام عليكم ورحمة الله وبركاته
قصص رائعة أختنا الكريمة
الله يستر من يلي جاي...............................

[السنونو]

بصراحه تقولي كلمتين وتفلي بهيدي الطريقه وماتطفي القصه يعني مابقى بدي علق

[Nadine]

طولنا عليكم بس انشغلنا بهل الكم يوم,
مارح طول عليكم رح بلش بالحكاية

قعدت أختنا بالله مفيدة
وسكبولها كاسة العرق سوس وحطت نبريج الأركيلة بتمها
الله لايحطلكم قلب وبلشت تحكي وتقر
وقالت :
انا قصتي ياعيني بتبكي الحجر
لك خير والله نغوشتي قلبنا نغوشة
احكيلنا شو صاير معك
هاد ياستاتي متل مابتعرفو أنا كنت وحدة مطلقة
ونزلني زوجي الجديد يقبر قلبي على ضرة
أي وشو عليه يعني وإذا نزلت على ضرة
معيشني أحلى عيشة ومستتني ع الآخر
إيه وبعدين
مالكم غير بالمفيد ولا إلكم بالطويل
أنا وضرتي متل مابتعرفو مو صحاب
وأنا ياعيني عم ساوي المستحيل حتى إرضي زوجي
وماتركت شي وغير عملتو كرمال يرضى ويحبني أكتر
إي والله بس يجي من شغلو كنت أركض وإنقعلو رجليه بالمي ودلكلو ياهم
وهو كان ولا معبرني
كنت خلص تدليك تفريك من هون وهو يشوط الجاط برجلو ويقللي قومي ولي حطيلي اتعشى
وانا قللو فريرة إبن عمي فريرة
وأنا محتارة والله محيرني إذا بحبني ولا لاء
وإذا عاجبتو ولا لا
وأنا ماكنت نقص عليه شي
إي والله لو تشوفوني كيف كنت إرقص وإتخشلع شخلعة قدامو
ماعليكم غير بالمفيد
هادا ياستاتي
باليوم التاني من رمضان قللي حابب آكل سجقات مع صحن كبة نية
وأنا قلتلو تكرم عيونك إبن عمي
وفقت من الصبح وبلشت شغل بهالبيت
وجهزت السجقات وعملتهم متل حبل الغسيل
وخلصت شغل وقرب المغرب وركضت ركض
تحممت وتبودرت وتغندرت ومعطت حالي بالحمرا معط وإستنيتو لحتى يجي
مالكم غير بالقصير وقعدنا وبلشنا أكل وهو طارق راسو بالطنجرة ومبلش أكل
وأنا قللو طيب يازوجي مرتك هديك بتعملك هيك
بقللي أي يمكن أكتر
وانا قللو طيب بتعرف تطبخ متلي
وهو بقللي أي ويمكن أكتر
يبعتلي حمى على حظي ياصبايا
بعمرو ماهناني بشي
ولاخلاني انبسط بشي عملتو بحياتي
وهو يقبر قلبي قاعد على الأرض وحاطط الطنجرة بين رجليه
وبيمسك حبل السجق وبيسحب فيه على فرد سحبة
وبالأخير بيقعد وبيسند ضهرو ع الحيط وبقللي دخيل الله ماعاد فيني كمل
وانا بقللو معليش إبن عمي بكرا خليك نايم عندي وبتكملهم
لسى برميل الغسيل مليان سجق
وهو ولاهون بيرتمي على الأرض على ضهرو وببلش شخير
وانا بقعد بتفرج على حالي وبندب حظي
وبصير ببكي وبسلخ حالي كفوف
وانا بقوم بتفشفش بهالجليات
وهو بفيق على غفلة بدو يشرب مي وبقللي
شو رح تطبخيلنا بعد بكرا يامفيدة
يه يه يه يه يه
لك لسى ماهضم الأكلات
شو بدي أعمل ياصبايا
هي حظي وبختي وهيك الله كاتبلي
بس بدي اسمع منو كلمة بحبك يامفيدة أكتر من هديك الضرة
يبعتلها حمى إلهي
قولوا آمين ياصبايا
آمين يارب
قلتلو تكرم عيونك إبن عمي رح جهزلك برميل كوسا محشي بعد بكرا
قللي تقبري قلبي شو رضية
وأنا خطرت ببالي فكرة حتى إكتشف إذا بحبني ولا لا
صبولي كاسة عرق سوس
والله نشفتولي دمي
\\\
وهيك يأعضائنا الغاليين أختكم مفيدة عم تجهز حالها على أكلة محشي
بس أبصر شو خطر ببالها حتى تعرف إذا بحبها زوجها أم لا
بكرا منكفي ومنعرف شو عملت مفيدة بالكوسا محشي
يالله بكرا منكمل

[Mohammad]

لقد جعلتيني أشتاق لرمضان و لسهرات رمضان ....الله يبارك فيكم ..
شو أولك أكل المحاشي برمضان يعني بعطش م هيك ..
شكرا ً أخت نادين على تلك القصص ...بس أنا ما عم إإدر أصبر لعبكره يعني كل يوم في بكره....

[مايا]

السلام عليكم ورحمة الله وبركاته
يا سلام رجعت ايام قصص النسوان
وما تطولي علينا بكمالت القصة ناطرينك .

[Nadine]

اشكر الاخ محمد والاخت مايا, السنونو و ali hazim على المتابعة والتشجيع

[Nadine]

وين وصلنا امبارح
أي لعند مفيدة وطبخة الكوسا محشي
ورح نشوف اليوم شو قصة الكوسا محشي


يالله يامفيدة والله عيب عليكي نطرتي الناس
إعذروني ياصبايا أعصابي ماكنت بتتحمل
يالله خلصينا إنطقي هالجوهرة وعرفينا شو عملتي بالكوسا محشي
إي شبكم والله ماعملت شي بالكوسا محشي
فقت من الصبح قبل الشحادة وبنتها
وشطفت البيت وسقيت الزريعات
ونزلت لعند الخضرجي وجبت 15 كيلو كوسا و4 كيلو لحمة
وهيكل عظمي لخاروف لحتى حطلو ياه لزوجي تحت المحشي بحب يفصفصو قبل مايبلش بنقر المحشيات
يقبر قلبي بحب النقورة
ماعليكم ياصبايا بالطويل
نتعت برميل هالغسيل وشعلت بابور هالكاز وصار صوتو يلعلع لعلعة بالحارة
وصوت بابور الكاز تبعنا بيتحدى ارجل بابور بالحارة
ماعلينا
حشيت هالمحشيات وياحزركم شو عملت حتى اعرف إذا بحبني هالمضروب ولا لا
شو عملتي خبرينا نطفتي قلبنا ريتها تضرب هالأكلة
أي يابنات طولوا بالكم
هاد ياصبايا جبت ليرة عثملي وحطيتها بوحدة من هالمحشيات
أي
شو أي حطيتها بمحشية من هالمحشيات
فهمنا وليش حطيتها
إي حتى أعرف إذا زوجي بحبني ولا مابحبني
خلصت حشي
وصفيت الهيكل العظمي تبع الخاروف بسفل البرميل
وحطيت هالمحشيات فوقهم حتى يسقسقو سقسقة
زوجي بحب كلشي مسقسق وكان يدلعني ويقلني يامسقسقة إنت
وهيك ضلو يغلو حتى قبل المغرب
ركضت وتحممت وتغندرت وبتودرت ومعطت حالي بالحمرة معط
وشرف زوجي قبل الفطور بخمش قايق
ودغري ركض على برميل المحشي وضمو كأنو عم يضم ولد من ولادو
وصار يبوس فيه
ولا كأنو شايفني
جريت برميل المحشي وشحطتو شحط لعند السفرة وقعدنا
ولي عليكي شطحتيه كللو
إي شحطتو وشو بدي ساوي لكن
ضرب المدفع
وزوجي قعد وحط هالرميل قدامو بين رجليه
وانا قللو تقبر قلبي ياالله بلش نقورة
والله ياصبايا وإبن عمي ماكذب خبر
بلش هجوم بدون وعي
وصار يمسك هالمحشية ويظلطها زلط
وأول محشية قلت بحبني
طيب خبرينا ليش حطيتي الليرة
إي جايتكم بالحكي ريتها إيدي إنكسرت ولاحطيتها
وكل مايظلط وحدة وانا قول بحبني والبعدها مابحني
ولي على حظك يامفيدة سلخ نص البرميل وماطلعت الليرة لسى
وهالرجال ماعاد فينو بلش كرشو بنتفخ
وكل مابدو يقلب على قفاه وينام متل عادتو
أنا قللو لا إبن عمي تقبرني على مهلك شوي والله ماحلك تشبع
كمل إبن عمي كمل
وهالزلمة ماكذب خبر سفق تلاتة كيلو تانين
وأنا على كلمة
بحبني
مابحبني
بحبني
مابحبني
حتى قلتلو والله بدك تاكل من ايدي هالمحشية
وأنا عم قول يارب تطلع فيها الليرة
ظلطها وقلت بحبني والرجال غص
هو غص من هون وأنا نطيت من هون وقلت بحبني يقبر قلبي والله بحبني
وهالرجال طلع فيني هيك ومانو عم ياخد نفس
وانا عم نط وارقص بارض الديار
وماشفت هالرجال غير بيحمر وشو وبينفصو عيونو
وبينزل راسو ببرميل المحشي
ولي عليكي يامفيدة على هالعملة
وأانا راحت السكرة إجت الفكرة وركضت عليه
وبلشت دق على ضهرو بس ياعيني هو ماعطس
وأنا بلشت أصرخ وولول بالحارة
إلتموا أهل الحارة
وعطاكم عمرو وترملت

الفاتتحة ياصبايا عن روحو الطاهرة

الله يرحمو الرحمن الرحيم
ويرحم أمواتكم يارب
صبولي كاسة عرق سوس والله نشف دمي

وهيك ياعيوني منكون عرفنا قصة أختنا مفيدة
وكيف ترملت
ويخرب بيتها على هالعملة
وهلء بترككم بأمان الله وحفظو وأوعكم يانسوان تقلدو مفيدة حتى تعرفو ا إذا بحبكم زوجكم ولا لا

[مايا]

السلام عليكم ورحمة الله وبركاته
ههههههههههههههه
شو هالمفيدة هي هههههه
تسلمي اخت نادين ولا تطولي علينا .

[Nadine]

بسم الله الرحمن الرحيم
والصلاة والسلام على سيدنا محمد
أشرف وأطهر المرسلين
قولو آمين

واليوم بدنا نعرف قصة سعيدة وشو عملت بزوجها المعتر
إلهي يخليلكم نسوانكم ياحق
ولاتفرق راسين عن بعض
بس شو حظها معتر هالسعيدة
هلئ رح نشوف هالشللة الحلوة شو بدهم يفطروا اليوم
حاكم هالنسوان بحبو ضرسن كتير
مالكن غير بالمفيد
أجتمعو هالمساكين عند مفيدة
وبلشو يحضَرو فطور اليوم
واليوم مابعرف نفسهم مفتوحة على الاكل ليش
نزلو من على بكرة الصبح على السوق
وماخللو شي الا وماجابوه
دخلو على المطبخ
نطت مجيدة وقالت انا رح جهز الشيش برك
ونطت مفيدة وقالت أنا رح جهز بابا غنوج - وفتوش -
وصلطة زيتون-وصحن صلطة للي بتحب
وبتنط سعيدة بتقول
أنا رح جهز القطايف لأنو جوزي أبو خلقة ناشفة بحب ياكل
قطايف من تحت دياتي
وهيك بلشو هالنسوان نطوطة بالمطبخ وبلشت الروايح الحلوة تفوح
المهم مالكم غير بالمفيد المختصر
خلصو هالمطلقات طبخ ونفخ
وشطفو ارض الديار بالمي وسقو الياسمينة ورشوها بالمي
وبلشت ريحة الياسمين تفوح بارض الديار والنارنج ياعيني عليه
ومدو الحصيرة تحت النارنجة
وحطو الاكل والذي منو
وكل وحدة قعدت وحطت إيدها على خدها وصفنو بالسفرة
ولي عليهم شو منحوسين هالمساكين
والله قلبي وجعني علين
وهالأرامل قاعدين وناطرين المدفع
ومافي غير صوت العصافير عم تودع النهار
وهوووووووووووووووووووووووب
بيضرب المدفع
كل وحدة تمها بيوصل لدنيها من الفرح بالمدفع
وبفشو خلقن بالاكل
أي والله يامحترمين كأنو اول مرة بشوفو فيها أكل
ماعلينا
بيخلصو أكل وبتقوم مفيدة بتجلي الجليات
وسعيدة بتلم السفرة وبترشرش مي بأرض الديار
ووجيدة بتنزل السطل على الجب يعني بير المي
وبتعبي مي باردة بوظ
وبتغسل جاط عنب
الاراكيل والقطايف بكونو جهزوا
وبيقعدو بقولو يالله سوسو يعني سعيدة
خلصينا بدنا نعرف قصتك
بتقول سعيدة اي مو تكرم عينكم ياصبايا
والله رح احكيلكن كلشي

ريتني إضرب على حظي المعتر هديك السنة طلاق وهلء ؟
رح أحكليكن ياصبايا

----
هاد ياجماعة زوجي خلقتو ناشفة ومابيضحك لرغيف السخن
إي
يعني أنا ياعيني بقعد طول السهرة وبحاول ضحكو وهو بقللي سدي بوزك
بحاول احكيلو نكتة وهو بقللي بايخة متلك
شو أعمل بحالي مابعرف
تصورو الله وكيلكن بيوم من الأيام فقت من صلاة الصبح وبلشت شغل بالبيت
وجهزت الإفطار وتحمت وتغندرت وتبودرت ومعطت حالي بالحمرة معط
قلت يامرة حقك تضحكي وتفرفشي متلك متل كل هالنسوان وقلت والله حابة أرقص
والله ياصبايا إجا زوجي قبل المغرب لبين ماغسل إديه كان ضرب المدفع
فطرنا وشربنا عرق سوس وياعين وياليل
لميت هالاكل وجليت الجليات وحطيت جاط الفواكة وهو تصدر وقعد وضرب بوز
أما أنا بسرعة أجيت وربطت شال على خصري
وبلشت هز وخلع قدامو
وهو فنجر عيونو فيني وأنا ولا كأني شايفتو
صرت هز وأخلع وأبرم وأفتل وأتفتل
وكل ما طلع فيني فيني هز أكتر وقول هلء بيضحك
مابشوفو الله يعزكم غير بيسفقني بالشحاطة على بوزي
وبمدني فلق بورم رجلي توريم وبشقلي كلشي عندي تياب للهز والخلع
(ولي عليه شو قوي)
وانا ياعيني مابعرف شو بدي ساوي
إنكسر خاطري
وبقيت قالبة خلقتي
حتى هيك بيوم من الأيام
فقت قريب الضهر قلت والله لدللو سبع دلالات اليوم وبدي إعملو كبة
كبة نية ومقلية وبالصينية كمان
عملت الأكل وجهزت جاط هالفتوش وكسرت شوية تلج وحطيتهم بإبريق العرق سوس
وحطينا هالبطيخة بالبحرة وقمت بسرعة البرق تحممت ولبست وتلبست وتغندرت
وتبودرت ومعط حالي بالحمرة معط
إي وبعدين
بعدين يقبر قلبي إجا وضرب الطوب وضرب البوز كمان وقعدنا على الفطور وأكلنا أكل يالطيف
وغبينا عرق سوس حتى مافينا
إي وبعدين
بعيدين قلتلو سيدي وتاج راسي قوم بدل أواعيك ولبوس الجلابية الجديدة
قللي هاتيها ( بنفسية ناشفة )
مالكم بالطويل
أخد هاالجلابية الزلمة ولبسها ودغري ركض وتلقح بالفرشة
وأنا قلت بقلبي والله لخليك تضحك غصب عنك وعن كل عيلتك
ورح إرقص وهز أخلع حتى إنخلع خلع
رح فرجيك يا إبن عمي كيف رح يكون الهز منيح
تلقح هالرجال من هون وأنا ركضت ولبست تياب الخلع والشخلعة
بس لبست فوقهم جلبابي
وركضت على أرض الديار وجبت جرة صغيرة حطيت فيها فشتوكة صغيرة
شووووووو
لك أي فشتوكة يعني فارة صغيرة
غسلتها وحممتها وعطرتها
يخرب بيتك شو عملتي فيها
أي شبكم عصبتو علي
والله ماني حكيانة لشوف لبكرا
صبولي كاسة ضراب السخن
ريتني إضرب على حظي


إي نعم هيك عملت سعيدة
وياهل ترى شو بدها تعمل بالفارة الصغيرة
ولبكرا بترككم بحفظ الله ورعايتو

[Mohammad]

أوف أوف أوف فاره شو بدى تعمل بالفاره ...هل مره رح توكل أتلى مرتبه الله وكيلك ...تنشوف أكيد عبكره م هيك ...ناطرينك ها و شكرا ً

[nana]

إيمتا بوكراااااااااااا يعني يالله ناطرينيك

[Nadine]

اليوم معزومين كلنا عند سعيدة على أكلة شيش برك
اي نعم شيش برك
وعزيمة معتبرة
ورح نشوف هلئ شو قصة الفارة
اي نعم شو قصة الفارة
أي شبكم لعيت نفسكم
والله سعيدة نضيفة حرام تظلموها
بس هي كانت محتاجة الفارة لغرض في نفس يعقوب
وهلء رح نشوف شو كان بدها بالفارة


يالله ياسعيدة خلصينا إحكيلنا شو كان بدك تعملي باالفارة
والله شغلة بتمخول فارة يامنظومة فارة

إي شبكم طولو بالكم علي شوي خلوني آخد نفس والله متخومة من الأكل
أي ياجماعة جبت هالفشتوكة وحممتها وعطرتها وزهزهتها زهزهة
وحطيتها بالجرة
وزوجي متل عادتو ضرب بوز وتلقح بالفرشة وأنا متل عادتي ومتلي متل كل هالنسوان
حابة إرقص وإترقوص
هو نام بالفرشة من هون وانا جبت هالفارة وحطيتها بعبي
وجيت لجنبو ع الفرشة ونمت جنبو
هو غمض عيونو وأنا مسكت هالفارة ودحشتها تحت جلابيتو
وصارت هالفارة تبحت بحت
وزوجي بلش ضحك
وقللي ولي شو هاد
وانا متل سيخ النار شلحت جلبابي وبلشت هز وخلع
والله ياستاتي هو يضحك وانا عم هز ويقللي يحرق حريبشك ياسعيدة شو هاد
لتكوني كنت رقاصة بزمانك ولي والله لموتك وألعن أبو هالخلفة
وأنا قللو روق إبن عمي روق
إنو يلي قاهرني وهو عم يضحك عم يقللي ولي
هو يقول ولي وانا هز وقللو بس إنت فرجيني سنانك تقبر قلبي
والله وأنا عم هز وهو قلب على ضهرو من الضحك
بتروح هالفارة يخرب بيتها بتطلع من تحت الجلابية وهوب
بتنط جوا تمو
وبتفوت وبتطحش
ولي عليكي جوات تمو
وهالزلمة ضحكو صار صراخ
وأنا من خوفي بقيت عم هز
وهالفارة صارت جوا بطنو وبلشت تنطوط جوا
قمت رفستها برجلي وهالرجال قللي ولي عم ترفسيني والله لألعن أبو----
قلتلو تقبر قلبي والله ماقصدي وبلشت رفس
ويقللي لك شو عم تساوي وأنا قللو بعدين بتعرف ابن عمي بعدين
بقللي ولي والله لأخرب بيت أبوكي
بقللو إبن عمي والله مو قصدي تقبر قلبي
وهالرجال ياعيني صراخو وصل لآخر الحارة
بتروح الفارة بتوقف على باب تمو بقوم بسفقها بالشحاطة الله يعزكم علىبوزو
بترجع برجوع لجوا
وهالرجال بطلع فيني هيك وعيونو بينفصو وببطل ينطق
وأنا بتيبس بأرضي تيبيس وببلش صراخ
وبيجو أهل الحارة بيلتمو
وياعيني بيعطيكم عمرو بأرضو
الله لايعطيكي العافية ولك هي عملة
هي بختي وحظي شو ساوي يعني
الفاتحة ياصبايا عن روحو الطاهرة

[ali hazim]

السلام عليكم ورحمة الله وبركاته
الله يعطيكي العافية () أخت نادين .والله لا يعطيا العافية لسعيدة على هالعملة .
ناطرينك .........................................