الخطيبة من برات القلمون ؟

انا بفضل انو الشباب يتزوجو من القلمون ,,لانو بالضيعة كل العالم بتعرف بعضها ,,,,يعني انا اللي قصدي علي انو الشاب بيقدر يعرف اخلاق البنت والبنت بتقدر تعرف اخلاقو للشاب

قال رسول الله صلى الله عليه وسلم"تنكح المرأة لأربع: لمالها، ولحسبها، ولجمالها، ولدينها، فاظفر بذات الدين تربت يداك".

(على فكرة هالمقطع مش بس عن شباب القلمون بل بالاجمال)
وانا ملاحظة انو بهالايام كل الشباب تقريبا بيتزوجو لجمالها....يعني قليل كتير انو يطلعو على بنت متحجبة وحتى ولو كانت المتحجبة احلى بكتير من المظنطرة,,بيقولو لأ هلق بتزوجها مانا متحجبة وبعدان مع الوقت بقنعها بالحجاب ....وبعدان بياكل صابيعو الشب ندامة
واذا كان الشاب غني ما بيطلع الا على العيلة ,,بتناسبو ولا لأ...

(وهون الجواب على السؤال رح بيكون سامعة عنو من كتير اشخاص صايرة معن القصة)
ليش الشاب بيتزوج من برات القلمون؟؟ (على فكرة انا عم احكي عن الشاب اللي بدو يتزوج , يعني مني عم اقصد الشاب اللي بروح برات الضيعة وبعدان قلبو بيدق وبدو يطأ حنك وما بعرف شو,,انا اقصد اللي بدو يطلب عروس)
في شباب بالضيعة عايشين على قد حالن بيقولو اذا جيت بدي اطلب فلانة من الضيعة رح تقول لأ لاني انسان عايش على اد حالي يعني المعاش يا دوب يكفي اكل وشرب واحيااااااااان يشتري تياب ,,فأحسن شي اتزوج وحدي من برات الضيعة وبتقبل انها تعيش معي سواء كنت معتر او مليونير ...
واذا في حدا عندو جواب تاني ليش الشاب القلموني بيتزوج من برات الضيعة يقلنا منشان يزيدو المعلومات...

(وكمان هون الجواب عن السؤال رح يكون سامعة عنو من عدة ناس صايرة معهم القصة)
ليش البنت القلمونية بتتزوج من برات الضيعة ؟؟؟
اول شي يمكن ما حدا طلب ايدها من الضيعة ,,,تاني شي يمكن اللي طلبها من برات الضيعة يكون معو مصاري ,,,
كمان اذا حدا عندو جواب تاني يزدلنا معلوماتنا

كمان انا سامعة كتير حكي انو الشاب بيجي بدو يطلب عروس من القلمون ,,بس يصير وقت الحكي بالمهر وما بعرف شو,,,بيقلو الشاب لابوها اديش بدكن تعملو المهر,,بعدان الاب بيقول تقلها ذهب ,,,يعني انا ما بعرف شو المقصود ,,بس هالاب يتخيل انو هالشاب ابنو شو بيكون موقفو ساعتها؟؟؟

على فكرة منشان ما حدا يعلق على كلامي انا زوجي من القلمون وبكون ابن خالتي ...

الحمد لله والصلاة والسلام على رسول الله أما بعد : تعليقا" على الأخت ندين أنا أعرف عدد لا بأس به من الشباب كان سبب خطيبتهم من برات القلمون هو أنهم تقدموا لعدد كبير من الأخوات المحجبات الحجاب الصحيح لكن كان الرفض سرعان ما يأتي من الأخوات بحجة أنهم سيكملون علمهم علما" بأن أولائك الشباب ليس لديهم مشكلة في أن تكمل علمها وعلما" أن الشباب لديهم البيت والوظيفة و... أنا ارى المشكلة في الأخوات وليس في الشباب وأود أن تتكرمي علينا بإيضاح صريح حول هذا الرفض بناء" على أنكي مررتي بمثل ذلك السن وما هو الحل مع تلك الأخوات علما" أن الرسول عليه الصلاة والسلام يقول إن أتاكم من ترضون دينه وخلقه فزويجوه
فأين هو هذا التطبيق لأمر الرسول عليه الصلاة والسلام أي لأمر لله عز
و جل.
سوف يتبع إنشاء الله

أخي الكريم بسام... أحب أن أنبهك إلى أن تنوين الفتحة ليس " ولكنه ـً .. فقد لاحظت كثرة استعمالك للهلالين مكان التنوين وهو يسبب بعض التشويش على القارئ... ويمكن أن تحصل على الحركات من خلال الكبسات التالية:
الفتحة = شيفت مع ض
تنوين الفتح = شيفت مع ص
الضمة = شيفت مع ث
تنوين الضم = شيفت مع ق
الكسرة = شيفت مع ش
تنوين الكسر = شيفت مع س
السكون = شيفت مع ء
الشدة = شيفت مع ذ
وبارك الله بكم...

السلام عليكم
مشكور كتير يا أخ عمر لكن ما علقت على المضوع أنا بهمني رأيك

هو الموضوع صار قديم.. وأكل عليه الدهر وشرب.. قولة ما بقولو... وكتار يلي حكيو بالموضوع.. وفي منن أحسن مني وأفهم مني وأوعى مني وأكبر مني... بعدان أنا ما فيني اعطي كتير رأيي بهالمواضيع.. هلأ مرتي صارت معي بدبي... يعني الحبل عالرقبة.. ما فينا نلخبط... بعدان.. أنا رجال قولة الشامي... ما منخاف من نسوانا...
بس إنت بتعرفني؟ أو أنا بعرفك؟؟؟

انا بنت من القلمون و احب ان اعلق على موضوع الخطبة من برات القلمون.
أنا من خلال معرفتي ببعض الشباب المتزوجين من برات القلمون, سواء كانوا من الأقارب او الأصدقاء, فبكل موضوعية بحط الحق عالبنات.
هون البنت بالقلمون بس يتقدملا عريس من الضيعة بتصير تحط شروط تعجيزية : مهر خيالي, شقة باسما, سيارة اخر موديل.......... و كأنوا الله ما خلق غيرا.
أما بس تشوف شب غريب من برات القلمون بتصير بتركض ورا لحتى يقبل يتزوجا و بتتنازل عن كل شروطا و بتصير تحكي عنو قدام العالم و تعملوا متعلم اكتر من اينشتاين و غني اكتر من اوناسيس و ملك جمال.......... و بالأخير بعد ما يتم الزواج بتندم و بيصير بدا تتطلق.
عن جد معادلة غريبة عجيبة.
على الفكرة نفس الحكي بينطبق عالشباب يللي بيخطبوا من برات القلمون.

يا عمي أنا ما عم هاجم نات القلمون ، بس يلي عم قولوا انو كل واحد يخد البنت يلي بحبها .

يعني أنا لما بحب بنت بكون عجبني فيها صفات معينة ، شكلها ودينها وأخلاقها ، ويمكن اتعرف على بنت خارج القلمون بعملي وتعجبني ، فوين المانيع من اني اتزوزها ، وليش بس كون ماشي بالطريق بسمع الناس عم تحكي عليي ، هادا يلي آخد الغريبة ....


وبعدين بنات القلمون ، بلا مؤاخذة ما بينحملوا ، من ناحية الكزار والهوشنة ، والتشليف ، والمهر وطأ الحنك ... ليس هذا ما يريد شبابنا .

أكيد بالقلمون في آوادم ، يعني بعرفلي كم واحدة ، بيطلعوا شي 5 أو 6 ، بس هدال طبعا ما يطلعوا برات البيت يتصهصنوا بالطرقات متل ما بيعم كتار من بنات القلمون اليوم ، وللأسف بعضهم محجبات ، على كل يلي بدوا يتزوج يراسلني ، -هذه مش مزحة أنا بنصحوا ، وبتضلها بين وبينو- .

الله يخليك يا ريس.....وأكتر شي عجبني بردك.....أخر فقرة.....إنك عم تحكي جد.....ومستعد تقدم النصيحة.......لأن عنجد بينأصنا كتير عالم هيك!!!!

وأهلا وسهلا فيك من جديد.......ولا بئا تتركنا هالأد.....ما فينا على فراقك مين ما كنت تكون!!!!

ولك الله يحظفك يا معلم زاهر ، وين إيامك انت ، كيف حالك ، وكيف هالجامعة ، هلأ طالع على التالتة ؟

اقتباس:

---

المشاركة الأصلية كتبت بواسطة الريس

ولك الله يحظفك يا معلم زاهر ، وين إيامك انت ، كيف حالك ، وكيف هالجامعة ، هلأ طالع على التالتة ؟

---

الله يخليك يا أبضاي......يا زعيم الأبضايات.......
والله.....أيامي بين هالبيت ونتوفة الكزار.........حالي نحس متل هالبلد النحس.....لكن الحمد لله.....كلشي من الله منيح.........أما الجامعة.......أنا بالعلوم.......بعتقد هاد بيكفي........

بعدين تعا لهون....لسا أسبوع بالتمام...وبيصير عمري 19......شايف حالي ختيار......بس مش هالأد........آل طالع عالتالتة آل......لا لا لا لا ......هيك كبرتني كتير.......هههههههههههه......طالع عالتانية يا زعيم!!!!.....وإن شاء الله تمضي على خير.....ونطلع عالتالتة!!!!!

فيك تؤلي دوووع ع أيش يا معلم مشكلجي...
شكلك أكلك شي لبطة مرتبة من شي بنت...من شان هيك معأد من النسوان...

اقتباس:

---

المشاركة الأصلية كتبت بواسطة وسيم غنوم

أما بالنسبة للفتيات في القلمون ، فليتفضلو وليتزوجوا من خارج القلمون ، فهناك يرضون بالعيش على الحصير ، أما حينما يتعلق الأمر بشباب القلمون ، فكلهن مثقفات لا ينتقلن إلى الحياة الزوجية دون الحصول على شهادة الدوكتوراة كحد أدنى .

وأنصح نصيحة أخيرة ، فلتعلم كل فتاة ، عندما يأتيها الخاطب الأول ، أنه قد يكون الأول والأخير ، وأنها أحلامها التي رسمتها لمستقبلها قد تبقى مجرد أحلام ، فالعرض كثير والطلب قليل .

---

كلامك جواهر يا حج
يعني هيدي صارت ظهرة باخر فترة انو ازا بيتقدم للبنت شب من القلمون بتصير البنت مفتكرة حالها ماري انطوانيت .............................
على كل حال الله يستر على الجميع

أهلا وسهلا بالأخ رامي قزيحة ، وأتشكره على هذه المشاركة الراقية ، وسأحرص إن شاء الله على مناقشة مراحل الخطوبة مرحلة بمرحلة ، ولكن علي أن أقسم هذه المراحل قبل ...

يا الله كتبت رد وانمحى كلو رح حاول عيد

أريد فقط أن أعلق على مسألة رفض الفتاة للشاب المتقدم مما يحمله على الخطبة من خارج القلمون
ذكر أن رجلا أتى إلى الرسول صلى الله عليه وسلم يسأله الإصلاح بينه وبين زوجته فامرأته كانت مصرة على الطلاق ....فعندما سأله الرسول عن السبب قالت له أنها رأت زوجها مع مجموعة من أصحابه فكان أشدهم سوادا وأقصرهم قامة وووو وقالت أنها لاحاجة لها به فلم يعب عليها الرسول وكان لها ما أرادت
والشاب عندما يتقم للفتاة يغفل أنه باختياره لهذه البنت بالذات قد رفض أخريات فلماذا يحق للشاب أن يختار ولا يحق للفتاة أن تختار زوجها
وحديث إذا جاءكم من ترضون دينه... ليس معنهاه أن تقبل الفتاة بأول طارق يطرق بابها
قد يكون المتقد شابا على خلق ودين ولكنه يفتقد لميزة أساسية بنظر الفتاة كأن يكون غير مهتم بشكله أو لياقته أو أنها بعد أن جلست معه وجدته ثقيل الدم أو أوو والأمثلة كثيرة أو أن أهلها لم يعجبوا به فرفضوه من دون إخبار ابنتهم كما قلت الأمثلة كثيرة
أما مسألة الخطيبة من خارج القلمون فبرأيي أن الأقربون أولى بالمعروف وبنت ضيعتك أولى من الغريبة إلا إذا تعلق قلبك ببنت من خارج القلمون فهذا أمر آخر وليتذكر كل منا أننا عندما نتحدث عن بنت القلمون نعني بها الأخت والخالة والعمة وووو فهن أولى من الغريبات

الله عم يجازيك يا أم سفيان مشان هيك عم يمحوا يلي عم تكتبيهم ، احنا ما عم ننكر انو البنت لها حرية الاختيار بنوب ، بس يلي عم نقولوا انو بنات القلمون ما بق عم يعجبهم العجب ، وما عم تطلع الشغلة إلا براسهم ...

بكون الشب متل القمر ، ومتعلم ومهذب وديين وموظف وعندو بيت و... بيطلع لحتى يطلب البنت ، بضلهم يلفو ويدوروا ، والله يا ابني ما في منك ، وانت واحد مهذب ، ومتعلم ودين ، واهلك جماعة أوادم وجدك كمان آدمي ، وأبو لجدك ، وجدو لجدك ، وجد جدك و... بتسمع كل شجرة العيلة ، وبالآخر بقولولك بس بدها تكفي علمها ، يعني ليسانس وفهمناها ، وبعدين ...؟؟؟ يعني ناقص يقولوا بدنا نشتغل كمان ، ما فاضيين نتزوج !!!

البنت لها حرية الاختيار والشب كمان عندو الاختيار ، ما مضطرين شبابنا ، يطبلوا على كل بواب القلمون لحتى يلائو مرا دينة ومهذبة وحلوة وفهمانة ... ما في أكتر منهم برات القلمون ، وبيستمنو كمان

والله يا ريس من برات القلمون ولا من جواتها ما في مشكل المهم البنت تكون كويسة ومتربية وعلى خلق ودين بالاول كان يحقلنا نقول وليس طلع لبرة الشب وجاب واحدة من برات ضيعته لان كانو بناتنا بينضرب فيهن المثل بس للاسف بهلايام الوضع اختلف وصار المثل بينضرب فيهن بس بالنقيض المهم انا يلي بدي قولوا انه مش كل بنات القلمون متل بعض ذي ما صابيعك مش كلهن متل بعض بس وفيه بنات قمة الالتزام والتدين والعفة بس بالنهاية القلب وما يهوى والمهم هوة انه تكون مسلمة وملتزمة ومتربية سواء كانت من القلمون او من الصين
وبالنسبة للمطاليب يلي حضرتك تفضلت قلتها فما بدنا نضحك على بعض ولا نتسلى يعني متل ما بالقلمون عم يطلبو كمان بنات برة منهن مقصرين واذا نحنا بدنا رطل بنات الغرب بدهن رطلين يعني ما فيك تناقش بهلموضوع حتى ما تطلع غلطان واذا ما جربت اسأل حدن مجرب وبتشوف شو مطاليب البنت الغريبة
وفي نقطة كتير مهمة بدي قلك اياها انه للاسف في كتير شباب بلقلمون بيفكروا بطريقة ساذجة وهية انه بنت الغريبة يا ساتر درة تحفة بيبقى راكد وراها بس لانها غريبة وشو بدك مع العلم انه ما فيها شي غير عن بنت ضيعته
يعني معليش نفكر بمنطق شوي وبالنهاية انا معك مكان ما القلب بيشك رح نوقع بس ما نبرر وقعتنا ونحطها بضهر غيرنا
والمهم شو شو؟؟؟
المهم تكون مسلمة ملتزمة وعلى خلق ودين وربي يوفق الجميع

رح نعمل شحنة للموضوع ..لحتا يلي ما عطي رأيو يعطيه.
ويا هلا بالريس.....و ان شاء الله تكون عم تشتغل منيح.

شو يا ندور كيفك والله منك هين ها هالشحنة أكتر من 978897volt

انا رايي متل wishes