كان ياما كان

**Nadine** · 31-01-2008, 12:23 PM

السلام عليكم رحمة الله وبركاته,

بما انو ما في موضوع بالمنتدى عن الحكايات , احببت اني افتح هالموضوع منشان نشارك بعضنا بوضع الحكايات.

كل عضو عندو حكاية مسلية يحطها هون. على شرط تكون طريقتو بسرد حلوة ومسلية.

يللا رح نبلش مع اول حكاية.

كان ياما كان في قديم الزمان
كان في اربع مطلقات
هن رفقات وبحبو بعض كتييييييييييييير
بلا طول سيرة وبلا ماعللكم قلبكم
اجتمعو الأربعة في أول يوم برمضان
وقررو كل يوم يكون الفطور يكون عن وحدة
وكل وحدة بتحكيلنا بدورها قصة طلاقها
وكان أول يوم للفطور عند أكبر وحدة
وأسمها سعيدة
ومالكن غير بالمفيد.....
اجتمعو الاربعة في بيت سعيدة في اول ايام هالشهر الفضيل
وكل وحدة بلشت تعمل الطبخة يلي بتحبها
شي فتوش - شي فتة- شي سلطة
ووحدة راحت تجيب عرق سوس
ووحدة شوربة العدس
ووحدة صحن حمص
بلا طول سيرة
عملو الفطور وجهزو الأكلات الطيبة
وقعدو بساحة الديار قدام النافورة
ونطرو المدفع وبطونهم عم تزقزق زقزقة
وبووووووووووووووووب
بيضرب المدفع
بلشو أكل وهن عم يتحسرو ويتذكرو أيام ماكانو في بيت أزواجن
وحدة بتقول :أضرب على حظي كان بحب الفتوش
والتانية بتقول: اضرب على حظي كان بحب ياكل الشوربة من الطنجرة مباشرة
والتالتة بتقول: يقبرني كان يسلخ ابريق سوس قبل مايحط شي بتمو
وهيك
خلصو اكل
وجهزو اربع اراكيل مع ابريق عرق السوس
وبلشو طق حنك
وقالو اليوم دور مين
قالت سعيدة صاحبة البيت أنا
--
قالت
هادا ياستاتي كنت صبية حلوة وغندورة وامورة
والله لما بمشي بالحارة بتوقف الحارة كلها على رجليها
وااااااااااااااااااااااااااو
اي لكن شو بفكركن يعني
المهم بلا طول سيرة
زوجي كان زلمة موسوس كتير
يعني والله بعد الفطور بدو قالب صابون على ايديه
اييييييييييييه
وانا هالمسكنية طول النهار بقضيه تعزيل ومسح ونفض
وشطف
ايييييييييييييييييه
وفوق هيك بدو ياني كل يوم انفض الفرشات والمخدات
اي والله انكسرو ادي وانحلو اكتافي
اييييييييييييييه
وكمان بحب المخدة الطرية
يعني كل يوم بدي افتحلو مخدتو وانفشلو قطنو
ايييييييييييييييييييييييه
والله قلت يامرة يعني لايمت بدك تبقي هيك
لازم تلاقي حل
اييييييييه
يعني كمان والله بعد كل تعبي مابتعجبو المخدة
بيترك المخدة وبنام على ايدي (بقللي ماشاء الله شو هالزنود ولا لية الخاروف)
اييييييييييييه
والله وانا بالنهار لمعت براسي كلمة لية
تذكرت لية الخاروف
ايييييييه
نزلت لعند اللحام وقلتلو عطيني لية خاروف كاملة
المهم جبت لية الخاروف وغسلتها منيح
ونشفتها
ايييييييييييييييييه
ايه شبكن عم تفنجرو عيونكن فيني
خلص مارح كمل القصة
لبكرا
صبولي كاسة عرق سوس خلوني روق دماتي شوي
بكرا منكمل

**nana** · 31-01-2008, 01:06 PM

هههههههههههه تخيلتا القصه مسلسل سوري بس ما إنو تتركينا لبوكرا لنعرف الحكايه

يالله ناطرين

**الزاهر** · 01-02-2008, 05:01 AM

وبعدين يا تيتة؟؟!!

**Nadine** · 01-02-2008, 05:28 AM

المشاركة الأصلية كتبت بواسطة NARA

هههههههههههه تخيلتا القصه مسلسل سوري بس ما إنو تتركينا لبوكرا لنعرف الحكايه

يالله ناطرين

يا اهلا بالست نارة , مشكورة على مشاركتك, مبارح ما قدرت كفيت القصة لان كان الوئت مأخر وبدي نيم بنتي.

اليوم رح حط كفاية قصة اول مطلقة

**Nadine** · 01-02-2008, 05:29 AM

المشاركة الأصلية كتبت بواسطة Zaher Eddin

وبعدين يا تيتة؟؟!!

يللا تابعونا

**Nadine** · 01-02-2008, 05:34 AM

بعرف انكن متشوقين بدكن تعرفو شو عملت سعيدة
بلية الخاروف
اي نعم ياساداتي ياكرام
رح نشوف سعيدة شو عملت بلية الخاروف

أيسعيدة والله نطفتي قلبنا يالله خلصينا احكي
أي شبكن يالله يادوبني فطرت وقعدت
يالله رح كفيلكن القصة يانسوان
اي بلا طول سيرة
جبت لية الخاروف
ونشفتها وعبيتها بكيس نايلون ولفتيها منيح
وفتحت مخدة جوزي وعبيتها فيها
ايييييييييييييييه
وانا دغري رحت اتحممت ومعطت حالي بالحمرة
وتبودرت وتغندرت ونطرت جوزي حتى يجي
ايييييييييييييي
والله أكلنا وشربنا والذي منو
بعدين طفينا ضو الكاز وقللي حل النوم يامرة
قلتلو وانا عم أدلع (متل مابدك أبن عمي)
اييييييييييييه
المهم بلا طول سيرة ومالكم غير بالمهم
اييييييييييييييييييه
حط راسو ونام الزلمة
وقللي الله يسلم اديكي هي اسمها مخدة
وانا قلت بقلبي الحمدلله
والله اهترو زنودي وصارو زرق متل النيلة من كتر مابنام عليهم
قلتلو تقبر قلبي أبن عمي نام وارتاح أنت زلمة تعيب
اييييييييييييييييه
وهيك
كل يوم بمر أحلى من التاني
وجوزي بيشخر شخر
اي والله يقبر قلبي ماسمعت صوت شخيرو منيح حتى نيمتو على لية الخاروف
لك يقبرني على هالشخرة
اي والله جارتنا سعاد طاقة من القهر
بدها تعرف كيف عم يشخر هيك
(لانو الحكي بسركن زوجها شخيرو مابيوصل لباب الحمام)
له له له له
ولي على حظها (لباب الحمام بس)
لك يقبر قلبي صوت شخير جوزي صار معبي و معبي الحارة
اييييييييييييييييييه
ومالكم غير بالمهم
كان نايم جوزي
وانا مفتحة عيوني ومبسوطة
وعم طقطق اصابعي
ايييييييييييييييييييييه
ومابشوف غير الدود ببلش يسبح سبح
ايييييييييييه
الله وكيلكن شي على دانو شي على تمو شي على راسو
وانا ماعم لحق (نقف)
ماخليت ولادودة ا الا ونقفتها باصبعي
اييييييييييييييه
الا دودة وحدة يبعتلها حمى إلهي
وقفت على راس منخارو
وبلشت تترقوص رقوصة
يخرب بيتها تقولو ياجماعة آكلة نص الية
هي تترقوص وانا عم اتنغوص
تقولو ملزقة على انفو لزق
ماتركت طريقة معها الا ماجربتها وماكانت تحل عن منخار
وهي عم تتمختر مخترة
و جوزي ريتو يقبر قلبي
وقفتلو شيخرو (شو بدن يحكو علي الناس) بترك هديك الجارة تشمت فيني
ايييييييييييييييييي
والله فار الدم لراسي
وطلع جناني
وماشعرت بحالي غير ماسكة الشحاطة (الله يعزكن)
مسكتها وسلختا بالشحاطة على بوزها
وماشفت غير جوزي بنط
وبصير راسو بالسقف
وبقللي يبعتلك حما إلهي شو عملتي
بيشعل ضو الكاز
اييييييييييييييييه
وبشوف الدود عم يسبح سبح بالفرشة
والمخدة نبع للدود
له له له له له
بقللي لك شو هاد
بيسلخني اول كف
بروح بحكيلو القصة كاملة
بروح الله وكيلكن بعلقني من رجلي بالسقف
وبمدني فلق من تحت كعب الدست
وأنا عم قول بقلبي يالله يامرة فلقة وبتخلص
أتحملي
ومع كل كرباج عم قللو تقبر قلبي على هالزنود
أضرب والله بستاهل
وانا عم قول بقلبي
يالله يامرة أحسن مايقلعك على بيت اهلك
تركيه يضرب
أي والله صار الدم يسرح من رجلي سرح
وعم قول الله يمضيها على خير
بس ماكانت تمضى
بعد مامدني فلق
بيرمي علي يمين الطلاق بالتلاتة
ولي على حظك شو معتر
مافي شي قاهرني ياجماعة
إلا أني صرت أدعيلو مع كل كرباج
قلت بلكي قلبو بحن علي
بس
آلهي مولاي انت جاهي وحكمي
تكسرلو أديه -- وتحمرلو رجليه
وتخلي مرتو متل العودة حتى لايتهنى بنومة على زنودها
قولو آمين
آمين يارب
شايفين
بالله يانسوان الحق على مين
يبعتلو حما الهي الحق علي طبعا
بعدين شبو بيت ابوكي خليكي عندو
-----
وهيك شفنا قصة طلاق سعيدة
بكرا إن شاء الله الفطور عند مفيدة
ورح تحكيلنا سبب طلاقها من زوجها

**nana** · 01-02-2008, 11:44 AM

هههههههههه والله قصتا قصها هل سعيدة يعني إذا في عنجد نسوان هيكي أكيد فيون خلل بالمخ
يالله وين بقيت لحكايه

**دوكر** · 04-02-2008, 12:21 AM

يا هلا بالست نادين...
يعطيكي العافية...
ؤصص حلوة...

**Nadine** · 04-02-2008, 10:23 AM

المشاركة الأصلية كتبت بواسطة NARA

هههههههههه والله قصتا قصها هل سعيدة يعني إذا في عنجد نسوان هيكي أكيد فيون خلل بالمخ
يالله وين بقيت لحكايه

يا هلا بالست نارة.

خليكي متابعة القصص كتير حلوين .....

**Nadine** · 04-02-2008, 10:24 AM

المشاركة الأصلية كتبت بواسطة دوكر

يا هلا بالست نادين...
يعطيكي العافية...
ؤصص حلوة...

اهلا بك اخ دوكر,

الله يعافيكم,

تابعونا

**Nadine** · 04-02-2008, 10:45 AM

اليوم معزومين كلنا عند مفيدة على الشوربة
اي نعم الشوربة
وعزيمة معتبرة
ورح نشوف هلئ شو قصة طلاق مفيدة من زوجها
اي نعم
يعني شو قصة الشوربة
--
اجتمعو هالمطلقات التلاتة عند مفيدة اليوم
وبلشو يحضرو الافطار في تالت أيام هالشهر الكريم
أي نعم
واجتمعو هالنسوان بالمطبخ
وبلشو يحوصو ويلوصو
عم يحضرو الفطور
وكانت العزيمة اليوم على جاط فتة(تسقية)
اي نعم فتة بالحمص
جهزو جاط هالفتة وحطو معو كل انواع المكابيس
وفحلين بصل
ومدو الحصير بأرض الديار وشغلو نافورة المي
وقعدو ساكتين من غير كلام كل وحدة حاطة أيدها على خدها وصافنة
كأنو مقتول قتيل
بس والله اعلم كل وحدةعم تتخيل زوجها وهو عم يفتح شوارع بجاط الفتة
يعني معن حق كل وحدة مصيبتها على قدها
بلا طول سيرة وكبر معلاق وحكي بلاطعمة
وفجأة
هووووووووووووووووووووووب
بيضرب المدفع
وببلشو أكل
وكل وحدة تفتح طرقات وشوارع بجاط الفتة
وكأنو عم تحكي قصتها
بيخلصو اكل
ومتل االعادة بجهزو الأراكيل
وابريق العرق سوس
وابريق التمر هندي
وبقولو اليوم دورك يامفيدة
بتقول مفيدة تكرم عيونكن رح احكيلكن حظي وبختي
---
أح شو بدي احكي حتى احكي
كنت متزوجة ومتهناية بحياتي
وماحدا قدي والله
وزوجي مو منقص علي شي بالدنيا كلها
وبيت المونة مليانة دائما
وعندي على طول من جميعو
يلي بتطلبيه بتلاقيه

نياااااااااااااااااااااااااااااااالك
زوجي كان عندو محل بسوق البزورية
يعني محل فول وعدس وحمص وعدس مجروش
يعني كانت ارض الديار مصفوفة بالشوالات صف
ييييييييييييييييييييييييييي--
ولحقي يامفيدة تعزيل وتنضيف وتنفيض
وكمان
زوجي ضرسو طيب
يعني بحب بطنو كتير
أي والله ناقر كرش غير شكل
يقبر قلبي لما بيمشي بالحارة أي نسوان الحارة مابشيلو عينن عن كرشو
وبيحسدوني بقلبن
أي والله في مرة جارتنا تهاني صابيتو عين لجوزي بكرشو
يعني داب ماصفي شي منو
بس يعني اجت الداية أم احمد وسكبتلو رصاصة
الحمد لله رجع اكبر من أول
بس ياجماعة
هالكرش مو لله
ماإجا هيك
بدو هز كتاف
بدو مرة تكون نفسها طيب بالطبخ
مابدو وحدة من حارة التنابل
يعني بدو شغل ليل نهار بدو حشي منيح
اي وبعدبن---
يعني وربي ياجماعة
وانا ماني عم لحق طبخ ونفخ
أي والله بطبخلو طنجرة الشوربة
مابياكلها بالمعلقة
لكن شووووووووووووووو---
اي جوزي غير كل البشر
أي بحط الطنجرة على تمو
ومابشيلها وفيها معلقةة وحدة
ييييييي عليه شو فجعان----
وزوجي بقللي يامرة
الشوربة إلا الشوربة
في عندك كل شي
اطبخي ولاتقصري
يعني الله وكيلكن لازم كل يوم اطبخ شوربة
يعني صرلي متزوجة سنتين
وطابخة 720 طنجرة شوربة
ولي عليكي يعني كل يوم---
أي كل يوم
يعني ملليت وانحلليت
واخضُرو رجلي من طبخ الشوربة
وصرت اكره اسم الشوربة
اي والله
بيوم من الايام حطيت طنجرة الشوربة على النار
وقعدت بأرض الديار عم فصفص بزر وزت بهالارض
فصفص وزت
يعني عم فش خلقي بهالبزرات
ايييييييييييييييييييييه
وشوالات الرز والعدس قدامي عم يترقوصو رقوصة
وعيني لاتشوفن
ايييييييييييييييييييي
وكل مابشوف شوالات العدس والرز قدامي بنرفز
وبصير متل المجنونة
وفجأة لمعت براسي فكرة
اييييييييييييييييييييييييييييييييييييييه
شو لمعت يعني شو عملتي
أيه عملت عملة يعني بصراحة مابتنعمل
يييييييييييييييييييييييه عليكي شو عملتي---
لاتتطلعو فيني وتضحكو
بطلت أحكي
عبولي كاسة تمر هندي وحطولي النارة
مارح كمل لبكرا
---

**Nadine** · 05-02-2008, 08:59 AM

الهيئة ما بقا بدكن تعرفوا شو كمالة قصتها لمفيدة.

ما ني شايفة في كتير تشجيع من الاعضاء على القصص مع انو اللي شاهدوا الموضوع هنه 77

ليش مافي ردود ؟؟

ما نن حلوين يعني؟؟؟

**فشلان** · 05-02-2008, 09:26 AM

ولك حلوين... بس عم تعليلنا قلبنا... شو مفكرة حالك على الإم بي سي كل شوية دعايات.... وكفي بكرا... وكفي بعد بكرا...

يالله رح ينحرء قلبنا..... حطي القصة كاملة أو إذا بدك حطيها وفاء....

ولك دووووووووووووووووووووووووووووووووووع

**Nadine** · 05-02-2008, 09:55 AM

يا هلا بالاخ فشلان,,

هلأ اذا حطيتن كلن فيك تقراهن , مابدنا نتقلا على الاعضاء....

شو يا اخ فشلان ايمتن بدك تعملنا شي شعر , قصدي شعر بأعضاء المنتدى؟

**فشلان** · 05-02-2008, 10:26 AM

المشاركة الأصلية كتبت بواسطة Nadine;39564[SIZE=5

شو يا اخ فشلان ايمتن بدك تعملنا شي شعر , قصدي شعر بأعضاء المنتدى؟[/SIZE]

ولك أي شعر.. صار الشعر ما بطعمي خبز..... الواحد صار بينتع قصيدة هالأد أدا... ما حدا بقلو مرحباً... أكتر الشي بيعملو شرطي سير.. وبقلك شكراً على المرور.... السرعة القصوى 50كلم بالساعة....

آآآآآآآآآآآآآآآآآآآآآآآآآآآآآآآآآآآآآآآه على هاديك الإيام....

**X-Man** · 05-02-2008, 11:05 AM

**بسام** · 05-02-2008, 01:18 PM

هههه حلوة الأصة بتسلي وبتمضي الوقت وياالله ناطرين الكمالة بس سؤال: زوجك عم يأراهن شي ؟ لأن لازم ياخد حذرو منك ما تأومي تركبيلك شي فيلم فيه متلن ههههه
بس عنجد حلوين وأسلوب السرد كمان حلو وشكرا الك.
أوعى تحكين لبنتك ميشان ما تصير تطبأن هههه يا الله سلام

**Nadine** · 05-02-2008, 02:12 PM

**Nadine** · 05-02-2008, 02:14 PM

المشاركة الأصلية كتبت بواسطة فشلان

ولك أي شعر.. صار الشعر ما بطعمي خبز..... الواحد صار بينتع قصيدة هالأد أدا... ما حدا بقلو مرحباً... أكتر الشي بيعملو شرطي سير.. وبقلك شكراً على المرور.... السرعة القصوى 50كلم بالساعة....

آآآآآآآآآآآآآآآآآآآآآآآآآآآآآآآآآآآآآآآه على هاديك الإيام....

طيب شفتلي حدا ادر ينافسك بالمنتدى؟؟؟

شو رأيك تتسجل بإسم تاني( اسمك الحقيقي يعني ) وبعدان تعمل تحدي مع حالك... ما شاء الله انت من الشعراء اللي ما حدا في يوقف بوجن...

عنجد شتأنا نقرا شي شعر مهضوم....

**Nadine** · 05-02-2008, 02:16 PM

المشاركة الأصلية كتبت بواسطة بسام

هههه حلوة الأصة بتسلي وبتمضي الوقت وياالله ناطرين الكمالة بس سؤال: زوجك عم يأراهن شي ؟ لأن لازم ياخد حذرو منك ما تأومي تركبيلك شي فيلم فيه متلن ههههه
بس عنجد حلوين وأسلوب السرد كمان حلو وشكرا الك.
أوعى تحكين لبنتك ميشان ما تصير تطبأن هههه يا الله سلام

يا هلا بالاخ بسام ,, ان شاء الله رح حط كمالة القصة,,,

زوجي ما عم يقراهن بس انا عم قولو ياهن شخصي,,ههههه

يعني انت برأيك انو ما معن حأ يعملوا اللي عملوا؟؟

هههههه

**Nadine** · 05-02-2008, 02:21 PM

بدكم تعرفو أختنا مفيدة شو عملت بشوالات العدس والرز
والله مسكينة هالمفيدة
معها حق
رجليها تورمو من الوقفة بالمطبخ حتى تعمل شوربة
والاكتر من هيك أنو ياساداتي ياكرام
انو مفيدة مابتعرف طعم الشوربة شو
مابخليها جوزها تاكل ولا معلقة
هي بتحط الطنجرة وصحنين على الاكل
بس هو دغري بيمسك هالطنجرة
وبحطها على تمو وبيسلخها سلخ
ربي يسعدو رح يعمل مع مفيدة مرض نفسي

وانتو يا اعضاء المنتدى
يلي بدو يعمل شاي يقوم يعمل
لانو رح بلش القصة
ورح تبلش مفيدة هلئ تحكيلنا شو صار معها امبارح

---
يالله يامفيدة دخيل عينك نطفتي قلبنا بدنا نعرف شو عملتي امبارح
اي معليش لاتواخذوني كنت تعبانة امبارح وفاير الدم لراسي
والله ووأن

وأنا عم احكي امبارح تخيَلت نفسي عم أطبخ شوربة
وتخيلت جوزي ماسك الطنجرة وعم يشربها شرب
يعني دخيل عينكم لاتزعلو مني
هلئ رح كمل
--
هاد ياستاتي كنت ئاعدة بأرض الديار
عم فصفص بزر (الله لايفصفصلكن قلب)
ايييييييييييييييييييييييه
والله كنت فاتحة شوال بزر
ونازلة فصفصة
وعم أندب حظي
وياعيني شوالات الرز والعدس عم تترقوص قدامي
وأنا عم أتنغوص
كأنن عم يجاكروني
وانا عصبية ونزقة
يعني مابتحمل أبدا أي والله صرت بقاتل دبان وشي
وخطرعلى بالي فكرة جهنمية
يعني قلت بقلبي يامفيدة عليكي وعلى أعداءك
والله
اييييييييييييييييييييييييييييييه وبعدين
رحت لميت كلشي في عندي وبراميل غسيل
وبراميل الحمام
وكمان عملت لفة برمة بالحارة
جبت بوابير كاز
وبراميل غسيل الحارة كلها
يعلم الله انو بهداك اليوم ماحدا تحمم بالحارة
ييييييييييييييييييييييييييه
بلا طول سيرة
صفيت براميل الغسيل بأرض الديار صف
ومديت نبريج المي
وعبيت البراميل مي
وشعلَت بوابير الكاز
وبلشت أفتح بالشولات وزت بالبراميل
افتح وزت
ماتركت لاشوال عدس ولا رز
وقلت والله رح خليه ياكل شوربة لحتى يموت
رح تكفيه طول العمر
معليش
اييييييييييييييييييييييه
شو اي
فتحت شي سبع تنكات سمنة
وحطيت شوال ملح كامل
وبلشت اختكم مفيدة
بلشت تنطوط نطوطة من برميل لبرميل
شي تحركو
شي تقوي النار تحتو
شي تزيد المي
شي تحطلو ملح
والبخار صار معبي أرض الديار
يعلم الله انها غيمت ومطرت تاني يوم
شووووووووووووووووووو
اي يعني بجوز تكون مطرت بسببي
اي ماعليكم غير بالمفيد
شو بدي احكيلكن على هداك المنظر ياجماعة
والله بسفر برلك ماطبخو هيك للعساكر
خليه يشبع شوربة خليه
كمان انا مو حرام لكن
يامين يشوفني عم اطبخ شوربة
المهم
ضلييت عم حرَك وصب وشيل وحط
حتى أستوت الشوربة
خلصت وطفييت النار
ودغري ركضت على الحمام
اتحممت وتعطرت وتغندرت وتبودرت ومعطت حالي بالحمرة معط
وانتظرت جوزي لحتي يجي
يقبر قلبي رح يكيف والله على الشوربات
رح خلي مو نسوان الحارة بس تحسدني على كرشو
رح خلي نسوان جبلة كلها تتحسر وتحسدني
يقبر قلبي شو بحبو هو وكرشو
ايه إجا جوزك بعيدين ----
إي إجا وين بدو يروح يعني
أي إجا بس متأخر شوي
أي إجا وكانت الدنيا ليل
ودغري فات على الغرفة
وقللي
شو طلعت الشوربة يامرة
قلتلو أي ابن عمي طلعت إسكبلك صحن
ريتك تقبر قلبي
قللي شو جنيتي جيبي الطنجرة كلها
وأنا مو عاملة بالطنجرة
كللو براميل
دغري شحطت برميل الشوربة للغرفة شحط
وكان يقبر قلبي داير ضهرو
قللي اي حطيتها قدامي لشوف
وأنا حملت البرميل حمل (الله بيعلم انو صار ضهري شقفتين)
حملتو وحطيتو بوشو
وهو طلع فيني هيك
مدري شو صرلو أخضر وشو
مدري فرحان مدري غضبان مدري قرفان
مابعرف شو

وقللي
قللي مو هاد تبع الحمام
قلتلو أي أبن عمي
حتى تشبع
قلتلو ابن عمي
بعرفك جوعان
وإذا مابكفيك فيه لسا
قلللي شووووووووووو
فيه كمان
وراح
ماسك الشحاطة الله يعزكن وسلخني فيا على بوزي
وانا هربت لارض الديار
والدنيا ليل
وهو ركض وراي
وياعيني بروح بيتزحلق
وبينزل راسو ببرميل الشوربة
وانا ياجماعة مابعرف شو صرللي بهداك الوقت
بروح بقللو كول أبن عمي كول
أشرب ولايهمك
وحطيت ايدي على راسو
كل مابيرفع راسو
بقللو لاوالله بدك تشرب
وبنزللو راسو بقلب البرميل
وهو يصرخ وانا شد
قلللو ريتك تقبر قلبي اشرب
ولايهمك في لسا كمان
مو أنت بتحب الشوربة أشرب أبن عمي أشرب
امااااااااااااااااااااااااااااااااااااااااااا اان وبعدين
والله من حلاوة روحو
بروح بينفضني بإيدو
وبيمسكني من شعري
وبغطسلي راسي
وبقللي الله يلعن هالترباية
والله بدي ربيكي
وانا عم قول بقلبي ربيني ابن عمي والله بستاهل
ربيني
والله
كل مارفعلي راسي
بقللو رجعني لاني بستاهل (عاقبني ابن عمي)
والله ماخليت برميل شوربة الا وما غطست فيه
بلاطول سيرة
انا قلت يامرة معليش اتحملي كلها حمام وبترجعي عروس
قلت
بلكي بيشفق عليكي
بلكي بقطعها هيك
بس ماكان يكتفي
راح بيرمي علي يمين الطلاق بالتلاتة
ألهي مولاي انت جاهي وحكمي تلهم مرتو تحطلو ملح
أنكليزي وتخليه مايتهنى بطنجرة شوربة
والله يانسوان مافي شي زاعجني الا لاني أنا يلي طلبت منو
يحطلي راسي بالبراميل وعم ادعيلو وقللو بستاهل ابن عمي
شايفين يانسوان
الحق على مين
---
وهيك ياساداتي ياكرام
منكون عرفنا قصة طلاق مفيدة من زوجها
بكرى ان شاء الله رح نعرف قصة طلاق
وجيدة

**بسام** · 05-02-2008, 03:09 PM

هههه
الله يبارك فيكي
نحن بانتظار المطلقة الثالثة بس ما ألتيلنا هادا أسلوبك في سرد القصة ؟

**Nadine** · 20-02-2008, 09:04 AM

اليوم بدنا نعرف وجيدة شو سبب طلاقها من جوزها

هلئ رح نشوف (سعيدة - ومفيدة - ووجدية )
رح نشوف شو رح يفطرو اليوم
حاكم هالنسوان بحبو ضرسن كتير
مالكن غير بالمفيد
أجتمعو هالمساكين التلاتة عند وجيدة
وبلشو يحضَرو فطور اليوم
واليوم مابعرف نفسهم مفتوحة على الاكل ليش
نزلو من علىبكرة الصبح على السوق
وماخللو شي الا وماجابوه
دخلو على المطبخ
نطت مجيدة وقالت انا رح جهز الشاكرية ورز
ونطت سعيدة وقالت أنا رح جهز بابا غنوج - وفتوش -
وصلطة زيتون-وصحن صلطة للي بتحب
وبتنط مفيدة بتقول
أنا رح جهز القطايف لأانو جوزي أبو كرش كان يبحت بحت
على القطايف من تحت دياتي
وهيك يا أحبائي الاعضاء
بلشو هالنسوان نطوطة بالمطبخ وبلشت الروايح الحلوة تفوح

المهم مالكم غير بالمفيد المختصر
خلصو هالمطلقات طبخ ونفخ
وشطفو ارض الديار بالمي وسقو الياسمينة ورشوها بالمي
وبلشت ريحة الياسمين تفوح بارض الديار
ومدو الحصيرة تحت النارنجة
وحطو الاكل والذي منو
وكل وحدة قعدت وحطت إيدها على خدها وصفنو بالسفرة
ولي عليهم شو منحوسين هالمساكين
والله قلبي وجعني علين
وهالمطلقات قاعدين وناطرين المدفع
ومافي غير صوت العصافير عم تودع النهار
وهوووووووووووووووووووووووب
بيضرب المدفع
كل وحدة تمها بيوصل لدنيها من الفرح بالمدفع
وبفشو خلقن بالاكل
أي والله يامحترمين كأنو اول مرة بشوفو فيها أكل
ماعلينا
بيخلصو أكل وبتقوم وجيدة بتجلي الجليات
وسعيدة بتلم السفرة وبترشرش مي بأرض الديار
ووجيدة بتنزل السطل على الجب يعني بير المي
وبتعبي مي باردة بوظ
وبتغسل جاط عنب
الاراكيل والقطايف بكونو جهزوا
وبيقعدو بقولو يالله ياوجيدة
خلصينا بدنا نعرف شو سبب طلاقك وحظك المهتر
بتقول وجيدة اي مو تكرم عينكم ياصبايا
والله رح احكيلكن كلشي
---
هادا صبايا كنت متزوجة من واحد نص مجنون
حتى لانظلمو
كان طيب ومافي منو
بس يلي كان يجنني فيه أنو قبل كل مناسبة بيقعد بجهزلها قبل بشهرين
كيف يعني
يعني
نحنا بيتنا صغير
مافي غير هالغرفة
يعني اكلنا وشربنا ونومنا فيها
ايييييييييييييييييييييييييه
وجوزي الله وكيلكن بجيب غراض وبزت بالغرفة
بقللو ياجوزي ليش هاد
بقللي عم جهز لرمضان
اييييييييييييييييييه
شو ايه
قبل شهرين ياجماعة ببلش يجيب بالغراض
شي رز شي برغل شي عدس
شي بطاطا
يعني والله ماترك شي بالسوق الا ومادحشو بالغرفة
وانا رح طق
لمين بدي احكي
ماضل مكان حتى ننام
يعني شلحنا المخدات برا وصرنا نحط راسنا على كياس الشعيرية والمعكرونة
هههههههههههههههههه
وكل ما اسألو ياجوزي لمين هالغراض
بقللي لرمضان
أي شو بدنا ناكل يعني برمضان
وانا رح طق
ماعاد فيني اتحمل
اذا اجتني جارتي مافي محل تقعد عليه
شو ياسعيدة بتتذكري لما اجيتي لعندي وين قعدتك
صحيح ياجماعة قعدتني بسحارة البطاطا
شايفين بسحارة البطاطا
وانا شو بدي احكي على حالي يعني
يعني الله وكيلكن بكون بدي انزل على السوق
بجيب المانطو تبعي بدي ألبسو
بلاقي بجيوب المانطو شي ملح شي برغل شي عدس
وانا اقعد بنص الغرفة وانتف بشعري
وبلش صرخ وولول
وأدعي على حظي المعتر
اييييييييييييييييييييييه ولي حظك شو منيل
وبعدين
اي شو بعدين
بيجي جوزي المسا
وبكون حامل بايدو اربع خمس كياس
بقللو ياجوزي شو هاد بقللي لرمضان
اي والله والله صرت حب شعبان اكتر من من رمضان
كللو من ورا جوزي
وانا فار الدم لراسي وطلع جناني
وعملت عشا وقعد يتعشا
وقللي يامرة لازم اليوم ننام بعرض الفرشة
وقللي رجليكي لاتفرديهم كتير
لمي حالك منيح
ولييييييييييييييييي عليكي ياوجيدة
ولييييييييييي عليكي
ولي على عينو
حتى الفرشة ياجوزي
والله حط الاكياس بالفرشة لانو ماضل محل بالغرفة
وأنا مانمت ولاغفت عيني هداك اليوم
وقلت والله لفرجيك ياجوزي بكرى
الصباح رباح
نام نوم العوافي انشاء الله
وقبل ماينام قللي
ياوجيدة رمضان على الابواب
قومي عملي جرد وشوفي شو ناقصنا غراض
وانا قلتلو نام أبن عمي نام
بكرى رح أعمل جرد منيح
ونام جوزي وأنا قعدت خططت وفكرت ودبرت

اييييييييييييييييييييييييييه على شو خططتي
والله ماعاد الي نفس على الكلام
عبولي كاسة عرق سوس
او لاء
هاتولي قطايف بدي حللي ضرسي
خلص بكرى منكفي
---

**عبد الله** · 20-02-2008, 10:16 AM

ههههه شو هل القصص الحلوة فيها تشويق بس رح ننطر لبكرا.
وانشاء الله ما تكون هادي آخر قصة

**Nadine** · 20-02-2008, 11:42 AM

اهلا بك اخ عبد الله , مشكور على المشاركة, نعم للاسف عبكرا رح حط كمالة القصة, وبالنسبة اذا كانت اخر قصة, لا اسا في ان شاء الله, وكمان على هالنسق كتير مهضومين.

**Nadine** · 22-02-2008, 03:08 AM

اكيد عم تتحرقصو بدكن تعرفو وجيدة شوعملت بالمونة تبعيت رمضان
والله مسكينة هالوجيدة
جوزها الله وكيلكن ماترك شي بالسوق الا وجابو منشان رمضان
وهو ياحسرتي مافي غير راسو وراسها
يعني
طبخة صغيرة بتكفيهم
أي وصلت معمو القصة أنو عمل المانطو تبعها مستودع
يعني انتو مع مين
أكيد مع وجيدة ومتعاطفين معها
يعني شو ماعملت بجوزها بتكون ماقصرت فيه
بس ياهل ترى شو عملت فيه
معقول تكون قلدت رفيقتها مفيدة وطبخت كل المونة
كلشي ممكن

أي وجيدة والله نطفتي قلبنا النا ناطرينك من امبارح
امانة لاتواخذوني يانسوان
بتعرفو انو الدنيا رمضان
وبصراحة كش بدني من سيرة جوزي
الهي ينتقم منو
يالله ياوجيدة
هاد ياستاتي المحترمين
سهرت طول الليل وانا فكر شو بدي أعمل بجوزي
يعني والله بدي فش خلقي فيه
اييييييييييييييييييه
نام جوزي بعرض الفرشة
وحاطط تحت راسو كيسين شعيرية
وانا ساندة ضهري على شوال الرز
جوزي بلش شخير
وانا بلشت تفكير
طلع الصبح
قام لبس تيابو
وراح على شغلو
وانا ياحسرتي
وين بدي اقعد وين بدي نام
شو بدي اعمل مابعرف
مالكن غير بالمفيد
تذكرت كلام جوزي انو هالاغراض لرمضان
اييييييييييييييه وشو بعدين
ولاقبلين
تذكرت فورا جارنا رمضان الفوال
جاركن رممضان--
لك ايه جارنا رمضان الفوال
حطيت على راسي المنديل
وفضًيت من المانطو تبعي الرز والعدس
ولبستو
فتحت الباب وصرخت يارمضان
ماحدا رد
صرخت مرة تانية يارمضان بأعلى صوتي
بروح بنط رمضان وبقللي خير جارتنا شو بدك
بقللو دخيل عينك
جوزي جايبلك شوية بضاعة
قللي متل شو
قلتلو مونة
ولي على عينك هيك عملتي--
وكل ماسألت جوزي ليش هالمونة بقللي لرمضان
الله وكيلكن جارنا رمضان هيك يعني متل يلي ضربو قرد
مدري شو صرللو
قللي وينن الغراض
قلتلو فوت على الغرفة
فات
ووقف هيك بتم الباب متل المسطول
وقللي ولي كل هاد
قلتلو اي كلن الك
مو انت رمضان
قللي اي انا رمضان بعينو
قلتلو أي إذا أحمل وشيل
والله ماكذب خبر
وبلش رمضان يحمل ويشيل
يحمل ويشيل
وانا عم اتفرج عليه
وقللو الله يعطيك العافية
وفوق هيك
عملتلو براد شاي وقلتلو تعال روق دماتك أخي رمضان تعال
شرب الشايات
وتحللى رمضان
وحمل البضاعة ورواح
انا فتت على الغرفة
ولي على حظي
رمضان أخد يلي ألو ويلي ما إلو حمل نص العفش
بس قلت بنفسي أي أريح
مالي ذنب زوجي قللي لرمضان
شو يانسوان ماسمعتوه بدانكن عم يقول لرمضان
صحيح ياوجيدة هيك قال نحنا شاهدين--
بعد ماراح رمضان
كان انقضى النهار كللو
وأنا ركضت دغري تحممت وتغندرت وتبودرت ومعطت حالي بالحمرة معط
ونطرت جوزي حتى يجي
أجا جوزي وكالعادة
أضرب على حظي
حامل بأيدو كياس
تركتو ماسألتو شي
فات على الغرفة
ومدري شو صرلوو
صار يميل على اليسار
وعلى اليمين
وانا عم ميل معو
وأضرب حالي كفوف
والله بدو بدو يسلخني فلق
بس سكتت
برم لعندي وقللي وين المونة ياوجيدة
قلتلو
ليش لمين كانت المونة

قللي لرمضان
قلتلو أي أنا صرخت لرمضان إجا أخد المونة
موأنت قلتلتي بتمك لرمضان
قللي يامجنونة لشهر رمضان
شو دخلو رمضان الزفت جارنا شو انا مجبور فيه حتى جبلو مونة
والله لربي الحارة فيكي
قلتلو شو بعرفني أبن عمي
ماسمعت كلمة شهر منك
امااااااااااااان يانسوان
مسكني من ايدي وبرمها على ضهري

وربطني ربط
وشحطني من شعري بأرض الديار شحط
والله لهلئ كتفي مخلوع
إلهي تفك رقبتو وتخلعلو كتافو وتفسخلو رجليه
قولو آمين
آمين
وبروح بمدني فلق
بأرض الديار
وأنا قللو شد يا أبن عمي شد
والله بستاهل
هي عملة بعملها
شد يا أبن عمي شد
هو يشد
وانا اصرخ وقللو اكتررررررر
وقول بقلبي اكيد رح يشفق علي هلئ
يعني كلها فلقة وبتمضى
كلها شهرين تلاتة مابوقف على رجلي
بس احسن مايزتني ببيت أهلي
والله ماكذب خبر
وقف عن الضرب
وانا متل المجنونة
بقلو
لا والله بدك تكفي
لا والله
اضربني انا بستاهل
بروح
مابكذب خبر
الهي يكسرلو اديه
بشمر عن إديه
وببلش ضرب
حتى بلش ينزل الدم من رجلي
وانا غبت عن الوعي

بروح بعبي سطل مي من النافورة

وبرشني فيها

ولما بفتح عيوني بقللي طالق
بالتلاتة
وبعدين فقت لاقيت حالي ببيت اهلي

بس والله ياجماعة مافي شي معذبني
غير لاني قلتلو اضرب ابن عمي بستاهل ضرب
وهيك على مين الحق يانسوان
علي ولاعليه
عليه طبعا انت شو ذنبك
ولي على عيونو شو مقوص
خليكي ببيت أهلك حبيبتي هنيك اريحلك
----
وهيك ياساداتي ياكرام
منكون عرفنا قصص هالمطلقات
وأكيد حبيتوهم كلهم
وقضيتو معن ايام حلوة برمضان
ونصيحة ألكن يانسوان
لاتعملو هيك عملات
يعني بالنهاية رح تاكلوها فلق وتروحو على بيت اهلكن

**الزاهر** · 22-02-2008, 11:43 AM

المشاركة الأصلية كتبت بواسطة Nadine

----

وهيك ياساداتي ياكرام منكون عرفنا قصص هالمطلقات وأكيد حبيتوهم كلهم وقضيتو معن ايام حلوة برمضان ونصيحة ألكن يانسوان لاتعملو هيك عملات يعني بالنهاية رح تاكلوها فلق وتروحو على بيت اهلكن

هادي أحلا شي بكل الموضوع!!!!...............هههههههههههههههههههههههه هه

**nana** · 22-02-2008, 12:49 PM

مين قال أخت نادين منا عم نتابع قصصك أكيد عم نتابعون بس والله كنت مشغوله هل فتره
عنجد كتيييييييير حلوين بس كنت اتحرقص لما ماشوف كفاية القصه

يالله ناطرين قصصك الجديدة بس ما تتأخري علينا كتيررررر

**Nadine** · 22-02-2008, 12:52 PM

المشاركة الأصلية كتبت بواسطة Zaher Eddin

هادي أحلا شي بكل الموضوع!!!!...............هههههههههههههههههههههههه هه

اهلا بك اخ زاهر , مشكور على التعليق , شو ما عندك شي قصة تشاركنا فيها؟؟

**Nadine** · 22-02-2008, 12:57 PM

المشاركة الأصلية كتبت بواسطة NARA

مين قال أخت نادين منا عم نتابع قصصك أكيد عم نتابعون بس والله كنت مشغوله هل فتره
عنجد كتيييييييير حلوين بس كنت اتحرقص لما ماشوف كفاية القصه

يالله ناطرين قصصك الجديدة بس ما تتأخري علينا كتيررررر

يا هلا الست نارة , والله نورتي الموضوع , والله يعطيكي الف عافية .

انا متأسفة اني كنت عم خليكن تتحرقصوا بس هيدا الشي اللي بخلي الواحد يتابع وبدو يعرف شو صار.

وتكرمي هلأ رح حط قصة جديدة كرمالك بس.

**Nadine** · 22-02-2008, 01:05 PM

اليوم في عنا قصة جديدة
قصة شب مدلل أمو
أي نعم مدلل أمو لأنو يابعدي أبنها الوحيديعني لازم يكون مدلل أمو

كان ياماكان في قديم الزمان
كان في شب في اول عمرو
وهالشب مدلل أمو
بس هالشب زكرتاوي ئبضاي
وبحب الشغل
وامو بدها تخطبلو
كل يوم بتزن براسو
وبتقللو :شفتلك بنت الحلال
لاقيتها ياأبني
متل الحورية
إلها تم ياكل وماإلها تم يحكي
عيونها متل حبة اللوز
أنفها حبة فستق
بيضة متل الفل
ياعيني شو تربابية
بتضربها الكف بتدير خدها اليمين
هاد الشب يابعدي قال
ليش لاء

خلينا نخطب

وراحت امو دبرت الموضوع بمعرفتها
وشافتلو بنت الحلال
اتفقو على يوم معين انو يتلاقو مع بعض بحمام السوق
أي نعم بحمام السوق
يعني فهمكم بكفي بدن يشوفو البنت لاسمح الله
تكون غاشتهم للجماعة
أي لكن عمي لكن شو بدن ياخدو البنت على عماها
بلاطول سيرة
أجتمعو هالنسوان هيك متل العادة على هالبنت
واخدوها على حمام السوق وفلوها تفلاية
ووافقو عليها بالاجماع
وبلا طول سيرة وعلاك مصدي

المهم
اجتمعو الرجال وفصلو الحق
يعني كتبو المهر
ووقتها ياساداتي ياكرام
كتبلها شي ماانكتب من قبل
كتبلها بقرتين و 25 دجاجة وديكين و3حمير
المهم
تمت الخطبة بخير وسلامة وكتب كتابو الشب على سنة الله ورسولو
وهيك مرت الايام والشب خاطب
بس كان في عندو حماية قوية كتير
الله لايورجيكم غير النور
كانت مكلفتو البلا
يعني اذا جبلها بطيخة وطلعت بيضة بتقللو
لو بتحبنا ماكانت طلعت هيك
وذا جاب شي للبنت بتقلو وين هديتي انا
يعني كرهتو البنت
والبنت ياعيني بالعة الموس عالحدين
يعني مين بدها تراضي حتى تراضي
هي عيني وهي عيني
بلا طول سيرة
مرت الايام والشهور وقرر الشب بتجوز وينستر
ويخلص من نق حماتو
يعني معو حق
المهم

اجتمعو الاهل وحددو موعد للعرس
ومتل العادة
بيوم العرس
اجو رفقات العريس لبسوه بارض الديار
بلشو يقرصوه وينخوزوه ومدري شو
والعروس عم يجهزوها اهل الحارة
بلا طول سيرة
كانو النسوان ببيت اهل العروس مجتمعين
ومتل العادة بتبلش العراضة الشامية الحلوة
يعني سيف وترس (وعريس الزين يتهنا-- وصللو على محمد مكحول العين--)
وبيعملو برمتين تلاتة بالحارة
حتى وصلو العريس لبيت اهل العروس
هنيك كانو مجتمعين النسوان
ولما بيعرفو انو العريس وصل
دغري بتبلش الزغاريد تلعلع بالحارة
لعلعة
وبيركضو ركض بيحطو على راسهم
وبيدخل العريس
على مكان الفرح
وهالنسوان متل العادة سيدي
ببحلقو عنيهم فيه
شو لابس وشو عامل
بيلفت انتباه الجميع ياساداتي ياكرام
أنو العريس حامل بإيدو علبة ملفوفة بشكل حلو ومرتب
والكل صارت عينو على هالعلبة شو فيها
قعد العريس على البرزة
وحط الهدية جنبو على الطاولة
ببلشو رقص وغني
وهيك حتى تعبو وفلسو من الغني

بيجي العريس بلبس العروس الدهبات وببلشو زغاريد
وبحضرو حالن لحتى يمشو
بيجي العريس بيوقف
وبقول بالصوت العالي
شوي لو سمحتو

بقللها ياحماتي انا ماني نسيانك ابدا
بتقلو تقبر قلبي جايبلي هدية
بقلها كيف لكن
هي هديتك
بتمسكها بايدها وبتقللو شكرا
بقللها لاء
لاء
افتحيها هون وقدام الناس
والناس بقولو اي افتحيها
وهي نفشت ريشاتا وفردت حالا
وفتحت العلبة
وبتشوف
ياحزركن شو بتشوف
اي

بكرى منكمل القصة اذا الله راد

**الزاهر** · 22-02-2008, 04:01 PM

أنا محلو بكون جايبلها عئربة هدية!!!!!
عم امزح ها!!!!.............اووووووووووووووووووول!!!!

**Hussein Mallat** · 22-02-2008, 04:42 PM

kteer 7ilweh l2ossa, bas heik 7ar2astiona w 7ara2tilna albna !!!! badna na3ref shu bi bhal 3elbeh.... bas 7ilweh fikret l2ithara wl teshwi2 .... i like it.... keep on the good work!!!

**عبد الله** · 23-02-2008, 10:09 AM

انشاء الله اليوم تكون كمالة القصة وما تنطرينا لبكرا

**Hussein Mallat** · 24-02-2008, 08:28 PM

lak wein kmelet l2ossa .... 7ar2astina ya 3ami!!!!!!!!!!!!!!! ntafa albna!!!!

**Nadine** · 25-02-2008, 03:19 AM

المشاركة الأصلية كتبت بواسطة Zaher Eddin

أنا محلو بكون جايبلها عئربة هدية!!!!!
عم امزح ها!!!!.............اووووووووووووووووووول!!!!

يا هلا بالاخ زاهر , مشكور على التعليق

**Nadine** · 25-02-2008, 03:21 AM

المشاركة الأصلية كتبت بواسطة badboy

kteer 7ilweh l2ossa, bas heik 7ar2astiona w 7ara2tilna albna !!!! badna na3ref shu bi bhal 3elbeh.... bas 7ilweh fikret l2ithara wl teshwi2 .... i like it.... keep on the good work!!!

اهلا بك اخ باد بوي وباينتك غود بوي , اليوم ان شاء الله بكفي القصة

**Nadine** · 25-02-2008, 03:22 AM

المشاركة الأصلية كتبت بواسطة عبد الله

انشاء الله اليوم تكون كمالة القصة وما تنطرينا لبكرا

عذرا انا ما دخلت على النت السبت , واليوم منكمل ان شاء الله

**Nadine** · 25-02-2008, 03:46 AM

اليوم رح كملكن القصة
ورح نعرف اذا الله راد شو جاب مدلل أمو هدية لحماتو

يجي العريس بقللن شوي لو سمحتو
بقللها ياحماتي انا ماني نسيانك ابدا
بتقلو تقبر قلبي جايبلي هدية
بقلها كيف لكن
جايبلك هدية ونص
هي هديتك

بتمسك الحماية الهدية بإيدها
وهي قلبها هيك ناقذها
بتقللو إي تقبر قلب حماتك بفتحها بالبيت
بقللها لاء
افتحيها هون وقدام الناس
ولو شو أنت رخيصة ياحماتي
والناس بقولو اي افتحيها
وهي نفشت ريشاتا وفردت حالا
والكل عم يبحلق بالعلبة
بتقطع الشريط
وبتشق الورق
وبتفتح العلبة
وبتشوف
فيها
ياحزركن ياساداتي ياكرام شو بتشوف بالعلبة
شو رايكم منتركها للمرة الجاية بخبركم شو بتشوف
طيب لاتحلفو رح احكي
اي نعم
بتفتح العلبة
والكل عم يقول بقلبو
والله بيطلعلها هالضرسانة
المهم
بلا طول سيرة
بتفتح العلبة
وبتلاقي جوات العلبة

بتشوف صابونتين
اي نعم بتشوف صابونة عدد تنين
وهون بيسكت الكل
ولو زتيت ابرة بتسمع رنتها
والحماية بيحمرو دنيها
وبتفرك بإيديها
بتقللو صابونة يابعد روح حماتك
شو قالولك قاعدين من دون حمام
بقلها اي صابونة ياحماتي
بتقللو وليش صابونة يعني
بقلها بالصوت العالي
حتى تغسلي أديكي من بنتك نهائيا
اعتبريها بنت وماكانت
يعني اعتبري حالك ماخلفتي ولا انجبتي
شو نسيتي يلي عملتيه فيني
وبشنكل عروستو وبياخدها لبيتو
والحماية بيغمى عليها
وبرشولها مي وبتقوم بتروح على بيتها
والبنت خلص بتصير ببيت زوجها

يعني هي رسالة للحمايات
يديرو بالن منيح
لايعذبو صهرهن
شو مالكن عارفين انو مرجوع البنت على بيت زوجها
--
وهيك منكون عرفنا قصة مدلل أمو
وان شاء الله بكرى يوم جديد وقصة جديدة

**الزاهر** · 25-02-2008, 03:53 AM

ما شاء الله....................ما عندي غير هالتعبير!!!.....................كتييييييييييييييير حلوة!!!!

**عبد الله** · 25-02-2008, 01:54 PM

شو هل الهدية يلي ماحدى بيتوقعا
بس فعلا القصة حلوة
وشكرا

**Hussein Mallat** · 25-02-2008, 04:19 PM

very nice ending, 3anjad kteer 7ilween your stories w kteer mo3abirin!!!!! i really liked them, keep on the good work...w ne7na bi 2intizar essa jdideh 3ala a7ar mnl jamer

**Hussein Mallat** · 25-02-2008, 04:26 PM

very nice ending, 3anjad kteer 7ilween your stories w kteer mo3abirin!!!!! i really liked them, keep on the good work...w ne7na bi 2intizar essa jdideh 3ala a7ar mnl jamer

**Nadine** · 26-02-2008, 02:11 AM

المشاركة الأصلية كتبت بواسطة Zaher Eddin

ما شاء الله....................ما عندي غير هالتعبير!!!.....................كتييييييييييييييير حلوة!!!!

اهلا بك اخ زاهر, الصابونة اشتريا بيوم العرس مانو بوئت الخطبة , لا وئت الخطبة بدك تصبر وتساير.

**Nadine** · 26-02-2008, 02:13 AM

المشاركة الأصلية كتبت بواسطة عبد الله

شو هل الهدية يلي ماحدى بيتوقعا
بس فعلا القصة حلوة
وشكرا

اهلا بك اخ عبد الله , ايه مظبوط ما حدا بيتوقعا , بس هالنوع من الحمايات بدن هيك, والا بيكون الرجال مجبور بالتنين.

**Nadine** · 26-02-2008, 02:22 AM

المشاركة الأصلية كتبت بواسطة badboy

very nice ending, 3anjad kteer 7ilween your stories w kteer mo3abirin!!!!! i really liked them, keep on the good work...w ne7na bi 2intizar essa jdideh 3ala a7ar mnl jamer

اهلا بك اخ باد بوي , اكيد رح حط قصص اكتر لان عم شوف ردود كل مرة , وهل الشي بيشجع اني ضيف قصص جديدة.

**Nadine** · 26-02-2008, 02:35 AM

اليوم رح احكيلكن حكاية النجار المسكين
جاهزين اليوم

هادا ياسيدي
في نجار مسكين عندو محل بجنب النهر,
وهو عم ينشر بيوقع المنشار من ايدو
وئعد متل الولاد الصغار يبكي على المنشار

وكان في جنية ئريبة منو عم تتفرج على هالنجار المسكين
أجت وقالتو شبك يا بني آدم ليش عم تبكي
قلها وقع منشاري بالنهر
وهالمنشار مافيني بلاه ابدا
وهادي الجنية جميلة من الجميلات
بتوقف قدامو هيك

وهووووووووووووووب
غطست بالنهر
وشالت منشار من ذهب
قالتلو
هاد المنشار الك
ئلها لاء
غطست مرة تانية وشالت منشار من فضة
قالتلو هاد المنشار الك
قلها لاء
غطست مرة تالتة وقالتو هاد المنشار الك
قلها اي هاد المنشار من حديد الي
وضحك حتى شفايفو وصلو لدنيه
وقلها شكرا
اي سيدي لكن نحنا العرب صاحبين اخلاق
مالكن غير بالمفيد
وبعدين الجنية وجعها قلبها على هالطيب وحبيتو لانو شريف
راحت هديتو المنشارين لانو صادق وشريف

وصارت احوالو عال العال وامورو تمام
التمام
واللهم صلي على حبيبنا محمد البدر التمام
وبروح بينقرها جوازة غير شكل
وبيوم من الايام كان عم يتمشى هو زوجتو جنب النهر
وعم ياكلو بزر
ويفصفصلها ويطعيميها بايدوا
وماسكين كيلو موز
بقشرو الموزة
وبيرموها بالارض
بقشرو وبيرمو
بتروح بتدعس زوجتو على قشرة الموز
وهووووووووووووووووووب
بتوقع بالنهر
متل كل مرة بيقعد وبيبكي
وبحط إيدو على خدو
وبيتفرج على النهر
وهووووووووووووووب
بتحضر الجنية وبتقلو

خير ليش عم تبكي يا مسكين
بقلها زوجتي سقطت بالنهر
بتقللو ولايهمك
رح جبلك ياها
هووووووووووووووووووب
بتقفز بالنهر
وبتشيل----------
له له له له

لاتواخذوني عندي موعد
لازم روح
لاتزعلو بكرا اذا الله راد
منعرف شو بتشيل الجنية من النهر
سامحونا وادعولنا
----

**الزاهر** · 26-02-2008, 03:23 AM

المشاركة الأصلية كتبت بواسطة Nadine

...........
هووووووووووووووووووب
بتقفز بالنهر
وبتشيل----------
له له له له

لاتواخذوني عندي موعد
لازم روح
لاتزعلو بكرا اذا الله راد
منعرف شو بتشيل الجنية من النهر
سامحونا وادعولنا
----

لاه ولو!!!!................هيك طخنت!!!

يتشلو عجوز شمطاء..............بتألو هادي مرتك.............بيألها أعوذ بالله................هوووووووب.............بتشلو مرتو..........بيفكر..........بيؤول بركا اللي بعدها أحلا......فبيكذب عليها وبيألها لا مش مرتي.............هوووووووووووووووب.............بتش لو.............ما بعرف.............لنشوف الكمالة!!!

**Hussein Mallat** · 27-02-2008, 03:21 PM

lak wein lkmeleehhhhhhhhhhhhhhhhh....... ra7 ysir ma3na daghet !!! lol
bas 3anjad Allah yberek fiki 3ala hal essas, ennou 7ilween w deyman fiyon 3ibra... mesh mtl essas hal iyam yalli bala ta3men w ma bte7ki gheir 3an l7ob w ta2 l7anak ...w ya reit l7ob l3afif!!!! lol

**عبد الله** · 28-02-2008, 09:19 AM

أنا بعتقد إنو بتشللو مرتو بس ما بيقبل فيها
على كل حال ناطرين الكمالة وشكرا

مشاهدة نتائج الإستطلاع: بيستاهل الموضوع التثبيت؟

الموضوع: كان ياما كان

أدوات الموضوع

عرض

كان ياما كان

سلام

سلام

هههههه

السلام عليكم

السلام عليكم

السلام عليكم

ضوابط المشاركة