أين نصيب إخواننا المأسورين من الدعاء؟

[الحجر]

للأسف إن أئمة المسجد البحري لم يدعوا حتى الآن لإخواننا أبناء القلمون المأسورين . فلماذا ألسنا أبناء بلدة واحدة؟ ألسنا أبناء طائفة واحدة؟

لذا أرجوا من كل من قرأ هذه الأسطر القليلة أن يرسل هذه الرسالة الملحة إلى أئمة المسجد الموقرين.

ومشكورين.

[فيصل]

صلو على النبي
والله خي مظلوم بد تدلك مظلوم ولك ولا حدن رح يرد عليك خلص ماتت الغيره على الدين فشحال ميشان الشباب المظلومين بس الأحلا من حيك بوكره بس يطلعو إنشاء الله شوف ساعتها الغيره والمحبه ولك يا أخي قل حسبنا الله ونعم الوكيل وبس ولا تفكر كتير بيوجعك راسك بس شاطرين يتناقشون إذا لزم يطلعلها عمره أوكلا يعني قصدي بس بالجدال شاطرين و أنا أولهن

[الحجر]

أنا ناطر اليوم صلاة التراويح والوتر ورح شوف كنو وصلت الرسالة للإمام.

[وسيم أحمد الفلو]

أللهم فك أسرهم وفك أسرنا وأزل الغشاوة عن عقولنا وقلوبنا.

[روعة]

اللهم فرج هم إخواننا وقر عيون ذويهم يا رحمن يا رحيم

[Nadine]

اللهم فك أسرهم, وفرج همهم, واكشف كربهم , ويسر أمورهم

[الشامي]

السلام عليكم...

اللهم فك أسرانا وأسرى المسلمين وفرج همهم وردهم إلى ذويهم سالمين يااااا رب...

أخوكم

[Nader 3:16]

معك حق يا اخي...

لازم ندعو لهم!!!!!

[الحجر]

اللهم فك أسر إخواننا المسلمين في شتى بقاع الأرض وخاصة أسر أبناء بلدتنا وصبّر أهلهم.

[Sarah]

اللهم فك اسرهم واعدهم الي اهلهم سالمين.ااااامييييين يا رب العالمين.

[بسام]

اللهم فك أسرهم ويسر أمرهم ودمر من كان سبب في إعتقالهم

[wishes]

انشالله بيطلعوا قريبا"
ويللي كتب عنن بالجرائد الله لا يوفقوا
كل همن بس يوسخوا اسم القلمون
لأنوا هنة وسخين بدن يوسخولنا اسم الضيعة.

[بسام]

اللهم من أراد بالإسلام والمسلمين سوء" فاجعل تدبيره تدميرا" عليه

[wishes]

امين
و شكرا" عالموضوع أخ بسام
انشالله بيطلعوا قبل ما يخلص رمضان

[بسام]

متل ما بيقولو النسوان: من تمك لبواب السما

[شرشبيل]

اللهم كُن معهم يوم قل المعين
اللهم كُن معهم يوم تخلى عنهم المسلمين
اللهم شُل اليد الظالمة التي تنال من إخواننا المسلمين

[بسام]

أيها الإخوة أقرب ما يكون العبد إلى الله وقت السجود فأكثرو من الدعاء لهم في السجود وخصوصا" في هذه الأيام المباركة

[Nader 3:16]

و الله اكثر ما يغيظني اقسم بالله

انو للأسف في بعض الناس بالضيعة عم يقولوا انو الشباب المعتقلين الهم علاقة بما يسمى (فتح الاسلام).......

و الله للأسف ان نسمع هكذا من ابناء البلدة التي تحتضنهم!!!!!!

يعني عيب عليهم يحكو هيك!!!!!

ياما في ناس انسحبست ظلما و تلقت الاهانات ثم خرجت بريئة!!!!!


الله يفك اسر جميع المظلومين

[moustafa]

اللهم فكّ أسرهم و يسّر أمرهم و فرّج كربتهم و ردّهم الينا ردّا جميلا... اللهم إجمعنا و إيّاهم في هذا الضيعة المباركة في عيد الفطر المبارك يا عزيز يا جبّار... و اّخر دعوانا أن الحمد لله ربّ العالمين و الصلاة و السلام على خاتم الأنبياء و المرسلين محمّد صلى الله عليه و سلّم

[بسام]

أيها الإخوة ألحو على الله بالدعاء النابع من القلب

[محمد أحمد الفلو]

قبل أن أسافر أخبرني أحد الشباب بأن عامر الزعبي طلب منه أن يعلم جميع الشباب أنه بريئ من جميع التهم التي نسبت إليه... ولو حكم عليه بالسجن مئة عام ...وها أنا بدوري أعلم جميع أهل المنتدى
فادعوا الله وأنتم موقنون بالإجابة

[بسام]

الله أكبر
ونحن انشاء الله على يقين أن كل الإخوة بريؤن
أيها الإخوة أكثرو من الدعاء لهم
ورجل لو أقسم على الله لأبره
عسى أن يكون من بيننا
لو أحد يتكرم ويخبر الشيخ جمال وهاني بأن يدعو لهم وهم أئمة التراويح في المسجد البحري

[المهند]

أرى بعض الأعضاء يرفعون اكفهم بالدعاء لاخواننا المأسورين وهم في مشاركة اخرى يقولون"انو الموضوع فى ان"!!!!!!!وهون رافعين ايديون وعم يبكوا عليون ويدعو على يلى حكى عليون بالجرايد!!حيرتونا يا ناس معكون..ولا القصة ترداد ببغائي مع يلى ماشي ..!؟؟يلى بيكون فعلا متيقن من براءة المأسورين ما لازم تسولو نفسو انو بقول حرف واحد عليون بينفهم منو اتهام الهون!!..يعنى صحيح انو جريدة الاخبار والديار وسخت على القلامنة بس كمان قناة المستقبل ما قصرت فينا أبدا..وكمان جريدة المستقبل لما ردت كان كل هما انو ترد التهمة على الشيخ فتحى يكن وتألب الرأى العام عليه وما كانت حاطة نصب عيونا ابدا لا اهل القلمون ولا كرامتون ولا انصافون من يلى انحكى عليون!! يعنى اجتون فرصة من السما حتى يحكوا بطريقة اشمل واوسع على شخص بيعتبروه حليف سوريا الاول وراس حربة فى وجوهون!!هيدي كل القصة يعنى يلى وسخو على اهل القلمون كانوا ولاد كل الشهور ادار وشباط اللباط ..اقتضى التنويه لانو انا ما بحب يلى بيبيضو وجوهون قدام الملأ ..ولا بحب شوف حدا بوجين او اكتر هون بالمنتدى..الهى أسألك ان تفك قيد أسرانا وتشفي مرضانا وترحم شهداءنا وموتانا في كل مكان على أرض الاسلام والمسلمين!! امين

[الحجر]

والله كلامك جواهر يا المهند وأنا رأيي من رأيك.

[wishes]

انا لما حكيت بموضوع اخي المهند عن المأسورين و إنو في إن بقصتن ما كنت بقصدن كلن انا بقصد ناس معينين او بالاحرى شخصين هنة يللي قرو عالباقيين لذلك ارجو عدم التفلسف.
بالنسبة للجرائد مش الحق علين الحق عولاد الضيعة يللي عطيوهن الأخبار الكاذبة يعني المستقبل او الديار او الأخبار ...... بيبرموا ع scoop بس للأسف و يا عيب الشوم عالأمناء بالضيعة يللي ما بهمن اسم ضيعتن.
و كمان البلدية عليا حق يعني ما شفنا ولا مؤتمر صحفي لنفي الاتهامات و بعتقد إنو هيدا بخلين يشكوا فيهن أكتر.

[بسام]

اللهم إنهم إخواننا فمن ظلمهم فعليك به فإنه لا يعجزك.
خلينا بلا معاتبة يمكن الأخ ما يكون بيعرف أبو أسامة منيح

[المهند]

يا ريت يا" تلميذ كفاح "توضحلنا كلامك منيح عمين بتقصد انو قال هالحكى!! وبالنسبة للاخت ويشز ما بظن انو كلامك سابقا وكلامك يلى توضحى فيه الان الو ترابط ببعض!! يمكن انا فهمتو غلط ورح ناخود الكلام على حسن النية..بالنسبة انو البلدية ما عملت مؤتمر صحفى انا معك بهالخطوة انو كان لازم تصير بس مع هيك البلدية وضحت على لسان الرئيس فى بعض الاتصالات والمقالات فى الجرائد..وانا ما عم اتفلسف انا دليتك عشى انتى قولتيه قبل..وسورى ازا الكلام زعجك..

[wishes]

sorry ما فهمت شو قصدت بالأخير
يمكن عالصيام
إذا فيك توضح إذا ما في إزعاج

[Nader 3:16]

الله يفك اسرهم و جميع اسرى المسلمين.....

[Nader 3:16]

خلو الموضوع للدعاء....

و ليس لتبادل الاتهامات

اللهم فك اسر اخواننا

[صلاح الفلو]

بداية المشاركات كانت بأسلوب وجداني جميل فأرجو من المشرف سحب النقاش السخيف الذي أضاع الموضوع الأصلي.

[وسيم أحمد الفلو]

ربما يكون المشرف مصيباً بحذف المشاركات ولكن هذا الأمر خلف لدينا لبساً عن الموضوع وتم إتهام إخوان بأمور لم نتبين صحتها من عدمه، وأنا أعتقد أن الأخ "تلميذ كفاح" ملزم بالإعتذار من الأخ "المهند" إن ساق (أو نقل له) إتهاماً غير صحيح، وإن كان العكس فالأخ "المهند" ملزم بتوضيح سياق كلامه.
ربما هذه المشاركات بعيدة كل البعد عن الموضوع الأصلي ولا تناسب سياسة المنتدى ولكن لا يمكن أن يتم توجيه إتهمات يكون قد قرأها نصف الأعضاء وتكتب ردود حولها ومن ثم يتم حذف كل شيء من دون أن نحصل على توضيح، وهذا ليس جيداً بحق المُتهِم ولا المُتَهم.

[تلميذ كفاح]

الساده آل الفلو و نادر
إن ما تسمونه إتهامات للمهند هو عندي من الأمور المؤكده
وهو قد قال جملته تلك في المسجد ثم يأتينا اليوم صابا شتائمه عليّ .
أعود وأؤكد ما سبق وقلته : السيد المهند قال في المسجد بحضور طلال دنكر وعلي الظنطوثلة من الشباب بعد توقيف كفاح وأحمد ( آ لو ما علين شي ما إخدون) .
وما دفعني لقول هذا إلا من باب معاملته بالمثل

ملاحظة: أنا من حذف مشاركاتي السابقة وليس المشرف

[وسيم أحمد الفلو]

للحقيقة فأنا أستغرب صدور هذه الكلمات عن أخي المهند لأنها لا تتناسب قط مع طريقة تفكيره، وأعتقد أنها ربما وردت في سياق الحوار وأن من سمعها نقلها من دون باقي الكلام كمن يقول "لا إله" ولا ينتظر قول "إلا الله".
على كل فأنا أعتقد أنه ينبغي أن نحسن الظن بعضنا ببعض، وبالإفتراض أن لاكلاماً كهذا صدر عن "المهند" فلا شك أن توضيحه السابق يبين عدم اقناعه بمثل هذه الكلام (فلا يمكن لأحد أن يذم شيئاً ومن ثم يقول بمثله).

[Nader 3:16]

انا ما الي علاقة بهالاصص هادي مشكلتك انت و اياه و ما تدخلني بالنص!!!!!

و الله يفك اسر جميع المظلومين

[محمد أحمد الفلو]

انا ما الي علاقة بهالاصص هادي مشكلتك انت و اياه و ما تدخلني بالنص!!!!!

و الله يفك اسر جميع المظلومين

شو يا نادر هيئتك خيفان من المهند

[Nader 3:16]

هههههههههه مين قلك يا حميطون بس انا ما كنت حاضر بالتعتوع ليش تحتا يدخلوني معهم؟؟؟؟

[المهند]

سلام على من اتبع الهدى وبعد:
أنا تحديتك وقلتلك جبلى الحج طلال أوالحج على الظنط او"الثلة" من الشباب يلى عم تحكى عنا ومنتواجه ما فى مشكلة..بس الظاهر انت مصر ترجع تحكى هون من غير ما تكون بدك تحل الموضوع من جزورو!!أولا يا تلميز كفاح لو قلت كلمتى انا هيدي ما بخاف منك ولا بسأل لا عنك ولا عن غيرك وبظن انو اغلب المنتدى هون صار بيعرف المهند كتير منيح..تانيا انو ما تفكر حالك ازا سميت حالك تلميز كفاح انو انت صرت غيور عكفاح او احمد او اى كان من المأسورين أكتر منى او من اى حدا من اخوة المسجد..يعنى منا عجيبة بعد كم يوم تفوت انت علينا هون بالمنتدى او غيرك ما بعرف وعاملى فيا كمان" كتائب الاسير كفاح" ومحزم حالك ولابس لثام وبدك تفجر الدنى!!كل هيدا حتى نصدق انو انت تلميز كفاح وانو انت مشاعرك تجاه أسر كفاح القص كبيرة وما عم تعرف كيف بدك تنفسا ولا بأي اتجاه!!يا حبيبي هالحركات المحرتئة والمصدية يلى عم تعملا انت وغيرك ما بتفيدو للاخ كفاح بالعكس انا برأيي يمكن تضرو..يعنى لا كفاح ناقصو ولا اهلو ناقصين فلسفتك وهالهمروجة يلى عم تعملا انت وغيرك هون او بالجامع او بين الناس لانو انا عارف متل ما انت عارف انو كل كلمة بتنحكى هون او غير هون عليا الف ادن والحيطان الها دينان بتسمع ولما هالدينين بتسمع امثالك كيف عم يتصرفو بيصيرو يفكرو انو فعلا كفاح عليه شي وانو هو شخص متزعم مجموعة وانو القصة مش قصة شيخ بيدرس قران فقط بالمسجد!! فهمنا انك بتحبو لشيخك كفاح بس ما تفكر انك بتحبو اكتر من اى شخص عم يدعيلو هون وكفاح اصلا ربينا سوى نحنا واياه بالبناية قبل المدرسة لانو كان جاري بالطابق يلى تحتنا قبل ما ينتقلو للعمار الجديد بالجبل..ما عم قولك هالحكى لانى عم دافع عن حالى انو انا ما حكيت هالحكى,لا تفكر هيك ابدا بس بجد انا عم قولك هالحكى انو امثالك بعدون لما بيتصرفو هيك بيكونوا عم يقوموا بضرب غبا محترم وعلى مستوى عالي من الغباء لانو ما بيزينو كلامون ولا تصرفاتون قبل ما تطلع منون ولا بيعرفو لوين هيك تصرف او هيك كلمات ممكن توديون او تودى غيرون معون!!!!!..متل ما قال اخى وسيم فلو "أبو رغد" انو انا بصراحة راجعت كتير بعقلى اى كلام صار باى وقفة او جلسة او اجتماع ولو عرضى أو عابر وما بظن انو بيوم من الايام صدر عنى هيك حكى اللهم الا مثلا ازا صار الحكى بالطريقة التالية:"انو لو ما حدا زاكرون بشى ما كانوا رجعوا اخدو" أو هيك شي ساعتا بقولك ممكن ,وبعدين ليش انا بدى احكى الجملة يلى انت عم تقولا وأحمد الحلو ما طلبو لا اول مرة ولا شى وفورا اجو طبو عليه صح او لا؟!!بعدين انا دايما بجلساتى مع مين بيعتبرو حالون مع التيار او اقطاب بالتيار انو دايما بيكون هجومى مضاد عليون لانو للاسف هنى يلى بيعتبرو انو ولاد الضيعة متهمين حتى انو وصلت مرة مع احدون ما رح ازكر اسمو انو قلى بالحرف:"اى ولاد الضيعة ارهابيين ومتل ما بتكتب المستقبل او بتحط عالاخبار نحنا معو ومنصدقو!!"يعنى بعتقد هيك جلسات انا الان عم خبرك عنا وانت ما كنت بتعرفا يعنى كيف بدى كون متناقض مع نفسى من تاني ميل قدام "ثلتك الجهنمية" وشو يلى بيجبرنى اني كون هيك أصلا؟!!برجع بقولك انو انا الان ما عم بررلك قولى لانو منى مضطر برر لانسان بعتبرو بصراحة وما تزعل مني"غبي رقم 1" من لما شفنا طلتك البهية باسم" تلميز كفاح" لانى بعتبر انو عم تشجع غيرك على انو يتصرفو بطريقتك المضرة والغوغائية وعم تساعد انو كفاح القص وغيرو يبقو خلف القضبان شهور ويمكن سنوات اطول!!!لا قدر الله!!بعدى عم اتحداك بس ما تيجي تتفلسف هون عالمنتدى مرة تانية ولو كنت رجال ابن رجال بتقبل التحدى وبتواجهنى بالجامع او وين ما بدك وبتجيب يلى حكالك هالقصة وساعتا ممكن يتبين الحق من الباطل!!

وهناك يظهر حين ينقشع الدجى من كان خوانا وكان المشفقا

[المهند]

وانت يا حميطون المنحوس؟!!شو عم تتمرجل من ورايي حسب ما سمعت!!قولك نادر خايف من المهند لانو اخد عبرة من بعض ناس حاولوا يدوسو عطرف للمهند قام المهند هزؤون .. أكيد ما عم احكى عنك سلامات

[kalamoun_28]

أحلى تحية و100 وردة الى حبيب قلبي السيد المهند, طبعا يا أخي حميطون يلي بخربط مع الأبضايات, بدو يسمع حكي مبيعجبو".

اللّهم انصر المسلمين والمظلومين في كل مكان ... آمين.

سلامات, نزيه خداّج ملاّط

[محمد أحمد الفلو]

وانت يا حميطون المنحوس؟!!شو عم تتمرجل من ورايي حسب ما سمعت!!قولك نادر خايف من المهند لانو اخد عبرة من بعض ناس حاولوا يدوسو عطرف للمهند قام المهند هزؤون.. أكيد ما عم احكى عنك سلامات

والله أنا صرت بفرنسا ، يعني عصايتك يلي عم تلوح فيا ما بتوصلي ، اللهم قبل الصيف الجاية.
وووو هلق نيه ... كيف يعني عم إتمرجل؟
.

[الحجر]

والله شكله الرسالة وصلت من كم يوم للأئمة

[المهند]

سلامات الى خيي نزيه خداج وانشالله منفرحلك بعريس عن قريب و"دزتينة"صبيان يا رب ..وبحب خبرو لخيي المظلوم انو رسالتك وصلت من أول يوم ..

[الحجر]

مشكور على جهودك بس هومن كم يوم بس لحتى دعي الإمام بالمسجد البحري للإخوان

[بسام]

اللهم إن لنا إخوانا في الأسر
اللهم يا ربنا يا الله يا الله يا الله إنا نسألك في هذه الأيام المباركة أن تفك أسرهم وأن تعيدهم إلى أهلهم سالمين
اللهم هذا الدعاء ومنك الإجابة اللهم آمين

[Nader 3:16]

الله فكّ اسر إخواننا المأسورين و ردهم الى اهلهم سالمين....

ارجو ان لا يكون أهل القلمون قد تنساوا ان هناك إخوة لهم في الأسر محتاجون الى الدعاء

و السلام عليكم

[Nader 3:16]

يا شباب لا تبخلوا بالدعاء لإخوانكم المعتقلين...

الله فك اسر كل المظلومين! آمين