عوكر المدوكر [الأرشيف] - الصفحة 2 - منتدى موقع بلدة القلمون في لبنان

محمد

12-05-2008, 11:22 AM

عوكر والغداء الدسم
مرة نحنا وصغار ، من رجعتنا من المدرسة رحنا عالبيت وكان معنا دوكر
وبتعرفو بعد المدرسة وقت غدا ،
وبتعرفو كيف النسوان بيعيطو للواحد لياكل ...........
متل العادة أمي عيطتلو لعوكر
يا عوكر تعا تغدا
ولمعلم يألها آكل آكل ..........
أمي : تعا تغدا ................
دوكر : آكل .............آكل ...............آكل .............
ودلاتو الحوار ذاته شي نص ساعة
ويلي بيسمع دوكر عم يقول آكل بيقول آكلو شي خاروف محشي
بالآخر أمي سألتو : ولا، ما هلأ جيتو من المدرسة ؟ لكن شآكل ؟؟!!!
دوكر: علكة !!!!!!!!!!!!!!!!!!!!!!!!!!!!!!!!!!!!!!!!!!!!!!

محمد

16-05-2008, 05:12 PM

عكّور ومسلسلات الإجرام
في هذه السلسلة يتم سرد قصص المجرم عكّور الذي ألحق أشد الأذى بضحيته ( دوكر).
وتتطرح هذه الجريمة لكي ندعو لدوكر بالسلامة ولعكّور بالهداية أو بكسر اليد التي ارتكب بها جريمته البشعة.
أرجو ممن عنده أي قصة أو حادثة من اجرام عواكر الضيعة سردها .
وشكراً
قصص حقيقية وواقعية من القلمون .

محمد

16-05-2008, 05:19 PM

أبدأ بقصتي مع عكّور المجرم

كنا عالبحر بأمان الله نحنا والشباب (أغلبيتن من أعضاء المنتدى) ، سبحنا شوية وكلنا مناقيش من عند عيشة
أول شي شفنا المناقيش كتار بس ما شاء الله ما بيكتر شي عالشباب ....................
وخصوصي وعكّور المجرم معنا !!!!!!!!!!!!!!
نازلين نسبح مرة تانية بس سبحان الله ،الله مانو كاتب لدوكر يوصل عالبحر مرة تانية...............
حب دوكر يطري جو مع الشباب .........
عارف أنه معن مجرم ما حب يمزح معو آل بنمزح مع الباقيين..................
آم حمل قنينة وكان بدو يرش الشباب مويه
انتبهو ما رش كان بدو ............
رش صوبن وكان المجرم عكّور معن ............
كان في هواء ما وصلو لمويات ولكن كان حجر حجر ولك صخرة (إسا أكبر)كانت صخرة المجرم عكّور أقرب لدوكر.............
وتم اصابة دوكر اصابة مباشرة عميتلو ألبو .........
وصار يتوجع والشباب حولو هربان ألبن أكيد ما حدا بكي منن بس ...........
الله وكيلكن تنكدت نزلت دوكر كلها !!!!!!!!
أطمأن الشباب عدوكر جات شوية صخرت المجرم عإجرتينو وانجرح شوية وهو هلأ بخير .......في يمشي يعني الحمد لله ......
وفوق كل هادا اجا لمعلم عمار بدو مصريات
ليك بتروح لعند المجرم عكّور وبتاخد منو عم تسمع ...........ما رح ادفع ولا قرش.
أرجو من الإخوة دعوة لأخوكم دوكر المظلوم ، والدعوة بالهداية لعكّور (أو بكسر الإيد متل ما بدكن......)

محمد الكوسا

16-05-2008, 05:42 PM

الحمد لله عالسلامة يا ابن الخالة
هيئتو عوكر ما رح يتربى إلا ما ينحبس شي مرة
لازم ندعي ع عمار لأنو بدو مصريّات
على فكرة اسا عوكر ما دفع عن دوكر

مايا

16-05-2008, 07:39 PM

السلام عليكم ورحمة الله وبركاته
مشكور اخ محمد على هالقصة الله يجزيك الخير
ههههههههههههههههههههههه يا حرام يا دوكر طيب عارف انو عوكر الشرير رايح شو بياخدو, يلا الو نصيب ياكل صخرة هههههههههههه بس سلامتوا ان شاء ما على قلبوا شر والله يهديه لعوكر ويترك خلق الله بلا اذى

الزاهر

16-05-2008, 08:20 PM

الحمد لله على سلامتك يا إبن العمة

وهاد عكّور (مش عوكر) ما يأرا موضوعك بدو ينحرك!!!!................:)

أيمن غ القلموني

16-05-2008, 10:47 PM

مرة من الإيام وبسالف الزمان ، بس منو من كتير ، يعني من شي ٣ سنين ؛ شو صار يا حزركن ، آل الشبيبة بدون ينزلوا عالبحر ، آل منلعب غول ومنغطسلنا غطسة ومنطلع.

في اليوم التالي ، ومع بداية تسلل خيوط الشمس من نافذة الغرفة ، إستفاق دوكر منو لحالو ( إذا على الجامعة بدك ونش ما بيفيؤو لدوكر ) ؛

المهم يا أعضاء ، لبس دوكر تيابو ، كان إسا لموعد اللقاء(مع الشباب ، ما حدا يفهم شي تاني:1 (86):) جم الجامع الفوقاني ٥ دقائق ، بس عأساس في موتير بوصل ب ٥ دقايق.

نزل ، إطلع ، وإذ بالطامة الكبرى ، الموتير على المحطة ، آل لإنو أخو لدوكر حب يجي قبل بيوم مشي على البيت ، رياضة على الساعة ٣ بالليل ، ما تستغربوا ؛

حمل حالو دوكر ، وسفقا مشوار ، رياضة صباحية يعني :1 (65):، وصل عند الشباب ، وإذ وجوههم متشحة بالسواد، أد منون رايئين :)؛

المهم حملنا حالنا وإنزلنا عالبحر ، لعبنا ، كلنا مناقيش ، كرواسان ، وشكينا بالبحر ؛

وبالغلط ها وأحنا وعم نتساءل على بعضنا ، بقوم عكور ( الله يعطي العافية ) بيلقطلو راسو لدوكر وبشد ؛ ويا حزركن شو صار ؛ يا حرام داخ دوكر المعتر ، بس الحمدلله ما غرق ؛ بس لش الدوخة ؛ بكل بساطة إنفختت طبلة الأذن اليمنى .

وهك نزل دوكر بطبلتين عالبحر ، طلع بواحدة.:1 (76):

بس إطمنوا ، دوكر وعكور من أعز الأصدقاء.

ومنقول عسلامة لدوكر بالقصتين.

محمد

17-05-2008, 11:59 AM

عوكر والمفتاح الصاروخي
مرة عالفرصة بالمدرسة كان عوكر ورفقاتو قاعدين بأمان الله عم ياكلو .
بس عكّور المجرم ما بحب يشوف حدا عم يدحك صار يتسآأل عالشبيبة ولكن عوكر رد السآلة بأتأل ولكن المجرم عكّور أظهر سلاحه من الجيبة وكان المفتاح الصاروخي الذي وجّهه إلى الضحية (عوكر) وكانت الجريمة.
كانت اصابة مباشرة على الطابق الفوقاني ..........ودمّ .......
الله يهديك يا عكّور

سلامات لدوكر يا أخ أيمن والله يديم المحبة بين الشباب

محمد

17-05-2008, 12:06 PM

وهك نزل دوكر بطبلتين عالبحر ، طلع بواحدة.:1 (76):

ألف سلامات للأخ دوكر
ولكن نريد الإطمإنان
هل تكفيك طبلة واحدة يا دوكر ؟؟؟!!!!:)
لأنك معود عالتطبيل كتير:)
ان شاء الله تكفيك
وسلامات

مايا

17-05-2008, 12:26 PM

السلام عليكم ورحمة الله وبركاته
وهك نزل دوكر بطبلتين عالبحر ، طلع بواحدة.

مشكور اخ ايمن قصة كتير حلوة هههههههههههههههههههه يا حرام يا دوكر سلامتك والله يهديه لعوكر

مايا

17-05-2008, 12:31 PM

السلام عليكم ورحمة الله وبركاته
مشكور اخ محمد الله يجزيك الخير

محمد

17-05-2008, 02:56 PM

الحمد لله على سلامتك يا إبن العمة

وهاد عكّور (مش عوكر) ما يأرا موضوعك بدو ينحرك!!!!................:)

الله يسلمك يا أخ زاهر
لك ما بيطلع من أمرو شي ،
هلأ كنت أنا واياه قلي : ولا شكاتب عالمنتدى ؟؟!!
قلتلو متل ما قريت !!!!!! .......واسا المسلسل ما خلص .
لا تفزع علي ..........ولو..!!!!!!!!!!!!!!

محمد الكوسا

17-05-2008, 03:29 PM

السلام عليكم
اليوم مع قصة اخرى لعكّور
مرة اتفقو الشباب انو نجي بعد المدرسة ع حقلة المنار تنعمل تخت من حشيش
و كانت اول ايام الربيع وكنا بصف الثامن
كنا اربعة اللي جينا تنعمل التخت....
اتنين بيجيبو حميضة واتنين اللي برتّبون...
انا و دوكر كنا عم نجيب الحميضة و عكّور وواحد تاني عم يرتبو الحميضات
وقت جبنا الحشيش إلا دوكر و عكور بيعلئو بالحكي مشان الشغل...
و هرب دوكر و لحئو عكور و ركدنا نحنا وراهن تنردّن عن بعضن إلا بتخلص المطاردة!!!
لئينا دوكر نايم عالأرض و عكور حامل ججر صوّان كبير فوئو و سفئو في من ائوى اوّتو وإلا داخ دوكر... وجاو تنين كبار اخدو عالبيت...
الحمدلله فاء دوكر بعد شي ساعة و تصالح مع عكور

محمد

17-05-2008, 03:54 PM

دلوع الماما بالمخيم ،بس التوبة .........
كان دوكر مدلع كتير من أهلو بيفزعو علي، ولك عالمدرسة بإيدو بياخدو وهو يمكن كان بالبروفيه .
المهم جات الصيفية ، وابتعرفو كنا كل صيف نطلع عالمخيم يلي بتعملو الجماعة .
المهم كان دوكر ما عندو ولا رفيق إلا أخي .............وأخي طالع عالمخيم .......
يعني بالآخر رح يبقا وحدو بالضيعة ؟؟!!!
لأ ........صار أخي يأنعو :طلاع معنا المخيم .............
الله وكيلكن لو ما في شي اسبوع اسا للمخيم ما كان اقتنعو اهلو بأقل من هالفترة .........
المهم اقتنعو اهلو واطلعنا عالمخيم ...........
كان أكتر واحد يمكن مدلع ............. ولك متخيل ولد من شي 5 سنين معو سلالور ........؟؟!!!
المهم بنوصل للمجرم عكّور .............
المجرم عكّور متل ما بنعرف بيركد ورا المصلحة ..........شاف رفيق معو أكل كتير ......هادي نقطة ضعف عند عكّور صار رفيقو لدوكر هو وأخي ...........
المهم هنّا(أخي ودوكر) يحاولو يهربو بس المجرم ما عمل اسا ولا جريمة بالمخيم بقا رح يموت ...........
المهم مرة من المرات وكان أخي ودوكر قاعدين عرواق تحت شجرة عم يحكو ومبصوطين ........
كانت فرصة أوية للمجرم عكّور للجريمة ................ لأن شاف واحد عم يدحك وهو ضد هالمظاهر ..........
المهم بدو يسمع ويدحش حالو بالموضوع ..............
الجريمة :
ركد وقعد بالوسط بين أخي ودوكر .................. وبججج
عأيش جا آعد يا حزركن ؟؟؟!!!
عإيد واحدة لأ ................!!!!!!!!!!!!!
عإيدتين، واحدة لأخي وواحدة لدوكر ..................
بدكن تقولو وين الجريمة ما بينت ............؟؟؟!!!!
انكسرت ايد دوكر .............وايد أخي انفكشت.............
ومتل الصاروخ كانو أهلو لدوكر عنا .........................
أخدو والتوبة دوكر يطلع برات البيت من وقتها ...................

محمد

17-05-2008, 03:58 PM

achakik

17-05-2008, 04:12 PM

وبالغلط ها وأحنا وعم نتساءل على بعضنا ، بقوم عكور ( الله يعطي العافية ) بيلقطلو راسو لدوكر وبشد ؛ ويا حزركن شو صار ؛ يا حرام داخ دوكر المعتر ، بس الحمدلله ما غرق ؛ بس لش الدوخة ؛ بكل بساطة إنفختت طبلة الأذن اليمنى .

وهك نزل دوكر بطبلتين عالبحر ، طلع بواحدة.:1 (76):

بس إطمنوا ، دوكر وعكور من أعز الأصدقاء.

ومنقول عسلامة لدوكر بالقصتين.

ههههه و الله ايام يا ايمون ، بس نسيت انو دوكر دائما كان بيجي آخر واحد و دائما الشباب بيتصلو فيه ٢٠ مره حتى يفئ.
و كمان عكور ضربو لدوكر على إدنو بالغلط ، مش متل ما عم تقول انت انو شد على راسو.
على كل حال سلام للأخ عكور.

أيمن غ القلموني

17-05-2008, 10:10 PM

في يوم مشرق ، نزل صاحبنا دوكر من جامعته هو وشب معو ؛ طلعو الشبين بسيارة الأجرة وقعدو في المقعد الخلفي ، وكانت صاحبتنا دكورة قاعدة بالمقعد الأمامي.

دوكر المهضوم حب يفنص إدام صاحبو ، لإنو صاحبو كان دافع إدامو عن بنت من القلمون من شي أسبوع .

المهم صاحبنا دوكر حط إيدو بجيبتو ، فكر بطلع المصريات ولا ما بطلع ، قوى حالو وسحب هال٣٠٠٠ ، وألو تفضل للسائق وهو يضحك ظاهريا ويتألم داخليا ، بس آل هالأ أكيدا الفتاة دكورة بتؤولو ميرسي وبينسى الألم من جراء هال٣٠٠٠ ؛

ولكن إذ بدكورة ، تطلع للوراء ، وتقول له:

مين إنتا تا تدفع عني ؟ من وين بعرفك ؟

دوكر إحمر وتلبك وما عرف شو بجاوب ، ألا آآآ آآآ وما يطلع حكي معو .

وإلا هو وبهالحالة ، دكورة بتسفؤو صاروخ تاني وبتؤولو ، مين سمحلك تدفع؟

دوكر فقعت معو ، وبؤولو للسائق تينزلون ، وهك نزل دوكر وصاحبو جم الميرامار وكملو مشي عالقلمون ، ودوكر عم يقول : ما بكفينا خسارة ١٠٠٠ ، كلنا بهدلة كمان من فتاة قلمونية.

achakik

17-05-2008, 10:15 PM

ههههه اه والله دوكر بزعل ، وينك يا دوكر تشوف قصتك هون... بس يالله بسيطة،مشوار من الميرامار للألمون أحسن من انك تخسر ١٠٠٠....

محمد أحمد الفلو

17-05-2008, 10:48 PM

مع احتراماتي للجميع بس القصص بدون أسماء بايخه
يعني بتفهّم انو ما ينزكر الاسم ازا كان بيزعل من سردها
أما ازا كانت عاديه ... فذكر الأسماء هو يلي بيحلي القصه

دوكر

18-05-2008, 04:04 AM

يا هلا بالجميع......
و يا هلا بالمعلم محمد............موضوع حلو ......
بس شكلو بدو يصير في دواكر مجرمة .........و منو حلو هل السيط عنا ...ههههههههههههههه.....
يعطيكن العافية ؤصص حلوة معأنا فيا شوية ازا بس المهم الكل بعدا عم يطلع سليم.................
اخوكم دوكر المعوكر...........

الزاهر

18-05-2008, 04:06 AM

السلام عليكم ورحمة الله تعالى وبركاته

ارى بأن يدمج هذا الموضوع بموضوع "عوكر المدوكر" لأنه وبكل بساطة "هو ذاته" فلماذا الفصل؟؟!!...........خاصة وأن ذاك الموضوع مثبت وهذا سيصبح في الصفحة العاشرة في بضعة اسابيع!!!

فما رأيكم محمد؟؟؟

محمد

19-05-2008, 01:15 AM

شكراً الأخ زاهر
أطلب من المشرف دمج الموضوعين

kata2eb

19-05-2008, 05:24 PM

**** عوكر و برد النهر .....

آل مرة كان عوكر رايح عرحلة

فسمع إنو الرحلة رح تكون عنهر

صار يفكر شبدو يطلع معو

جا وأت الرحلة وجا عوكر معو شنتة كبيرة

أول ما وصلوا نزلوا كل رفآتَو تيتسبحوا إلا هوا

إعد يدحك علين

كلن صاروا يزأزئوا من البرد

وهوا عم يدحك
ويدحك
ويدحك
ويدحك
ويدحك

فجأة آم دوكر ........ فتح الشنتة ........ لبس الجكيت ..... ونط بالنهر

وإساتاو لهلأ عم يدحك علين
لإنن بردو

وهو كان لابس جكيت

samer kouta

21-05-2008, 03:41 PM

3awkar أخر همو المنتدى، ومرة من المرات 3awkar سأل dawkar عن ميل وسيم زيدان ، فعwkar طلع بيلو إن يعمل ميل متل وسيم أو بإسم وسيم ويحكي مع 3awkar .
fa dawkatr عمل ميل وسيم زيدان وعمل أدد لا 3awkar وبلش يحكي معو وكن بنفس الغرفة عند dawkar وكان dawkarه وراه ل 3awkar و3awkar مش عارف بأن dawkarه هو وسيم زيدان أو ميل وسيم .
فلمهم بلش dawkarه و3awkar الكلام و- 3awkar سأل dawkar أو وسيم عن صحتو وحيك أمور، ف وسيم أوdawkar سأل 3awkar يا 3awkar إنت حابب تصبح مشرف بال منتدى، ف3awkar كتير نبست وdawkarه أو وسيم شيفو عم يضحك من وراه هاهاها وdawkar يضحك ، 3awkar يضحك وdawkar يضحك على 3awkar، ف3awkar بعد ما انبسط ألو أكيد أنا كتير بحب صير مشرف وأنا كتير زكي هيهيهي فdawkar ألو حسنٌن ستصبح مشرف، بس على شرط انك تؤول هذه الجملة أبل ما تصير مشرف، ف3awkar أد منو مبسوط، ألو انشا الله بأولا لش لأ،
فdawkar ألو شو رأيك تؤل جملة من عندك، ف3awkar مابعرف شو بدي قول؟
فdawkar قلو المشرف لازم يكون متدين وكتير منيح فألو فيك تؤول هل جمله
" قسما بالله ان اكون على قد المسؤوليه و ان اتصرف حسب ما يملي علي ديني "
وألو لازم هيدا يكون من قلبك وتحفظ كتير منيح .
ففرح 3awkar وبلش يحفظ لل قسم وdawkar أو وسيم ألو يالله أولو لا شوف
ف3awkar ألو القسم ، بس dawkar أو وسيم ما خلّص ، يعني بدو يضحك عليه أكثر، فألو لازم تأولا خمس مرات ميشان تحفظها منيح ، ف3awkar بدو يصير مشرف يعني مضطر يألو خمس مرات ، فألو ياه خمس مرات وعdawkar بيضحك بيضحك بيضحك و3awkar مش ب هذه الدنيا كان وراه dawkar و3awkar مش عارف ، ف3awkar لما قاله ألو شو بدي صير مشرف والله شو? ، فdawkar مش آدر يصبر أكتر لأن طأو خواصيره من الضحك فdawkar ألو لا 3awkar يا مهبول كيف بدي خليك تصير مشرف وإنت مهبول ووقعت بحق فخ .
ف3awkar عرف اللعبة من dawkar لأن مش أول مرة هيهيهيهي
فهيدي القصه كتير حلو وخاصةً إن 3awkar هو الضحية وسلام..
وسلام لا أخي المشرف 3akwkarrrrrrrrrrrrrrrrrrrrrrrrrrrrr.

:1 (86)::1 (1)::1 (44)::1 (11):

أبو رياض القلموني

21-05-2008, 04:14 PM

فهيدي القصه كتير حلو وخاصةً إن 3awkar هو الضحية وسلام..

وسلام لا أخي المشرف 3akwkarrrrrrrrrrrrrrrrrrrrrrrrrrrrr.

:1 (86)::1 (1)::1 (44)::1 (11):

ههههههههههههههههه

حلوة كتير هالأصة يا أخ سامر ...

عوكر ما غيرو .. مهيك ...هههههههههههههه...

أبو رياض القلموني

21-05-2008, 04:24 PM

عوكر و السكسيكة

بالزمانااااااااااااااات ... أخونا عوكر حمل هالبارودة و طلع يشوف رزأتو بهالكرومات ...
هو و طالع شاف عنكوش آعد تحت الشجرة عم يتصيد ... كان عنكوش حاطط سكسيكة و ناطرة ...
ألو عوافة عنكوس ...
أهلان عوكر ... حول ...
ألو مستعجل والله ..بدي روح شوف رزأتي ...
مشي عوكر كم فشخة لإدام ...إلا بيسمع صوت عصفور من الشجرة ...
بيطلع بيلائي شي أسود كبير بالشجرة ...
ألك هادي هية ... الله بعتلنا شحروء نتصبح في ...
بوف بوف ...

وهيكا صارت آلتو لعنكوش عشر شأفات ...

كمشو لعوكر و خلا يدفع حأ الآلة ...

فشلان

25-05-2008, 10:30 AM

المحروم

25-05-2008, 12:23 PM

ولا وسيم ال اكلت اتله من عكوره ما بتسترجي تكمل القصص
هههههههههههههه

محمد الكوسا

25-05-2008, 01:12 PM

ولا وسيم ال اكلت اتله من عكوره ما بتسترجي تكمل القصص
هههههههههههههه
اه صحيح مبارحة لأطو بالجامع و موتو الأتل

kata2eb

25-05-2008, 01:50 PM

**** عوكر وإبريق الشاي ....

هادا يا سيدنا الإكرام , مرة عوكر كان آعد عندن مجموعة شباب

فهوا حب "بس ما طحنوه " أنوا يعملن إيمة للشباب وشيعملن " شاي "

عيط لأمو وألها إنوا تنزلوا سكر

فمكان من الأم الحنونة إلا أنا ردت علاي

وما مرت إلا دقائق حتى فات عكور المجرم

وحامل بإيدوا كيس آل أموا لعوكر نزلتلاو ياه

فيا حرام على دوكر ... ما فكر إلا إنو أموا الحنونة حسها ألبها

إنو مأ فاي سكر وهو محرج من الوضع

فما فكر دوكر أبدا

فتح الكيس وحط نصوا بألب البريق

وما هي إلا ثوان , حتى بلش البريق يفور

وبلشت هالرغوة تملي المكان

فما كان من دوكر المسكين الحنون إلا أنوا يدوء شحط بالبريق

وما خيبت أملوا بعد أن إكتشف إنوا حاطط"أنا " تايد بالبريق
فما كان من دوكر المسكين إنوا كب الشايات وعمل للشباب بريق تاني

إذا حبيتوا تعرفوا مين دوكر
فإسموا مخبا بين الأسطر
حلوة مهيك
سلامااااااات

محمد

31-05-2008, 12:47 PM

طيب ما تثبتلك على شي اسم... هلأ عم تحكي عن دوكر؟ ولا عوكر؟؟؟؟؟؟؟؟؟؟؟؟؟؟؟؟ احترنا معك....

عوكر هو وزن للإسم المستخدم فقط

Nader 3:16

02-06-2008, 11:37 PM

دوكر و أكلة البيض.

كانو الشباب حابين يتعشوا بيض مع سلاطة مايوناز كالعادة عند المعلم عنكوش...المهم دوكر بيطلع مع الشباب لعند عنكوش (وكانت الكهرباء مقطوعة)....مرحبا عنكوش....اهلين دوكر...دوكر بحب الاكل كتيييير ما اخد و عطي كتير مع عنكوش دغري توجه صوب البراد و اذا يفاجأ انو ما في بيض بالبراد!!!!! ولا عنكوش يا... وين البيضات!!!!! بجاوبو عنكوش شايف هالنسوة....بقلو دوكر ولا الله لا يعطيك العافية شبدنا نعمل هلء؟؟؟؟
فبقلو عنكوش الحل عندي احسن شي ننزل عالقن و نسحبلنا كم بيضة من تحت الدجاجة.
دوكر ما معو وءت يفكر قلو جيب معك شمعة و لحقني...
فتح دوكر القن و عنكوش حامل الشمعة و عم يدلو عالبيضات ...هادي منيحة ..هاديكا مقبولة..
فجأة بيءوا الضو شوية و شوية...عنكوش و دوكر فكّروا الكهرباء جيت و ابسطوا كتيييير...
وما بيسمعولك الا الديك بلش يزعوط وبلش بالركد!!!! تاري كان في ديك نايم و الشمعة دءت بالريش تبعو....
ودوكر و عنكوش شبدهم يعملو !!!!!! ولك الديك شاعل و عم يركد بالقن....ولو ما عنكوش مسكوا وشلحوا برات القن...كان القن صار شواية دجاج عالفحم!!!!
و هيكا استطاع عنكوش و دوكر الحصول على البيض الطازج...مخلفين ورائهم ديك عريان عالآخر!!!

الزاهر

03-06-2008, 02:00 AM

عم اتخيل المنظر............:):):)

الله يعطيه العافية الأخ عوكر!!!.........:)

جابر دملوك

06-06-2008, 12:16 PM

(61)
عوكر و أجرة السرفيس
بعد ما خلص عوكر محاضراتو ب كلية العلوم ب الأُبِّة
حمل حالو و نزل ع موئف الألمون ت يطلع ع الضيعة.
الدورية كانت ل الشوفير شاكوش هلي ما بيسمع نص الحكي و النص التاني بيسمعو غلط.
شاكوش كان ناطر راكب واحد ت يكتمل الطلب معو.
وأتل عوكر بيفوت ع السيارة بيحضى ب
بنديرة (بنت الجيران الباب ب الباب) و
إختزال (بنت عمو هلي متعاليئ هوو و بوو)
آعدين إدام جنب الشوفير
و 2 غُرب آعدين وراهون و طلعت أعدة عوكر ورا شاكوش.
عوكر مانو عارف مين دافع و مين لأ ف حب إنو يئهر بنت عمو و يبين حالو شبوبية إدام بنت الجيران.
عوكر بينكز الشوفير ب كتفو و بيعطي أجرة راكبين و بيؤلو 2.
شاكوش بياخد المصريات و بيحطن بجيبتو و لا بيسأل مين دفع من ورا و لا حتى بيسأل ع مين كمان.
عوكر بيسأل حالو : " و لك ما سألني حتى عن مين ... آخ ما يكون مخسب إني دافع عن بنت عمي "
السيارة أطعت البحصاص و عوكر ما شاف حدا دفع غيرو.
وأتل بيوصلوا أرب معامل الغندور واحد من الشباب الغُرب بيؤل ل الشوفير إنو ينزلون
ف شاكوش ما بيسمع بيدلو مكمل بتؤم إختزال بتؤلو للشوفير ت يوئف لحتى الشباب الغرب ينزلو.
بينزلو الغرب و شاكوش بيكمل سواؤة ع الضيعة و طول التريئ عوكر عم يفكر عن مين بدو يطلع دافع.
السيارة بتوصل ع الضيعة و بنديرة و إختزال بينزلو و لا كأنو عوكر دافع عن حدا منون و لا كأنو عوكر كان معون حتى ب نفس السيارة.
بيفتح عوكر الباب و بينزل ع مهلو و عامل حالو مانو هامو الأمر و لا حتى ناطر حدا يؤلو يسلمو دياتك لأنك دفعت عني.
ما بيلحئ عوكر يفشخ فشختين إلا و شاكوش الشوفير بيعيطلو :
"لوين يا حلو ...
شو عاملك شوفير خاص ...
ولا بدك ياني آخد الأجرة من البابا من عشية ب الأهوه ؟ "
عوكر تبلكم و ما عاود يعرف شبدو يؤل
طلع دافع عن الشباب الغرب
و مو دافع لا عن بنت الجيران و لا عن بنت عمو و لا حتى دافع عن حالو.
و إضطر يدفع مرة تالتة لأنو شاكوش كان عن جد شاكوش و ما سدأو.

محمد الكوسا

10-06-2008, 10:02 PM

السلام عليكم
اليوم مع قصة جديدة اليوم صارت!!!!بين عوكر و دوكر!!
كان عوكر عالنت وشاف انو في تقديم طلبات لسوائت سيارة جديدة اسما اكس 6
المهم فات وسجل اسم رفيئو دوكر و سجل كل المعلومات عنو ....
اليوم تلقى دوكر اتصال من الإمارات من شركة البي ام....
سألتو الموظفة اول شي عن المعلومات اللي معبيا رفيئو وبلش يكذّبو!!!
المهم سألتو انت بدكtest drive ولّا بدك بس معلومات عن السيارة؟؟
فكر دوكر و بلش الشيطان يلعب بعبّو!!!
آل دوكر بنفسو انا عرفت معنى المعلومات والمعلومات ببلاش بس test drive?? هادي جديدة وما بعرف معناتا اكيد هادي شي اطعت كومبيوتر!!
ام الها لأ انا بدي معلومات !!!!
وروّح ع حالو سفرة عالإمارات و تجربة للسيارة!!!

الزاهر

10-06-2008, 10:58 PM

سماع هالأصة يا باش:

هاد الجمعة الماضية ألت لحالي يا زلمة طلاع حضار فرنسي .... حرام المعلمة بتكون اشتائتلك!!!........وأول ما فاتت المعلمة...............زااااااااااااااااااااااهر هووووووووون!!!!............:)
المهم

بنص الحصة بسمع زميلي بالصف اللي كان آعد ورايي عم يسأل صاحبو: "ليك.....الشنغليشة بيأطفوها من الشجر ما هيك؟؟"............ آم بيردلو عم يتمسخرو "لا..... بيشيلوها من الأرض متل البطاطا"...........

سنة تانية بالجامعة هاد ها!!!
:):):)

Nader 3:16

11-06-2008, 12:33 PM

دوكر و رفيقو عنكوش بحبو بعضهم بلاااااااااااااوي و دائماً بيمشوا مع بعضهم...
فكل ما يكون ماشي دوكر و عنكوش بصادفوا عفروط فبقلوا لعنكوش ليش ماشي وحدك يا عنكوش؟؟؟؟ عم يتمشسخر عدوكر...المهم دوكر بعصب بلاوي و بيحفظلوا ياها....
مرة تانية بكونوا ماشيين و بكون مارء زءزوء و بيعمل نفس الشي و دوكر بعصب و بيحفظلوا ياها...مرة تالتة و رابعة و خامسة الكل عم يقول نفس الجملة للمعلم دوكر....
فمرة بالصدفة بكون دوكر و عنكوش ماشيين و اذ بدوكر يلمح من بعيد عنكوش و زءزوء و كل الشباب يلي كانو يعملو فيه هادا الفصل فقرر انو يضرب مليون عصفور بحجر واحد...
و هو بصير جنبهم و ابل ما يفتحوا تمهم يبادرهم دوكر بصوت عالي...( ليش ماشيين وحدكم)؟؟
و بلش يضحك بصوت عالي انو هو بخعن كلن مع بعضن !!!!!......

دوكر

11-06-2008, 01:32 PM

يا هلا بالجميع.....
هههههههه........حلوين بلاواي هل الؤصص.....
يعطيكن العافية.....
اخوكم دوكر المعوكر.....

محمد الكوسا

27-06-2008, 05:02 PM

السلام عليكم..
اليوم مع قصة جديدة صارت مبارح استمر من بعد العصر وحتى الواحدة ليلا..
بلشت الئصة انو عكارة و عكَير و عكر نزلو عالبحر عن بور مراد ومعن حسكتين..
ومتل العادة عم يلعبو و يتسابئو و...
المهم كانو رايحين عالحسكات عبور سمير وعالطريئ عم يلعبو كل شوي يشلحو واحد منن بالبحر ويهربو منو ...
وصلو عبور سمير وكان ناطرن هونيك رفئاتن عوكر و عكور و كنو هالتنين متفئين انن يعملو فلم ب عكير وعكارة...
المهم انن شلحون عن الحسكة وشفطولن تيابن و مفاتيحن و شحاطاتن....وهربو منن عالحسكات مع عكر اكيد...
بئيو عكير و عكارة بلا امصان وبلا شواحيط وادمن طريق طويلة من بور سمير للسيارة تبعيتن اللي كانت تحت بيت الحاج وحيد...
المهم راحو مشي حافيين وبلا امصان...وسبحان الله كل الضيعة مرأت وشافتن ودحكت علين!!
وكانو الشباب متفئين انو بعد البحر رح يطلعو ع ابو سمرا تيتعشّو عند سناك عمرو
وهون جا دور عكير و عكارة انو يعملو بالبئية فلم آم اتفئ عكير و عكارة انن يمرئو من جمب البئية بالسيارة ويهربو منن وما ياخدون عالعشا!!!
وكانت المفاجئة!!وئفو الشباب بالتريئ و ما خلو سيارة عكير تمرئ وعربش عكر عالسيارة وصار عكارة يعضو ويسفئو تينزل المهم انن هربو بالآخر منن بس دلن عم يبرمو بالضيعة
بالآخر اتفئ عكارة وعكير انن يطلعو البئية معن بس مقابل انن يتعهدو بعدم الإعتداء ع عكارة و عكير...
وصلنا ع ابو سمرا لعند عمرو آم ال عكور انو بدو يروح عند محل معجنات واخد معو حلفائو عكر و عوكر
وهون بلش عكير يلعب بعئل عكارة الو شو رئيك ننزل عالضيعة ونتركن ب ابو سمرا؟؟
كانت الساعة 12 باليل التلو لأ حرام؟؟
بس عكير ما كان عندو رحمة كان مأجرم دلّو يلعب بعئل عكارة حتى أل عكارة لعمرو انو يضب الوجبات تننزل عالضيعة...
المهم خلصنا من عند عمرو وننحنا وبالسيارة لمحنا الشباب راجعين من محل المعجنات امنا هويّنالن ونزلنا عالضيعة
بطريق النزله كان عكارة عم يحس بالندم كل شوية بس عكير يوسوسلو وينسّي
وصلنا عالضية وكلنا الأكلات وعكير مكيف انو عمل فلم وانتصر وكانت الشماتة بالشباب اللي تركناهم ب ابو سمر عم تزيد الأكل لذّة!!!
بعدين رحنا نوصل عكير عبيتن إلا وهو معنا بيجي اتصال من عاكر بيئلو انطرني ادام البيت بدي احكي معك بموضوع مهم ...
احنا تركناه و رحنا كانت الساعة شي وحدة باليل..
ضل عكير وحدو ناطر عاكر برات البيت إلا بيشوف سيارة عاكر جاية من بعيد...
بس المفاجئة انو كان فيا عوكر وعكر وعكور كمان وكلن آلعين اشاطاتن ونطو ع عكير...الله يعينو!!
والّع عكير بالركيد و ركدو وراه ولئطو بعد شي 200 متر ونزلو في جلد...نزل الدم من ايدي يا حرام...وصارو يطلبو منو انو يتصل بعكارة حتى يجي ويعملولو كمين...
موتو الئتل..بس اليوم صرّح لي انو رغم الئتلة اللي اكلا اساتو هو المنتصر لأنو مزحو ما تخطا الحدود على عكس المجرمين البئية اذا صح التعبير و اليوم يمكن يجي دور عكارة الله يعينو كمان...

حُسَينْ ... !

27-06-2008, 06:56 PM

السلام عليكم
:)
لاعب بالسيناريو يا كوسا ;) ;)
شكراً على هذه القصة

THE TERRORIST

08-07-2008, 01:31 PM

الله يبارك فيك يا ندور.... هههههههههههه
بعتقد إني عرفت قصدك عمين!!!!هههههه
مشكورين جميعاً عالقصص تبعيتكن.....
سلام.......

Arsenic

16-08-2008, 02:25 PM

بالاول مات ؤرويب دوكر بالهند فا تصل واحد هندي بدوكر و عزاه و الو إنو ؤروبو مات ولازم 25ألف دولار ليجيبو و يدفنو بلبنان فجمع دوكر كل ؤرويبينو و إخد منن مصاري بس طلعو 5ألاف دولار بس بس دوكر حؤ و دينو بدو يجيب ؤرويبو يدفنو هون
ؤم دومر اتصل بالهندي و الو إنو مامعو إلا 5الاف فالو يعني بنحرؤو ؤل دوكر لأ نطزر لحظة و رجع دوكر جمع ؤروبينو من جديد و باعو مل الأراضي والسيارات و كل شي بس طلع معن 7 ألاف دولار بس ؤم دوكر اتصل بالهندي و او طيب خلص حرؤو ؤم الهندي ألو حتى نحرؤو لازم 15 الف دولار ؤم او دوكر طيب ما فيكون تلطوعو طلوطوع يعني ما تحرؤو عالآخر بهال7الاف دولار....

Arsenic

20-08-2008, 04:41 PM

أد ما عوكر حظو بأرف دعستو سيارة و هية و طالعة روحو دعستا طيارة......

مايا

20-08-2008, 07:26 PM

السلام عليكم ورحمة الله وبركاته
ههههههههههههههههههه
حلوة آخر قصة . ههههههههه

الزاهر

29-08-2008, 08:53 PM

عوكر يريد الزواج بالأميرة عوكرة!!

هاد يا سادة يا كرام كان الملك يريد أن يزوج ابنته الأميرة ... فهي عنست تقريبا ... ولم يتقدم لها أحد وقبلت به !!!

فأرسل الملك معلنا في أرجاء الأرض كلها أن الأميرة عوكرة تريد الزواج من صاحب أجمل صوت أو لحن!!!
فتهافت الناس على القصر من كل حدب وصوب ... هذا يعزف الناي وذاك يغني وهكذا ... ولكن الأميرة لم يعجبها العجب!!!
وبعد أيام عديدة خطرت لعوكر فكرة بعد أن رآ في منزله جرارا عديدة بمختلف الأحجام ... فالتقف الأولة وبدأ يصرخ في جوفها .... ويغني ... جرب الأولى وهي الصغرى فلم تعجبه ... فجرب الأكبر منها .... كذلك لم تعجبه .... فجرب تلك التي كانت في الزاوية وهي أكبرهن ... كذلك الأمر لم تعجبه ... فاعتمد الجرة الصغرى وتوكل وذهب .... وهو في الطريق يفكر .... لعلها تعجب بهذا الأسلوب الفريد ... المبتكر ... الإبداعي !!!

وعندما وصل القصر واستقبله الحراس ... وقف في الصف بانتظار دوره .... وحان دوره!!!

دخل وركع أمام الملك والأميرة وحياهم ... فأمره الملك بأن يسمعه ما عنده .... حمل الجرة وبدأ يزعق بها .... وأخذ يصدر الأصوات ما شنع منها وما حسن!!!

وبعد لحظات ثار الملك ووبخه وعنفه وقال له ... أوتهزأ مني ومن الأميرة بهذا!!!
ونادى على اثنين من حراسه الشخصيين الأشاوس ... وأمرهم بعقابه .... وقال لهم : إملؤا جرته بالماء .... تغمس يدك فيه وتصفعه بكل ما أوتيت من قوة .... وأنت يا عنكوش تقوم بالأمر ذاته .... حتى يفرغ الماء من الجرة!!!!!!

سبلاح ... أول صفعة .... آآآآآآآآآآآآخ .... صرخ عوكر !!!!
سبلاح ... ثاني صفعة .... آآآآآآآآآآآآخ .... صرخ عوكر !!!!
سبلاح ... ثالث صفعة .... آآآآآآآآآآآآخ .... صرخ عوكر !!!!
سبلاح ... رابع صفعة ..... هاهاهاهاهاهاها .... دوت ضحكات عوكر في القصر كله .....

فتعجب الملك لحاله .... أنا أعذبه .... وحراسي يصفعونه بكل ما آتاهم الله من قوة ... وعوكر يضحك ... ما لهذا المجنون!!!

فأمرهم الملك بأن يحضروه إليه فورا !!!!
وسأله بنبرة حادة .... ما لك أعذبك فتضحك .... فقال عوكر:

لو تدري يا سيدي بما كنت سآتيك
خابية .... بحجم 20 جرة من هذه !!!!

سمعتها عن عمي عبد الحكيم

яiиda

29-08-2008, 09:20 PM

ههههههههههههههههه
مشكور اخّ زاهر كتير حلوة.....
سلام:)

AbouRajaa

29-08-2008, 09:34 PM

عوكر أصبح ملكاً

يا سادة يا كرام ، كان للملك ابنة ، خصها الله بالجمال و الذكاء و الحسب و النسب و كل ما يمكن للمرأة أن تحوزه في هذه الدُّنيا !
و في إحدى الليالي الحالكات قرر الملك أنه لا بُدّ من تَزويجها ، فهو قد شاخ ! و ليس من طريقة أخرى للحفاظ عليها !
لكن لا بدَّ لهذا الزوج العتيد ان يكون رجلاً بمعنى الكلمة !
فقرر إخضاع كلِّ رجال المملكة لاختبارٍ يُحّدِّدُ هُوِيَّةَ هذا الرجل !
فجعل يطْلُبُ من الرجال الواحِد تِلوَ الآخَر أن يأكُلَ كيساً من الملحِ يزيد عن الخمسين كيلو غراماً من الملحْ ، و كان كُلٌّ منهم يَخْرُجُ و هوَ يَقولْ : لقدْ جُنَّ الملكْ !!
و أخيراً جاء عوكر المدوكر و كان آخر رجال المملكة ، فدخل على الملك ، فطلبَ منه الأخير أن يأكُلَ ما في الكيسِ منَ الملحْ ، فأخَذَ القليلَ من الملحِ فأكلهُ ثُمّ التفتَ إلى الملكِ فقال قد فعلتُ ما طلبتَ إليّ ، فقال : لا فأنا طلبتُ إليكَ أن تأكُلَه كُلّه !
فنظر إليه عوكر المدوكر و قال : لقد علمتني الحياة ، أنَّ الذي لا يتأثر بذرّاتٍ من الملح ! لا يتأثَّرُ بقنطارٍ منه !
فقال الملك : هوَ أنت الرّجلُ الذي يستحِقُّ أن يتزوَّجَ من ابنتي .
و هكذا تزوج عوكر المدوكر من ابنة الملك ، الذي ما لبث أن مات فورثه عوكر ، فصار هو الملك !
مبارك للأخ عوكر المدوكر هذا الزّواج ، و هذا الملك !
اللهم ارزقنا مثلما رزقت عوكر المدوكر إنك على ما تشاء قدير .

Nader 3:16

24-09-2008, 12:34 AM

مرة عنكوش فات مع الشباب الألامنة يلي بأنشدوا كل مرة عند أجيال...و عوكر كان من المنشدين المحترفين بالفرقة...المهم عنكوش غليظ كتير و عاجءها و عم يلعب بكل شي ساعة بيمسك المزهر و بطبل و ساعة بيسفء هادا سحسوح و ساعة بأنشد معهم و بينزعلهم الانشودة و بالاخر وءعت ايدو على كتاب لأبو دجانة. و عنكوش منو سامع فاي من ابلا...قام مسك الكتاب و قال مينو هادا أبو دجاجة؟؟؟؟

بنط عوكر و بءلو هادا يلي بغنّي هالصيصان شو حلوين!!!! ءوم انإبر من هون...

جابر دملوك

05-10-2008, 04:29 PM

(62)
عوكر و آآآآآآآآآ مين
ليلة 19 من رمضان جا عوكر ع الجامع مِتْعَوء ف راح عْلَي العِشا مع الإمام.
دَوِّرْ ع حَدَا عم يصلي وحدو ما حضي آم ألو الإمام أحسنلك تصلي معنا.
إنت ب نية العشا و أحنا ب نية التراويح و ب ترجع تكمل الركعتين الباءيين وحدك.
و بس تخلص ب توؤف تصلي معنا التراويح متلك متل غيرك.
عوكر ما كَزِّبْ خَبَر عمل متل ما أللو الشيخ.
وأتل خلص عوكر 4 ركع العشا كان الشيخ إساتو ب الركعة التالتة من التراويح و صار ب سورة الشعراء.
عوكر راحت علي الفاتحة ب هالركعة دخل ب الصلا و كان الشيخ وصل ع :
" وَ فَعَلْتَ فَعْلَتَكَ التيِ فَعَلْتَ و أَنْتَ مِنَ الكَافِرِين "
" قَالَ فَعَلْتُهَا إِذاً و أَنَاْ مِنَ الضَّالِين "
عوكر الوحيد هلي آُل
" آآآآآآآآآآآآآآ مين "
إفتكر حالو عم يأَمِّن ع الفاتحة

مايا

05-10-2008, 08:16 PM

السلام عليكم ورحمة الله وبركاته
مشكورين على هالقصص الحلوة ههههههههههه

جابر دملوك

11-10-2008, 04:09 PM

(63)
عوكر مانو جيعان بس بينأنيئ
مرة من المرات عوكر بيمرؤ ع بيت أختو من بكير.
ما بيكون ب البيت غر بنت أختو كركوبة.
" تروئت يا خال و لا بحطلك ترويآ ؟ "
" لا و الله سبأناكون بس بنَّأنيئ."
" طيب رح لفلك لفوفة لبنة و حطلك فيا حبتين زيتون و خيارة. "
" الله يرضى عليك و يطول دينيكي يا بنتي. "
عوكر 3 كدشات و بيجيب أجل اللفوفة.
" إساتك جيعان يا خال ؟ "
" و الله يا بنتي تروئت أبل ماجي لعندكون ماني جيعان بس بنأنيئ."
" طيب رح لفلك لفة تانية شو رأيك ؟ "
" متل ما بدك ما رح زعلك "
ما بتهدا اللفوفة بإيد عوكر أكتر من دئيآ.
" بدك الحئيآ أنا متروء و ماني جيعان بس لفوفاتك طيبين كتير . شو رأيك تعمليلي لفة تالته نأنيآ."
" ب بببببووووووووس إيدك يا خال أعود تروأ مرة تانية و خلصني بآ من هالتنؤنؤ."

Nader 3:16

11-10-2008, 04:42 PM

يا مية اهلين بالؤرايب.....كيفك؟؟؟؟؟؟
يا زلمة طريقة كتيبة القصص المونية عالاخير اسا اسلوبك الالموني احسن من اسلوب دوكر.

كيف عم تفهمي الؤصص يا مايا مني عارف

الزاهر

11-10-2008, 05:08 PM

دقق بكلامك ي نادر ... بالألمون ممنؤول "شو رأيك" منؤول "شرأيك" ... وممنؤول "ماني جيعان" منؤول "مني جيعان" :)

" طيب رح لفلك لفة تانية شو رأيك ؟ "
" بدك الحئيآ أنا متروء و ماني جيعان بس لفوفاتك طيبين كتير . شو رأيك تعمليلي لفة تالته نأنيآ."

яiиda

11-10-2008, 06:27 PM

هاهاهاها ..... حلوين .....
سلام :)

مايا

12-10-2008, 01:44 PM

السلام عليكم ورحمة الله وبركاته

كيف عم تفهمي الؤصص يا مايا مني عارف
على فكرة أنا بلاقي صعوبة أبدا بفهم الكلام ( يعني نادرا ما تطلعلي كلمة ما بفهما )
متل ما بيقولوا عنا : لساني نعوج يعني صرت عم احكي قلموني على فلسطيني على اردني على مصري .
والخير لأدام .

جابر دملوك

01-11-2008, 08:30 PM

(64)
عوكر و مَسَا الخَير
عوكر ع فكره بيمشي متل مشية فشلان بس بدون تنؤوز.
يعني كل فَشْخَاتَو أَدْ بَعْضُن من أول المشوار لآخرو حتى لو مات من التعب متل الرِجَّال الآلي.
و إزا طلعت إِدَامَو جُوره ما بِيأَصِر الفَشْخَه و لا بِيطَوِلا ب العكس بيُبْرُم 90 درجة و بِيزِيح عَنَّا و بيكمل مشوارو.
بيوم من الإيام بيكون راجع ع البيت و أبل ما يوصل ب شي 200 متر بيُحضا ب 3 نسوان كبار جيرانو و من عمر أمو.
ها 3 نسوان كانوا موروشين عم يحكوا بموضوع لو فَئِعْت شِنْكِه جُمِّنُن ما بيحسوا فِيَا.
أخونا عوكر كتير مهزب بيمرؤ من جُمِّنُن و بيؤلن "مسَّسَّسَّا الخَير"
أكيد النسوان ما سمعوا و لا حسوا بشي مرأ من جمنن.
محسوبكن "دملوك" شاف المشهد كلو و عرف شصار.
و عوكر عرف إني عرفت ف ما حب إنو يطلع ب البَخْعَه ف لازم يرجع يمسيون ب الخير مرا تانيه و بشكل يسمعو.
بس عوكر إزا مساهون هو و ماشي و عم يفشخ رح يبعد أكتر و أكتر و أكيد ما رح يسمعو أبداً.
لو كنتو محلي كنتو فرطو من الدحك وأتل عوكر رِجِع 5 فشخات لورا
كما لو كنت عم تِرْجَع أَنَارْيي ومتل ما بتحضر الفلم من الآخر للأول
و بصوط عالي عيط :
" عم نؤؤؤؤل مّْسسسسا الخَيْيْيْر"
ساعِتَا النسوان إنتبهوا و جاوبو بصوط واحد :
" الله يِسْعِدْلِي هَالمَسَا "

أبو الشوارب

10-11-2008, 01:50 AM

قصص جميلة يا اخ جابر و خصوصاً قصة السجدة و العبوشة و امتحان اللغة الانغليزية و فيلم 21 ساعة في ميونخ و الكثير من القصص. والله ضحكت كثيرا عند القراءة

محمد

10-11-2008, 03:18 AM

السلام عليكم
باختصار المعلم عسين عيدان ألي قبل ما ننام :

" طفي اللمبة تشوف "

لأن لمعلم بشوف بالعتمة
دووووووووووع

محمد

10-11-2008, 03:25 AM

يومها ، قلتلك ما تمزح بس انت ما رديت ... على كل بعتقد انو الفخت يلي عملك ياه المفتاح براسك ، كان درس للمرات الجاية .
كل ما واحد يحكيك كلمة سفقو بالمفتاح ..........
دوووووووووووووووووووووع
خرجك ، ولا مضيع كل مفاتيح الجمعيات الإسلامية بهالضربة يلي مبارح سلختو اياها للمعلم عسين عيدان.
بس ليك هاديك الساقية يلي نزل فيها بتوصل عالبحر بركا بيعلق بشي قفة للوالد.
وكمان دوووووووووووع ، ومنيح لما بيوصل المفتاح عالدبية .

جابر دملوك

14-11-2008, 08:28 PM

(65)
عوكر و دعاء يونس عليه السلام
بنت عوكر جاها سبع تمن عرسان و كلن رجعوا مكسورين الخاطر.
عوكر ما عجبو ولا واحد مِنُنْ و ب الآخر عَنْسِت البنت و إنأطع نصيبا وأعدتلو ب البيت.
و كبرت البنت و بوا كبر معا.
و بيوم من الإيام كانوا آعدين ع المصطبه إدام الباب
إلا و الأب بيتنهد من كَعْب إِجْرَي و ب الطالع و بيؤل :
" لَّا إِلَهَ إِلَّا أَنتَ سُبْحَانَكَ إِنِّي كُنتُ مِنَ الظَّالِمِينَ "
البنت بتسمعوا و بتجاوبو ع الحارك :
" أعوذ ب الله
إنت مَنَك من الظالمين
إنت الظالمين ب أُمُنْ و بُوُوُن "

Nader 3:16

10-12-2008, 02:32 AM

دوكر بدو يتدّين

مرة دوكر كان جايا عبالو يشتري كم شغلة من شرايات الولاد الزغار ..طلع عالبيت وما لقي امّو بالبيت...وهوا ما معو لا ليرة...شبدي اعمل قال بينو و بين حالو.....رجع طلع معو انو احسن شي اتدّين من عند فلان كونو كل مرّة امّو بتدّين من عندو.

ما كزّب خبر من ساعتو حمل حالو ونزل عالدكان يلي كان تحت بيتون....فات دوكر عالمحل وراح يأيبل عالشرايات يلي بدو ياها...بس المشكلة ما لقي غر نوع واحد من يلي بدو ياه عند البياع.

فراح عند البيّاع و قلّو بدّي اتدّين من عندك بألف...وانا خدت هادي حقها متين و خمسين و بدي منّك تردلي سبعمية و خمسين.

اطلع فاي البياع الو روح حط يلي خدتها و بسرعة اضوي من ادامي....شي هالعالم هادي.

جابر دملوك

12-12-2008, 04:13 AM

(66)
عوكر و محطة البانزين
وأتل مرتو ل عوكر لِئيت شُغل صار بدا تغَير الشَّآ لأنا بعيدة عن الشُّغل.
ف راحِت هي و جوزا ت يدَوروا ع شَآ تانية أَءْرَب شوَية.
وأتل لِئيوا شَآ عِجْبِتُن كتير ف طلعوا ع البلكون ت يشوفوا المَنطآ من العَلالَي.
عوكر بيؤل ل مرتو : " يا هُمَّ لالِي محطة بانزين فَشْخَا من باب البِنَاية "
" رح يعطوك البانزين بَلاش يعني ؟ " سئِلتو مرتو .
جاوبا عوكر :
" لأ يا حبيبتي ... بس صار فِيِّي روح عَبِّي السيارا مَشِي "

the panther

14-12-2008, 05:33 PM

ههههههههههههههه كتير حلوين القصص ولكككككككككككككككككككك

شادي فقوعه

29-12-2008, 09:55 AM

Nader 3:16

18-02-2009, 02:43 PM

عوكر بكون شيخ كبير من القرّاء تبعون مصر المشهورين....

فمرة من المرات كان ؤاعد عوكر عم يقرأ ومعروف عن عوكر انو بيشطح احياناً بالقراءة و بصير بألف من عندو. فساءبت انو الشيخ المقرئ عنكوش ؤاعد جنبو.
الشيخ عوكر كان عم يؤرا . وابراهيم الذى وفى .رجع قال.وابراهام الذى وفى .رجع قال.وبراهيم الذى وفى رجع قال .وبرهوم الذى وفى.فالشيخ عنكوش عالم بالقراءات و قاعد عم يسمع بيرجع بقلّو باللهجة المصرية ."الله يفتح عليك ياشيخ عوكر بس انت نسيت وابو خليل الذى وفى". وشكيه لنقابة القرّاء و الشيخ عوكر صار برا النقابة و موء حدا بيسمعلوا.

نقلاً عن qquran .

جابر دملوك

22-02-2009, 06:47 PM

حِلْوِه يا نَدُور

الشامي

23-02-2009, 06:27 AM

السلام عليكم...

من زمااااان ما سمعنا عن السيد عوكر...

شو شيخ جابر، فضي الخزااان!؟

جابر دملوك

09-03-2009, 03:18 AM

(67)
عوكر و الطبونة
عوكر و عنكوش الامْنِه عايشين ب أَجْنَبْيَه.
عنكوش ساكن هو و أخ مغربي.
بيوم من الإيام عوكر ب يجي لعند عنكوش و جايبلو غرض تئيل حاطوو ب طبونة سيارتو.
عوكر ب يوئف السياره إدام البيت هلي ساكن في عنكوش و ب يؤم ب يرن الجرص و ب يرجع ع السياره.
الأخ المغربي ب يطل من الباب ب يشوف عوكر آعد ب سيارتوو ب يعرف إنو هو هلي رن الجرص.
ب يؤلوو : " حَوِّل عنكوش عم يتحمم ما بَآَ إِلا يخَلِص "
عوكر ب يجاوبو إنو مستعجل بس إزا فيي يساعدوو ب حمل الغرض.
المغربي ب يسأل عوكر : " وينوا الغرض ؟ "
عوكر ب يجاوبوو : " ب الطبونه "
" أســـــــــكت " ب يصرخ فيي المغربي.
عوكر بيني و بينكن متل الأطرش ب الزفه.
" أسكت ... أسكت ع أيش يا مشحر ؟ " آل ب ألبو.
عوكر ب يؤل للمغربي : " إزا ما فيك عيطلي ل عنكوش خلي يحمل معي ... الله وكيلك ما فيني دلي وائف ب نص التريئ "
عنكوش ما خلص حمام إسانو الظاهر ما كفا غنيه " جص الطبيب لي نبضي " ل فهد بلان هو عم يتحمم.
عوكر مرا تانيه : " و لك تعا شوفوو يمكن منو تئيل بس ما بسائِب إحملو وحدَي و لك أحوَوا ب الطبونه "
المغربي : " أســـــــكت ... أســــــكت .... أســــــــــــــكت "
عوكر رح يخوت : " ولك شؤصتو ها الزلمه كل ما إحكي كلمه بي سكتني "
" الله يجيبك يا عنكوش و تخلصني من هالمصيبه الزرآ ... و لك الله يعينك يا عنكوش ع هالمصيبه هلي رازحآ ع صدرك "
عوكر : " يا أخي شؤصتك اليوم حِكَّيْتَك شي كلمه زايحا ؟ ... سبيتك ؟ فهمني "
إلا و ب يجي عنكوش : " شفي شبِكُن ؟ "
عوكر : " ب يؤلوو ل عنكوش عم نؤل ل صاحبك معنا غرض ب الطبونه ... " و بدو يكمل
ب يآطعو المغربي : " أســــكت ... أســـــكت ... أســـــكت يا وقح "
و فات ع البيت هو و عم ي تمتم و ي بربر الله أعلم ش عم يؤل.
عنكوش ب يدحك و ب يؤلوو ل عوكر : " هادا عم يسكتك ع كلمة الطبونه "
عوكر : " و شفيا كلمة الطبونه ؟ "
" عندون ب المغربي معناتا (عورة المرا الوريانية)
الله وكيلك رح يشيبني
طلع نص حكينا الألموني من خصر ل المغاربه و ب النازل "
" الحمد لله الذي عافانا مما إبتلى به كثيراً من خلقه (أصدوو عنكوش و عيشتو مع المغربي)"
عنكوش : " و لك ربك حميد منك سايئ سيارة فولز فكن متل هلي عند ل البآع
و لك هادك طبونتا من إدام كانت طلعت العورا الإدمانية
و لك يمكن كان هدر دمك "

Nader 3:16

09-03-2009, 10:08 AM

هههههههههههههههههههههههههههههههههههه

يأطع خملك يا شيخ جابر فرّطني من الدحك...هههههههههههههههههههههههههههههههههه:1 (40):

haitham

09-03-2009, 08:15 PM

والله في قصص اضحكت عليها من جوات قلبي شكراااااااااااااااااااااااااااااااا

جابر دملوك

13-05-2009, 11:44 AM

(68)
عوكر كان رَحْ يسُب
من كزا و طعشر سنة و بيوم من إيام رمضان كنت راكب أنا و عوكر مع عنكوش ب السيارة.
كنا ب تريئنا ع مركز إسلامي ب يعمل إفطار جماعي للعِزابِة.
ع التريئ ب يدخل وأت المغرب ف عنكوش ب يؤل :
" يا شباب دخل وأت المغرب صار فيكن تفطروا "
و الله وكيلكن ب السيارة ما في شي ب ينحط ب التم و لا حتى نؤطة مويه.
حبة علكة ما في ب جيبة حدا منا و لا حتى واحدة معلوكة من يومين.
و عنكوش كل دئيأتين يرجع يعيد و يكرر إنو دخل الوأت و صار فينا نفطر.
ما عاد في عوكر يستحمل ف ألوو ل عنكوش :
" ما معنا شي نفطر عليي ... ب نسُب يعني ت ينحسب إنا فطرنا ع الوأت "

Nader 3:16

13-05-2009, 12:57 PM

هههههههههههه...عأيش فطرتوا بالنهاية؟؟؟؟؟؟؟

مايا

13-05-2009, 08:46 PM

هههههههههههه
شكرا للاخ جابر
ايه هيك رجعوا حركوا المنتدى متل ايام زمان

جابر دملوك

10-07-2009, 04:39 AM

(69)
عوكر و شريط كشك (الله يرحمو و يحسن إليه)
عوكر ما بيحب يحكي ع التلفون كتير.
بس يطول شوية ب تبلش ترعا رئبتو و بيصير يعئص مدري كيف.
بيوم من الإيام بيتصل في رفيؤ هلي متل اللزآ مدا ما لَبِّصْ لَبِّصْ.
أسأل من الدِّبان الأزرء.
بينو و بن نفسو عوكر بيؤل : " منين جيتنا هاللزآ هلأ "
و بلش يدور ع حجه يتخلص منو ع بكير.
" شعم تعمل يا عوكر " بيسألو
عوكر بيرد : " عم إسمع خطبة ل الشيخ كشك ... أمااا شو شريط بيجنن "
" هات سمعنا لنشوف "
عوكر : " جات و الله جابا "
بيحطلو سماعة التلفون جنب المسجلة و بيروح يكمل شغلوا هلي كان عم يشتغلو من أبلة.
و بيمرؤ الوأت و عوكر بينسى رفيأو.
عوكر بيفوت ع الحمام أَجَلّكُون منشان ... و يتوضا.
ب هالوأت الضايع بيخلص الوج الأولاني من الشريط ع جملة " و طرق طارق الباب "
و رفيؤ ل عوكر مفتكر إنو عوكر عم يسمع معو و رح يئلب الشريط.
بينطر دئيآ دئيأتين ما بيعاود في يصبر بيصير يعيط " ولك وينك ... ون روحت .. ما تئلب الشريط "
و عوكر منو ب هالوارد عوكر ب المختبر.
بيتوضا عوكر و بيطلع هو و بيصير برات الحمام بيصير يسمع عياط من بعيد.
عوكر بيطل عن البلكون ت يشوف إذا حدا ع التريئ.
" لا و الله ما في حدا ... العمى منين عم يجي هالصوت "
عوكر بيوأف يصلي و هو و عم يصلي بيرجع بيسمع العياط من جديد ساعتا بيتزكر إنو تارك الدبانا الزرآ ع الطرف التاني من الخط.
مِنْ كُتُرْ ما دِحِك يمكن ما نحِسْبِتْلُوا الصلا.

محمد الكوسا

10-07-2009, 06:35 PM

هاك اليوم عوكر كان وائف مع رفئاتو بالجامع عم يحكو عن الموتيرات الا بيجي واحد وبيألن انو شاف ابل الصلاة موتير "متل الحصان" راكب علي تلاتة!!
المهم خلصو حكي و كل واحد راح بسبيلو و عوكر نزل ع طرابلس
هو و نازل بلائي السير عاجق عند كوع الحبلة فسأل واحد عالتريق شفي؟
الو هاداك في رانج ضرب ٣ ع موتير شلحن ع طرف الطريق!!
بس الحمد لله ما صابن شي!

flauritta

10-07-2009, 07:42 PM

هههههههه...شي بفرّط من الضحك..ههههههه..حطّولكن اسّن كم ؤصة..والله بيعملو جوّ و عجأة بالمنتدىhttp://forum.qalamoun.com/images/icons/icon10.gifhttp://forum.qalamoun.com/images/icons/icon10.gifhttp://forum.qalamoun.com/images/icons/icon10.gif

Nader 3:16

12-07-2009, 12:55 AM

عوكورة الصغير تلميذ بالمدرسة.....

ومرّة حبت الادارة بالمدرسة تعملّون حفلة للتلاميذ.....وطلبت من كل تلميذ يجيب معاو 1000 ليرة لبنانية كإشتراك رمزي عأساس.....

والله عوكورة حبّ يشارك بالحفلة متل رفؤاتاو....والها لأوماو.....

تاني يوم أمّاو عطيتو 2000 بدل ال1000 وحطتلاو كل الف بجيبة منشان ما يضيع....وقالتلو هادي منشان الحفلة و التانية منشان تشتري فيها عالفرصة.....

حطّ عوكورة الشنطة عضهراو و فتح الباب و ركد.....

وبعد شوية ما بيسمعوا العالم الا بكا ولد زغير....العمى شفاي؟؟؟؟ ركدت امو و ستّو لعوكورة ليشوفاو ما يءوم واءع عالارض او صايبو شاي....

شباك يا حبيبي؟؟؟؟ مين اتلك؟؟؟ ؤالت أمّاو.....

بوووووووووووواااااااااع بوواااااااااااااااااااع.....

ولك شباك عم تبكي؟؟؟؟

بوااااااااااااااع بوااااااااااااع _والبناية كلها رح تفيق_
بوااااااااااااع نسيت أي 1000 منشان الحفلة و اي 1000 منشان اشتري فيها....

وبس منشان هيك عوكورة الصغير كان عم يبكي ماو أكتر.

hadid

12-07-2009, 01:38 AM

هالعوكورة هو الجنرال نادر :p

flauritta

12-07-2009, 01:47 PM

عوكورة الصغير...ابن فشلان هادو؟؟
حلوة حلوة الؤصّة..http://forum.qalamoun.com/images/icons/icon12.gif

مايا

12-07-2009, 05:30 PM

ههههههههههههههههه
كتير حلوة ههههههههههه

اليمامة الحضرمية

25-07-2009, 01:22 AM

عوكر والشيفروليه

كان عوكر ياخد تاكسي من طرابلس على البترون تيرجع على بيتو بآخر النهار قبل ما يفتحو الأوتوستراد ...

وكان هالتاكسي بيطلع عدة ناسات ،، وخصوصاً عساكر،، وكان العسكري قبل ما يطلع بالسيارة، يسأل :"شيفروليه؟" والتاكسي يقولو:"ايه طلاع"

هلأ صاحبنا عوكر بما أنو شمالي وما خصوا بصوب بيروت ،، فكّر أنو نوع الراكب شيفروليه..يعني مثلاً ممكن يكون أرخص من الراكب العادي وأسرع "يعني الراكب يلي ما بيسأل"...

فخطر على بالو بيوم من الأيام أنو يجرّب الشيفروليه....قام وقّف تاكسي وسألو "شيفروليه؟" قالو التاكسي:"تفضل"

قام انبسط وقال يلا ظبطت معي....

وهو وماشي التاكسي وصّل على البترون ..بيقول عورك:"على اليمين اعمال معروف"......

بيقولو التاكسي:"خير في شي؟"
بيرد عوكر:"خلص وصلت"...

بيقولو التاكسي:" ما على أساس شيفروليه؟؟؟؟".......

عوكر:"ايه شيفروليه بس على البتروووووووون"........

(ملاحظة: ومن كم سنة تعرف عوكر أنو الشيفروليه هي منطقة ببيروت)

اليمامة الحضرمية

25-07-2009, 01:31 AM

عوكر سارق سيارة بو

كان عوكر بأول طلعتو ينطر أبو حتى ينام ويشفط السيارة.....وكان أبو يشتغل بشكرة الترابة بالهري...

ومرة من المرات عوكر سرق السيارة كالعادة وراح على الهري...

وإذ بيشوف سيارة نفس سيارتهم طالعة من حد شركة الترابة..... وصارت بوجو ماعاد فيه يروح مطرح "يعني انزرك"...

فقد ما عوكر خايف من أبو... افتكر أنو هيدا أبو يلي قدامو..وكمشو سارق السيارة...

ففتح الباب ونزل بسرعة من السيارة وهرررررررررررب عشان ما يكمشوا أبووووو..............

اليمامة الحضرمية

03-08-2009, 12:51 AM

عوكر وكتب كتاب بنتو

عوكر عندو بنت وحيده ... وكان باقي يوم على كتب كتابها (عقبال العزابة) ومتلبكين بالعزيمة ..قام نسيوا يعزموا ناس بيقربوهن...قام مرتو لعوكر قالتلو اتصل على التلفون وحكيهون واعتذر أنك ما قدرت تروح لعندهن على البيت...

قام استناول عوكر هالتلفون ودق على الناس تيعزمهن وقلون:"عبال فرح ولادكن،، لا تواخذونا عمنعزمكن على التلفون..بس اضطرينا أنو نكتب كتاب البنت بكراااااااااااااااااااااااااااااا"........................

جابر دملوك

07-08-2009, 03:23 AM

(70)
عوكر و البيتزا
من شي 18 سنة تأريباً كان عوكر و عنكوش عَزِّيبِة و ساكنين مع بعضون ب أَجْنَبْيَة.
ب ويك آند من ال ويك آندات بيجي لعندون كرحوش.
بآ من عشية بيطلبوا بيتزا كبيرة و عادة البيتزا بيؤصوا 8 خرطات.
بيحطوا البيتزا و تنك البيبسي و يا كريم " بسم الله "
هلأ عوكر كان مخطط من أبله عدنوا إنو ياكل خرطين زيادة.
يعني 2 لعوكر و 2 لعنكوش و 2 لكرحوش
و ال 2 البائيين بيطلعوا ل عوكر ب التعصيب(حسب تخطيطوو)
ف شبيعمل أد منو منجوس بيحمل الخرطة و بياكل الطرايا فيا و بيترك الآسيين لبعدين.
عنكوش بيحس علي ما هو عاجنو و خابزو و بيعرف كف بيفكر.
عوكر منو عارف إنو عنكوش اكتشف الملعوب ف بآ تارس راسوو ب هالبيتزا و حتى ما عم يشارك ب الحديث.
هو و بيخلص الخرطين تبعينوو و بيمد إيدوو ت يستناول التالتة بيلؤطلو عنكوش إيدوو و بيؤلوو :
" و رب إسرافيل هلي ناطر ت ينفخ ب الصور
ما بتدؤ بخرطا من الخرطات البائيين أبل ما تأرئش الحطبات هلي حطيتون ع جنب
و لا سنانك حليب نكغا أبآ أبآ "

مايا

07-08-2009, 12:00 PM

شكرا لكم على هذه القصص المفرحة وننتظر مزيدكم

جابر دملوك

09-08-2009, 04:56 AM

(71)
عوكر و عويضة
ب يوم من الأيام أعد عوكر و عنبر يحلوا الكلمات المتقاطعة.
عم يأدفوا طالع نازل ب ألم الرصاص و مبسوطين.
عنبر عم يؤرا : " شاعر سوري في المهجر (9 أحرف) (أول حرف ن) و (الخامس ع)"
عوكر : " نجيب عويضة "
عنبر : " متأكد ؟ "
عوكر : " و لك كف مني متأكد ... ولك آريلوو كل ديوانوو "
عنبر : " خلينا نشوف عمودي (الحسام ) (يعني السيف ) هدا معناتا (الحرف التاني بالشاعر هو س منو ج) "
عوكر : " يحريئ حريشك ع السرعة خبصت أصدي أوول نسيب عويضة "
عنبر : " و هلأ متأكد ؟ "
عوكر : " و لك عم ألك كتبوو معبيا المكتبة عنا "
عنبر : " وئف هون تؤلك ولك بت عويضة أصلاً كلون بيشتغلوا ب الأماش
و أمي هاك اليوم نزلت جابت أماش ت تعمل بردايات و جابت كمان زرار وخيطان و دبابيس "
عوكر : " طيب هلأ ب تشوف إنو حكيي مظبوط (طيب شفي إسا عمودي بيساعدنا) "
عنبر : " طعم الحنظل (حرفين) (يعني مر) (معناتا إنو موو عويضة ) "
عوكر : " يا الله ... ولك كف راح عن بالي إسموو ع المظبوط
مع إني آريلوو كل أصايدوو و هاري كتبوو بن إيديي
(هادا نسيب عريضة ) "

flauritta

12-08-2009, 03:48 PM

بارك الله بكم..مهضومةhttp://forum.qalamoun.com/images/icons/icon10.gif

الزاهر

25-10-2009, 02:24 PM

عوكر والسجود للنواب

مرة من المرات عوكر هالمعتر آلولو بدنا ننزلك عند النائب دعبول نعملك واسطة تصير عامل نظافة بالبلدية. فاقتنع بالفكرة لقلة حالو وأموالو واتكل على وعود هالوساطة وهم بالنزول معو لعند النائب دعبول.

هنة وعالطريق بيألو صاحبو : ليك يا عوكر، هاد فخامتو دعبول بيحب الوجاهة وهالأصص ... فبدك بس تفوت لعندو تسجدلو وتترجاه وتتذللو وكلو بيمشي ساعتها.

بيألو عوكر : أنا بحياتي مني ساجد سجدة لله بدي هلأ اجي اسجد لواحد متل هاد منشان اشتغل عامل نظافة !!! ... بلالي هالشغلة وهالمذلة أحسن بألف مرة !

hadid

26-10-2009, 01:02 AM

ههههههههههههههه هالهوكر صاحب مبدأ !!

جابر دملوك

13-12-2009, 05:46 PM

(72)
عوكر و الإستخارة
سِمِع عوكر إنو أحسن للواحد إنو يِسْتَخِير أَبل ما يؤم بأَي شَغْلِة فِيا قرار مُهِم ب حَياتَو.
آلُولَو إزا كان و لا بُد لازم تُحفظ الدعاء و تصلي ركعتين نافلة و أبل ما تسَلِم ب تؤل الدعاء.
عوكر كِتِب الدعاء و بلش يحفظ فاي و وأتل حس بحالو إنو حِفْظو منيح آم و بَلِّش ب الصلا.
دخل عوكر ب الصلا و وأتل خَلِّص الإبراهيمية بَلِّش ب دعاء الإستخارة و بَدَل ما يؤل :
" فأنت تعلم و أنا لا أعلم "
عِكِس الجملة و آل :
" فأنا أعلم و أنت لا تعلم "
و فوراً عِرِف حالو إنو غَلِّط ف آم سَلِّم و بَلِّش يستغفر رَبَوو.
و آل عن حالوو :
" و لَكْ دَنْبَر و بَدَّك تدَّلَك دَنْبَر ...
10 كِلْمَات ع بَعْضُون مَنَك آدِر تحفظون مِتْل العالم و الخَلْأ ...
مِنْ أَوِّل الدُعاء اْرَطْ كُفْرِية أَدْ جَبَل تُرْبُل ...
إنت خَرْج إستخارة إنت ... "

جابر دملوك

25-12-2009, 06:18 PM

(73)
عوكر و الطِّلَّابِة
صلَّآ عوكر المغرب ب الجامع و الآيات كانت عن توزيع التركة ب سورة النساء
و كانت قراءة الإمام حلوة كتير و الجو روحاني و كلو تمام.
حمل عوكر صباطوو
و حط إجرو الشميل ع فردة الصباط الشميل
و لبس الصباط اليمين ب إجرو اليمين
و رجع لبس الصباط الشميل ب إجرو الشميل
و هيكه بيكون طلع من الجامع ب الشميل و بلش لبس الصباط ب اليمين.
ع باب الجامع في طِلَّابِة مَرَا متحجبة : " من مال الله يا أخي"
عوكر بيشيل 1000 و بيعطيا و هوا مرتاح الضمير و مبسوط ب عمل الخير.
بيُبْرُم وِشَّوو و بدو يمشي إلا و في طِلَّابِة تانية متحجبة و مغَطِية وِشَا.
عوكر بيمُد إيدَو ع جَيبتَوو و بيستناول 1000 تانية ت يعطيا هِيه
و أبل ما توصل لإِيدا بيتِضِحْلَوو إنو 1000 ما كانت 1000 كانت 5000.
بدو يرجع إيدوو و ما لُو عين آم عِطِيَا هِيه و هُوا مِسْتِحَي.
هلأ الطِّلابِة الأولانية شافت إديش عطيا و إديش عطي التانية ف ما فيا تدلا ساكتة.
ف شآلت : " آ عطوا أكتر ت تكَتْرُولا المرسيدسات و البنايات هلي عندا "
عوكر شآل : " أَكَلْنَاهَا "

flauritta

07-02-2010, 02:59 PM

ههههههه...الله يعينو لعوكر
http://forum.qalamoun.com/images/icons/icon10.gif

مايا

07-02-2010, 03:02 PM

هههههههههه
مشكور خيي جابر نوطرين لمزيد

جابر دملوك

20-12-2010, 11:39 PM

(74)
عوكر غلط بالإسم بس قَلْقِل البَا.
بعد غياب طويل رجع عوكر ع الضيعا.
و بيوم من الإيام بعد صلى العصر ب العزم بيطلع عوكر برات الجامع هوا و إبن خالوو.
بيصدف إنو أُوُّو ل الشيخ رائد مارآ من إدام الجامع ف بتوأف ت تسلم علاي.
" الحمد الله ع السلامة يا عوكر
كيفك كيف الصحا
و الله طولت الغيبة علينا "
" الله يسلمك و يسلم محبينك
و الله الحمد لله
الله يطول ب عمرك و يحفظك
يا أم رائدراتب "
(هلأ هوا و وصل ل همزة رائد
تزكر إنو راتب هوا الكبير عندا مانو الشيخ
و بسرعة واحد ع مليون من التَّكِّه
حط البا محل الدا و قلقل البا منيح
بس ما إدر يخبي ع إبن خالوو هلي كان بلزأوو)