ألفاظ بديعة من القرآن الكريم تجري مجرى المثل

[جابر دملوك]

ألفاظ بديعة من القرآن الكريم تجري مَجْرَى المَثَل

[جابر دملوك]

زبون العوافه حمل حالو من بكير و راح لعند اللحام و وصى ع السودا و ألو بُبْآَ بمرؤ عليك و باخُدُن.
مرئت ساعا ساعتين تلاتا و لك رح يصير الضهر و حضرتو ما شرف.
أُرْب الضهر بيمرُؤ واحد لعند اللحام و بيؤلَّو :
" مِنْشَان السودات هلي وصاك عليُّون فلان لفلاني بيؤلَّك إنو نشغل كتير و ما عاوِد في يمرؤ عليك ف تصرف فِيون بمعرفتك."
اللحام بيعصب و بيبلش يسب و يكرفت ع الزلمه هلي وصلو الخبر
و هاداك خْطَيه مالو علاآ بالموضوع لا وصى ع سودا و يمكن ما بيكل سودا بالمرا
بس صدفت إنو ماريئ من هاك الزاروبه ف ألَّو وصلي هالخبر .
ألَّو : " يا أخي صطفل منك لُووو أنا مالي علاآ لا فيك و لا فيي أنا كل هلي عليَّي إني وصلتلك الخبر.
( و ما عَلَى الرَّسُولِ إِلاَّ الْبَلاَغُ ) "

[جابر دملوك]

كم مَرَّا بتلائَي تنَين عم يتآتلوا مع بعضُن
ف بآ واحد منن بياخُدا من أَصِيرا و بيؤلَّو ل التاني :
" ( وَإِذَا خَاطَبَهُمُ الْجَاهِلُونَ قَالُوا سَلَاماً ) "
أو واحد تالت بيكون ماريئ بيمسك واحد منُن و بيؤلَّو :
" و لك شبك منو هادا مشكلجي و أزعر
( خُذِ الْعَفْوَ وَأْمُرْ بِالْعُرْفِ وَأَعْرِضْ عَنِ الْجَاهِلِينَ ) "

[جابر دملوك]

اديش الواحد منا ما بيعمل شغلات كتيره و بيأنع حالو إنو منو آدر يعملا بحجة
" ( لاَ يُكَلِّفُ اللّهُ نَفْساً إِلاَّ وُسْعَهَا ) "
و هو آدر يعملا و يعمل أكتر منا بس نفسو والشيطان.
اللهم عافنا و أعف عنا.

[الزاهر]

فإذا نبدل الأمثال آيات من الآن وصاعدا !!! ...



موضوع شيق يا شيخ المنتدى ... شيخ الدماليك .... المعلم جابر !!!

[جابر دملوك]

بالماضي كانوا العالم متجمعين ب الأهوه عم يسمعوا الأخبار
إلا وبيزيعوا إنو ناءلة جنود أسرائيليه بسبب عطل فني أو بسسب الجو وأعت و ماتو كل هلي بألبا
ف واحد من ل كانو عم يسمعوا آل :
" الله أكبر ... الله أكبر ... الله أكبر
وأعوا و ما حدا سما عليون
( وَكَفَى اللَّهُ الْمُؤْمِنِينَ الْقِتَالَ ) "

[جابر دملوك]

الله يطول ب عمرك و يبارك فيك يا زهرة الألمون كُلا
و الله يتئل حضانية زيتون الخضير.

[جابر دملوك]

واحد من الإخوة الطيبين (و لا نزكي على الله أحدا)
نسي جكاتو ب الجامع وأتل ألعا ت يتوضا.
أخونا توضا و صلا و حمل حالو و راح و ع البيت.
و بعد شي نص ساعا ب البيت تزكر إنو كان لابس جكات ف ركب ب هالسيارا و بسرعا ع الجامع.
الجكات كان فيا مبلغ أكبر من المبلغ هلي ضاع من الأرايب عمر ملاط (تنزكر و ما تنعاد يا بو عمير)
وصل ع الجامع فتش نبش ما حضي ب الجكات.
يروح و يجي و يبحبش ما كا يلئي شي.
بدو يسأل و ما في يسأل أيشو الحل رح ينفر الدم من وشو أد ما انزعج.
دلو آعد ب الجامع ت حتى صار وأت الصلا هلي بعدا.
بلشوا العلم يجو ف أخونا صار يبحليئ ب الكل ت يشوف إزا واحد معو الجكات.
صلا و هو و خلص ما بيلائي إلا واحد من الصف الآخراني بيوأف و بيؤل :
" إزا حدا مضيع شغله يشوفني برات الجامع ت يعرف عنا "
أخونا رجعتلو روحو ف لحيئ الزلمه و ألو إني نسيت جكاتي ب محل الوضوء.
الزلمه سألو شلونا و ألو جكاتك معي ف عطي هيه.
أخونا إخد الجكات و بلش يعبط ب الزلمه هلي لإيا و مد إيدو ع الجيبة و سحب 100 دولار و عطيا للزلمه.
الزلمه و حؤ و دينو ما بيرضا ياخد فرك و ألو : " أنا ما عملت أكتر من الواجب "
رد علي و ألو :
" أنا حابب كافآك
( هَلْ جَزَاء الْإِحْسَانِ إِلَّا الْإِحْسَانُ ) "

[جابر دملوك]

أَبْل الإنتخابات
ناس بيأيدو هادا
و ناس بيأيدو هاداك
و ناس لا مع دا و لا مع داك
و ناس تانيين ما بيتخبوا حدا و الكل عندُن خبيصا و مو هامِمُن إلا الكرسي.
بيوم من الإيام و أبل الإنتخابات نْسَأَل واحد من يلي ما بينتخبو حدا
" لش ما بتنتخب هادا ؟ و الله واعدنا إنوا يعملنا كزا و كزا و مبين علي ساديئ مَوْ زعبرجي متل داك."
ألُّن : " هادا أنحس من داك بكم شغلة
و هادك أنحس من هادا بكم شغله
و تنَيْنُن بيوعدوك و تنَيْنُن كزابين
و
( هَيْهَاتَ هَيْهَاتَ لِمَا تُوعَدُونَ ) "

[جابر دملوك]

تنَيْن مارئين من الأهوه بطريؤن ع الجامع سمعو عياط.
ف واحد سأل التاني ألو :
" ع أش بَاللهِ هالجْعِعِعِعِير ؟ و كُلُن جُم بعضن ."
جاوبو و ألَّو :
" يا سيدي هادَول كل يوم عن نفس الموال
كل واحد منن عم يشيد بإنجازات حزبو
و كلن عم يحكو بنفس الوءت و ما حدا عم يسمع لحدا
و الله وكيلك
( كُلُّ حِزْبٍ بِمَا لَدَيْهِمْ فَرِحُون ) "

[جابر دملوك]

بيوم من الإيام كان في 2 رُفْآ راكبين بسيارة و رايحين ع الشغل.
بنُص التَريئ إلا و دولاب من الدواليب بيصير ع الأرض.
الشوفير مِنُن بيعصب و بيبلش يسبسب و يؤل :
" هلأ وأتا ... كيف بدنا نغيرو هلأ و نلحيئ ع الشغل ؟ !!! ... يا الله كيف بتجي المصايب ؟ !!! "
صاحبو بيؤلو : " و لك بسيطا ... طول بالك يا زلمة بتعمل من الحبه أُبه و لك يمكن هالشي لصالحك "
ألو : " كيف يعني "
ألو : " ( وَعَسَى أَن تَكْرَهُواْ شَيْئاً وَهُوَ خَيْرٌ لَّكُمْ ) "
ألو : " ما فهمت يعني ... احْتَرَأ سِلاف الدولاب و صار بدو كَبْ و بتؤلي إني أنا الربحان "
جاوبو و ألو : " أنا ما ألتلك إنك ربحان
أنا ألتلك يمكن يكون بمصلحتك إنو يُفْأع الدولاب ب هالوءت و ب هالمنطآ بالزات
أوم نعجل نغير الدولاب هلأ و بُبْآَ بفهمك ع رواء بس نكَمِّل "
غَيْرُو الدولاب ب ربع ساعا و ركبو ب هالسياره و مشيو ع مِهْلُون لأنو الدولاب هِلِّي حَطو أظغر من الإياس العادي.
ما لِحْؤ مشيو 500 متر إلا و بوليص لاطَي بسيارتو ع المفرأ.
ألو : " فهمت هلأ
شايف لو ما يفأع الدولاب و تنزل تغيرو
كنت رح تمرؤ من إدام البوليص أنت و ماشي بسرعة 100 ع شارع 60 "
" وأكيد كان رح يوءفك و يفأعك بهدلة و ضبط
و كان راسك رح يفأع منو متل ما فأع الدولاب و زيادة
و هِلِّي كاتبو ربك ما فيك تغيرو و لا تهرب منو.
( وَاللَّهُ يَعْلَمُ وَأَنتُمْ لَا تَعْلَمُونَ ) "

[جابر دملوك]

صار وءت الصلا ف صلا الكل إلا صبي من الصبيان ما صلا معن.
الأب سأل وينوا (دَكْرُوج) لش ما صلا معنا.
جاوبت الأم : " بيكون ملَبِص ع الكمبيوتر "
آم الأب و شافو عن جد متل ما آلت الأم ف مَرَأ من جُمِنَو و آلَّو :
" يا عيب الشوم ( فَوَيْلٌ لِّلْمُصَلِّين * الَّذِينَ هُمْ عَن صَلَاتِهِمْ سَاهُونَ )"

جاوبو الإبن : " هلأ بس خلص الدَّأ بؤوم يا بابا "
ألُّو بُووو :
" يا حبيبي ( إِنَّ الصَّلاَةَ كَانَتْ عَلَى الْمُؤْمِنِينَ كِتَاباً مَّوْقُوتاً ) "

[محمد أحمد الفلو]

الحلو إنو بكل قصه في موقف من حدث معين ... والأحلى الموقف
بارك الله بك

[جابر دملوك]

الله يبارك فيكم يا أخي
شاركنا ب شي أصا حلوه
لا بد من حدث هون و هانيك
بس العلآ إنو الواحد أحيان بينسى شغلات كتيرة بتصير معو.
الله يعينا جميعاً

[الزاهر]

بيوم من هالأيام الماطرة، حمل حالو عوكر ونازل لعند أختو زيارة
والدنية طايفة، أيبل عشمسية بهالبيت ولا كان يلائي
شو يامو ... وين الشماسي ... والله ما عنا شماسي يامو غير شمسية مرت أخوك
شو بدو يعمل عوكر ... اتكل عالله وحمل هالشمسية الزهرية ونزل لعند أختو
وبنص هالطريء بيلائي عنكوش راكد تحت هالبلاغين عم يتدرا
بيألو حول اتدرا لوصلك .. بيتطلع فيه .. شحامل ولا .. أنا لي عين اتدرى بشمسية نسوانية !!!
فبيألو عوكر :

﴿ فَمَنِ اضْطُرَّ فِي مَخْمَصَةٍ غَيْرَ مُتَجَانِفٍ لِّإِثْمٍ ۙ فَإِنَّ اللَّهَ غَفُورٌ رَّحِيمٌ ﴾

[مايا]

السلام عليكم ورحمة الله وبركاته
شكرا للاخ جابر على الموضوع القيم وسمحلننا نشارك في من بعد اذنك
هاد بيوم من الايام كانت عوكرة وعنكوشة قاعدين بزاوية وعم يحكو مع بعض بصوت نايس وبتمرق من جنبهم فركوشة بتلاقيهم عم يتوشوشو فبتقلهم :
وَلَا يَغْتَب بَّعْضُكُم بَعْضًا ۚ
فبيردوا عليها تنياتهم بصوت واحد
إِنَّ بَعْضَ الظَّنِّ إِثْمٌ

[جابر دملوك]

الإبن عم يحُل رياضيات يوم الجمعه أبل الصلا بشي 3 ساعات.
و الأم كانت عم تنشر الغسيلات ع البلكون إلا و بِيرِن جرس الباب.
الإبن بِيطِل من الناضور بيلائي مطربية ف بيعيط لأُمَو ل تشوف شبدا تعطيا.
تركت الأم شغلا و بسرعا ركدت ع المطبخ و فتحت الدرفه تحت المجلا
و "دْرِرِرِرِرِج" (صوت ازاز عم يِطَّحْبش)
بيفز الإبن بسِرعا لعند أمو بيلائي الأزاز و الزيت معبي أرض المطبخ بيسألا : " شصار ؟ "
بترد و هي محموآ : " الله يأطع المطاربه من الدنيا "
" و شْلُهَا دخل المطربية ب الزيت و الأزاز لش افتحتيلا الباب إسا "
و ع فكرا شكُنْتِ رايحا تعطيا ؟
" كنت رايحا إعطيا زيتات الأَلِي صار بدون كَبْ و مَنُون لازميلنا بآ "
"هادا كل شي فينا نعطي هالمساكين يا أمي !!!"
" شبدك ياني إعطيا يعني ؟ "
" يا أمي
( وَلاَ تَيَمَّمُواْ الْخَبِيثَ مِنْهُ تُنفِقُونَ وَلَسْتُم بِآخِذِيهِ إِلاَّ أَن تُغْمِضُواْ فِيهِ )
" يعني بدك ياني إعطيا متبئية برما بفستؤ مطفحا تطفيح."
" ما ضروري متبئية معبية ... خرطين مناح.
يا أمي
( لَن تَنَالُواْ الْبِرَّ حَتَّى تُنفِقُواْ مِمَّا تُحِبُّونَ ) "

[hadid]

سلام من أجمل المواضيع يا أبو الدماليك عسى إنو نشاركك بشي قصة عوزن هيدول .....

[جابر دملوك]

أهلا و سهلا ب الأوادم

[جابر دملوك]

2 إخوة عم يتآتلو.
واحد منن بطح التاني ب الأرض و سبتو.
التاني ما عاود في يحرك ساكن.
كل هلي طلع ب إيدو أو ب الأحرى طلع ب لسانو إنو
هدد خووو و ألَّو :
" بتؤم عني و لا بأوم ب دعسك تدعيس "
ف رد علي خووو و ألَّو :
" زكرتني ب فرعون وأتل آل :
( وَقَالَ فِرْعَوْنُ ذَرُونِي أَقْتُلْ مُوسَى وَلْيَدْعُ رَبَّهُ
إِنِّي أَخَافُ أَن يُبَدِّلَ دِينَكُمْ أَوْ أَن يُظْهِرَ فِي الْأَرْضِ الْفَسَاد )
و هو كان طالع ب إيدو أد مَنُو طالع ب إيدك تماماً "

[جابر دملوك]

طِلِع الصبي من البيت من دون ما حدا يعرف.
إِهْلَو ما تركوا حدا إلا و سألُوو عَنَّو.
فَتشوا نَبشوا طِلعوا نِزلوا ... ما لِئْيُولُوا أَسَر.
(فص ملح و داب)
الساعا عشرا ب الليل حَضِرْتُو مشَرِف و جايا.
" شُو وَنْ كان بَطَل دِدِه ؟ " سألو بُوو.
" كنت عند رفِيأَي "
" شكُنت عم تِعمل ؟ "
" حِلَّينا نِتْفِة مَتْ و رجعنا لعِبْنَالنا شوَيِه "
" شوية + شوية = شويتين
بس حضرة جنابك لُوْ بُرَات البيت شي 10 ساعات إزا مَنُو أكتر "
" يعني مَنْكُن مسَدْئِينَي !!! ... سأَلُووو إزا بدكُن "
و اللهِ
" ( سَنَنظُرُ أَصَدَقْتَ أَمْ كُنتَ مِنَ الْكَاذِبِينَ ) "
" هَاتْ أُلْنا أَيَّا رفِيئ كنت عِنْدَو تَ نشُوف "

[الزاهر]

الحمد لله الله كان مريحنا من هالأصص .. لا ليش جاية هلأ ولا وين كنت ولا مع من كنت ولا لوين رايح ولا من يحزنون !!!

[جابر دملوك]

جا المدير فدعوس ع الشغل و جايب معو حزورا و جوابا.
ع الفرصا بلش يسأل الموجودين ب الغرفه.
كل واحد شال ألمو و حك راسو و وأتل طلع معو الجواب آم و وشوش فدعوس.
و فدعوس آعد و حاطط إجر ع إجر و من راس مناخيرو عم يحكي.
كل ما جا لعندو واحد ت يوشوشو ب الجواب يؤلو أنا بنصحك ترجع ع المدرسه و تعاود تبلش من صف الخامس.
لعما رح يتعأدو ما بيصير الحل مظبوط كل واحد منن يؤل لحالو.
يجاوبو فدعوس : " للأسف غلط."
سعدون واحد من الموظفين كان برات المبنى ع الفرصا و ما عرف ب السؤال.
ف واحد من الموظفين ألو للمدير فدعوس :
" لش ما ب تسأل سعدون و أكيد رح يعرف الجواب ب أل من دئيآ "
و الله فدعوس ما كزب خبر.
ف وأتل رجع سعدون من برا راح لعدو ع مكتبو و سألو السؤال و ألو إزا طلع معك جواب بآ شوفني و راح ع مكتبو.
سعدون إري السؤال و بأل من دئيآ كان طالع معو الجواب.
بس دلو آعد و ما راح لعند المدير.
بعد شي ساعتين جا المدير لعندو ما لِئِي ب المكتب كان راح ع الحمام بس لئي الجواب مكتوب ع ورآ ع الطاوله.
رجع سعدون لئي المدير عم يكتبلو جنب الجواب غلط و ستين غلط و لك عدنو كل موظفيني من البالِه الهيآ "
ألو سعدون : " هادا الجواب المظبوط و ما في جواب تاني و هادا هو الحل
و لو جا أَنْشْط ولا أَنْشْطَين ما رح يطلع معن أصح من هالجواب "

و " هَاتُوا بُرْهَانَكُمْ إِن كُنتُمْ صَادِقِينَ "
طلع المدير فدعوس جايب الحزورا و الجواب من الإنترنات و ما بيعرف الحل.

[جابر دملوك]

أخ من الإخوة بينجح ب الجامعا و بيتخرج ف رفآتوو بيباركولوو و بيؤلولوو :
" بس هادي ما رح تمرؤ هيكه ب بلاش ... لازم تحلينا "
أللون : " ن شا الله بعزمكون لعند الحِلاب شي يوم "
بس الشباب ما نسيوا الموضوع صاروا ع الرايح و الجاية يسألوو :
" متى هذا الوعد إن كنتم صادقين "
ف ما يرد عليون و يحاول يغير الموضوع الظاهر ما كان آدر يعزمون.
و وأتل صار معوو مصريات عيطلون و أللووون :
" إنطلقوا إلى ما كنتم به تكذبون "

[flauritta]

[lina k]

من أجمل ما قرأت في هذا المنتدى......
بارك الله بك أخ جابر

بإنتظار المزيد
والسلام عليكم

[جابر دملوك]

و الله هادا إطراء ما كنت إتخيل إنو ينآل لي
و خصوصا إنو في عمالقة بيفشخوا عني ب رياحا
و هنه موجودين الله يبارك ب كل ساحا و كل فن من الفنون.
و إنت واحدة منون.

[جابر دملوك]

ذكـاء شاعـر و دهــاء والي

دخل شاعر على الوالي فأنشده شعراً.
قال الوالي : أطلب ما تشاء. قال الشاعر : هل تعطيني ؟ قال : أجل.
قال : أريد أن تعطيني دنانير بمثل الرقم الذي أذكره في الآيات القرآنية. قال : حبا وكرامة.
قال الشاعر : قال الله تعالى : " إلهكم إله واحد " فأعطاه دينارا.
قال : " ثاني أثنين إذ هما في الغار " فأعطاه دينارين.
قال : " لا تقولوا ثلاثة انتهوا " فأعطاه ثلاثة.
قال : " ولا ثلاثة إلا هو رابعهم "فأعطاه ثلاثة و أربعة.
قال : " ولا خمسة إلا هو سادسهم " فأعطاه خمسة وستة.
قال : " الله الذي خلق سبع سماوات " فأعطاه سبعة.
قال : " ويحمل عرش ربك فوقهم يومئذ ثمانية " فأعطاه ثمانية .
قال : " وكان في المدينة تسعة رهط يفسدون في الأرض " فأعطاه تسعة.
قال : " تلك عشرة كاملة " فأعطاه عشرة.
قال : " إني رأيت أحد عشر كوكبا " فأعطاه أحد عشر.
قال : " إن عدة الشهور عند الله اثنا عشر شهرا في كتاب الله " فأعطاه اثنا عشر.
ثم قال الوالي : أعطوه ضعف ما ذكر واطردوه.
قال الشاعر : لماذا يا مولاي ؟!
قال : خفت أن تقول : " وأرسلناه إلى مائة ألف أو يزيدون "