أسئلة الخطبة (إهداء لصديقي دوكر المعوكر)

[أبو رياض القلموني]

السلام عليكم ورحمة الله وبركاته

أما بعد...
بعد ما شفت أخي و صديقي دوكر بدو يخطب ..وحسيت إنو ضايع شوية ..قررت إني إرجع شارك بالمنتدى بعد ما كنت تركتو بسبب بعض (*****-حذفت من قبل الأدمن) اللي دمن تأيل ولسانن طويل ..بلا ما تزكروني ..

المهم .. هادا يا سيدي دوكر ..بالزمانااااااااااااااااااآآآآآاااااااااااااااااآ آآآآآآاااااات..
لمن كان أخوك أبو رياض ضارب عينو عأم رياض , و بعد ما أعد معا سألا الأسئلة التالية :

1- يا حبيبتي يا أم رياض ..فيكي لو سمحتي ..إذا بتريدي ..تأوليلنا أيشوا هدفك بالحياة؟..

2- دوموازيل أم رياض .. أيشوا تصورك لمفهوم الزواز؟ .. وأيشيا غايتك من الزواز من أبو رياض؟ ..
هل هي بناء الأسرة ..و عبادة لله وتطبيق لأمره ليكون الإنسان خليفة في الأرض و لتربية الذرية الصالحة ...
ولا بدك تاخدي أبو رياض لأنو أحلى و أرجل واحد بالضيعة ..دخيلو اللي خلأو ...

3- أيشيا الصفات اللي بتحبيا تكون بشريك حياتك ؟..
أكيد أم رياض أعدت توصفني ..عضلاتو مفتولة ..إلخ ...

4- أيمتن بتحبي تجيبي ولاد؟ .. وكم نفر بتتوقعي تجيبي من أبو رياض ؟..

5- عندك شي مشاكل خُلقية , يعني كيف أخلائك ..كيف بتتعاملي مع رفآتك ؟..هل بتحبي تشتغلي بالبيت ..طبخ وجلي ونشر...

6- ميننا رفآتك؟ ..وهل إنتي بتحبي تختلطي بالعالم وتتعرفي علين ..يعني بالمختصر , إجتماعية ولا لأ..

7- كيف علائتك مع أرايبينك ؟.. بتزوري عمومتك وخوالك .. ولا مآطعتين ..

8- شعندك هوايات ؟... و شبتعملي بوأت الفراغ ...

9- شعندك أعمال أو مشاريع إسلامية؟ ... وأيشنا نشاطاتك الدعوية ...

10- سبتعملي إذا أرايبينك بدن يتدخلو بحياتنا ؟؟...أمك مثلاً .. هل بتخلي أمك تدخل فينا .. هل بتسألي أمك عن كل شي بدك تعملي ..

11- شبتعملي إذا شي مرة غلط معك أبو رياض ؟؟.. إذا مثلاً كنتي طالبة منو غراض ونسي يجيبن ..


للإجابة على الأسئلة التالية الرجاء الإتصال على الأرقام التالية : 01010101 أو01010102 أو زيارة موقعنا على الإنترنت ..

أكيد يا دوكور , ما لازم تسألا الأسئلة لدوكرة كأنك عاملا إمتحان ..
يعني أنا أعدت مع أم رياض شي شهر تخلصت الأسئلة , وكل سؤال كنت عامل موضوع وداحش بألبو هالسؤال ...

بس اختصرلتلك هنا لأنو ما فيني أكتب كل شي هون ..بدي شي يومين تخلص ...

عكلن إذا بدك أي معلومات .. أو حابب تعرف كيف لازم تكون الأجوبة ..أبو رياض بالخدمة .. كم عنا دوكر إحنا !! .. وإذا بدك فيك تسألني عالخاص..



أخوكم
العم أبو رياض القلموني

[دوكر]

يا هلا بالمعلم ابو رياض...
بوسة مني لاك ...يسلمو كتير ع هل المشاركة الرائعة...و يا هلا فيك و الله شتأنالك و لطلتك البهية...
يعطيك العافية...
اخوكم دوكر المعوكر...

[أبو رياض القلموني]

أهلين بأخي دوكر

أبو رياض بخدمة الأوادم ...(سرأناها من خداج)

[أيمن غ القلموني]

بس ما ألنا دوكر شو صار معو.

[Nader 3:16]

اول ما بيرجع دوكر عالمنتدى...الكل بباركلوا ها..
لازم نقوم بالواجب..عيب...