الخطيبة من برات القلمون ؟
كيفكم يا جماعة ؟
أنا حابب اسأل سؤال ، ليش بالقلمون اذا الواحد اخد واحدة من برات الضيعة بيعتبروه عمل عملة كبيرة كتير كتير وما بتنغفر ، ببلشوا بالحكي على الزملة ولك بينشحوا عرضو نشح ، " ليش ترك بنات الضيعة ؟ وشفاتير يلي آخدها أحلى ؟ وما شافينيها كيف قالبة سحنتها استعفر الله العظيم -بالعين- ؟ وبعد كل هذا يا رب بلا جبر على الناس و...."
يعني أنا بدي اسأل شو فيها اذا الشب عجبتوا بنت من برّات القلمون ؟ انو ربنا خلق بنات القلمون وما خلق غيرهم ؟ يعني ليش بدنا نجبر الشب بشي هو ما بدو ياه ، ما بيمشي الحال هيك أبدا ، يلي بتعجبوا بنت وما بيخدها ولك رح يضل يفكر فيها لحد ما يموت ، ولك أصلا سألوا الريس ، الواحد بس يوقع متل محسوبكم هون ، بصيروا كل البنات عندو بشعين ، وببطل يشوف الا واحدة وبس ، وبصير لاطي اذا حدا غيروا بيطلع فيها لحتى يعلق معو ، وبضل ناطر اليوم يلي بيخدها وبيتزوجها فيه ، بعد ما تعرف عليها عن قرب وعرف كل شاردة وواردة عنها ، وبس يتزوجها بكون مفكر حالوا انو عمل انجاز كبير كتير وملك الدنيا كلها ، لأنو حصل على أغلى شي بالدنيا ، فببلشوا اهل القلمون يبخعوا فيه ، ويعيبوا هالزواجة عليه .
عنجد لازم الأجيال ما تتوارث العادات والتقاليد هيك من دون ما تفكر وتعمل قراءة لها .
وهيك شغلات ولازم الناس تقصر لسانها فيها ، -يعني بالأخص مع الريس- لأنو بهذه الإيام الشباب أكثر من البنات بكتيير ، وبالتالي عم تكتر العنوسة و...... وفي بنات من القلمون عم يعنسو ، وكل واحد عنست بنتو أو ما جاها عريس حلاوا متل الريس ، بحط الحق على شباب القلمون -وبالأخص الريس- بقللّك الحق على هالكلاب شباب القلمون ربينا هالبنت وجبنالها أحلى تياب ، وخليناها اتذكر و... ودفعنا عليها ما فوقنا وما تحتنا ، لحتى بالآخر تقعد بلا زواجة ، وببلش يحط الحق على شباب القلمون .
طيب انو انا بدي اسأل بنات القلمون هنة ولاد البطة البيضا ، ويلي مش من القلمون ولاد البطة السودا ، انو ليش لحتى البنت الغريبة اتعنس وبنت القلمون لأ ؟؟؟ بعدين الدنيا قسمة ونصيب ليش كلو بتحطوا الحق فيه على الريس ، شو هو الريس بدو يخد كل بنات الضيعة ؟؟؟ الريس بأيبل على الحب وعلى واحدة تكون ريسة بتفهم عليه وعلى عقلوا ، ويمكن تكون من القلمون ويمكن تكون من برات القلمون ، بس الأولة خلص ، هيأتنا رسينا على برات القلمون ، تنشوف التانية من وين بدها تكون .
فضبوا لساناتكم يا اهل القلمون أحسن ما يأطشلكم هية الريس ، وضبوا بناتكم ، لأن يلي لها نصيب رح يجي على ألب بيتها ، ويلي ما عندها لو قلعتوها بالظلط ومشيتوها ما رح يجيها .
وانتو يا أجيال ما تتوارثوا التقاليد هيك ، فكرو أبل ما تحكو الكلمة ، انتو جماعة متعلمين ، ما تفكروا بطريقة غبية .
وانتو يا شباب أيبلو على رزقكم وما تحطو حدود لحالكم أبدا ، لا ضمن العيلة ، ولا ضمن القلمون ، أيبلو محل ما بدكون وما تسألوا عن حدا ، وبس تلاقوا القمر ، اتعرفوا عليه -بس أكيد رح يكحشكم لأن الريس بحبوا ، وبالدنيا كلها ما في غير قمر واحد ، فشيلوا فكرة القمر من راسكم ، لأن الريس بدو يخطبها- اتعرفوا على البنت يلي بدكون ياها ، وحبوها واخطبوها و ما تسألوا عن حدا أبدا .
رد مع اقتباس
كيفكم يا جماعة ...
المشاركة الأصلية كتبت بواسطة وسيم غنوم
