لماذا يدفع الأبناء ثمن أخطاء آباءهم؟؟

[اليمامة الحضرمية]

بسم الله الرحمن الرحيم

--.--.--.--.--.--.--.--.--.--.--

"الأهل يأكلون الحصرم والأولاد يضرسون"

برأيي هذه ليست مجرد كلمات،

فقد وجدت في واقعنا مواقف كثيرة تجسد هذا المثل،،

فقد تجد شاب صالح ينتمي إلى عائلة طالحة،

فتجد الأبواب تسد في وجهه بسبب تاريخ عائلته العريق في الرذيلة والتفلت،،

وقد يرفض الناس توظيفه، ، أو تزويجه، أو حتى مجالسته،

وقد يشيرون إليه بإصبعهم كيفما توجه،

ويوجهون له نظراتهم الحادة،

ويلسعونه بكلماتهم الجارحة،

فيصبح منبوذاً أو شبه منبوذ،،

،،،،

هنا يطرح السؤال نفسه

لماذا يدفع الأولاد ثمن أخطاء آبآئهم؟
،،،،،

ألا يجدر بمجتمعاتنا الشرقية أن تخرج من عقليتها المحدودة في مثل هذه المجالات، فتقيّم الفرد كفرد مسؤول عن نفسه، ولا

تحسابه بسبب أخطاء الآخرين؟!؟

،،،،،،،

تخيّل نفسك إحدى الشخصيتين: الفرد المنبوذ إجتماعياً بسبب ماذكرناه سابقاً،

أو الشخص الذي يوجه إصبع الإتهامات...!!

وتكلم عن موقفك بكل صدق وواقعية،،

وهل تقبل مثل هذا الشخص (الأول) أن يكون زوجاً لأختك /لابنتك/ أو قريبتك؟؟

وهل تقبليينه زوجاً لكي؟؟

أرجو التفاااعل

[مايا]

السلام عليكم ورحمة الله وبركاته
مشكورة اخت يمامة والله يجزيكي الخير وانا رح شارك من بعد اذنك
بالنسبة للصحبة فأنا ما عندي مشكلة اذا كانت صديقتي حدا من عيلتها سواء اخوها او ابوها او اي حدا مش منيح لأن بالنهاية انا عم صاحبها هي وأذا كانت منيحة فما بفكر مين اهلا لأن ما بيهمني واصلا نوادر لتلاقي عيلة كاملة الا ما يطلع فيها حدا غير شكل .
اما بانسبة للسؤال اذا كنت بقبل بالشخص كزوج فما بعتقد فيني جاوب لتصير معي لأن يمكن جاوب بس وقت يلي بتصير كل شي بيتغير ما بعرف الله اعلم بصراحة لقيت الجواب صعب مع اني ضد هالشي انو يتعير الشخص بأهلوا وما بتقبلها ابدا .
بس ما سمعنا جوابك

[السجين]

السلام عليكم ..مشكورة كتير أختي اليمامة عالموضوع المهم و يلي بيصير كتير هالأيام ..والله أنا حسب رأي انو اذا الشخص هيك منيح بس منو بالظاهر ..يعني أكيد بدي اسأل عنو قبل ما أعطي بنتي أو أختي ...أكيد بسأل أشخاص موثوق منن ..و اذا طلع انو هادا الشخص بعيد كل البعد عن عيلتو و أخلاق و تصرفات عيلتو ..فمفي مشكلة .....و كمان شغلة انو صعب كتير تلاقي حدا هيك الا ما ندر يعني لأن الشخص بأغلب الأحيان بدا تطلع أخلاقو متل أخلاق أهلو
سلام.

[wassim.h]

سلّمون عالموضوع الحلو....
والله يا ستنا إذا كنت الشخص الأول بدّايء كتير
...لأن هيد الشخص بيكون عم يحارب الشيطان لحتا يدلو على الصراط المستقيم وبيكون عم يبعد عن جو إهلو وهادا شي بيدايء كتير كتير و بعد كل هيدا بيجو العالم بينبذو وبيجرحو وبيحاسبو عغلط غيرو......يعني بلا ما يساعدو ويبعدو عن الجو إلو هوا في....ويساعدو يساعد أهلو تيصلحون.....
وبعدين ماني عم لائي سبب إنون ينبزو ويعليرو ...ليش هنه الواحد مننون هو ختار أهلو ؟!!ولا ربنا إلي بيرزء؟؟!! !!!!!!!!!
بالنهاية الله يصبّر هالإنسان ويثبتو والله يهدي العالم المذكورين....

ومن ناحيت إذا بءبل إنو يكون زوجاً لي أو لأختي أو لبنتي أو لحدا من ءرايبيناي....يعني أنا هلء ماني واعي الوعي الكامل لأعرف بس هلء بؤول إني إذا متأكد إنو هيدا الشخص منيح وصالح بءبل في وبعتمد عالله ....شو إنو هيدا الإنسان ما لازم حدا يئبل في لأنوأهلو هيك؟؟!! يعني هو شذنبو؟؟!!!!
إن شاء الله ما منحكم بيلي بيرضا ربنا...

[Barbie]

السلام عليكم ,

بارك الله بك أختي اليمامة , على الموضوع .

للأسف بات أكثر الناس اليوم , هكذا .... لا يعاملون الفرد حسب ما فعله , ما قدمه !!! بل حسب أهله .
و إن فكرنا بشكل واقعي , فمن الصعب , فصل الشخص عن أهله بشكل مطلق من المرة الأولى . فالإنسان بطبيعته يخاف أن يتأثر هذا الإبن , أو هذه الإبنة بأفعال عائلتهم . و لكن هذا بالتأكيد لا يبرر , و لا يعني أن نغتاب الناس و نظن السوء بهم . و من الأجدر بنا أن نلتزم الصمت في هكذا مواقف .

و عندما يقف كل منا , و يفكر بمدى خطورة محاسبة أي شخص على أخطاء لم يقترفها , سيدرك عندها أنه يظلم هذا الإنسان و يساهم بشكل مباشر , في تراجعه و عودته إلى أهله , لأنه في الحالتين , يحاسب على أنه مذنب !!!!!!!!!!!

لذلك , صار من الضروري أن نعي , و نحاسب أنفسنا لأننا نظلم غيرنا و لا نصدق أنه من الممكن أن يكون بالفعل مختلف عن أهله .
و نحن بالطبع لا نحب أن نكون مكان هذا الشخص .... نسمع في كل خطوة كلمات جارحة , قاسية ....... و الأكبر من كل هذا أنها ظالمة .
لذلك فالنعامل الناس كما نحب أن يعاملونا . فما من أحد ٍ يستطيع إختيار عائلته و محيطه .

و بالنسبة للإنسان الذي يحس أنه مظلوم , و لا ينتهي من إتهامات الناس الباطلة ..... فليذكر دائما ً أن الله تبارك و تعالى معه , ما دام يذكره عز و جل .
و أجره لن يضيع بإذنه تعالى , إن لم يكن في الحياة الدنيا , ففي الآخرة , عساه يكون من أهل الجنة , لما صبر عليه .
و كلما ضعف , فاليتذكر أن ما يمر به الآن إمتحان من رب العالمين . و ليعرف أنه بتراجعه سيساهم في تعزيز هذه الفكرة عند الآخرين , لأنه سيطبق ما قد ظنوا به .

لأجل ذلك يجب علينا قدر المستطاع إحترام غيرنا , و معاملته حسب ما يفعله و ما يقدمه و يقوله ( طبعا ً بعد التفكير مليا ً ) .

نسأل الله تعالى أن يغفر لنا و لجميع المسلمين و يهدينا و يهدي الأهل , لأنهم السبب الرئيسي لضياع الأبناء .

[wassim.h]

بس ما ءلتيلنا يا أخت باربي

وهل تقبل مثل هذا الشخص (الأول) أن يكون زوجاً لأختك /لابنتك/ أو قريبتك؟؟

وهل تقبليينه زوجاً لكي؟؟

[Barbie]

السلام عليكم ,

سأرد على السؤال بجواب ٍ واحد ...لأن ما ارضاه على نفسي سأرضاه على أختي , أو أخي ....

المهم , الإرتباط بمثل هذا الشخص يكون أمر مشرف , لأنه ترك الفتن و تغلب على وسوسةالشيطان و هوان نفسه و كلام أهله ..... و هذا إن دل على شيء فهو يدل على حسن أخلاقه و قوة إيمانه و خوفه من الله تعالى , و إرادته .

و بالطبع لن يكون قراري عشوائيا ً , لأن الزواج ليس بالأمر السهل أو الأمر الذي يقبل التسرع . لذلك يجدر بي أن أسأل عنه من يعرفه و من يكون مصدر ثقة ... للتأكد من صلاح دينه و صفاء نيته , ليكون جوابي صحيحا ً . أي بالنسبة لي أقبل و أتوكل على الله .

لكن , القرار لن يكون لي وحدي , فالأهل هنا يلعبون دورهم إما إيجابيا ً و إما سلبيا ً , حسب أفكارهم .
فربما سيهتمون بعائلة الشخص أكثر من إهتمامي أنا ... و بالطبع لا يمكنني لومهم ( ما دام رأيهم ضمن المنطق و الحدود ) , لأنهم يفكرون من منطلق الأهل , و يخافون أن يكون كأهله .

و بالنهاية , لن أعارض أهلي مهما حصل( في هذا الأمر طبعا ً و ليس العكس أي انني لن أوافق على شخص لا أرتاح له , حتى و إن كان بنظرهم الشخص المناسب ) , و لكن هذا لا يعني انني لن أدافع عن رأي .... بل أكون متمسكة بوجهة نظري ما دمت مقتنعة بها , و أحاول إقناعهم قدر المستطاع , و بكل قدرتي , لكن في اللحظة الحاسمة , عندما يحين موعد الجواب , لا أقدر ان أخالفهم , حتى و إن كنت على ثقة كبيرة من الشاب .
فهم أهلي , و أتحمل كل شيء , مقابل رضاهم .

و بهذا سيحاسب هو على أساس أهله و تصرفاتهم و ربما سيظلم , كما أنني بنفس الوقت أكون قد خضعت لرأي أهلي و أفكارهم ..... فهذه هي الحياة , و الله تبارك و تعالى لن يتركه مهما حصل و إن شاء الله سيعوضه بمن هي أفضل و أصلح مني .

[wassim.h]

بارك الله بكم أختي باربي....
بإنتظار الرد على الأسئلة من قبل طارحة الموضوع...

[أبو عبد الرحمن]

السلام عليكم
هادي اول مشاركة لي بالمنتدى هوني
المنتدى لهلاء ما بعرف عنو شي بس يا ريت يكون حلو

[اليمامة الحضرمية]

بارك الله بكم أختي باربي....
بإنتظار الرد على الأسئلة من قبل طارحة الموضوع...

عفوا على التأخيير
بالنسبة لي الأمر جدا صعب أني كون انا الأول
وبإذن الله ماعندي مشكل أني وافق على زواجي من شخص أهلو مش مناح شششششششششششششششششررررررررررررط
يكووووووون مشهود له أن نحسبه من الصالحين والله أعلم طبعا
الشغلة صعبه شوي بس أهم شي هو كيييييييييييييف هيدا رأي
وشكراااااااا للجميع على مشاركاتكم الصريحه وبارك الله فيكم

[أبو الحسين]

ءعوديلك شي سنة و رجعي فتحي و جاوبي عالموضوع

[أبو رياض القلموني]

من و جهة نظري أنا ... ما بوافيء عالحكي اللي بأول إنو إذا الواحد إهلو منن مناح بكون منبوذ ...
عم إحكي كمثل عنا بالضيعة .. في كتير شباب أوادم بس إهلن منن مناح و منن ما بصلو و ...
بس هالشباب كتير محبوبين من الشباب الدينين .. بالعكس بحبون أكتر من غيرن .. لأنن بعانو و بيعلأو مع إهلن تحتا يمشو عالصح ... و أحوا أبو رياض عندو كتير رفأة إهلن مش أوادم ... بس شبدي بإهلن(أصلن ما حدا منن عايش ...) .. شو أنا عم صاحبن ولا عم صاحب إهلن ...
أما بالنسبة لموضوع الزواز .. فهادا صار شي تاني .. لأنو هوني رح يصير في علاءة مباشرة مع الإهل .. يعني إذا واحد بدو واحدة إهلا منن مناح أكيد رح يضرب ميت فرام أبل ما ياخدا ..و من حأن لإهلو يرفضو لأنن منن متفإين مع هيك عيلة ... لأنن ممكن ينغصولو عيشتو ...و خصوصي إذا أما من النوع هاداكا ... يا دلي ... و هون معك حأ إنو الإهل سببو مشكلة لإبنن أو لبنتن ...

[wassim.h]

عفوا على التأخيير

وين بصرّفوا هيداي؟؟؟؟ أه؟؟!!!
ههههه عم إمزح....عارفين إنو الإمتحانات شاغلتكون.....ف ما تتفاصح يا abdullah ولك تيييييييي.....شو كيف عملتو ولا إسن ما عملتو؟؟

[اليمامة الحضرمية]

من و جهة نظري أنا ... ما بوافيء عالحكي اللي بأول إنو إذا الواحد إهلو منن مناح بكون منبوذ ...
عم إحكي كمثل عنا بالضيعة .. في كتير شباب أوادم بس إهلن منن مناح و منن ما بصلو و ...
بس هالشباب كتير محبوبين من الشباب الدينين .. بالعكس بحبون أكتر من غيرن .. لأنن بعانو و بيعلأو مع إهلن تحتا يمشو عالصح ... و أحوا أبو رياض عندو كتير رفأة إهلن مش أوادم ... بس شبدي بإهلن(أصلن ما حدا منن عايش ...) .. شو أنا عم صاحبن ولا عم صاحب إهلن ...

صح كلالالالالالالالالامك عين العقل وهيك المفروض والله يبارك فيهم وفيك

أما بالنسبة لموضوع الزواز .. فهادا صار شي تاني .. لأنو هوني رح يصير في علاءة مباشرة مع الإهل .. يعني إذا واحد بدو واحدة إهلا منن مناح أكيد رح يضرب ميت فرام أبل ما ياخدا ..و من حأن لإهلو يرفضو لأنن منن متفإين مع هيك عيلة ... لأنن ممكن ينغصولو عيشتو ...و خصوصي إذا أما من النوع هاداكا ... يا دلي ... و هون معك حأ إنو الإهل سببو مشكلة لإبنن أو لبنتن ...

الرجال ما بيخلي حدن يتدخل بحياتو وحياة مراااتو
وعمنقول "إذا هي منيحهــ" يعني أكييد هي ماراح تخلي شي يطلع برة البيت وكل شوي تخبر أهلها مادامها بتعرف كيف هن وحتى لو ما بهن شي ما لازم كل شوي تخبرهم بكل شي...

[اليمامة الحضرمية]

شكرا على مرور الجميع والله يبارك فيكن

[it's ha]

السلام عليكم
اسمحو لي ان أقول ان هذه الظاهرة تجتاح لبنان والبلدان ولكنها تزدهر شيئا فشيئا في بلدتي الحبيبة "القلمون" (للاسف)
أنا مني وعليي عندي كتير رفقة وكلهم الحمد لله مناح يعني انا بكامل ارادتي اخترتهم لحتى كمل معهن مسيرتي وشاركهن أفراحن وأحزانن. يعني ما أعملت "statistique" قبل ما أتعرف على كل واحدة منن مين اهلها ومين بتقارب وكنو أمها يوم من الأيام علقت مع أبوها أو كنو شي مرة أخوها على صوتو عليها بالشارع أو كنو أهلها ما بصلو وما بيوصلو رحم وما بزكو أو بيتصدقو...........
أنا بالنسبة لخبرتي مع رفقاتي الي هي فوق ال9سنوات لقيت انو الي بتعاني مع مشاكل مع أهلها في الصلاة أو الالتزام أو السيط السيء فهي بالعكس عمبتكون أوعا وأحسن لانها عمبتحس بالفضيحة وهي تلقائيا عمبتصير أحسن الناس.فأنا هون ما بقول "الاباء ياكلون الحصرم والابناء يضرسون" بل أقول "الاباء يخربون والابناء يدفعون حق هذا التصليح"
بعدين أنا قلت انو عنا بالقلمون هالظاهرة متفاقمة ,اسمحو لي بهذه الكلمة ولو كانت ثقيلة عند البعض "اذا واحد منيح يعني مقبول بيعملوه نبي من الانبياء عقد ما بفخمو بالشغلة واذا واحد يعني عرفو عنو من زمان شي شغلة أو عن أهلو بيعملوه ابن حرام" ايه روحو يا عمي .
أنا مني وعليي اذا بدي اختار زوج لابنتي او لابني أكيد مش رح اسأل نسوان القلمون مش ميشان شي بس لانن كتير ببالغو أنا رح استخير ربنا عز وجل واسال الناس الصالحين المشهود لهم في قريتنا.
كنت اريد قول بعض الامور التي تتعلق بالموضوع المطروح أكثر من الذي ذكرته الان ولكني وجدت الاخت "باربي " قد أعطت الصورة التي أريد.
والسلام عليكم

[اليمامة الحضرمية]

اهلين فيكي أخت إتس ها نورتي الموضوع

صدقتي والله أنو المشكلة اجتاحت لبنان والبلدان وخصوصاً العربية.. كمان للآسف

وأنا بحييكي وبحيي رفقاتك كمان والله ياخد بيدهن وانشالله الله يثبتكن ويجعلكن من الصالحات وإيانا

"أنا مني وعليي اذا بدي اختار زوج لابنتي او لابني أكيد مش رح اسأل نسوان القلمون مش ميشان شي بس لانن كتير ببالغو أنا رح استخير ربنا عز وجل واسال الناس الصالحين المشهود لهم في قريتنا"

الله يهدي الجميع وانشالله بتفرحي من ولادك (ما بعرف إذا حضرتك متزوجه وعندك ولاد أو مجر إفتراض)
وتزوجيهن احسن البنات...

أهلا وسهلا بكي نورتي

[it's ha]

السلام عليكم
مشكورة يا "سمر"

[Mohammad]

هذا الموضوع رائع...
أما مجرد أن يحسب المرء نفسه في الشق الأول فهذا شيئ محتمل وأعرف أنه صعب...يعني لمجرد أن أهله ُ سمعتهم غير طيبه تصب فوق رأسه كل مصائب المجتمع و يصبح هو....الحاله الشاذه....بأعين الناس...فلا تجد له صديق و لا صاحب و لا حتى زميل مشكله حقيقيه نسأل المولى عز و جل العافيه...و لكن علينا دائما ً أن نتفاءل بالخير..و أما الشق الثاني و هو بالنسبه للزواج...فأقول الذي قاله النبي صلى الله عليه و سلم ...إذا جاءكم من ترضون دينه و خلقه فزوجوه إن لم تفعلوا تكن فتنة في الأرض و فساد ٌ كبير....
و شكرا ً

[اليمامة الحضرمية]

أهلاً بك أخ محمد وشكراً لمشاركتك