عين على مدرسة المنار الإسلامية.

[nour]

أيها الإخوة
بلدتنا عريقة ، في تقاليدها وأعرافها، في استقامتها وعقلانيّتها. أليس غريباً أن لا توجد فيها مؤسسات ؟
مدرسة المنار أولى مؤسسات البلدة، تأسست بدافع الغيرة على الإسلام لما استقطبت المدارس التبشيرية أبناء المسلمين.
كان بمقدور عباد الرحمن أن ينشئوا لهم مدرسة في بيروت أو طرابلس أو حتى في إحدى بلدات لبنان الأكبر مساحة والأكثر عدد سكان.
لكن وقع اختيارهم على القلمون التي تجاور دير البلمند، أكبر مركز تبشيري في الشرق الأوسط إن كنتم لا تعلمون. والمدرسة التي تحصل على مساعدات من عديد من مؤسسات الغرب الخيرية التبشيرية إن كنتم جاهلين.
وبالفعل ، سرقت المنار فور تأسيسها طلاب دير البلمند من مدرستهم. احتضنتهم والعديد منهم تعلّموا مجاناً في المنار، لأن المدرسة كفلتهم إما لأنهم فقراء أو لأنهم أيتام. وعديد منهم تعلّم بأقساط قليلة. فالمنار ليست من المؤسسات المصنّفة (تجارية) بل من مؤسسات المجتمع المدني التابعة لجماعة تسعى إلى أهداف محدّدة.
نعم إخوتي. عندما كبر هؤلاء سجّلوا أولادهم في مدارس أخرى.
من السهل أن تقولوا: يجب ويجب. ولكن من الصعب أن تنفّذوا ما يجب تنفيذه، فدونه عقبات وعقبات. لا سيّما عقبات مادية.
مدارس أخرى حلّت المشكلة وعقدت صفقات مع نواب وسياسيين: تدفعون منحاً،ننتخبكم.
لكن المنار لم تفعل. ولا أحسبها ستفعل.
الآن قيّموا مؤسستنا القلمونية الإسلامية الأولى .
الآن فلننتقد لكن لنرقى بها لا لنشمت أو نرائي.
إجعلوا عيونكم على المنار.

[الزاهر]

كلامي بالأحمر وكلام الماما بالزهري
السلام عليكم وبعد
مدرسة المنار أولى مؤسسات البلدة، تأسست بدافع الغيرة على الإسلام لما استقطبت المدارس التبشيرية أبناء المسلمين.
يا ريتها لساها هيك. صارت بقية المدارس أفضل منها لأنها ابتعدت عن الهدف الذي تأسست عليه. والمشكلة أن القيمين عليها ما بعرف وين طامرين روسهم....ما شايفين شو عم يصير بالمدرسة؟!

.....لكن وقع اختيارهم على القلمون التي تجاور دير البلمند، أكبر مركز تبشيري في الشرق الأوسط إن كنتم لا تعلمون. والمدرسة التي تحصل على مساعدات من عديد من مؤسسات الغرب الخيرية التبشيرية إن كنتم جاهلين.
وإن كنتم جاهلين أنها حصلت على مساعدات هائلة من الذي تسمونه رأس السنة "رفيق الحريري" والمدرسة التي تربي أهل السنة في عقر دار أهل السنة لم تحصل على "بسقة" من "رأس السنة"
وبالفعل ، سرقت المنار فور تأسيسها طلاب دير البلمند من مدرستهم. احتضنتهم والعديد منهم تعلّموا مجاناً في المنار، لأن المدرسة كفلتهم إما لأنهم فقراء أو لأنهم أيتام. وعديد منهم تعلّم بأقساط قليلة. فالمنار ليست من المؤسسات المصنّفة (تجارية) بل من مؤسسات المجتمع المدني التابعة لجماعة تسعى إلى أهداف محدّدة.
والعديد ممن أصبحو خارج المدرسة (إما تخرجو أو طردوا) ----أتكلم عمن تتبناهم المدرسة---لا زالت تتلقى عنهم مبالغ من جماعة عباد الرحمن على أنهم يتعلمون ويتثقفون وووو.....لساها أسمائهم مسجلة على أنهم ممن تتبناه المدرسة ويتعلم عندها.....
نعم إخوتي. عندما كبر هؤلاء سجّلوا أولادهم في مدارس أخرى.
ما معهم حق ليش....أنا عندما انتقلت من مدرسة الصبيان الرسمية إلى مدرسة المنار كان انتقالي من قلب جهنم إلى أطرافها، لكن لا زلت في جهنم....أنا لست بجاحد للجميل لكن أنا ممن يعتبر أن مدرسة المنار كمدرسة، لم تقدم لي الكثير لكن الأساتذة----المظلومين----هم الذين قدموا لي.....وأنا أعتبرهم من أهم الأساتذة في العالم أجمع ولو أنهم يعلمون في جو يخلو من الفساد ومصلحة العائلة لتخرج من مدرسة المنار علماء.....المدرسة لم تقدم لي الكثير لأنها لم توفر لي الجو الذي يجب أن يكون للطالب وللأستاذ على حد سواء.......لكن الأساتذه هم الذين قدموا لي العلم والثقافة ولولاهم لما كنت كما أنا اللآن......
مدارس أخرى حلّت المشكلة وعقدت صفقات مع نواب وسياسيين: تدفعون منحاً،ننتخبكم.
لكن المنار لم تفعل. ولا أحسبها ستفعل.
بس انطريلك كم شهر جاية. على زماني كان أتباع تيار المستقبل يدخلون الصفوف ويدعون لمبادأهم من دون أي إذن.....فاحسبيها أنها ستفعل وليس الأمر بالبعيد......


نعم أعلم أنك ستقولين لي أين النقد البناء والهادف......لكن القصة لا ينفع معها لا نقد بناء ولا هادف وأنت أعلم مني بهذا....فأنت من صلب الموضوع ومن داخله وقد جربت عدة مرات.....هل نفع معك؟!
كنت دائما ما تقولين لنا أن الكلام لا بد وسيُسمع.....لكن كم علينا أن تتكلم لكي يطبق؟!......

بس تصير المنار خارج "قبضة" آل طوط بتصير مدرسة بحقّ......هذه خلاصة كلامي

بس ما تزعلي مني يا ماما .........

السلام عليكم

[أم سفيان]

الحقيقة مرة يا أخت نور فهل تريدينا أن نكون صريحين معك شرط ما تزعلي منا أم تريدننا أن نجامل بانتظار إجابتك

[Nader 3:16]

أنا لم اكن من طلاب المنار لكن كنت اسمع من اصدقائي عن اهمال الادارة بشكل عام في بعض الامور التي تعتبر اسلامية........

[الزاهر]

الهيئة رح تسمع أمي نور أصص ما سامعتها أبل هلأ........

بس أنا بحب إرجع أكد إنو الأصة صعبة......يعني أنا وأت بدي إحكي على أبوها لأمي وعلى أختها وأختها التانية وعلى زوجها وعلى عمها وعلى عمها التاني وعلى زوج أختها وووووووو......يعني منطلع ناشحين العيلة كلها نشح......ولك الأحلى من هيك إنهم كلهم جيراننا ومنحبهم....بس ما في حدا ما بيغلط........

شو لساها مأطوعة الكهربة بالضيعة؟؟؟؟

لوووووووول!!!!

[nour]

أتابعكم
نريد آراءكم بكل صراحة ووضوح وشفافية.
خوفنا من النقد هو سبب تخلّفنا. ومن لا يسمع نقداً لا يتحسّن.
النقد البناء نقد تجاور حسناته السيئات
نقد لا يكتفي بطرح العلة بل يبحث عن الحل.

[الزاهر]

بدك الحل؟؟!!!! آه.....أوليلي بدك الحل.......طالع خلئي وما شايف أدامي ها.....بدها حل آل.......

عم إمزح بس أنا جديا أرى أن الحل يكون بنفض المدرسة كما ننفض الثياب.....نبعد كل الغبار عنها...
وذلك بـ:
عارف إنو حكيي خيال وما ممكن يطبق ولو بالخيال والأحلام....لكن هذا رأيي...ما المدرسة للعباد ومصلحة آل طوط من مصلحة العباد........

يجب أن تهدم مدرسة المنار على رؤوس من فيها وتنشأ مدرسة منار جديدة بكل معنى الكلمة...جديدة المبادء، جديدة الإدارة، جديدة الأساتذة،......جديدة بكل نواحيها......وخاصة الإدارة وطاقم العمل المؤلف من آل "طوط" وآل "طوط" وآل "طوط" والمصالح الشخصية لآل "طوط" .....
يعني كم يوم جاية تصير المدرسة إدارتها من آل طوط وأساتذتها من آل طوط وعامل النظافة من آل طوط وما شاء الله أبنائهم كثر ....يعني سنتين زمان بيصير الطلاب كلهم "طوطيين".....وبيصير لازم نسميها "مدرسة طوط الإسلامية".....

يعني لما تكون مصلحة آل طوط والعائلة أهم المصالح كيف تكون المنار مدرسة تخرج الأجيال.....
إذا مصلحة الطلاب تحتل 0.000000000000001 بالمئة من أولويات المدرسة والإدارة بدعّسكُم على رأبتي (هذه عبارة يرددها أخي.......ما لأيت غيرها)

أصحا حدا يفكر أنو عندي مشكلة مع آل طوط ها.....كلهم أحبابي وأقاربي وجيراني......وأت بيجي على بالي فيني طسهم بالحجار من شباك غرفتي........ ما هيك يا نور (بنت بنت خال أبي) ما ألتلكم كلهم أقاربي وجيراني......

سامحونا......بس ما بعرف كذب عالناس وما أول الحق.....على الأقل كما أراه
وسامحني خيي وسيم غنوم.....سرأتلك أسلوبك بالرد شوية.....ما شفتك اليوم بالضيعة طويلا لحتا أستعاره عيارة.......

سلام

[عمر ملاط]

أخي المناضل زاهر..
أنا أعلم أنك تعاني من دوني حين تذهب إلى ما فوق مدرسة المنار.... ولكن اصبر.. فما بعد الصبر إلا الفرج...

المهم هية مش المشكلة إنو إذا شخص من عيلة معينة.. شغل كل العيلة معو.. بالعكس هادى حرص منو على أهلو وأصحابو...

يعني بقصد إنو مش هادي المشكلة.. يعني خلينا بكل صراحة... أنس ممكن يعلم دين.. والحج علي ممكن يعلم دين... والشيخ فراس ممكن يعلم دين... مش عيب أبداً إنو الأستاذ محمد طوط يختار أنس لأنو قريبو..

المشكلة تكمن في إنو الأستاذ يهمل المدرسة من أي ناحية... وأنا صرلي زمان بعيد عن المنار.. لذلك لا يمكنني أن أحكم...

ولكني أحببت أن أنبه إلى أن المشكلة لا تكمن في تغليب العيلة على الطاقم.. إنما تكمن في حال كان الطاقم والإدارة يستخفون بواجباتهم ويهملونها...

فلذلك لا تجعل المشكلة في التطويط الذي ذكرته.. وابحث عن المشكلة الحقيقية..

والله تعالى أعلم وأحكم..

[nour]

والله فاجأتني يا زاهر . شو هالأخبار؟!.
أ}كّدلك مئة بالمئة إنو كفالات الطلاب تدفع للطلاب وعندما يغادرون المدرسة تنتهي.
وأؤكّدلك أننا كل سنة نسحب نتائج مدارس الشمال الأشهر وتكون نتيجة مدرستنا في مادتي الفيزياء (التي يدرّسها سامح) والرياضيات(التي يدرّسها رضوان) هي الأفضل .
عن الفوضى ،أتفق معك في أمور كثيرة. ولكن السبب الرئيسي قلّة الموظفين . وطبعاً هناك أخطاء.لهذا نحن هنا. لنعالج الأخطاء .
إنّ حلّك -يا بني- فيه تعسّف كثير .وسأخبرك أني أعرف كم تعب والدي وأنفق من مال ومن جهد منذ تأسيس المنار ، فضلاً عن تقديمه مبنى للمدرسة قبل البناء الجديد. لن تجد أوفى منه لهذه المؤسسة. ولولا تشبثه بها لأقفلها العباد نظراً إلى ظروفها المادية.
فرجاء لنضع النقاط على الحروف ولنوجّه نقدنا لل(الفعل) وليس لل(الفاعل) . وهذا نهج القرآن الكريم. وهو نهج يعترف بالحق لا بالرجال، فصوابية العمل أو خطؤه أمر لا علاقة له بالفاعل. صحيح؟ .
ولنعد إلى قضيتنا التي أرجو التفاعل معها بجدية وإخلاص.
أعتقد أن ثمة مشكلة إدارية. نعم. المشكلة أن المدرسة محتاجة إلى لجنة إدارية لا إلى مدير. ليكون العمل مؤسساتياً حقاً . لجنة كل فرد منها يضطلع بمسؤوليات محدّدة ، وفق أنظمة محدّدة ، وتتكامل في التشاور واللقاءات الدورية.
فهل تعتقدون أولاً أنّ المنار قد عرفت إداريين أكفاء؟ من هم؟
سنعالج قضية الهيئة التعليمية لاحقاً . لنبدأ مع الإدارة.

[الزاهر]

أنا آسف لأن فهمتوا عليي إني عندي مشكلة مع آل طوط
ما أنا ألت أكثر من مرة :
"أصحا حدا يفكر أنو عندي مشكلة مع آل طوط ها.....كلهم أحبابي وأقاربي وجيراني......وأت بيجي على بالي فيني طسهم بالحجار من شباك غرفتي........ ما هيك يا نور (بنت بنت خال أبي) ما ألتلكم كلهم أقاربي وجيراني......"

والله بحبكم كلكم......لكن كانت النقطة التي أتكلم بها أنه وباختصار، مصلحة العائلة أصبحت المصلحة العليا........شايفة يا ماما.....ما بئا بحب الإختصار....صاير بكتب كتييييير....

فالحل بتغليب مصلحة الطلاب على مصلحة العائلة.....
هل أنا أتكلم عن الفاعل أم على فعله الآن؟؟! هل "تغليب المصلحة" إسم شخص؟! والله إذا كان هيك رح سمي إبني بكرة بهالإسم...... شو رأيك يا ماما!!!!

ثم أنت قلتي :
"قد أن ثمة مشكلة إدارية. نعم. المشكلة أن المدرسة محتاجة إلى لجنة إدارية لا إلى مدير. ليكون العمل مؤسساتياً حقاً . لجنة كل فرد منها يضطلع بمسؤوليات محدّدة ، وفق أنظمة محدّدة ، وتتكامل في التشاور واللقاءات الدورية.
فهل تعتقدون أولاً أنّ المنار قد عرفت إداريين أكفاء؟ من هم؟
سنعالج قضية الهيئة التعليمية لاحقاً . لنبدأ مع الإدارة."

يعني أنا وياك على نفس الموجة......ألووووووو.....وششششش!!!!......عم تسمعيني؟!! ......يبدو ماشي الخط منيح.....طيب هل عرفت المنار إداريين غير الأستاذ محمد طوط......ما تؤوليلي إنو بيوم من الأيام كان فلان الفلاني مدير....لأن من يوم يومها المنار إدارتها بيد الأستاذ.....ولو لم يكن هو المدير الرسمي....ما هيك؟!

يالله شو التطور التاني برأيك؟!.....بعدين خليني ألك ....ما إنتي عطيتي الحل الكامل المتكامل....ولونتلك ياه بالأحمر....هلأ صار بدنا كيف نطبق هالكلام.....هون المشكلة....مستحيلة!! وما في خط أكبر من هيك لحتى أكتب فيه
يالله ناطرين تؤوليلنا تفاجئتا بكم مرة أخرى ها.....أصحا تنسيها ببداية المشاركة الجاية.......لوووووووووووووووول!
السلام عليكم

[أبو حسن]

أتابع الموضوع منذ البداية وقد ترددت كثيرا قبل المشاركة فيه ...

حتى وأنا أكتب هذه الكلمات ... مازلت غير واثق بأني أريد فعلا المشاركة في هذا الموضوع ...

ربما لأني أرى أنني قد قلت سابقا، ومرارا، وصراحة، ما عندي في هذا الموضوع، ولأهل الشأن مباشرة ... وآلمني ردة الفعل على كلامي رغم أني حرصت حين قلته ألا يبدو شخصيا أو متحاملا ... وإنما واقعيا ومتجردا ... والدليل أن علاقتي مازالت طيبة مع كل أهل الشأن في هذا الموضوع ...

لكن بما أن الأخت الفاضلة "أم معروف" تريد الكلام على الإدارة ... فالسؤال الذي يطرح نفسه:

هل الإدارة مطلوب منها أن تكون خلافة أبدية لا عزل فيه حتى يقضي الله أمرا كان مفعولا (وهو أصلا رأي فقهي باطل بنظري) ؟

المنار تابعة لجماعة عباد الرحمن، والجماعة لديها مجلس إدارة ... هل لأختنا الفاضلة "أم معروف" أن تستقرئ لنا تاريخ مجلس إدارة العباد وتخبرنا بنتيجة الإستقراء ؟
وهي خير من يقوم بهذا الإستقراء إن لجهة أبيها أو لجهة عمّها أبي زوجها أو لجهة زوجها نفسه !

وعلى وقع أجوبة هذه الأسئلة يتحدّد بالفعل إن كان مطلوبا لهذا النقاش أن يبلغ غايته المرجوة أم لا.



عن عبد الله بن مسعود رضي الله عنه أنه قال: "كم من مريد للخير لم يُصبه"، وفي رواية "ليس ببالغه".

[الزاهر]

الله يحيي أصلك أخي أبو الحسن.......نحنا على نفس الموجة كما يبدو لكن أنا معتر....ما بفهم أصدي منيح

سلام

[هشام الفلو]

مدرستي ما أحلاها قلبي معلأ بهواها
سأحاول أن أتناول عدة نقاط موجزة:

تخضع المدرسة لبعض المحسوبيات، مما يؤثر على أدائها بشكل عام.
تقييم نجاحها يقاس بمقارنتها بنظيراتها، مع الأخذ بالإعتبار إمكاناتها المادية
يجب أن لا يتوقف الطموح نحو الأحسن، لست أدري إن كنت أظلم المدرسة إن كنت أعتقد أنها تراوح في مكانها
قياس مدى النجاح يكون بملاحظة مدى الإستقطاب، في مرحلة دراستي فيها، كانت الصفوف تحوي بعض الطلاب من خارج البلدة مما يدل على ذياع صيتها، ولا أدري الحال في الوقت الراهن
أخيرا سؤال أظنه محوري، هل الطلاب القدامى يعودون ليسجلوا أولادهم في مدرستهم السابقة التي درسوا فيها ؟
بستغل المناسبة ت وجه تحية لمعلمتي سنا، وهي فيا تقيم جزء من النجاح عبر تقييم مداخلتي من النحية اللغوية !
لو شو ما انتقدت، بيكفي أنو هل المدرسة قدرت تتحملني من الروضة للقسم تاني ........
والسلام

[الزاهر]

قياس مدى النجاح يكون بملاحظة مدى الإستقطاب، في مرحلة دراستي فيها، كانت الصفوف تحوي بعض الطلاب من خارج البلدة مما يدل على ذياع صيتها، ولا أدري الحال في الوقت الراهن

أهلا وسهلا بالأرايب.....اشتأنالكم والله.....وينكم ما حدا بيسمع عنكم؟؟؟؟

والله يا أخي الكريم وجوابا على كلامك أحببت أن أنوه أن عدد طلاب فرع العلوم العامة في مدرسة المنار كان من عدة سنوات يقارب الـ 15 طالب.....وعلى زماني كنا 5 طلاب....والسنة الحالية 3 طلاب.....والسنة القادمة 0 طلاب....واللي بعدها ما بيعاد في ثالث ثانوي واللي بعدها بيسكروا صف الثاني ثانوي....واللي بعدها بيصيرو يسكروا الصفوف بالجملة.....وبعد شي خمس سنسن بس نمر من على الأوتوستراد نقول:"والله بيوم من الأيام كان في مدرسة هون كان اسمها المنار......يااااااه على أيام زمان!!!!"

إن شاء الله ما يصير هيك.....بس الواقع يقول هكذا.....ما هيك يا ماما......خلونا نلحء حالنا أبل ما يصير مستحيل الرجوع إلى الصواب.....

والسلام عليكم

[محمد أحمد الفلو]

والله يا ست سنا ( هيك كنتو تعلمونا نقلكم) أنا بس مشان زيد عالقرايب زاهر شوية معلومات , بعرف إنو كل طلاب القسم الثاني biologie ,كانوا يتعلموا math عند داني اللهم إلا بنت الإستاذ رضوان
لأن ما بيخليا وكل واحد كان يدفع 100 ألف بالشهر لمدة 4 أشهر ( قال رضوان قال) , فشوفي وين صار المستوى . بعد ما كان سنة الي كنتي تعلميني صار في شعبتين ثاني متوسط و شعبتين ثاني ثانوي .
ببس بعدين كبروا بنات ا لمدير وصار لازم يتوظفوا........ وخطبوا ولاد المدير و صار لازم نوظف ولادن.......
وهيك دمر محمد الأول المنار بعد ما دمر هو وصاحبو محمد التاني مدرسة الصبيان...

أما شو الحل فبعتقد انو لازم ي سلموا إدارة المدرسة لمحمد التالت (الأستاذ الشقرة) وإن شاء الله بترجع احلى ما كانت

[HARD]

ولله كلامكم فيه ظلم معقول انتم كنتم بالمنار وحاملين هل الحمل عليها !!!!! انا بعرف انو المنار بتعلم عالم على حسابها .....
وبعدين اين المشكلة اذا تم توظيف الاقارب وهم الاجدر ......
بدي اعرف مين جبركم عليها ... اه جاوب يا اخ هشام ويا اخ محمد ويا اخ زاهر والكل .....،
ولله شغلة عن جد عيب هل الكلام ليس انتقاد بل مسبات .

[محمد أحمد الفلو]

على حساب وحيد يا حبيبي Hard , مش على حسابا.
وأنا بس عندي سؤال : أحفاد المدير بيتعلموا على حساب مين.

ليك حاج طامر راسك بالرمل .
يعايش بالمنار تتحكي , ي سماع العايشين فيا تتعرف شلازم تحكي.

[HARD]

ليك انت على راسي ....
بس انت ما رديت جواب على الاستفسار السابق
وما ادراك بما اعلم عن المنار ...
ومن قال اني لازم كون بالمنار حتى احكم ....
وبعدين انا كنت بالمنار يعني ما تواخذني لفترة معينة ....
وانا لو لم اكن اخي كان اصدقائي وغير هيك المشاكل تتنقل والجميع يعلم بها ويناقشها ان كنت بالمنار او خارجها

[محمد أحمد الفلو]

أبي سجلني لما كان عمري 3 سنين بالمنار ....
كنت إبكي حتى ما يبعتوني عالمدرسة بس جبروني متل كتار غيري...
يلا خالف تعرف
سلام

[HARD]

انت تريد ان تقول لي ان والدك غصبك بالمدرسة حتى القسم الثاني وانت عايش بهذا الهم .... اخي يعني ارجو ان المقصود قد وصل........
ولماذا انتقلت بعد ما صار ماصار......... انت تعلم ...
المهم ليس لي علاقة بهذا الكلام بس انا اريد منك ان تكون موضوعي بالانتقاد وعدم التجريح بالاشخاص ، انتقد ولكن لا تجرح مع تشديد الراء، اخي انا انزعجت من الكلام فما بالك بـ......

[الزاهر]

أنا بس مشان زيد عالقرايب زاهر شوية معلومات , بعرف إنو كل طلاب القسم الثاني biologie ,كانوا يتعلموا math عند داني اللهم إلا بنت الإستاذ رضوان
لأن ما بيخليا وكل واحد كان يدفع 100 ألف بالشهر لمدة 4 أشهر ( قال رضوان قال) ,

وأنا كمان يا قرايب منشان زيد عليكم معلومات......كان الأستاذ رضوان بس حدا يجيب علامة حلوة بيشوف حالو أد السما....ما عارف إنو "كل" تلاميذ الثالث ثانوي (باستثناء ميرا طوط وزاهر حليحل) هم تلاميذ للأستاذ داني القص......كل طلاب الثالث ثانوي.....وليس جزء كبير...طالبين ما بيعملو شي......
يالله إذا بدنا نضل نذكر السلبيات ما منخلص لبعد بكرة
بس أنا من الناحية الأخرى أقول (ولأول مرة) أن الأساتذة في مدرسة المنار هم من أعظم الناس الذين عرفتهم أو سأعرفهم......من مثل الماما سنا طوط.....الأستاذ أنس الحاج.....الأستاذ سمير الحج.....الأستاذ سامح الأبيض.....الأستاذ وليد الكوسا....الأستاذ نعيم طوط.....الأستاذة كسن......ولك واللائحة كبيرة كتير....بس أكيد يوجد بعض استثنائات....ما حابب أذكر أسماء لأن الأصة هون بتصير صعبة......

يالله بدنا نفكر بالحلول من هلأ وبالرايح.....ما بئا رح إحكي سلبيات وأرجو من الجميع تخطيها....لكي تصبح مدرسة المنار مخرجة أجيال إسلامية ولو بعد 10 سنين.....

السلام عليكم

[HARD]

الان نحن على الطريق الصحيح ..............

[الزاهر]

شو قصدك خيي؟؟؟!!!!

بنزل عالشارح بدعس عالم ها........عم إمزح!!

لكن يا أخي الكريم ألا يعد ذكر السلبيات النصف الأيمن من الطريق الصحيح.....يعني بس منؤول إنو في مشكلة وصلى الله وبارك........يا خيي ذكرنا وفصلنا بالسلبيات وقلنا وفرغنا قلبنا بالإيجابيات.....وبقي علينا الحلول، لكي نمحو تلك الغبرات عن هذه الـ(بلا ما نؤولها أحسن) لحتى تصير مدرسة بيوم من الأيام......يالله خيي، اليوم إجت الكهربا بالضيعة. بركدن نسمعلنا شي كم كلمة من الماما.....(ما تؤول لحدا بس هي على طول عم تراقب.....ما هي قالت مخابرات........لووووووول!)

السلام عليكم

[HARD]

انا ناطر الحلول تشوف هل هدفكم الاصلاح ام الاعتراض بس ........

[nour]

أشكر كلّ من شارك في الموضوع.
لو كنت أنا الناقدة ، لانتقدت ربما بطريقة ألطف. لكن برأيي : أن نمتلك الجرأة على النقد -ولو بصورة قاسية أحياناً- خير من أن نظلّ صامتين. ورحم الله امرئاً أهدى إليّ معايبي.
إخوتي:
حلم هو أن تكون لدينا مؤسسات حقيقية.
أجل. القضية هذه بالذات لا تخصّ المنار، بل بلداننا كلها كذلك ومؤسساتنا وأحزابنا يتم توريثها.
وليس هنالك مستحيل إن وجد الإخلاص والعزم.
أما التراشق فغير مفيد.
دعوني أخبركم أنه لن يكون هناك موظف_غير بنات الأستاذ محمد طوط- يرضى بالعمل يومياً ست إلى سبع ساعات ثم يحمل معه أعمالاً إلى البيت وهو يقبض الحدّ الأدنى للأجور أو أكثر قليلاً.
وعني أنا أقول: إني ربما كنت المعلمة الوحيدة التي اجتازت امتحان دخول في المنار وظللت أتلقى راتباً ضئيلاً(لأني غير مثبتة وتحت التجربة) عامين كاملين ، مع أن أستاذي:د. أحمد الحمصي زكّاني عند أبي وقال له: لا تجد مثلها. أفضل من أساتذة الجامعة.
يا إخوان
من العدل أن ننظر إلى الأمور بشمولية.
نعم ثمة مشكلة ولكن ليست هي وجود أقرباء المدير في المدرسة، فكل المدارس والمؤسسات يعطى الأقارب الأفضلية فيها.
المشكلة هي في عدم وجود نظام إداري.
والآن _كما قال زاهر _لنتوقف عن النقد قليلاً فقد انكشفت المحاسن والعيوب، ولنقترح الحل:
وها أنا أقترح حلاً:
لجنة خرّيجي المنار.
وفقاً للقوانين هذه اللجنة هي جمعية، وتملك صلاحيات جيدة للإصلاح.
فيا خريجي المنار ، هيا بادروا إلى تأسيس هذه اللجنة ونحن (المعلمون)معكم . وقد بذلنا جهداً طيباً في هذه السبيل فأكملوه .
هكذا يكون الإصلاح.

[الزاهر]

منذ قليل عندما قرأ صديقي هذه الردود قال لي:
"بيكفينا ياللي ذقناه من مدرسة المنار..........تحطمنا كفاية وما بئا مستعدين نعمل جمعيات للمنار.....والست سنا ما في أحسن منها وما في أدها منيحة....بس يا ضيعان هيك مدرسة بهيك معلمة....."



هاد مو كلامي ها.....كلام خريج منار.....طلع الكل من رأيي
السلام عليكم

[محمد أحمد الفلو]

يقول المثل مشروعان لا يخسران : المسشفى والمدرسة.
إن جميع المشاركات تدور حول تبرير فشل مدرسة المنا ر هو أنها تسجل عددا من الطلاب مجانا.
ألم تكن هذه الحال هي ذاتها عندما كانت المدرسة في أوجها العلمي ???

فما الذي تغير حتى وصلت المدرسة الى هذا المستوى اليوم?
الله أعلم لأن جميع المعاملات واكشوفات لا يعلم أحد عنها شيئا الا الله
بالنسبة لاقتراحك يا آنسة سنا.
لقد قام كثير من الإخوة الذين كانوا تابعين لكشاف عباد الرحمن بإثارة الموضوع مع مسؤولي الجماعة مرات عديدة , ولكن في كل مرة يمنع النقاش من ان يستمر تحت ذرائع عديدة.
من اجل ذلك فإني لا أجد الا حلا واحدا للمشكلة .
تغيير المدير ... وبأسرع ما يمكن.
والسلام.

[فشلان]

آ والله اليوم اكتشفت إنو مدرسة المنار مبهدلة.. وما بتستاهل إنو تكون حرف الميم من المدرسة..
شو هالمدرسة المبهدلة... والله لو إنها مدرسة محترمة وبتحترم حالها.. ما كانت بتخرج تلميذ مثل حميطون.. إسا لهلأ ما بيعرف الفرق بين آنسة وسيدة..

يا سيدي يا حميطون... معقولة منك.. تقول للماما نور آنسة.... والله شغلة إنت.... الماما سنا الله يحميها ويحفظها ويزدلها في الذرية الصالحة... عندها شرشور ولاد... بتعرف شو معناتا عندها ولاد؟؟؟؟؟ قال آنسة قال... ولأ والحلو فيه عم يناقش... ويعطي آراء... ولك هادي ما بدها دوووووووووووووووع وبس...

هادي بدها لوووووووووووووووووووووووووووووووووووول
وبخخخخخخخخخخخخخخخخخخخخخخخخخخخخخخخخخخخخخخخ
ودوووووووووووووووووووووووووووووووووووووووع
ودوععععععععععععععععععععععععععععععععععععععععععععععع ع
وفششششششششششششششششششششششششششششش
وما بعرف شو كمان.... قال آنسة سنا..... هههههههههههههههههههههههههههههههههه

[nour]

لا لا . مطلقاً لم أقل إن سبب أزمة المنار هو تسجيلها طلاباً مجاناً. بل طلبنا البحث عن المشكلة. والحقيقة مشكلتنا هي مشكلة المدارس الخاصة عموماً (المادية يعني) بس نحن أزود شوي.
وما في أي مبرر نسدّ آذاننا أو نغمض عيوننا. لأن ما في مشكلة من دون حل.

[محمد أحمد الفلو]

يا فشلان بهدلتنا,
بس ما سمعتنا رأيك بالموضوع.

ليش أصلا حدا عارف بآ شو هو الهدف من وجود مدرسة المنار: تربوي والا ديني ?

اذا كان تربوي فليش تخلت عمن كان لهم الفضل في تألقها قبل سنين ( حبيب حليحل, أحمد الفلو , جمانة كسن,محمد حكم.........) ?
والا ديني فليش صار مسموح دخول المعلمات بتياب مثيرة ( تذكروا تياب معلمات الإنكليزي) , كمان ليش صار مسموح يكون فيا أساتذة نصارى,ومديرها الإسمي بيتمسخر الدين علنا بالصف وهلأ صار أبضاي بيمضي بالصف على حملة فل ضد لحود, وصار مبنى المدرسة ممنوع على معهد القرآن بس مسموح لتيار المستقبل يعمل إجتماعاتو فيا.

لازم نعرف شو هو الهدف من أفواه القيمين.

[الزاهر]

السلام عليكم

يا إخوان ماني حابب إرجع عن كلامي....بس شو بدي إعمل.....بس يدخل حدا من آل فلو عالخط بتئوم الدنية.........عم إمزح ها....

القصة وما فيها:
لا مشكلة أن يوظف المدير أقاربه ....ولك ما يوظف غيرهم إذا كانو أهل للمهمة.....لكن المشكلة أن كل الهم حاليا "مصلحة الأهل" وليس مصلحة الطلاب.....بس تصير مصلحة الطلاب الأهم بترجع المنار متل الأول وأحسن.......بس معك حأ أخي محمد
يعني يُطرد ماجد جراد ......ويئتى بـ أنطوان فرح........حلوة كتييييير والله!!
والأحلى من هيك هاداك كان ضابط المدرسة وعاملها إسلامية على الأصول وهاد التاني بيوزع كتب بالصفوف والإدارة آخر من يعلم....يمكن لحد هلأ ما عارفين بالأصة اللي صارت معنا بالسابق......

يالله فات إبن فلو عالخط وغمرنا بالـ Tesion وصرنا عصبية متلو......
بس إن شاء الله رح نرجع للحلول......وتذكري يا ماما كلام ذاك الـ"خرّيج" ولتعلمي أن كثيرا ممن تخرج من المنار من رأيه ونظرتهم كنظرته....وأنا بعرف إنك كريمة ومن صفنا نحن المظلومين...بس شو بدنا نعمل .....حسّون عنجد بيطلع الخلاء....خاصة وأت بيبكي ساعة تحت شباكي وئت بدي نام....وعلى شو؟!......عالئ مع بنت وعم يشدلها بشعرها وهي نازلة فيه لبيط.........لووووووووول!!!!

السلام عليكم

[محمد الكوسا]

السلام عليكم ورحمة الله وبركاته
في البداية رأيت انكم مخطئون في تسمية مدرسة المنار وبرأيي أن الأسم الصحيح لما يسمى(مدرسة المنار الأسلامية) هو مقهى المنار الكاثوليكي فقد تعلمت فيها 14 عاما تمنيت ان أرى الدين فيها خارج حصة الدين اوفي الملعب او في الصف مثلا فبعض الشباب في ملاعب البنات إلا ان الناظرة غير فاضية لهم لأن هناك بعض الأولاد يركضون او يرمون الأوراق علىالأرض وهذا اهم بنظر الناظرة و بالطبع القوانين لا تمشي على ابناء الأسرة الحاكمة(ال طوط) ولهذا برزت تسمية جديدة لهذه الزريبة إسمها إمبراطورية ال طوط( ل ا)

[HARD]

ولله انا محتار اين هي الحلول ، الواحد بفوت وببلش بهدلة.... يعني الجميع بهدل وقلنا نريد حلول... بس الكل قطب ...... مارح كفي لاني فعلا مزعوج من كلام هدفه بس التشهير وليس فيه نتفة من نصيحة او من هدف الا تفريغ الحقد الدفين لا تواخذوني انا لو كنت بدل المشرف كنت حطيت حد لهل المهزلة فعلا مهزلة بس ماحدا الو عين عم يحكي وقت الواحد يسمع اتهامات بالفساد او مسبات لزم عليه الرد او طلب من المشرف حذف هيك كلام بس ان يتم التجاهل من الجميع فعلا لا يوجد قانون امر بهذا ..............................

[الزاهر]

ولله انا محتار اين هي الحلول ، الواحد بفوت وببلش بهدلة.... يعني الجميع بهدل وقلنا نريد حلول... بس الكل قطب ...... مارح كفي لاني فعلا مزعوج من كلام هدفه بس التشهير وليس فيه نتفة من نصيحة او من هدف الا تفريغ الحقد الدفين لا تواخذوني انا لو كنت بدل المشرف كنت حطيت حد لهل المهزلة فعلا مهزلة بس ماحدا الو عين عم يحكي وقت الواحد يسمع اتهامات بالفساد او مسبات لزم عليه الرد او طلب من المشرف حذف هيك كلام بس ان يتم التجاهل من الجميع فعلا لا يوجد قانون امر بهذا ..............................

يا أخي ما الحل موجود من ست أشهر
ما الماما قالت:" ثمة مشكلة إدارية. نعم. المشكلة أن المدرسة محتاجة إلى لجنة إدارية لا إلى مدير. ليكون العمل مؤسساتياً حقاً . لجنة كل فرد منها يضطلع بمسؤوليات محدّدة ، وفق أنظمة محدّدة ، وتتكامل في التشاور واللقاءات الدورية.
فهل تعتقدون أولاً أنّ المنار قد عرفت إداريين أكفاء؟ من هم؟
سنعالج قضية الهيئة التعليمية لاحقاً . لنبدأ مع الإدارة."

هلأ صار لازم نحكي كيف نطبق هذه الحلول

التطبيق يأتي من الأعلى، من جماعة عباد الرحمن المسؤولة (على أساس) عن المدرسة.......فبدل أن نطلب من الموجود حاليا أن يتغير يجب أن نضغط على الجماعة فقط........ما بئا معي وئت فصّل عذرا....بدي لحأ المحاضرو بالجامعة

السلام عليكم

[HARD]

ولك ليش هل اللف ودوران هي قالت انت لم تقل هي قالت يوجد لدي فكرة واقصد لجنة الخرجين وانت نقلت الكفر عن واحد كما قلت وتريد ان تسمع منكم حل وانتم والبهدلة اخوة يعني اولا يجب سحب كل الكلام اللذي قيل وهو ليس بمكانه ثانيا اذا معتبر انو وصلت للحل خلص اطلب من المشرف ان يقفل الموضوع وبلا ما يدخل واحد بعد شهر وبلش بهدلة على العالم ..... اه روح الله معك الله يستر من هيك عالم .......

[الزاهر]

وأخيرا ولأول مرة رح إحكي بكل جدية يا أخي العزيز....وخليها بلا تلوين أحسن.

يا خيي ألنا بيجينا البكس بس تجي عالضيعة آم الهيئة بعتو Fedex .......يا أخي بدون ما أقلل من احترام الماما أريد أن أقول لك أن بعض أفكارها تأتي من كوكب.....لا بل من كون آخر.....غير الكون الذي يعيش فيه البشر والملائكة وووووو......
منذ متى كانت القلمون وأهل القلمون يعترفون برأي الآخر.....ما صرلنا يومين نحترم الآخر ونعترف بوجوده......القصة مش هينة يا أخي الكريم.....أنا لا أحب الإفتراض لكن افترض وتخيل معي.....لو أنني ترأست اللجنة (لجنة الخريجين) ونظمنا اعتصاما أمام مدرسة المنار....ما أول ردة فعل برأيك......بيجيبولنا الدرك وبيسحبونا عالحبوس ومنطلع إرهابيين متل الـ 200 شخص المعترين اللي سحبوهم من الجامعة ومن برات الجامعة بتهمة الإرهاب وشنطلوهم عالمحاكم العسكرية.....يا أخي أول الله....بيطلعوا علينا بالكلاشنات....أليل ما كان فيها أسلحة المنار.....
والله الأصة مش هينة......مدراء المدارس التبشيرية كانو يطسوهم التلامذة بالكاتشاب والبيض الني آخر يوم بالمدرسة وكان المدير ينبسط أد الدنية لأن التلاميذ عم تعبر عن نفسها....عندنا إذا حاولت ترسم عاللوح بيطلع المدير بفرمان فيك بيجيب آخرتك.....يا أخي وين عاييش.....إنت كنت عصفور حر ....ما بتعرف مرارة القفص....ما بتعرف مرارة الجلاد.....عايش عالكيري والزهورات طول عمرك....نحنا كنا عايشين بالقهر والظلم.....وكدليل على كلامي هاد الأخ الباشا تسجل بالمنتدى خصوصي منشان يعبر عن نفسو بعد ما طلع من المنار.....يا أخي ما بدنا نغير الأشخاص...خليهم عالكرسي لحتى يموتوا ويورثوا الكرسي لأبنائهم......لكن نحن نسعى لتغيير ما في داخل هذه الأشخاص.....وهذا يحتاج إلى وقت وجهد......وقبل كل شيئ إلى الرئس المنظم المدبر....
فيا أهلا بلجنة الخريجين لكن أنا أدعو الماما سنا تترأسها وتضع أسسها لفترة انتقالية ومن ثم تنقل صلاحياتها إلى أحد الأعضاء الكفئ.....ويكون لنا اجتماعات دورية تجتمع فيها الجمعية العامة وتتخذ القرارات .....وأنا مستعد أن أنظم أكبر اعتصام سلمي عندها.....رح دبر 5000 شخص يشاركوا بالإعتصام......بس بدنا قيادة للجمعية العامة للمناقشات الأولية ووضع الأهداف والسبل لتحقيقها.....وهذا يحتاج إلى خبرة واطلاع أكثر مما نملك وإلى نظرة حكيمة ممن هو أعلم منا....

يالله يا ماما هل تقبلين ترأس الجمعية العامة أو ترشحين أحدا لها.....مبدئيا ولفترة انتقالية.....ثنم ننتقل للأفعال....شو غاندي أحسن مننا.....ليش أهدافو أشرف من أهدافنا......يالله اتكلوا على الله وهو الميسر لما فيه الخير........

[nour]

صبراً إخوتي.
أريد أن أضيف أن النقد غير التشهير. وأننا عندما نرفع أصواتنا ونتظلّم لا يجعلنا ذلك على حق. فالطبل إنما يقرع من فراغ.
لذلك أرجو من أبنائي وإخوتي أن يحسنوا النقد ويدخلوا البيوت من أبوابها . فلا يتكلّموا فيما لم يحيطوا به علماً.
كمان من مشاكلنا بالقلمون إنو كلّ خبرية بتنتشر بيظنوا الناس إنها حقيقة.
في ناس موتورين. وللأسف أكثر الموتورين هم الناس الأكثر استفادة من المنار.
يا إخوة شويّة وفاء.
يعني سنوات ترافق البرغش فتألفه.
قال المتنبي وصدق:
خلقت ألوفاً نلو رجعت إلى الصبا لفارقت شيبي موجع القلب باكيا.
في مشكلة. نعم.
في أخطاء نعم.
في كفر؟ لا.
ومهمة جمعية الخريجين مش الإعتصامات . مهمتها تحسين وضع المدرسة . لأن بالنهاية لو ما في غلط ما في داعي للإصلاح والمصلحين ولا للأنبياء يا شباب.
والغلط من سنن الحياة
وكمان من السنن تصحيحه.
أما إنو نرمي الكرة دائماً بملعب الآخرين ونطلع نحنا مش غلطانين ولا مرة ، وما علينا ولا مسؤولية. فهذا ليس دأب المسلم الناصح.
وقولة الشيخ العودة: هذه مشكلات تسبّب بها من قبلنا وسيحلّها من بعدنا.
فأين دورنا نحن؟ ومتى يحدث الإصلاح إن كنا نتقاذف الكرة؟ .

[HARD]

هل تريد العد من فوق لتحت ام من تحت لفوق

[محمد أحمد الفلو]

مدري ليش حاسس إنو السث سنا عم تمني حدا بفضل المنار عليه.
والله المنار مفضله علينا مش بس بمدرستا , بكشافا كمان.
على كل حال.
يا ست سنا, سمعيني منيح.
رح إحكيلك عن سيناريو شبيه بوضع المدرسة هو وضع كشاف عباد الرحمن .
كان الكشاف بلش يتراجع دورو كتير خصوصا بسبب سفر الشباب أو بسبب دراستن ببيروت, ولما الشباب عملوا لجنة إصلاح وصار ينعمل قرارات بالشورى , قال واحد من ال 3 محمدات : ( شوا يا أخ خالد , جاية تعمل ديمقراطية !!!!!!) .
وبعد بسنة حلوا الكشاف بحجة تصرفات ولادية من بعض الشباب ( كنت أنا منن )واستغلوها العبادا, وراح الصالح ( أحمد الشقرة كان بالسعودية , وخالد ا لفلو كان بالتجنيد......
) بحجة الطالح , وقال ما بترجعوا إلا بدورة تأهيل وامتحان بعدا.
فمن وقتا تشكلت قناعة إنو دورك بعباد الرحمن بينتهي لما تبلش تفكر.

فهل يا ترى ازا طلبت لجنة متل يلي عم تقترحيا لقاء مع مجلس إدارة العباد , مش بس مشان اصلاح المدرسة كمان مشان الكشاف بيلتقوا فيا , والا بيقولوا : كلو تمام, والا بيقولوا منو شغلكن!!!!!!!!
سألي الأستاذ والدك ا زا بيوافقك واللجنة جاهزه ليوم قبل بكرا , وعندا أفكار, وبتعجبك.

وينو أبو معروف مبيطل عالمنتدى ??

[الريس]

أنا بدي اعرف ، ليش ما عاجبتكم المنار ، انو كيف بدكم ياها تكون يعني ؟؟؟؟؟؟؟

الحلو انو احنا منحكي ومنقول اسلام مؤسسات ، بس بدنا مؤسسات ملائكية ما بتغلط ، واذا غلطت مننسى كل شي عندها منيح .

عيب عليكم ، ستحو عدمّكم بقا ، وخلونا نفكر كيف بدنا نعمل اسلام مؤسسات في القلمون ، قولة الشيخ سلمان .

بس يا حسرة ، بالقلمون صاير عنا فلاسفة وفقهاء ، بكون الواحد اسا ما طلعلوا شعرتين بوجو ، وجايية بدو يحكي على مشاييخ مقضايين عمرهم بالحبوسات .........

اتصوروا شب من الشباب وهو بيعرف حالوا ما في داعي سميه ، بيحكي على الشيخ سلمان ، عنجد عيب عليك ، استحي على طولك بقا ، والا بتصير في عداد المفقودين متل المرحومة أم سفيان .

[فشلان]

مو على أساس تبت يا ريس؟؟؟ ليش بعدك محافظ على الطريقة الجفصة بالحكي...
أنا بتمنى عليك وعلى الكل إنو يحكو بطريقة مهذبة... وما يبلشو قصف وصواريخ... يا أخي رفقاً بالقوارير...

[الريس]

أنا يا خيي ، هذا الزلمة بالذات ما بيخرط مشطي أبدا ، لأنو هو كتيير جفص ، وانت سبق ووجهتلو هذا الكلام ، بس هو ما بدو يقتنع ، ما رح اذكر اسمو لأن هو عرف حالوا ، بس عنجد عيب عليه ، عم يحكي على العلماء .

[محمد أحمد الفلو]

أحلى شي لما كل واحد بيعمل حالوا شو آدمي وبيبيض وج.
الله يعينا عليكم.
أنا إقترحت عالست سنا تسأل والدا إزا بيستأبل اللجنة.
ولك وتكون من تأليفا وهي رئيستا.
و أعضاءها من تلاميزا كمان(أكيد بدون وسيم غنوم:d).
بس كلشي حكيتوا قصص زيادة , مشان نعرف من وين بدا اللجنة المقترحة تبلش, أحسن ما تختلف اللجنة مع بعضا قبل ما توصل عند الإدارة .

[الزاهر]

أعتذر لأن الرد السابق صدر ناقصا وهذا التعديل:
ما دمنا نتفق أن المشكلة قائمة ومستمرة على الأقل إلى الآن
وبما أنا متفقون على أن أخطاء ترتكب
وأن الجمعية ليست للإعتصامات بل لتصليح وضع المدرسة
وأن أساس المشكلة هو الإدارة في فعلها الإداري بشكل عام.......
لماذ لا نتفق على الحل وننهي الموضوع عندما نجد السبيل لها الحل (السبيل العملي)؟!
هل الحل بتغيير الطاقم الإداري؟
هل الحل بلجنة إدرية؟
هل الحل بجمعية لن يكون لها صلاحية لقول "لا"؟
هل الحل بإقناع الطلاب أننا بأفضل حال والأمور على ما يرام؟
هل الحل بعرض وجهة نظرنا على الأساتذة وهم بدورهم إن اقتنعوا معنا يكونون العنصر الحل حيث يقومون بالضغط على الإدارة لكي تغير أسلوبها؟
هل الحل بتحريض الطلاب على العصيان؟
هل الحل بالتفجيرات والتهديد؟

أنا برأيي المتواضع أن الحل هو الخامس......فما رأيكم؟!!
وهنا أحب أن أنبه بأني لا أرمي الكرة على طرف آخر.....بل أنا بكل بساطة أطرح مسودة مسودة لمسودة حل ممكن أن "ينجح" ......يعني كقصة صغيرة: عندما لم يقبل أحد الطلاب في أحد المدارس الإسلامية مع أنه نال علامة تخوله دخولها بكل بساطة، اعترض أحد الأساتذة المتعاقدين وصاحب تأثير في المدرسة على هذا القرار المجحف. وبين ليلة وضحاها دخل هذا الطالب المسكين المدرسة وأكمل بها.....يعني عندما يعترض "أستاذ" على الإدارة بالطبع الوضع مختلف من أن يعترض "تلميذ" (طاولة) على الإدارة......فالتلميذ (عندنا) دائما على باطل....والجلاد (الأستاذ أو المدير أو الناظر) دائما على حق!!!!
وما العيب أن يساعد الأساتذة اللجنة في الحل؟!

أما بالنسبة لما ورد من تعليقات أخيرة من قبل الإخوان الأكارم فقد لفتني رد الأخ الريس....سامحني يا أخي الكريم......لكن ألم تقرأ الموضوع من أوله؟!.....من قال أننا نريد المنار ملائكية ....ألم نقل أنها أخطأت وقلنا أنها أصابت بعض الأحيان....وقلنا أن فيها خيرا إلى يوم القيامة.....لكن وللأسف نحن لا ندرك أهمية هذا الخير ولا نحافظ عليه كما يجب....بل بالعكس نحن نهدره بكل الطرق وبدون أن تعقصنا برغشة (نحس).....

ويا أخي وأرايبي محمد....ألا توافقني بأن من اقترح اللجنة من المفروض به أن ينورنا إلى أهدافها وطرق عملها....لأني بصراحة لا أراها حلا ذو نفع ، على الأقل في هذه الظروف....مع أنه بدا سابقا أنني أوافق عليها.
وأيضا أريد أن أسأل: وفق أي قوانين تحدد صلاحيات الجمعية.....أليس من المفروض أن تكون الجمعية "جمعية قدماء خريجي المنار" حيث هؤلاء كلمتهم معتد بها ولها تأثيرها....أما إذا بدك شخص ما عمرو 26 سنة يكون مثلا رئيس الجمعية آه هاد المدير شايفو صرصور ما صرلو عم ينخبز بالحياة أكتر من كم شهر....لا أقصد الأستاذ محمد بل المدير بشكل عام....
ولنفترض أن الجمعية تألفت واستطاعت أن تكسب نفوذا واسعا عند الرأس الكبير (جماعة العباد) وأنها وصلت إلى نتيجة تقول بأن الحل بتغيير الإدارة (مجرد افتراض) من سيكون المدير الجديد يا ترى.....وعلى أي أساس يتم اختياره.....هل على أساس المصالح المحسوبيات أم تجرى مباراة بين مرشحين......ألن يكون فريق المرشحين عندها فريق واحد : مهما يكن من فاز فالمسيّر هو واحد.....

إن شاء الله تجي الكهربا بالضيعة لحتا نوصل لحل قريبا......
السلام عليكم

[Luna]

بس عندي كلمتين بدي قولهم .. زعلتو أو رضيتو .. المعروف انو أهل القلمون لئيمين الا من رحم ربي .. وفهمكم كفاية !!
فما في داعي تعذبي نفسك يا أستاذة نور .. ذيل الكلب عمره ما بيتعدل (على قولة المصريين) .. وآسفة للكلمة ..
سلام

[الريس]

يا luna حابب قللك كلمة ، زعلتي أو رضيتي ما بهمني ، قيك تفهميلنا مين اللئيم ، آههههه ، ما حدا نكر انو المنار عندها أفضال و..... بس هل المطلوب منا اننا نسكر تمامنا عن أخطائها ، وما نعيد نحكي وانضلنا مسكرين بوازنا بحجة انو عندهم كم شغلة منيحة ، يا لونا شي هالمنطق الأعوج تبعك ، سميتيلي بدني .

[Luna]

[quote=الريس;10074]يا luna حابب قللك كلمة ، زعلتي أو رضيتي ما بهمني ،

ما عندي مشكلة انك تقلدني .. الناس عادة بيقلدو الكبار لووول

قيك تفهميلنا مين اللئيم ، آههههه ،
المتل بيقول (ان اللبيب من الاشارة يفهم) !! ... بعدين انتو ليش بتحكو بمواضيع أكبر من عمركم وعارفين انكم ما راح تفهموها ؟! أو المهم تحكو وبس

ما حدا نكر انو المنار عندها أفضال و..... بس هل المطلوب منا اننا نسكر تمامنا عن أخطائها ، وما نعيد نحكي وانضلنا مسكرين بوازنا بحجة انو عندهم كم شغلة منيحة ،

لأ أوعا ... بس يا ريت تفتحو تمامكم (أو بوازكم) الحلوين عالغريب ... حاج بقا عندكم عقدة كل شي اسمو غريب

يا لونا شي هالمنطق الأعوج تبعك ، سميتيلي بدني

سميتلك بدنك ؟! سلامة بدنك الرقيق
بعدين هادا المطلوب ... وسلامتكم

[الريس]

على كل يا أختي لونا شكلو كلامك مهضوم ، بس انت شو بعرفك فيني ، واذا أنا صغير أو لأ ، وبعدين ليش هيك فارزين المواضيع على الصغار والكبار ، أنا بعرف انو من زمان كان الشب يلي عمروا 16 سنة بقود جيش أحيانا ، وبهلإيام بصير الواحد أدد الهرش وممنوع يقول انو بيت طوط غلطوا أو فلان أو علتان .

بعدين مين قال انو ما نفتح بوازنا على الغريب ، يعني مين قال انو الخطأ يلي برات القلمون ما عم نحكي فيه .

على فكرة كلامك كتيير مهضوم ، وحسيت حالي مذنب لأني حكيت معك بطريقة فظة ، أنا بعرفك شي يا أختي ، اذا ما عندك مانع عرفينا عن حالك

[Luna]

[quote=الريس;10077]على كل يا أختي لونا شكلو كلامك مهضوم ، بس انت شو بعرفك فيني ، واذا أنا صغير أو لأ ، وبعدين ليش هيك فارزين المواضيع على الصغار والكبار ، أنا بعرف انو من زمان كان الشب يلي عمروا 16 سنة بقود جيش أحيانا ، وبهلإيام بصير الواحد أدد الهرش وممنوع يقول انو بيت طوط غلطوا أو فلان أو علتان .

(آثاركم تدل عليكم) ... وأظن انوانت كتابتك بتدل على هالشي

بعدين مين قال انو ما نفتح بوازنا على الغريب ، يعني مين قال انو الخطأ يلي برات القلمون ما عم نحكي فيه .

ما شفت أو سمعت انو حدا فتح (بوزو) عالبلمند ... وكيف انو أستاذ أو معلمة الرياضيات ( تخيل !!) وما بدي قول العلوم (يمكن لأنو العلوم شي طبيعي .. نوعا ما) بيحكو للطلاب كلمات بايحاءات جنسية والأهل بيسمعو وبيبتسمو لأنو ابنهم أو بنتهم بالبلمند ... وبتحب تعرف بأي صفوف بيصير هالحكي .. من صف سادس وسابع !!!!!!!!!!!!!!!!!!

على فكرة كلامك كتيير مهضوم ، وحسيت حالي مذنب لأني حكيت معك بطريقة فظة ، أنا بعرفك شي يا أختي ، اذا ما عندك مانع عرفينا عن حالك

بتعرفني ؟! ما بظن .. وكمان بظن انك ما راح تعرفني
كلو ولا ينسم بدنك ... لووول

[أم سفيان]

أهلا بالأخت لونا
كيف تريدينا أن نشهد على أمر لا علم لنا به فجميع من انتقد المدرسة كان من طلابها ولم يكن من طلاب البلمند