لماذا ينتحل الشاب اسم فتاة في المنتدى؟ والعكس

[Nadine]

في موضوع هل الشباب اكثر ام الفتيات قرأت مشاركة للأخ هارد وكان فيها : اكتر اسماء البنات هن شباب والله اعلم .

فأحببت ان افتح موضوع لنناقش حول هذه النقطة, لماذا برأيك الشاب يدخل المنتدى بإسم فتاة؟؟ ولكن ما الذي دفع هؤلاء لذلك ؟؟ كيف يستطيع ان يتحمل مخاطبته كفتاة؟؟

واذا كانو الشباب بيعملو هيك , طبعا الفتيات بيعملو نفس الشي, كمان بدنا نعرف ليش الفتاة بتدخل المنتدى بإسم شاب؟؟!!

[بسام]

كتعليق أولي مع احترامي للجميع
اعتقد للوساخة فقط

[ام السعد]

انا ام السعد امراءة افتحر بذلك جدا جدا
وسارد على المشاركة بموضوعك ولكن بعد ذلك وشكرا

[shanzimer6]

في موضوع هل الشباب اكثر ام الفتيات قرأت مشاركة للأخ هارد وكان فيها : اكتر اسماء البنات هن شباب والله اعلم .

فأحببت ان افتح موضوع لنناقش حول هذه النقطة, لماذا برأيك الشاب يدخل المنتدى بإسم فتاة؟؟ ولكن ما الذي دفع هؤلاء لذلك ؟؟ كيف يستطيع ان يتحمل مخاطبته كفتاة؟؟

واذا كانو الشباب بيعملو هيك , طبعا الفتيات بيعملو نفس الشي, كمان بدنا نعرف ليش الفتاة بتدخل المنتدى بإسم شاب؟؟!!

السلام عليكم:
كتعليق أولي عهالموضوع الحلو, كل واحد بيبيّن من أسلوبو بالكتابة اذا شب ولا بنت, يمكن من طريقة التصميم للمواضيع, وكيفية الرد على مشاركات الأعضاء الباقين المحترمين,
والله أعلم. وبركّز عموضوع الرد أكتر من الموضوع, فالأسلوب واضح بيكون, والكلمات كمان بيكونو غير شكل.... يعني بلا مؤاخذة, الشب بيحب يبيّن رجولتو, أو هضامتو, _أو شخصيتو, بتعبير أبلغ_.
أما البنت, ومني متحيزة للبنات, بس ناعمين أيش ما حكيو, ( هيك الله خالقن) أو أحياناً بايخين...
هلأ ما رح قلك يا بنت العم اسأليّن, لأن هالشغلة رح تكشف عن هويتن. بس أكيد رح يتشارك بهالموضوع, ورح نشوف الأسباب, ومين بيعرف, يمكن تكون مقنعة!!!

[shanzimer1]

سلام للجميع
والله ومعك حق يا نادين ..............من أول ما صرت فوت عالصفحة خطرت عبالي كل هالأسئلة؟؟؟؟؟؟؟؟و عن جد الشغلة بتعمل مشاكل وخصوصاً انو بصير في رفع للكلفة في الردود بين الإخوة والأخوات وهدا كتيييير غلط.....لأنو أهم شي حتى الحوارات تكون بنّاءة يكون في إحترام متبادل............

مشكورة عالموضوع وان شاء الله تلاقولو حلّ............والسلام عليكم..

[HARD]

يا اخوه انا تقصدت هذا الكلام لكي اشد انتباه ام السعد لكي اشدها للكتابه ولتدافع عن....ولكي اعلم اليقين وهذا هو الموضوع باختصار .

انا بعقتقد انو قلال كتير المتخبيين .....
بس انا لما بشوف البنت عم تجاوب وعم تقاتل وعم تحكي بفظاظة شو بدنا نقول عنها انا مني شايفها انا عم شوف كلامها ومن كلامها بس عم احكم
ويمكن هي غير ذلك والله اعلم
وعفوا على الظن ونحن نحب الحقيقة لذلك نظن .

[الزاهر]

أنا مع الأخ بسام......للوساخة .....
لكن برايي....في سبب تاني.....أحيان.....بيكون في "حدا"....ومرتو....بيفوتو عالمنتدى.....وبيكتبو من نفس الاسم.....وبفس التوجه.....فهادول تصنيفهم خارج نطاق "الوسخنة" أكيد!!!

في كمان منشان اواحد يبعد الشبهة عن نفسو اد ما فيه.......يعني مين بدو يظن مثلا إنو زاهر اسمو بالمنتدى "سمية".....أكيد ما حدا....خصوصي إن كنت حابك الحكاية منيح......وجامعها من كل الجوانب!!!!

بالمناسبة........صار مارر عليي شي 5 أشخاص يشكون بأن الريس بنت!!!

سلام

[دوكر]

سلام عليكم.....
يا هلا بالشباب والصبايا........
يسلمو يا ست نادين ....موضوع حلو....
الاسماء المستعارة .........في ناس بعتروا عار ازا كان عم يوكتب من ورا اسم مستعار ....و غيرون بؤلو انو الازم كل واحد من لي بفوتو ع المنتديات يحكي من ورا اسم اسم مستعار.......
بس برأي انو فنا نستعمل الحلين ......كل واحد حسب لي برتاح فاي اكتر ....شرط انو ما يطلع عن الاداب تبعت الحوار........
في ناس بفوتو بأسماء مستعارة لأنو الحكي لي بدو يحكاي ملو عين يحكاي بأسمو.....كنو كان شب و فايت بإسم بنت او العكس.....هادا فينا نعدو انسان عندو عقدة نقص.........
و الجزء التاني من تبعون الاسماء المستعارة......بحكي بشخصيتو الحءيءية...........بس حب ما كل الناس تكون عارفتو .....يمكن من شان ازا مسلن نزل ع الضيعة ما يوعدو يحكو معو عن كل المشاركات تبعيتو......
هلأ من شان ما نطلع عن المحور الاساسي للموضوع لي هي ليش الشب بفوت ع منتدى بإسم بنت او العكس.............
هلأ انا ما بلاءي لها مبرر.......و هل الناس بكون ءلال............
بس ما بعتءد انو دائم بكون للوساخة..........ازا كان عم يحكي بطرءة عادية بكون عندو حسب اعتءادي سبب......بس ازا فات و بلش بالناس عن بو جنب..."انتا سوكت." و "انتا بايخ..."...ساعتا اكيد للوساخة.......و متل ما ؤال المعلم زاهر انو ساعتا بكون عم يحاول يحبكا من كل الجهات
يعطيكن العافية......
اخوكم دوكر المعوكر.....

[THE TERRORIST]

و لا أنا بعرف ليش!!!! قولكم ليش؟؟؟
معقول يكون للبياخة... و معقول يكون لتشويه سمعة البنات؟؟
طيّب ليش ما بتقولوا إنو معقول يكون في بنات فايتيين بأسماء الشباب!!!!!!!!!

[Nadine]

اولا اريد ان اشكر كل من شارك بهذا الموضوع ,

الاخت شانزيمر 6 فقد اخبرتنا عن الطريقة التي نستطيع فيها ان نكشف فيها هؤلاء الاعضاء من خلال اسلوبهم في الرد على المواضيع المطروحة.

وهذه هي الافكار التي استنتجناها من الموضوع:

- بغرض الوساخة (كما قال الاخ بسام )

وكما اعتقد ان الوساخة هنا هي حتى يستطيع الشاب أن يتقرب للفتيات بقصد سوء النيه للإيقاع بهن عن طريق كسب ثقتهن لأن الكثير من الفتيات من مبدأ الثقة المفرطة تقبل أي صداقة بحكم الأسم المقابل يدل على أنه فتاه.
وأعتقد معروف السبب من الدخول بهذه الطريقة نسأل الله السلامة ونسأل الله أن يحمي فتياتنا وأن يقيهن شر العابثين.

- ممكن يكون الاسم لشخصين امرأة وزوجها.( كما قال الاخ زاهر)

تصنيفهم غير الوسخنة ما اختلفنا بس يعني ما حلوة تكون عم تقول يا اختي ويطلع اخي اللي مشارك مش اختي , ما بعرف ولا شو رأيكم؟

- انسان عندو نقص (كما قال الاخ دوكر)

كتير معقول هالسبب انو الشخص يكون عندو نقص بالشخصية او عدم الثقة بالنفس , فهذه الحالة هي حالة مرضية , الله يشفيهم ويبعدهم عنا.


- للبياخة ( كما قال الاخ ذا تاروريست) ,

هلأ في يكون شاب وبايخ وفيها تكون فتاة وبايخة , وهيدا الشي بيرجع لمستوى الفهم عند كل شخص.

- لتشويه سمعة الفتيات (كما قال الاخ ذا تاروريست)

معقول يكون سبب , بس هالشخص اكيد اذا بفكر شوي بيلاقي انو اختو فتاة وامو فتاة وخالتو وعمتو كلن فتيات. يعني اذا هيدا غرضو فهو انسان جاهل.

برجع وبشكر جميع من شارك بالموضوع الاخت ام السعد والاخ هارد وشكر خاص للاخت شانزيمر 1 واذا حدا عندو اضافات يتفضل.

وبارك الله بكم جميعا.

[Nadine]

استطيع قراءة مشاركتي اذا دخلت الموضوع ولكن اذا دخلت المنتدى العام فأرى ان اخر مشاركة هي للاخ ذا تاروريست , ما هو السبب؟؟