ظاهرة غريبة

[سحر الشرق]

اول شي السلام عليكم
ما رح طول عليكن ورح ادخل دغري بالموضوع
ليش الشب المتدين او يلي مسمى حاله هيك عم يركض علبنت المكشفة وياخدها وقال شو بيحجبها ومنلتفت شمال ويمين منلاقي المحجبات احلا واحسن اخلاقيا ودينيا وقد يكون جماليا
ممكن تجاوبوني عهلسؤال يا شباب ؟؟
وقال شو سمعو هلنكتة منسأل الشب يلي بيبقى عاملي حاله من سلالة الخلفاء ليش يا ابني خطبت واحدة لا ملتزمة ولا عندها اي فكرة عن الدين وتركت المحجبة بيقلك : والله انا بس هدفي خدمة الاسلام انو لان اذا خدت واحدة مكشفة وحجبتها بيلحقني حسنات يا سلام عنجد جواب مقنع الله يبارك فيك اقحمتنا يا شببلك
طيب وين عقلك يا ملتزم او يلي بيقول عن حاله بيعرف دينه وينك من حديث الرسول اللهم صلي عليه تنكح المرأة لثلاث...بس لا حياة لمن تنادي
وقال شو هلبنات فالتة منها عم تتحجب منها عم تلبس ما اذا انت يلي راخيلي هلدقن راكض تاخد واحدة مكشفة شو تركت لغيرك
يا ريت اسمع اراءكن وتعليقكن لعل وعسى اقدر افهم منكن شو القصة

[مصطفى معتوق]

بدك رأي يلي بيسمو حالن دينين بس او انا كمان فيني اعطي رأيي بالموضوع

[Rami Kozayha]

ليش يا ابني خطبت واحدة لا ملتزمة ولا عندها اي فكرة عن الدين وتركت المحجبة بيقلك : والله انا بس هدفي خدمة الاسلام

ليست خدمة للدين بشيء بل هي وسوسات إبليس.

[الريس]

تاني مرّة لما قللك عايشة بالكهف ابقي صدقيني ، عم تفترضي واقع مش موجود ، وعلى أساسو عم اتهاجمي الشباب ، وعم تحللي وتفكري وتوجدي حلول ، وبالآخر الشي يلي عم تحكيه ما في منو بالمرّة .

أنا بدي افهم وين شايفة شباب القلمون عم يخدو منظطرات ؟؟؟ ولك يلي بيسمعك بقول هدال ما بينلمو من الكاباريات ، شباب القلمون ما في منهم يا بنتي .

أنا بطالبك على المكشوف ، اتفضلي هلأ جيبيلنا أسماء الدينين يلي اخدو بنات منهم ملتزمات ، اتفضلي تنشوف ، واديش نسبتهم ، يعني اذا هذه الظاهرة موجودة بنسبة 0.0000098 بالمية بينما التظليط والتمشكح والتصهصن يلي عند البنات موجود بنسبة 89 بالمية ، فمنترك المشكلة الكبيرة ومنجي على المشكلة الصغيرة ؟؟؟

بعدين تعي لهون لشوف ، انتي شدخلك بالشباب ، كل واحد حر يخد البنت يلي بدو ياها ، وبس اتصير زوجتو فهو يتحمل مسؤوليتها ويجب عليه انو يغطيها ، وهذه أمو خاصة بالشباب بيعرفوا يحلوها ويناقشوها مع بعضهم .

أنا بالنسبة لي بفضل البنت المحجبة أكيد ، بس للأسف بالقلمون في كتير محجبات ظاهريا فقط ، وفي كتير بنات غير محجبات أخلاقهم متل مية الدهب ، بس بسبب ظروف عائلية أو غيرها ما قدروا اتحجبوا ، ولك مين قال انو كل واحدة مانا محجبة صارت بلا أخلاق ، ومين قال انو كل واحدة محجبة صارت خديجة وعائشة اللهم ارضى عنهم ، ولك في محجبات ما بيطلعوا ادام تاسومة بعض غير المحجبات ، أنا ما عم اتهجم على الحجاب بل عم اتهجم عليون لأن ما احترموا هذه الفريضة الربانية الطاهرة ، اتصوروا انو في بنات محجبات بسلموا على الشباب بلإيدين ، بينما في ناس مو محجبات ما بيقبلوا يضحكوا بيوج شب ، اتصوروا انو في منهم بيتحجب بالقلمون وبتلاقوهم بالهوري مندارين بالبيكيني ...

خلوها مستورة أحسن ما انبلش بالفضاييح ......

[سحر الشرق]

يظهر انتو انت اللي بعدك عايش بقلب الخسة او انك مغترب ومنك شايف الا الصورة يلي كانت براسك انت وطفل عن القلمون
المهم
اولا: ولك يلي بيسمعك بقول هدال ما بينلمو من الكاباريات ، شباب القلمون ما في منهم يا بنتي .

بقلك للاسف يلي منن عم ينلمو من شبابنا كتار ............... وسألأ بتعرف وما في شي مخبا !!!!

تاني شي:اتفضلي هلأ جيبيلنا أسماء الدينين يلي اخدو بنات منهم ملتزمات ، اتفضلي تنشوف ، واديش نسبتهم ، يعني اذا هذه الظاهرة موجودة بنسبة 0.0000098
ما رح قلك الا انهن بنسبة 50 بالمية وفيك تسأل .........!

تالت شي: المشكلة انك بتناقض نفسك بنفسك(((
بعدين تعي لهون لشوف ، انتي شدخلك بالشباب ، كل واحد حر يخد البنت يلي بدو ياها ، وبس اتصير زوجتو فهو يتحمل مسؤوليتها ويجب عليه انو يغطيها ، وهذه أمو خاصة بالشباب بيعرفوا يحلوها ويناقشوها مع بعضهم .)))))
بعدين هية البنت بس مرتو يعني اخته وامه وخالته ووووو هيدول معليش يفلتو على حل شعرهن من دون لا حسيب ولا رقيب........!!!!
ليك يا ريس بقلك شغلك بس طالما كل واحد منكن عمبيقول اللهم نفسي نفسي بعمرها ما تتصلح ...!!!
انا معك انه البنت يلي محجبة ممكن تكون محترمة وهيدي حقيقة بس تتقلي بتعرف دينها وبتخاف ربها فرح قلك لا وشي تاني لا طاعة لمخلوق في معصية الخالق ويلي بدها ومقتنعة ما حدن في يوقف بوجها وما بعتقد انو ابو جهل ابوها ولا فرعون عمها وفهمك كفاية فلا تضحكو على حالكن ولا تخلو هلبنات يشوفو انك مصدقين كذبهن على نفسهن وهيك بدل ما توعوهن بتغرقوهن اكتر
يلي مندارين يا ريس بالبيكيني معروفين وكل واحد بيلحق يلي على شاكلته
واخر الشي بقلك الاختلاف في الراي لا يفسد للود قضية وانا وانت منا مختلفين على النقاط الرئيسية بس كل واحد منا عم بيحاول يعالج الموضوع على طريقته ويحسبها حسب وجهة نظره

[الريس]

اول شي وان كنت مغترب بس بعرف أكتر منك بالقلمون ، وبعرف كل شي عن شباب المساجد في القلمون تقريبا وبعرفهم واحد واحد ، وحكيك عن ينلمو وما ينلمو بأكد انو ما في منو ، وثانيا هل 50 بالمية يلي عم تحكي فيها كمان ما في منها بنوب بنوب ، ولك واحد بالمية ما في .........

وبعدين عم تحكيني بطريقة متل كأني عم دافع عن الرجال يلي بكشف مرتوا وبنتوا و... ولك يا عيني أنا ضد انو الواحد يكشف وج بنتو و وجه مرتوا ، بس انتي عم تحملي الغلط على الذكر وحدو وهون قصتك ، يعني انتي اذا شفتي واحدة مظلطة بتلفي واتدوري وبيطلع الحق بالآخر على أبوها وأخوها وعمها وخالها وجدها وجدها السابع عشر و... وهي يا خطيتها خاروف بحديقة الذئاب .

شباب المساجد في القلمون ، قلت وبرجع بقول ما في منهم ، والقلمون مشهورة وين ما رحنا بشبابها ونسبة التزام الشباب فيها ، وحسن خلقهم ، انتي عن أي مشكلة عم تحكي ، انو اذا الشب رجع مستوي سوي من شغلوا وطلع مشي مشوار ؟؟؟ ولا لازم الشباب كلهم انضبهم وانفضي الشوارع للبنات ، ولكن وين عايشة انتي ، ولك يا سحر سمعيني انتي هون ، أنا عم حكيك عن كوكب الأرض انتي على أي كوكب هلأ ؟؟؟؟؟؟؟؟؟

وبنات القلمون للأسف إلا من رحم الله -هلأ كل واحدة منهم بتفكر حالها المقصودة بهل الاستثناء - شايفين بحالهم ومتكبرين ومفكرين انو ربنا ما خلق على صورتهم أبدا ، مفكرين حالهم أجمل وأفقه وأورع وأنشط وأزكى وأذكى نساء الأرض ، يعني متسضيعيين حالهم بشباب القلمون .

[سحر الشرق]

يا ريس شباب القلمون فيهم لكويس وفيهم القبيح بس للاسف الطالح نسبته صارت اكتر بكتير من الفالح
وبرجع بقلك كلكم راع وكلكم مسؤرل عن رعيته واي نعم الرجل هوة المسؤرل عن صون بنته ومرته واخته وربنا بيقول لا انا ولا انت وان خفتم نشوزهم ,,,, بما معنى الاية يعني الواجب واجب والحق حق والدين واضح بهلمسألة فلا تقلي لا كاني ولا ماني
قلت بتعرف كل شي عم بيصير بالقلمون وبقلك شكلك والله ما بتعرف شي او يمكن مفكر حالك انك بيوصلك كل شي

[الريس]

ولك اساكي مصرة على حكيك ، يعني بكرا يوم القيامة ربنا بفوت أبوها للبنت وأخوها على النار وجدودها كلهم وهي ما دخلها أبدا ، يعني المرأة مخلوق حيواني هو دون مرحلة التكليف ؟؟؟؟

ولك انتي ليش مستخفة بالمرأة آه ، الله وكيلك في منهم متل الحية تحت التبن بيعرفوا كل القصص والدواوين ، بعلقوا يلي بدهم يعلقوهم بثواني وبخطبوا وبطلقوا ويلي بدك ياه ، بيفتنوا وبيصلحوا و...

الشب لما بدخن بكون مفكر حالوا عم يغري البنت ولما بيسرع بكون مفكر حالوا عم يغري البنت ولما بيكفر بكون مفكر حالوا عم يعمل أبضاي ادام البنت و..........

وانتو يا خطيطكم القط بيكل عشاكم ، ولك حاج اتمسكنوا بحالك ياه ، قوموا فيقوا بقا .

[سحر الشرق]

يا ريس انت ما وصلك خبر انه بكرة يوم لقيامة كل واحد بيتحاسب وبينسأل عن محارمه وعن بناته وكيف رباهن طب حاول تستفسر عن هلموضوع وتقلي
المهم انا ما عم قول البنت ما بتتحاسب بس الاساس الرجل الرجال يا ريس قوامون على النساء فاهمني
انا حاسة حالي اني عم احكي بوادي وانت بوادي وعم نرندح لبعض يعني شو بدك قلك فهمني انو الشباب الله يبارك فيهن هني ضحايا والله يستر عليهن وكل مشكلتهن جايية من ورا النسوان
بتعرف اذا انا قلتلك هيك لازم انت تغلطني وتزعل لان ساعتها بكون ظغرتك كتير وغلط بحقك يا ريس
بالنهاية انا رح قلك اللي ما بترضى لاختك ما لازم ترضاه لبنات الناس وحتى لو كانو دارين بالشوارع وفالتين فانت ما لازم تشجعهن وتفكح وتلف وتدور وراهن لا
عمره يا ريس الخطأ ما بيتصلح بخطأ متله ابدا ومن راى منكم منكرا فليغيره بيده فان لم يستطع فبلسانه وان لم يستطع فبقلبه وهذا اضعف الايمان
انت بكلامك عن الشباب عن تشجعهن على المضي بالغلط بدل ما توعيهن
الله يهديك ويهدينا اجمعين لما يحبه ويرضاه

[الريس]

يا ريس انت ما وصلك خبر انه بكرة يوم لقيامة كل واحد بيتحاسب وبينسأل عن محارمه وعن بناته وكيف رباهن طب حاول تستفسر عن هلموضوع وتقلي
المهم انا ما عم قول البنت ما بتتحاسب بس الاساس الرجل الرجال يا ريس قوامون على النساء فاهمني
انا حاسة حالي اني عم احكي بوادي وانت بوادي وعم نرندح لبعض يعني شو بدك قلك فهمني انو الشباب الله يبارك فيهن هني ضحايا والله يستر عليهن وكل مشكلتهن جايية من ورا النسوان
بتعرف اذا انا قلتلك هيك لازم انت تغلطني وتزعل لان ساعتها بكون ظغرتك كتير وغلط بحقك يا ريس
بالنهاية انا رح قلك اللي ما بترضى لاختك ما لازم ترضاه لبنات الناس وحتى لو كانو دارين بالشوارع وفالتين فانت ما لازم تشجعهن وتفكح وتلف وتدور وراهن لا
عمره يا ريس الخطأ ما بيتصلح بخطأ متله ابدا ومن راى منكم منكرا فليغيره بيده فان لم يستطع فبلسانه وان لم يستطع فبقلبه وهذا اضعف الايمان
انت بكلامك عن الشباب عن تشجعهن على المضي بالغلط بدل ما توعيهن
الله يهديك ويهدينا اجمعين لما يحبه ويرضاه

يا عيني أنا سبق وقلتلك اني ما عم برر للشباب غلطهم ، وما عم برر للشب انو يبصبص على البنت ، وما عم قول انو بحقلوا وهو ما في بإيدو حيلة ... هذا كلام سخيف ، عيب ينحكا فيه ....

بس في شغلة بدي فهمك ياها ، انو البنت بتتحمل مسؤولية كبيرة من الواقع يلي وصلولوا الشباب ، رح قللك شغلة ، اليوم اذا واحد سرق لازم يطبق عليه القانون ، بس ما بصير يكون يلي عم يسرق وهو مرتاح متل يلي عم يسرق لأنو رح يموت الجوع ، يعني الاسلام أقر هذا الشي بأحكام الزنا ، اذا يليي زني كان مزوج برجموه للموت واذا لأ بيجلدوه .

كان أولى فيك يا ست سحر وأهم وأفيد انك تحكي بموضوع المهور وموضوع انو بنات القلمون ما بق عم يعجبهم العجب ، صدقيني كان هذا الشي رح يفيد الشباب أكتر من صريخك بالفلا وعياطك وابتداعك لمشاكل بعضها موجود وبعضها من تأليف خيالك .

اتفضلي حكي البنات ، هاك اليوم الست عبير قال شباب القلمون ما بملو العين ، ونازلين فيون تبخيس ليل نهار ، يعني أنا بدي افهم البنات بالقلمون ليش ضاربين حالهم بحجر كبير ، يعني يلي ربوهم ما هنة ذاتهم يلي ربوا الشباب ، وما نفس المدارس وما نفس المستوى المعيشي ، وما نفس الأرض ، وما نفس الدين ، وما نفس المشاييخ و... يعني اذا كل شي بيناتنا مشترك ، عيأش شايفين بحالكم هلأد ، فيكم تفهمونا .

[lina k]

السلام عليكم ورحمة الله وبركاته:أولا, أشكر الأخت "سحر الشرق"على هذا الموضوع.ثانيا,من وجهة نظري أعتقد أن الشباب منقسمين إلى عدة أقسام من ضمنهم القسم الذي يتحدّث عنه هذا الموضوع.ولكنني أعتقد أن هذا القسم لم يعد موجودا في أيامنا هذه وإن كان موجودا فهو لا يتعدى نسبة 0,5%.لأنّ الشاب القلموني الملتزم لا يطلب الفتاة قبل تأكّده من أخلاقها.هذا هو واقع الشباب في القلمون.ثالثا,بالنسبة للفتيات فهنّ خير وبركة.ولكن قسم منهنّ يرتكب أخطاء من خلال"رفع المهر-التكبّر على الشاب..."ولكن هذا القسم لا يشكّل سوى نسبة 2%من باقي الفتيات الموجودات في القلمون.إذا,الأكثرية في القلمون سواء الفتيات أو الشباب,هم على خلق واسع.
هذا رأيي الخاص وقد كتبته بناء على ما أراه في بلدتنا.
شكرا لك على هذا الموضوع.

[مصطفى معتوق]

صح لسانك يا انسة لينا

هاد هو الكلام المدوزن

[Rami Kozayha]

سلام:
عن جديد الكلام العام ما بيوصل لنتيجة، اذا بدكن نستفيد من هيدا النقاش لازم نناقش الموضوع بشكل مفصل وانتوا فيكن الخير والبركة و موخضرمين في النقاش، ناقشوا مثلاً:
1. متى يبدأ الشاب\الفتاة في التفكير بالزواج؟
2. هل للفارق الاجتماعي تأثير على الزواج؟
3. ما هيه الشروط الذي يجب توفرها قبل الخطبة ؟ وقبل الزواج؟
4. مالذي تتوقعه من الطرف الاخر؟ (مال؟ سيارات؟ دين؟ جمال؟ Green Card!
5. من توكل عنك إذا أعجبتك فتاة؟ ممكن الوسيط يخربها عالفاضي؟
6. هل لديك خطوط حمراء؟ حجاب؟ مهر؟ وظيفة؟
7. لازم تصارح الطرف الاخر و تعلمه بشروطك؟
8. مدة الخطبة؟
9. شو المطلوب خلال الخطبة؟ هدايا؟ حلويات؟ اخلاق ومعاملة؟ دراسة الطرف الآخر عن قرب؟
8. البنت تعتبر الشب مش شايف غيرها وفيها تتشرط على كيفها؟ ام انها متفهمة لماذا اراد الزواج؟
9. بالعربي المشبرح, إذا ما مشي الحال من تلوم؟ متى تعيد الكرة؟
10. ................ وغيرو وغيرو
11. نسبة الشباب إلي خطبو من بره؟ يمكن يكونو 2،3،4،10،50!!!!! في جواب؟

[الريس]

متى يبدأ الشاب\الفتاة في التفكير بالزواج؟

لما بكفي جامعة ، وبيلقي شغل ، وبعد ما يشتغل ويجمه حق دفعة أولة من سعر البيت ، ويجمع حق تكاليف الزواج والمهر ساعتها بفكر ينضرب عألبو .

2. هل للفارق الاجتماعي تأثير على الزواج؟

ما ضروري يكون في تأثير .

3. ما هيه الشروط الذي يجب توفرها قبل الخطبة ؟ وقبل الزواج؟

يكون مهذب ، ومعو مصريات ، وبيعرف يطبخ وما بنق كتيير ، وما بيحكي كتيير ، وبيسمع كلمة المرأة دغري ، وما يكون عندو أم مشلفة و..... وأهم شي انو مقتنع انو التعدد حرام ، ما بجوز انو يعدد هو ، بجوز بس بالكتب ........
4. مالذي تتوقعه من الطرف الاخر؟ (مال؟ سيارات؟ دين؟ جمال؟ Green Card!
5. من توكل عنك إذا أعجبتك فتاة؟ ممكن الوسيط يخربها عالفاضي؟

ما بوكل حدا أبدا ، بحمل حالي وبروح بحكيها أنا .
6. هل لديك خطوط حمراء؟ حجاب؟ مهر؟ وظيفة؟

أكيد في خطوط حمرا ، بس للأسف بنات القلمون في منهم قاطعين السودا وهيدي بعد الحمرا بكتيير كتيير .

ما بهتم اذا كانت محجبة ولا لأ ، لأن بس اخدها أنا تحصيل حاصل رح تتحجب ، بس بهتم بالأخلاق وبالجمال وبالثقافة ، وبطريقة فهمها لفلسفة الحياة و...
7. لازم تصارح الطرف الاخر و تعلمه بشروطك؟

أكيد ، من أول طريق بفهمها كل شي للمخلوقة ، بفهمها شو بحبك وشو بكره وبتعرف عليها وعلى كل حياتها وشو بتعمل وشو بتحب و...
8. مدة الخطبة؟
حسب غموض البنت .
9. شو المطلوب خلال الخطبة؟ هدايا؟ حلويات؟ اخلاق ومعاملة؟ دراسة الطرف الآخر عن قرب؟

الأهم هي الأخيرة يعني التعرف عن قرب ، ولكن الأولانيين لا بد منهم بسبب البروتوكولات و... بس اذا الواحد ما معو ما يكلف حالوا زيادة عن اللزوم .
8. البنت تعتبر الشب مش شايف غيرها وفيها تتشرط على كيفها؟ ام انها متفهمة لماذا اراد الزواج؟
حسب اذا عم تحكي عن بنات القلمون ، فأكيد هنة هيك ، الواحدة منهم مفكرة حالها انو اذا الشب ما عجبها رح يعنس .
9. بالعربي المشبرح, إذا ما مشي الحال من تلوم؟ متى تعيد الكرة؟

اذ كان سببها غير مقنع ، فما بلوم إلا اهلها لأن ما عرفوا ربوها ، أما أيمتن بعيد الكرة ، فبنفس اليوم .

10. ................ وغيرو وغيرو
11. نسبة الشباب إلي خطبو من بره؟ يمكن يكونو 2،3،4،10،50!!!!! في جواب؟

الله يزيدهم ، لأن ما في غير هالشغلة بتنزل بنات القلمون عن الجحشة يلي راكبين عليها .

[الزاهر]

بعد اللي قالوه الأخوة والأخوات.......صراحة ما عاد عندي شي احكيه!!!!
خدنا الموضوع ععالبيت لنفلحصو منيح......طلع حاكيين كلشي بدي أولو!!!!

[Nader 3:16]

انو وين المشكلة اذا الواحد عاجبتو واحدة منها متحجبة...انو كل واحدة منا متحجبة خلص صارت كحة!!....

هلء ما الي مروة كفي بالموضوع بسبب قصر الوقت فأعذروني و لنا عودة ان شاء الله...