رح ألك عكم شغلة إذا بتطبؤن بتتغير الغرفة 360 درجة ومنا مكلفة شوية دهان وكم ركاية
الشغلة الوحيدة المأبولة بالغرفة هيه الكرسي الأحمر ولونو مابو شي
برأيي إنو تستعمل الألوان الأحمر والأسود والأبيض والرصاصي الفاتح
الخزانه البنية والزاويه اذا بتدهنن أبيض بيكون أحلى وفيك إنتا تدهنن بنفسك كل اللي بتحتاجو مادة بتحطا عالخشب بيأشر اللون بترجع بتحفا شوية وبتدهنا أبيض منا صعبة أبدا
أما التختين واحد بتعملو تخت وواحد عملو صوفة اذا جا لعندك حدا بيؤعد عليا
وحطلك مفرش عالتخت يا لونو أسود وأبيض أو أحمر وأسود وكم ركاية
بالنسبة للصوفة جيب من هالشراشف السماك البيض اللي بيجو محفورين بنأشة منن وفين فؤشا علي وحط عليا ركايات بأحجام مختلفة من الألوان اللي ذكرتن وسندا بالحيط
والبرداية شيلا وحط واحدة عأد الشباك وبدك سطل دهان تدهن الغرفة أبيض واذا بدك تتفنن عميل حيط مألم أسود وأبيض أو رصاصي وأبيض
الكراسي البلاستك هنه والزهر بدن شيل
ومتل ما ألت بدك مكتبة تضب هالزبالة فيا فيك تفصل واحدة من خشب مضغوط بتكون رخيصة وجيب سلال حط السيديات وهالأضايا فيا ورتبا بما إنك عم تشتغل للموقع بيحئلك يفصلولك واحدة عحسابن
والطاولة اذا مضطر عليا جيب وش نايلن من هاد الكارو يكون من بعض الألوان اللي ذكرتا
بدو الشغل كم يوم بس النتيجة أكيد مبهرة