عوكر المدوكر

**حُسَينْ ... !** · 05-09-2007, 06:44 AM

الله يعطيك الف عافية يا اخ جابر
مشكور كتير ع هل ؤصص الحلوة عنجد متل ما أل عوكر بتشيل الهم عن الألب

**جابر دملوك** · 05-09-2007, 01:19 PM

جابر دملوك يدعو جبار السموات و الأرض أن يجبر بخاطركم.
ملاحظة : فإن قصص عوكر مثل الكاميرا الخفية.
من يدري قد تكون أنت بطل القصة القادمة.
غداً نلتقي بإذن الله تعالى مع :
(عوكر معتر بس خواجه إبن خواجه)

**من هنا و هناك** · 05-09-2007, 08:01 PM

يسلمو يا اخ جابر قصة عوكر و الزمور فرطتني من الضحك و خلت دموعي تنزل
نيالهم عليك و على قصصك المهضومة

**Nader 3:16** · 06-09-2007, 01:48 AM

وين غبت يا عم جابر ناطرين القصص الباقية!!!!

و الله عم تتعب معنا ....بس نحنا بالمقابل عم نتعب من الضحك كمان!!!!!

**جابر دملوك** · 06-09-2007, 03:41 AM

(13)
عوكر معتر بس خواجه إبن خواجه.
راح عوكر ت يشتغل بالسعودية.
الشركة هلي عم يشتغل فيا بعتتن يشتغلوا ب (مكة المكرمة).
و كلكن بتعرفوا إنو مكة كُلا حرم و ممنوع يفوت علَيا غير المسلمين.
يقول الله تبارك و تعالى :
(يا أيها الذين آمنوا إنما المشركون نجس فلا يقربوا المسجد الحرام بعد عامهم هذا ..... (التوبة:28))
عوكر مسلم إبن مسلم و صرلوا عم يشتغل ب مكة كَومِة.
و بيوم من الإيام مطََوِِع من جمعية الأمر بالمعروف و النهي عن المنكر بيخسبو مسيحي.
بيأرب المطوع من عوكر و بيسألو : خواجه إنت ؟
بينفش عوكر ريشو و مانو عارف إنو
(خواجه = غير مسلم و بالتحديد مسيحي)
و بيجاوبو : خواجه إبن خواجه.
و ما بيلحق عوكر يخلص لفظ (جه) من كلمة (خواجه)
إلا و جه كف ع وشو برمو متل الطاحون.
و إجتمعوا علي كزا واحد ... و وين بيوجعك ... نهنهوا.
و لا واحد منن فطنلو يسألو عن إسمو.
صاروا يتآتلوا ع أتلو.
و بعد ما فاء من الإنعاش عرفوا إنو مسلم إبن مسلم.
و هو بدورو عرف إنو مانو خواجه إبن خواجه.

**دوكر** · 06-09-2007, 06:26 AM

الله يبارك فيك
ؤصة حلوة

**جابر دملوك** · 06-09-2007, 01:20 PM

(14)
عوكر و أديب الأَص.
كلكن بتعرفوا ماركة ال adidas.
بيوم من الإيام إبن عم عوكر شافو طالع ع السلم ولابس سكب جديد ألو :
" و لك شو هالسكب الحلو يا عوكر ... ش نوعو ؟ "
" نوعو adidas " جاوبو عوكر.
ألو : بس غريبة شوية إشارتو.
ال adidas لو 3 شحطات
و سكبك لو 4 شحطات
و لك فرجيني لشوف إسم الماركة.
و لك يا عوكر سكبك نوعو :
" أديب الأص adibas مانو adidas "
راح عوكر عم يبكي لعند بو و ألو :
" دحكت عليي ... جايبلي سكب تئليد ... مادي هو بآ "
ألو بو : " من ألك هيكه ؟ "
" إبن عمي " جاوبو عوكر.
وأتل بو عوكر شاف إبن خو ألو :
" يلعن أبو عرضك منين طلعتلنا بهل الأصه هدي
ألله وكيلك ناتع السكب من بيروت و جايبو"

**دوكر** · 06-09-2007, 02:13 PM

هع هع هع...
مشكور ؤصة حلوة

**الزاهر** · 06-09-2007, 04:06 PM

يا زلمة......ما بئا لي ألب أترك موضوعك لفترة طويلة......بيجي دوز الضحك تئيييييييييييييل......ما بيعاد فيني استحمل.......!!!!!!!

لووووووووووووووووووول!!!!!

**جابر دملوك** · 07-09-2007, 04:00 AM

(15)
الإستاذ عوكر و الآلة الحاسبة.
الإستاذ عوكر معلم ثانوي بيعلم فيزيك بالإصم التاني.
كفو للإستاذ عوكر و صابيعو كبار (ما شاء الله)
بيوم من إيام (سنة 1978) تلميذ من تلاميذو إسمو عنكوش كان جايب معو آلة حاسبة ع الصف.
الإستاذ عوكر شاف عنكوش عم يفئس بالآلة آم عيطلو و ألو :
عنكوش تعا فرجينا شمَعَك.
آم عنكوش ِرِكد رَكِد لعند الإستاذ و عطي الآلة.
بلش الإستاذ عوكر يفئس ب هل الآلة
يضرب و يئصم و يجمع و يطرح
و sin من هون و cos من هونيك و log من فوء
و آخد مجدو طالع نازل.
و فجأة بيعصبلك تعصيبة ل بو دينا و ما بيعاود يتهدا.
و بيعيط ل عنكوش و بيؤلو :
تعا خود آلتك المعفنة ... لأنك الظاهر جايبه من الباله.
عنكوش بيصَفرِن ... فزع ع حالو و فزع ع الآلة ... لها معو يومين و هادا التالت ... بيصير نزعا الإستاذ.
" شبها الآلة ؟ " بيسأل عنكوش.
" آلتك خرفانة ... أو فاضية بطاريتا " بيجاوبو الإستاذ عوكر.
" الآلة جديدة خلنج ... و البطارية فُرتُؤ نَيْلُن ... يا إستاذ " بيؤلو عنكوش.
" و ليش ما طَلْعِت و لا جواب صح لِكَن ؟ " سألو الإستاذ عوكر.
" لش شفئست و ما طلع صح ؟ يا إستاذ " جاوبو عنكوش.
" ضربت و إصمت و جمعت و طرحت
و ما في شي ما فئستو حتى sin و cos جربتن
و لا جواب طلع صح أبدا " ألو الإستاذ عوكر.
" بدكياني جرب شي إدامك يا إستاذ ؟ " سألو عنكوش.
"عملي cos 60 لشوف لَكَن " ألو الإستاذ عوكر.
بيجربا عنكوش و بيفرجي الإستاذ عوكر الجواب.
" لك لو لاك لاك ... و لك و الله صح ... شعملت أنا غير شكل عنك ?"
سأل الإستاذ عوكر.
" هدي جربا إدامي يا إستاذ " ألو عنكوش.
حمل الإستاذ عوكر الآلة مرة تانية و ضرب cos 60 من دء و جديد
و الجواب طلع غلط
و ما لاحظ ع حالو شعمل
بس عنكوش كان حربوء عرف شعمل الإستاذ عوكر
و عرف لش طلع الجواب غلط.
عنكوش ألو للإستاذ عوكر :
"بؤلك يا إستاذ لش طلع الجواب معك غلط ... و ما بتؤتولني و لا بتزعل مني ؟ "
أَلُو : " أُوْل و عليك الأمان ما بؤطفك "
" يا إستاذ ... صابيعك كبار (ما شاء الله)
أصبع واحد بيغطي أربع خمس زرار
لأ و فوء هيكه و زيادة عم تستعمل الصابع الكبير
و منتظر يطلع معك جواب صح
آ منيح هلي ما أحترئت. "

**دوكر** · 07-09-2007, 10:43 AM

مشاء الله اسلوبك ب يجنن يا معلم جابر
الله يعطيك العافية

**جابر دملوك** · 07-09-2007, 01:10 PM

الله يعافينا و يعافيك و يرضى علينا و يرضى عليك يا رب.
ع فكرة : ما نك عوكر من هل العواكر المذكورة ؟
أنا كان لي الشرف إني كون عنكوش ... و تعوكرت بأصة من الأصص.

**جابر دملوك** · 08-09-2007, 03:06 AM

(16)
عوكر و ال Anonymous.
عوكر وطني و بيحب الأغاني الوطنية.
بيوم من الإيام وأتل كان عوكر عم يدرس ب أماركا راح يحضر حفلة ل (مرسيل خليفة)
ريع الحفلة كان تيبنوا مستشفى بالجنوب.
و الحفلة عبارة عن (غِناء ف تََبَرُع ف غِناء)
بعد ما خلص الحفل الغنائي الأول و جا وقت التبرع
مقدم الحفلة صار يذكر أسماء المتبرعين و المبلغ.
في بعض الناس ما حبوا تنذكر أسماؤن ف صار المزيع يؤل :
Anonymous
يعني مجهول و يذكر المبلغ.
هيكه يعني :
بو مالوش ----- 100$
anonymous $20
حنفوش ------ 80$
anonymous $30
شاكوش ------ 320$
anonymous $35
و هلم جر ... و عوكر والشله أعدين.
زبون العوافة عوكر أفندي إفتكر anonymous إسم شخص.
آم شآل : و لك يئطع عمرو شو زنكيل هالزلمة.
صحيح خَيِّر بس دِمو تئيل يدفعن بفرد مرة و يخلصنا بآ
حاجا عم يفرفطن و يمرضنا.

**دوكر** · 08-09-2007, 10:06 AM

هع هع هع....
و الله شغلة هل عوكر
بس عارف شغلة يا معلم جابر عن نسأ هل ؤصة صار معي بالأول
يعني الحمد الله مرأ ؤصة تعوكرت عن نسأ
مشكور و الله يبارك فيك .........
ناطرينك..

**Nader 3:16** · 08-09-2007, 12:41 PM

ههههههه مشكور يا عم جابر

كل ما ادخل عالمنتدى بفوت مباشرةً على موضوعك لأرى ان كان هناك من جديد!!!!

**الزاهر** · 08-09-2007, 03:06 PM

بالانتظار على قناة المنتدى........عوكر المدوكر.......في حلقة جديدة كل يومين!!!!

صار لازم نعمل للموضوع دعاية........لأن الكل عم يحكو فيه بالضيعة........صار مرجع!!!!

**جابر دملوك** · 08-09-2007, 11:36 PM

(17)
عوكر و المعزاية الضايعة.
بيوم من الإيام كان عوكر عم يلعب بالحُل مع رفؤتو.
و كان اللعب بأول كروم الزيتون.
الوقت صار أريب من المغرب و عوكر كان طاير مع الطايرين و خو ل عوكر كان طامم.
هو و رايح عوكر ل يتخبى بشي زيتونه بيشوف رجالين من الألمون و معن ِرجَّال غريب.
الرِجَّال الغريب كان راعي من الرعيان أياهن ضايعتلو معزاية حبلة و ع وشك إنا تخلف.
واحد من الألامنه سأل عوكر :
" شفتلك شي معزاية ب ها الصايح ... يا عمعوم ؟
" لا والله ما شفت شي ... ع كلٍ شلونا ؟ " ألو عوكر.
" لونا بُنَّي ... و في ببطنا سعسوع ... يمكن تكون لاطيتلا بشي أُرْنِه عم تخلف "
جابو الرِجَّال.
عوكر بينسى إنو عم يلعب بالحُل و ما بيلائي حالو إلا و مشي معن و صار عم يأيبل ع المعزاية.
فريئ التدوير بيبعد عن المحل هلي كان عوكر عم يلعب في بالحُل.
خو لعوكر راح يدور ع الطايرين لَأَط منن كم واحد و الباقيين تسملحوا و عوكر منو مبينلو أثر.
الكل تشوشوا علي و صاروا يعيطولوا.
و لا حياة لمن تنادي ... لأنو عوكر طلع ع الجبل و نزل ع الوادي.
خافوا ما يؤم هادر علي شي حيط.
أو شاكك شي عود زيتون براسو.
أو وائع من راس الشجرة.
دَلُّن يدوروا شي ساعة و ما حضيوا في.
لأنو عوكر صار بدنيا تانية و نسي الحل و هلي عم يلعبوا بالحل.
صار عوكر تَحَرِي مِعْزِه.
خو لعوكر راح ع بيتن و خبر إهلو و كل واحد من الأرطة عمل متلو و إنتشر الخبر بالضيعة.
نُص الضيعة صارت بالبرية عم تدور ع عوكر الضايع.
و عوكر الضايع عم يدور ع المعزاية الضايعة.
و حُلا بآ.
هادا لي طلع بالخرطوش.
و هاداك لي طلع بالدك.
و شي حامل عصا طخينة.
و البرية إنتلت عالم كبار و ظغار صبيان و بنات.
و كُلُن عم يعيطوا " عوكااااار ... يا عوكااااار ... و ينك يا عوكااااار "
و عوكر مانو سامع شي لأنو بعيد كتير
عم يجمع خيوط و بصمات ودعسات.
وأتل أنتشرت هل العالم بالبرية و صاروا أريبين من عوكر و سمع ناس عم يعيطولو.
تذكر إنو من شي 3 ساعات كان عم يلعب بالحُل.
" و لك أحِنِي هَونَيييييي " جاوبن عوكر.
" و شعم تعمل عندك ؟ " آلولو.
" عما دور ع المعزاية " ألون عوكر.
" أيا معزاية ؟ " سألوا.
" المعزاية الضايعة " ألون.
" و لأيتا ؟ " سألوا.
ألون : " لاء إسا ما لأيناها "
آلولوأ : " الله يئطع عمرك و عمر هل المعزاية "
" إنبح صوتنا و تكسروا إجرينا أحنا و عم ندور عليك "
" يا ريتك ضعت معا عن جد و ريحتنا "

**دوكر** · 09-09-2007, 01:37 AM

الله يجزيك الخير مشكور يا معلم جابر .....
بس ما تكون انتا لي تعوكرت بي هل ؤصة....
هع هع هع....
والله حلوين ؤصصك

**جابر دملوك** · 09-09-2007, 03:11 AM

(18)
عوكر و السُمْنَات.
إستعار عوكر بارودة و جناد خرطوش و راح ع الحريشة ت يتصيد سُمُن.
أوص عوكر الجناد كلو و ما وئع حتى بو ريشة.
هُوا و راجع ع البيت إبن عمو لعوكر شافو حامل بارودة ف إستغرب و ألو :
" عوكر عم يأوص سمن ... أكيد إربت القيامة ... مأوص شي ؟ "
جاوبو عوكر : " و لا تزفرت "
و سأل إبن عمو : " لش مأوص شي أنت ؟ "
اَلو إبن عمو : " أوصت 14 سمنة "
ألو عوكر : " بتبيعن ؟ "
" لش لآء ... إذا بتعطيني فين سعر منيح " ألو إبن عمو.
المهم عطي هنه و نبه علي عوكر إنو ما يجيب سيرة إدام حدا أبدا.
و ألو : " أنا بعطيك حَؤن بس أطلع ع الضيعة "
راح عوكر ع بَيتُن حامل هل المشكاك مليان سمن ع بنا إنو هو مأوصن.
أمو و إخواتو بلشوا يحَوطُوا.
بهاك الليلة إنشغل عوكر و ما في طلع ع الضيعة و نسي إنو مواعد إبن عمو إنو بدو يعطي حق السمامن.
راح إبن عمو ع الضيعة و بحبش الأهاوي كلن عؤش و عؤش و ما كان يحضى بعوكر حمل حالو و رجع ع البيت.
تاني يوم من ع بكرة الصبح بعت خو الظغير ع بيت عمو ت يجيبلو حق السمنات.
وأتل طََبِِل الظغير ع الباب و فتحولوا ألون :
" أخي باعتني ت جبلو حق السمنات هلي إشتراهن عوكر منو مبارح "

**دوكر** · 09-09-2007, 06:33 AM

هع هع هع...
هدي جرصا...يأطع خملو ...
الله يعطيك العافية

**nana** · 10-09-2007, 10:27 AM

شكرا كتيييييييييييييييييير لمواضيعك وياريت ما طول علينا بي قصصك

**Nader 3:16** · 10-09-2007, 04:21 PM

ولك شو هادا ......يلا بسرعة يا عم جابر!!! الله يخليك

لانطيق الانتظار!!!!!

**جابر دملوك** · 10-09-2007, 04:59 PM

(19)
عوكر و البِسِكلِة.
عوكر كان عايش ب أماركه و بيوم من الإيام إستعار بسكلة رفيقو عنبر هِلِي ساكن معو.
و بسكلة عنبر لها أفل و دولابا الإدماني بينشال بفتحت إيد بدون مفتاح عزآت.
بس عوكر ما بيعرف ها الشي.
أبل ما يروح عوكر عالبسكلة عِطي عنبر مفتاح الأفل و ألو :
" لا تنسى تأفلا "
حمل حالو عوكر عهالبسكلة و راح تيجيب غرض.
وصل عوكر و أبل ما يفوت عالمحل عمل بتوصيات صاحب البسكلة عنبر ف أفل البسكلة من الأصطر بشجرة و فات و هو مطمن بالو عالعُهدة.
10 - 15 دقيقة و بيطلع عوكر حامل الغرض و مهيي مفتاح الأفل و مانو عارف شصار بغيابو.
" إِلْعَمَه وينو الدولاب ... ولك ون طار ... شل المصيبة الزرقة هادي "
صار عوكر يترغل بصوت واطي و يطَّلع هيك و هيك.
حمل عوكر الباقي من البسكلة و حمل الغرض ركب بالباص و راح ع البيت.
وأتل وصل عوكر عالبيت و حكي الأصة لعنبر ألو :
" مانك عارف إنو الدولاب بينشال بسرعة "
جاوبو عوكر : " و لا كنت عم فكر بهالموضوع أبدا "
المهم عنبر ألو : " هلأ بروح بجِبلا دولاب من محل بساكل عتيؤه "
" لا و الله ما بي صير ... الحق عليي و أنا لازم إدفع حقو " جاوبو عوكر.
" طول بالك يا زلمه "
" ما بيصير أبدا "
" ما بتجيبو ... أنا لي بجيبو "
" حلفت ب الله و ما بتراجع "
المهم بعد هالمعركة إتفقوا إنن يروحوا يجيبوا الدولاب و عوكر يدفع حقو.
جابوا الدولاب. عوكر دفع حقو و طلع بالباص. و عنبر ركب عالبسكلة و لحقو عالبيت.
ع الطريق حن قلب عنبر ع عوكر و قرر إنو يشاركو بالبسكلة و يصير أيمتن ما عن ع بالو يركب عليا.
مرئت الإيام و صار شي عادي إنو البسكلة لعوكر و عنبر و مفتاح الأفل بالدرج هلي بدو يركب مشوار بياخدو وبس يرجع بيرجعو عالدرج.
بعد فترة شأل حالو عوكر و راح مشوار بعيد عهالبسكلة و جاع و عطش كتير.
ف أبل ما يفوت ياكل بِ ال Burger King أفل البسكلة من الأصطر كمان هل المرة ... بس عمل ضرب زكا ... فك الدولاب و فوتو معو عالمطعم.
وِئِف عوكر بالصف و طلب إكل و مانو حاسس سعم يصير برا.
عوكر أغا ... صحيح شأل الدولاب معو و ما بقى حدا فيي يسرقو.
بس طلع مأفل البسكلة ب شأفِت حديدة طولا شي متر و نص
و أرفع من أصطر شبكة الفولي
كانت البلدية ساندة شجرة فيي أبل ما تموت
و ماتت الشجرة و بقي الأصطر.
خَلِّص عوكر الوجبة السريعة و عبا مرة تانية الPEPSI بَلاش و طلع بإيد ال PEPSI و مفتاح الأفل و بإيد الدولاب المحروس.
ورقة المعلاء معو بس المعلاء طار.
تاري السِراء المسكين نأرء هو و عم يشؤل البسكلة وحدو ليمريؤه من الأصطر.
بقي الدولاب هلي عوكر دافع حقو و مفتاح الأفل بلا الأفل و صاحبو عنبر.
حمل عوكر الدولاب طلع بالباص و رجع عالبيت.
فات ع البيت هو و حامل الدولاب و أعد يشرح لعنبر و يؤلو :
" و لو شو هالدنيا هادي و لك بيسرؤ الكحل من العين "
بكل برودة أعصاب ألو عنبر : " أكيد ما بقى لازملك المفتاح "
ألو عوكر : " لاء ... بدك يا ؟ "
ألو عنبر : " لاء "
بس برأيي بما إنو الدولاب إنت لي دافع حقو و ما لي شي في
جبلك شي أضيب و إنزال كرجو فيي
وما بظن في داعي تأفلو ... بتاخدو معك ون ما رحت
و لا تنسى تنفخو كل ما نَفِّس.

**دوكر** · 10-09-2007, 06:22 PM

يا هلا بالمعلم جابر .........
يسلمو ع هل الؤصص الحلوة
يعطيك العافية

**عمار الفلو** · 11-09-2007, 10:57 AM

ههههههههههههههههههههه

**habouleh** · 11-09-2007, 12:12 PM

قصص كتير حلوة و الأحلى الأسلوب:d

**جابر دملوك** · 11-09-2007, 03:24 PM

(20)
عوكر و خو القاصر.
عوكر و خو التوم عندن محطة بانزين بيتناوبو ع الشغل فيا.
بيوم من الإيام وأتل كانت دورية الأخ إنسرؤ المصريات من الدرج.
جا دور عوكر و عرف بالأصة ف إتصل فوراً بالدرك.
وأتل جا المحقق جا معو دركي ألموني.
بلش المحقق يسأل عوكر عن ملابسات الجريمة لحتى يجمع الخيوط و يحط إيدو ع المجرم.
المحقق سأل عوكر :
"من كان موجود أو من كان من المفروض إنو يكون موجود بالمحطة وأتل نسرأؤ المصريات ؟"
إنتهز عوكر الفرصة و حب إنو يحكي " فصحى "
و هو طالع كحش من صف الخامس بعد ما خدم في تلات أربع سنين.
جاوبو عوكر : " بينما كان دور أخي (القاصر) بالمحطة ... "
وحب إنو يتابع حديثو إلا و بيآطعو الدركي الألموني و بيؤلو :
" عوكاااااار ... إنت عندك أخ قاصر ؟
رد علي عوكر و بالفصحى و آل : " القاصر أي الأقصر مني."

**دوكر** · 11-09-2007, 03:32 PM

يأطع خملو هل عوكرع هل فصحة هادي...
هع هع هع...
يسلمو يا اخي جابر

**جابر دملوك** · 12-09-2007, 12:03 PM

(21)
عوكر و الجزرة.
صلى عوكر العصر و إنضم لحلقة القرآن الكريم.
عوكر عندو مشكلة بحرفين "ج" و "ز" إذا جو تنينن بكلمة واحدة.
بينئلب حالو فوآني تحتاني و بيصير يلفظ "ج" "ز" و "ز" "ج".
و الأخ هلي عم يأرين بيعرف عوكر معرفة سطحية و ما بيعرف هالشي عنو.
بعد ما إري كم أخ جا دور عوكر تيبلش بسورة النازعات.
بلش عوكر بالسورة كل ما غلط يصلحلو الأخ المسؤل ف يظبط حالو و يكمل.
لحِد ما وصل للآية (13) ... " فإنما هي زَجْرَةٌ واحدة. "
آم إريا " .... جَزْرَةٌ واحدة "
ف ألو الأخ : " لاء يا أخي إطلع ب الآية مرة تانية و أراها من جديد "
عوكر رجع عاد الآية و إري ال " زجرة " " جزرة "
" يا أخي إطلع منيح ع هل الكلمة هجيا و إرجاع أراها " ألو الأخ.
عوكر هجا الكلمة مظبوط.
" حلو كتير ... يا الله أرا الآية هلأ لشوف " ألو الأخ.
رجع عوكر إري الآية و إري ال " زجرة " " جزرة "
" و لك يا حبيبي ما هلأ هجيناها مظبوط ... شبنا رجعنا نزعناها " ألو الأخ.
" ليك رُدْ ورايَي ( زجرة ) " ألو الأخ.
" زجرة " ألو عوكر.
" أهاه ... يا عيني عليك "
" هيكا بدي ياك تؤلا أنت و عم تؤرا الآية كُلا " ألو الأخ.
عوكر ألو : " رح حاول "
عوكر يؤرا الآية ب جزرة ... و الأخ يصلحلويه ب زجرة.
عوكر يؤرا ب جزرة ... و الأخ يصلح ب زجرة.
عوكرب جزرة ... و الأخ ب زجرة.
دلُن أكتر من 3 دقايق ع هالسيرة و ما كانت تنحل مع عوكر المشكلة.
و كل الموجودين فارطين من الدحك.
" يعني مُصِر إلحاحاً ع كلامك يا أخي ... و الله مشكلة " ألو الأخ.
" يا عمي و الله عارف إنو الجزر بيأوي النظر
بس بدي ياك تخففلي شوية من حضر Bugs Bunny
لحتى تنحل هال المشكلة و تصير بتعرف تؤرا الآية "

**wishes** · 12-09-2007, 12:09 PM

سامعة بهالقصة بس مع بنت مش مع شب
على كل حال مواضيعك و قصصك كلا حلوة
مشكور

**دوكر** · 12-09-2007, 12:17 PM

هع هع هع...
حلوة ...
يسلمو عنجد بتشيل الهم عن الألب

**جابر دملوك** · 12-09-2007, 12:38 PM

(22)
عوكر و الضبع.
مرة من المرات تنذكر و ما تنعاد ضربت هزة أرضية
بعد الصبح ب شويه الألمون من جملة المناطيئ هلي ضربتا.
كانت الضربة بَيْنَ بَيْن مانا أويه و مانا ضعيفة.
ف خافوا العالم ما تِلحَآ هزة تانية حملوا حالن و طلعوا صب الكروم بسرعة.
وئفولن شي نص ساعة.
و هنه و واءفين ما بيشوفوا إلا و ضبع راكد بسرعة صب الضيعة.
ما بيلتكش فيين و لا بيعبرن.
" العمه في ألبك لون رايح " آلوا الرجال.
و النسوان آلت : " تنكسر ع زعمك لون سارح ب النُزلة "
ما بيلحأ يبعد الضبع شوية إلا بيشوفوا عوكر نازل من الجبل.
تاري الضبع هربان من عوكر
ومانا فِرآنه معو الهزة الأرضية.

**جابر دملوك** · 12-09-2007, 01:13 PM

(23)
عوكر و فيلم "21 ساعة في ميونخ"
وأتل نزل فيلم "21 ساعة في ميونخ" هلي بيحكي أصة الفدائيين الفلسصينية هلي فاتوا ع المباني الرياضية الألمانية ب ميونخ و إحتجزوا الفريئ الإسرائلي المشارك ب الألعاب
قرر عوكر ينزل يحضرو و بلش يجهز حالو.
راح ع البيت رَكِب الضنجرة الكبيرة و بلش يسلوء بهل البيض.
فاتت أختو ع المطبخ و شافتو وائف جنب الغاز.
آلتلو : " شعم تطبخلنا بالضنجرة يا عوكر ؟ "
" ما عم أطبخلكن شي ... عم أسلق بيض لحالي " جاوبا.
" كل هادا بيض ؟ عازم الحارة ؟ " آلتلو.
" لآء يا زكية رايح أحضر فيلم (21 ساعة في ميونخ) بالسينما
ف عم حضر 21 بيضة مسلوقة كل ساعة باكل بيضة
ولا بدك ياني موت من الجوع هونيك
ما بيأديكي ما رح نام كل هل الوقت "
ألا عوكر.
آلتلو : " يا غشيم ... الأحداث إكلت 21 ساعة
بس الفيلم يا دَوْب يطلع ساعتين و نص 3 ساعات "
ألا : " هيكه لكن ؟ " آلتلو : " آ"
ف آم لف لفوفة إكلا و حمل حالو و راح.

**moustafa** · 12-09-2007, 02:45 PM

ههههههههههههههههه

**جابر دملوك** · 12-09-2007, 10:39 PM

الله يبارك فيكم جميعا و يبارك بجميع الأعضاء و الزوار
و ع راسن المشرفين الله يعطين العافية.
و إن شاء الله بيكون رمضان هالسنة
رحمة و مغفرة و عتق من النار
لكل الموحدين من أمة محمد علية الصلاة و السلام.

**جابر دملوك** · 12-09-2007, 10:54 PM

(24)
عوكر و البقاع.
طلع عوكر ع مخيم عباد الرحمن ب بعصفرين.
تاني يوم طَلِّعن العريف ع جبال الأربعين.
وأتل وصلوا لفوء ألن العريف :
" و من هون فينا نطل ع البقاع "
ع الحارك سألوا عوكر و آل :
" فيني إنزل إشتري من عندو ؟ "

**جابر دملوك** · 12-09-2007, 11:16 PM

(25)
عوكر و البزؤة.
عوكر و رفقاتو الأربعة وصلوا ع موقف الألمون بعد ما حضروا سينما بالبلد.
و كانت الدنيا صيفية و فطصة.
الشوفير هلي كان دورو ساعتا مشهور إنو بيبزيئ كتير من الشباك.
بيترؤلو شي 10 بزآت بالمشوار الواحد.
عوكر و الأرطة طلعوا طلب كامل.
و طلعت أعدِة عوكر ورا الشوفير مباشرةً.
رفقاتو لعوكر إتفأوا إنُن يعملوا مألب فيي و عوكر مانو حاسس عالطبخة.
هلي راكب ورا عاليمين طَلِع راسوا من الشباك و آل :
" خييييي ما أحلاها ... كأنك بالجُرد "
حب عوكر يعمل متلو و ب هل الوقت كان الشوفير عم يجوجل و يجمع البزؤة إلي هيه.
و ما لِحِيئ عوكر يطلع راسو من الشباك إلا و سطل مويه دافية و فيا سموخ بيجي ع صلعتو.

**nana** · 12-09-2007, 11:42 PM

you are the best

**دوكر** · 13-09-2007, 12:05 AM

هع هع هع ...
حلوين كتير...

**أبو رياض القلموني** · 13-09-2007, 12:26 PM

عوكر والمشمشات

عوكر شاري كيلين مشمش أم حسين وراجع عبيتن مبسوط...
بيفتح عوكر أول حبة بيلائية مدودة ..بيفتح التانية ....كمان مدودة !
التالتة .. كمان مدودة !!
بيطفي عوكر اللمبة ...وبياعد يكفي إكلو عرواء.....

**أبو رياض القلموني** · 13-09-2007, 02:14 PM

عوكر والدبوء

بالزمانااااااااآآآآآآآآآآآآااااااااااااااآآآآآآآآآ آآآآآآآآااااااااااااااااااااااااااات
من شي سنة , كان عوكر طالع عالصيد هو و رفآتو...
افترء عوكر ورفآتو عن بعضن ...هادا اللي لاحيء ععصفور...هادا اللي لاطي تحت اللوزة ...
عوكر حضي برف عصافير غاطط ....بلشلك فين بهالأويص ....أوص الأول ..ما طار الرف ,,
أوص التاني ..ما طار الرف ...دلاتو عوكر نازل فين بالأويص ..
رفآتو لعوكر سمعو الأويص فكروا في شي جبهة ...
ركدوا لعند عوكر ...لئيوا بالش أويص بهالعبوشة ,
عوكر يأوص العصفور ...آم يبرم ويدل معليء بالدبوء من إجري ...
صار عوكر يعيط لرفآتو ....ولك ركدوا ساعدوني ....متلان عصافير ...
عم أوصن وما عم يطيروا....
بعد شوية , لئي عوكر صاحب الدبوء راكد لين وبالش عياط وبهدلة و مسبات....
عوكر أبّع بالركيد , بعد ما اكتشف إنو أوص نص العصافير اللي عالعبوشة...

**الزاهر** · 13-09-2007, 02:28 PM

يا زلمة.......ذكرتني بأيام زماااااااااااااااااااااااااااااااااااااااان.....وئ ت كنت روح عالدبوء!!!

بس حلوة كتييير....يالله يا عم جابر........جاك مين ينافسك!!!!

**جابر دملوك** · 14-09-2007, 03:18 AM

(26)
عوكر و ال Helmet.
بيوم من الإيام راح عوكر هو و بو ع محل رياضة ت يشتري مضرب تنس.
فاتوا ع المحل و إتجهوا فورا ع الإصم هلي في مضارب.
بو عوكر يناولو بالمضارب و هو يجربن.
" هادا منيح ... هادا أحسن ... هادا ما بيسائب ...
هادا تئيل ... هادا حلو ... هادا بشع ... و إنت و ماشي "
هلاء هنه و عم يجربوا المضارب كان في رجال طول بعرض عم يعمل متل حكايتن.
هو و بالمحل عوكر بيحضى ب Helmet محطوطة ع الرف.
ال Helmet : هي طاصة بيلبسا الجندي بالحرب و هلي بيركب ع الموتوسيكل.
و مع إنو هل المحل ما بيبيع Helmets
بس عوكر عمرو 10 سنين و ما بيعرف
و بو موروش بالمضارب و بأسعارن و أينو حاطينو بنص حأو.
حمل عوكر ال Helmet و بلش يئيسا و هي بتساع راسين متل راسو.
عوكر يشد الربطة و يطلع ب بو و يسألو منيحة ؟.
و بو ما يطلع و يؤلو عندك واحدة جديدة بالبيت.
و هنة ب هل المشهد كان الرجال هلي جمنن حضي بالمضرب لي بيناسبو
و حملو و بدو يروح ت يدفع حقو.
بس وأتل فات ع المحل كان معو شغلة بإيدو و متأكد من هالشي.
عوكريديئ ال Helmet و يئيسا
و الرجال عم يخيدل من جمنو هو و عم يدور عليا
و مانو منتبه علي و لا خاطر ببالو إنو ال Helmet ع راس عوكر أبدا.
أكتر من خمس دقايق و الرجال ع هل الحالة
يطلع ع الموتوسيكل ت يتأكد إنو مانو رابطا عليا
و يرجع يفوت و يبحبش محل ما كان وائف.
و فجأ لمح ال Helmet ع راس عوكر
ف ما حب إنو يعصب علي لأنو ظغير و وائف جنب بو
( بطل كمال الأجسام بكل بيتون لعام 1982)
الرجال إطلع بعوكر و ألو :
" بينزلوا الحبلة تبعت ال Helmet من تحت الدقن "
عوكر رد علي و عمل متل ما ألو مفتكر إنو بيشتغل بالمحل و عم يساعدو.
وأتل ظبطت ال Helmet ع راس عوكر منيح ألو الرجال :
" ل Helmet إلي معك لي "
ساعتا عوكر ما عاود يعرف كيف بدو يئلعا
لأنو كان زاركا كتير و كان رح يخنؤ حالو.

**دوكر** · 14-09-2007, 10:53 AM

هع هع هع...
حلوة...

**جابر دملوك** · 16-09-2007, 10:06 AM

(27)

عوكر و الأخطبوط.

من أكتر من 25 سنة كان عوكر عم يِصْلِي أفف عالبحر و بالظبط محل بور الأحدب.

عوكر ما كان وحدو بهاك المنطؤة.

كان معو أرطا كبيرة من رفقاتو و ولاد حارتو و من جملتن إبن عمو دكروش.
مرة من المرات هو و راجع عوكر عالشط بعد ما صِلِي الأفف إلا و بيشوف أخطبوط بغُرؤة ظغيرة بتطلع شي مترين.

بيحمل حالو عوكر و بيطلع عالشط بسرعة تيجيب سيخ الحكش.

دكروش بينتبه ع عوكر ف بيؤم بيلحأو بلا ما يعرف.

عوكر نِفْسَو أصير كتير يمكن أأصر من نفس البرغوت و الأفف بينزلون تنزيل بالحبلة و الفواشة.

عوكر مستعجل تيشيل الأخطبوط و دكروش ورا بالظبط و معو ناضور و بَلْمات.

بيوصل عوكر فوق الغُرؤة و بي بلش يعمل بروفات تياخد النفس هلي هو.

بعد ما بيوخد نفس أخو شَلِّيتة بينزل تيحكش الأخطبوط بس للأسف النفس ما بيكون كافي ف بيترك سيخ الحكش تحت و بيطلع ت ياخد نفس أأوا.
و الأخطبوط آعد تحت عم يتأرج ع عوكر و يمكن عم يدحك علي كمان.
و أد ما عوكر كان معجوء بالأخطبوط ما كان حاسس بدكروش هلي كان ورا.

بلش عوكر إستعداداتو تياخد نفس أطول و هل العملية رح تاخد شي 3 أربع دقايق إذا ما كان أكتر. و دكروش بيعرف هالشي.

دكروش نِفْسَو طويل ما شاء الله و معو بلمات في يسرع.

هو و عوكر عم يستعد نزل دكروش حكش الأخطبوط و طلعو و طلع معو سيخ الحكس كمان و دلو طالع عالشط.

عوكر كل هل الفترة كان عم يستعد و ما كان عم يطلع تحت منو.

وأتل نزل عوكر لتحت لإي الأخطبوط فاركا و آخد معو سيخ الحكش.

خِوِت عوكر و ما سديئ حالو.

طلع و صار ينوضر من فوق و ما كان يحضى بشي.

حمل حالو وطلع عالشط و هو و ما نو مسديئ.

و بلش يحكي ألأصة كيف الأخطبوط فركا بالسيخ.

و الكل غاشيين من الدحك و هو مستغرب عم يدحكو علي و لا أيش.

و بعدين فَرْجا دكروش السيخ و سألو : " مو هادا السيخ تبعك ؟"

جاوبو عوكر : " مبلا ... كيف جبتو ؟"

ألو : " الأخطبوط كان مستعجل كتير
عندو مشوار ضروري و ما عاود في ينطرك
ف طَلِّعلك السيخ ع الشط
لأنو خاف ما تكون مانك آدر حتى تجيبو من كعب الغرؤة"

**دوكر** · 16-09-2007, 03:50 PM

يا هلا بالمعلم جابر...
يسلمو ع هل الؤصة الحلوة ...
ناطرين المزيد...

**Nader 3:16** · 16-09-2007, 11:42 PM

هههههههههه مشكور يا اعم جابر
و يا اخ ابو رياض قصتك من اجمل قصص عوكر.....

**جابر دملوك** · 17-09-2007, 10:36 AM

(28)
عوكر و التُّوم.
لَأَط إستاذ الفرنسي عوكر من إدنو و سألو : " كيف بيؤلوا تُوم بالفرنسي ؟ "
جاوبو عوكر : " ما بعرف "
عَصِّلو عليا و ألو : " بتعرف و غصبن عن دعس راسك "
ألو : " و الله يا إستاذ ما بعرف ... و بعدين عم توَجِّعني كتير "
ألو الإستاذ : " عم وجعك و بدي دلي عم وجعك تحتا تؤلي كيف بيؤلوا تُوم بالفرنسي "
صرخ عوكر و آل : " آآآآي (ail) ... الله يئطع التُّوم من الدنيا "
رد علي الإستاذ و ألو :
" أنا عارف إنك بتعرف
بس معلوماتك ما بتطلع إلا بأتلة
أحنك ألتا و ما أحلاك "
جاوبو عوكر : " ألتلك ما بعرف و لا بعمري سامع فيا "
رجع الإستاذ لأطو من جديد بإدنو و عصلو كتير وألو :
" ألي كيف بيؤلوا توم بالفرنسي أحسن ما نهنهك ها "
صرخ عوكر من جديد بصوت عالي :
" و لك آآآآآآآآآآي (ail)
حل عني إنت و التُّوم بآ ... رح تصير إدني أد إدن الفيل "
ألو الإستاذ : " و لك ألتا و إجرك فأ راسك "
ألو عوكر للإستاذ : " أنا ألتا ؟ ... أيمتن ؟ "
جاوبو الإستاذ : " ألتا مرتين ولا تنبل
و ساطلا علينا و عامل حالك مانك عارف "
ألو عوكر : " أيمتن ألتا ؟
لش أنا حكيت شي كلمة فرنسي هلأ ؟ "
جاوبو الإستاذ : " و الصرختين هلي صرختن
شكُنْت عم تؤل فين
الله وكيلك سنسبيل يمكن سِمِعُن من دِدِه "
ألو عوكر هو متعجب : " هلأ آآآآآي معناتا توم بالفرنسي ؟ "
الإستاذ ألو : " آآآ يا دنبر "
ألو عوكر : " و الله يا إستاذ هالكلمة
يمكن ما تنمحى من ذاكرتي لحتى موت
ع أد ما إنوجعت منشانا "

**دوكر** · 17-09-2007, 12:40 PM

حبيبي و الله يا خي جابر...
حلوة...
يسلمو...

**جابر دملوك** · 18-09-2007, 04:10 PM

(29)
عوكر بحِمْص.
عوكر تعرف ع رجال من حمص و إويت الصحبة بيناتن.
الرجال الحمصي عزم عوكر و ألو :
" جب هل العيلة و تعوا مضولكن شي يومين تلاته عنا "
عوكر عرض الفكرة ع مرتو.
ب الأول ما كانت المرة حابه تروح بس إبلت بعد ما لح عليا عوكر و ألا :
" مانا حلوه منا ما يؤم يزعل منا طاطيش
و ب المَرَّة هل الولاد بيغيروا جو و بينبصطوا "
حمل عوكر هل العيلة و راح ع حمص و وصلوا أبل المغرب ب شويه.
طاطيش و عيلتو كانوا ناطرين.
و ما أصْروا أبدا كانو مضيافين و إيدون طايلة.
مشويات و محشيات و حلويات و من جميعو.
و الكل تئل ع أد ما عجبن الإكل و ما عاود في مجال لحبة زيتون.
ع الساعة 10 و بعد ما سهرولن شويه صار وقت نوم الولاد.
ولاد عوكر بلشوا يتاوبوا ف لبسوا هل بيجمات و حاملن حالن و رايحين يناموا.
مرة طاطيش بتتعجب و بتسأل مرة عوكر و بتؤلا : " الولاد ما بيطأشوا أبل ما يناموا ؟ "
ردت عليا مرة عوكر : " يا خِرباني ... شبدن يتأشوا لي تأشوا
لش بأ في محل يحطوا شي
بلا ما يتأشوا هلأ ... بكرا النهار و ما طولو بيتأشوا أد ما بدون "
ما إنبلعت مع مرة طاطيش الحكاية كيف ما بدون يطأشوا أبل ما يناموا
ما يؤموا ينشنشوا ع الفرشة بالليل.
هادي تؤلا : " ما بيطأشوا ؟ "
و هاديكا تجاوبا : " تألوا إكل و ما في داعي يتأشوا بآ "
لحتى وصلت الأصة للدكارا عوكر و طاطيش
هلي بيعرفوا بعضن من فترة و كل واحد فهم مرتو ش بتؤصد التانية.
و هيكه عرفت مرتوا لطاطيش
إنو يتأشوا معناتا : يفأشوا بزر و دُؤا مخلوطة.
و عرفت مرتو ل عوكر إنو يطأشوا معناتا : يبولوا.
و راحوا الولاد طأشوا و ناموا.

الموضوع: عوكر المدوكر

أدوات الموضوع

عرض

يسلموووووووووووووووو

عوكر معتر بس خواجه إبن خواجه

عوكر و أديب الأص

عوكر و الآلة الحاسبة

عوكر و ال Anonymous

عوكر و المعزاية الضايعة.

عوكر و السُمْنَات

عوكر و خو القاصر.

عوكر و الجزرة.

عوكر و الضبع.

عوكر و فيلم "21 ساعة في ميونخ"

عوكر و البقاع

عوكر و البزؤة.

عوكر والدبوء

عوكر و ال Helmet

عوكر و الأخطبوط.

عوكر و التُّوم.

عوكر و العيلة ب حِمْص

ضوابط المشاركة